លោក Patrick Devillers ធ្វើសាក្សីក្នុងសំណុំរឿងភរិយាលោកប៉ូ ស៊ីឡៃ
ជាហេតុការណ៍ដែលកម្រនឹងមាននៅពេលដែលនគរបាលជាតិបញ្ចេញរឿងដ៏ចម្រូងចម្រាសមួយជាសាធារណៈ។ គេហទំព័រនគរបាលជាតិ បានផ្សាយរូបភាពវីដេអូនៃការចេញដំណើររបស់ជនជាតិបារាំងលោក Patrick Devillers នៅយប់ថ្ងៃអង្គារដើម្បីបង្ហាញថាជនជាតិបារាំងដ៏ចម្រូងចម្រាសនេះបានចាកចេញដោយគ្មានរងសម្ពាធ។ ប៉ូលិសក៏បានធ្វើបទសម្ភាសន៍ជាមួយជនជាតិបារាំងរូបនេះដែរ ដែលនិយាយថា លោកចាកចេញដើម្បីសហការជាមួយអាជ្ញាធរចិនក្នុងសំណុំរឿងលោកស្រី ហ្គូ កៃឡៃ ដែលជាភរិយារបស់អតីតអ្នកនយោបាយចិនអស់អំណាច ប៉ូ ស៊ីឡៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
មូលហេតុនៃការចាប់ខ្លួនជនជាតិបារាំង គឺលោក Patrick Devillers ដែលអាជ្ញាធរមិនសូវនិយាយនោះ បានលេចចេញបន្តិចម្តងៗ រហូតដល់ពេលនេះ។ ទើបតែពេលនេះ បានគេដឹងថា អាជ្ញាធរចិនបានស្នើអោយអាជ្ញាធរកម្ពុជាចាប់ឃាត់ខ្លួនលោក Patrick Devillers ក្នុងសំណុំរឿងរបស់លោកស្រីហ្គូ កៃឡៃ ដែលជាភរិយារបស់អតីតអ្នកនយោបាយចិនអស់អំណាច គឺលោកប៉ូ ស៊ីឡៃ។
គឺលោក Patrick Devillers ខ្លួនឯងដែលនិយាយយ៉ាងដូច្នេះ នៅក្នុងបទសម្ភាសន៍វីដេអូខ្លីមួយនៅមុនពេលចាកចេញពីព្រលានយន្តហោះអន្តរជាតិភ្នំពេញ ហើយដែលវីដេអូសម្ភាសន៍ និងរូបភាពនៃការចាកចេញពីកម្ពុជានោះត្រូវបានគេផ្សាយនៅក្នុងគេហទំព័រព័ត៌មាននគរបាលជាតិ។
ជនជាតិបារាំងរូបនេះ ត្រូវបានគេដឹងថាមានទំនាក់ទំនងស្និទ្ធជាមួយនឹងប្តីប្រពន្ធលោកប៉ូ ស៊ីឡៃ ដែលជាអតីតអ្នកនយោបាយជាន់ខ្ពស់ចិនមួយរូប ហើយកំពុងត្រូវស៊ើបអង្កេតក្នុងករណីពុករលួយ។ រីឯភរិយារបស់លោក គឺលោកស្រី ហ្គូ កៃឡៃនោះ ត្រូវបានអាជ្ញាធរចិនចាប់ខ្លួនកាលពីខែមេសាកន្លងទៅ ក្នុងបទសង្ស័យជាប់ពាក់ព័ន្ធនឹងឃាតកម្មលើអ្នកជំនួញជនជាតិអង់គ្លេសម្នាក់។
ស្ថាបត្យករបារាំងអាយុ៥២ឆ្នាំដែលត្រូវបានចាប់ខ្លួន កាលពីថ្ងៃទី១៣មិថុនានោះ ក៏បានបញ្ជាក់ផងដែរថា លោកបានសម្រេចចិត្តចាកចេញទៅទីក្រុងប៉េកាំង ប្រទេសចិនដោយខ្លួនឯង។ ថ្លែងប្រាប់ទីភ្នាក់ងារព័ត៌មានបារាំង AFP លោកឧត្តមសេនីយឯកគៀត ចន្ទថារិទ្ធ អ្នកនាំពាក្យអគ្គស្នងការនគរបាលជាតិបានពន្យល់ថា វីដេអូនេះចង់បង្ហាញថាលោក Patrick Devillers បានចាកចេញពីកម្ពុជាដោយគ្មានគំនាប ហើយថា មិនមែនកម្ពុជាបញ្ជូនលោក Patrick Devillersចេញពីប្រទេសកម្ពុជានោះឡើយ។
រដ្ឋាភិបាលបារាំងបានតាមដាន និងតាមការពារពលរដ្ឋរបស់ខ្លួនយ៉ាងម៉ត់ចត់។ នៅក្នុងសន្និសីទកាសែតកាលពីពេលថ្មីៗក្នុងសប្តាហ៍នេះ អ្នកនាំពាក្យក្រសួងកាបរទេសបារាំង បានប្រាប់អោយដឹងថា លោក Patrick Devillers បាននិយាយប្រាប់ឯកអគ្គរដ្ឋទូតបារាំងប្រចាំកម្ពុជាថា អាជ្ញាធរចិនបានសន្យាផ្តល់ការធានាមួយចំនួនដល់រូបលោក។ យោងតាមអ្នកនាំពាក្យក្រសួងការបរទេសបារាំងដដែល នៅពេលដែលលោក Patrick Devillers ស្ថិតនៅក្នុងប្រទេសចិន ស្ថានទូតបារាំងប្រចាំប៉េកាំងនឹងបន្តតាមការពារពលរដ្ឋបារាំងរបស់ខ្លួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ