អាមេរិកអញ្ជើញអ្នកកាសែតបរទេសទៅយកព័ត៌មានបោះឆ្នោត
មជ្ឈមណ្ឌលព័ត៌មានបរទេសនៃក្រសួងការបរទេសអាមេរិកបានរៀបចំកម្មវិធីសម្រាប់អ្នកកាសែតបរទេសដើម្បីពួកគេអាចយកព័ត៌មានក្នុងការបោះឆ្នោតប្រធានាធិបតីអាមេរិក។អ្នកកាសែតបរទេសចំនួន៥០នាក់ ដែលក្នុងនោះក៏មានអ្នកឆ្លើយឆ្លងព័ត៌មានរបស់វិទ្យុបារាំងអន្តរជាតិផងដែរ កំពុងជួបជុំគ្នានៅក្នុងមជ្ឈមណ្ឌលព័ត៌មានបរទេសនៃក្រសួងការបរទេសអាមេរិកដើម្បីសិក្សាអំពីដំណើរការបោះឆ្នោតនៅអាមេរិក។ អ្នកកាសែតទាំងនោះនឹងត្រូវបញ្ជូនទៅធ្វើការនៅតាមបណ្តារដ្ឋសំខាន់ៗរបស់អាមេរិកដែលបេក្ខជនប្រធានាធិបតីទាំងពីរកំពុងធ្វើយុទ្ធនាការឃោសនាបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
អ្នកកាសែតបោះពុម្ព អនឡាញ វិទ្យុ និងទូរទស្សន៍មកពីប្រទេសចំនួន៤៦គ្រប់ជ្រុងនៃពិភពលោកបានកំពុងជួបជុំគ្នានៅក្នុងមជ្ឈមណ្ឌលព័ត៌មានបរទេសនៃក្រសួងការបរទេសអាមេរិកក្នុងទីក្រុងវ៉ាស៊ីនតោនឌីស៊ី។ អ្នកកាសែតទាំង៥០នាក់កំពុងរៀនអំពីដំណើរការបោះឆ្នោតនៅសហរដ្ឋអាមេរិក មុននឹងពួកគេត្រូវចេញទៅធ្វើការនៅតាមអង្គភាពព័ត៌មានរបស់អាមេរិកនៅក្នុងរដ្ឋនានារបស់សហរដ្ឋអាមេរិកនៅថ្ងៃអាទិត្យនេះ។
ការស្ទង់មតិតាមដានប្រជាប្រិយភាពនៃបេក្ខជនប្រធានាធិបតី ការប្រើប្រាស់ថវិកាក្នុងការឃោសនាបោះឆ្នោត តួនាទី និងការទទួលខុសត្រូវរបស់សារព័ត៌មាននៅក្នុងការបោះឆ្នោត ការវិភាគទៅលើប្រជាប្រិយភាពរបស់បេក្ខជនប្រធានាធិបតីទាំងពីរ លោក បារ៉ាក់ អូបាម៉ា និងលោកមីត រ៉ូមនី ទាំងអស់នេះគឺជាកម្មវិធីសិក្សា២ថ្ងៃសម្រាប់អ្នកកាសែតបរទេសទាំង៥០នាក់។
កម្មវិធីនេះរៀបចំដោយមជ្ឈមណ្ឌលអន្តរជាតិសម្រាប់អ្នកកាសែត (International Center for Journalists) ដែលគាំទ្រដោយមជ្ឈមណ្ឌលព័ត៌មានបរទេស (Foreign Press Center) នៃក្រសួងការបរទេសអាមេរិក។ កម្មវិធីនេះមានរយៈពេល១៨ថ្ងៃ ចាប់ពីថ្ងៃទី២៣តុលាដល់ថ្ងៃទី១០វិច្ឆិកា។
លោកPatrick Butler អនុប្រធានមជ្ឈមណ្ឌលអន្តរជាតិសម្រាប់អ្នកកាសែតបានថ្លែងអោយដឹងថា កម្មវិធីនេះនឹងអនុញ្ញាតអោយអ្នកកាសែតបរទេសយល់ និងដកពិសោធន៍អំពីការងាររបស់អ្នកកាសែតអាមេរិកនៅក្នុងការបោះឆ្នោត។ ហើយអ្នកកាសែតបរទេសទាំងនេះនឹងអាចសរសេរអត្ថបទសម្រាប់ស្ថាប័នរបស់ខ្លួនពីសហរដ្ឋអាមេរិកដោយផ្ទាល់តែម្តង។
នៅក្នុងសិក្ខាសាលា២ថ្ងៃ អ្នកជំនាញជាង១០រូបដូចជា អ្នកកាសែត អ្នកស្រាវជ្រាវ និងអ្នកវិភាគត្រូវបានធ្វើមកធ្វើជាវាគ្មិន និងធ្វើបទបង្ហាញជាច្រើនសម្រាប់អ្នកកាសែតបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ