វៀតណាមនឹងបើកឡើងវិញមូលដ្ឋានយោធានៅ Cam Ranh ឱ្យកងទ័ពបរទេស
វៀតណាមបានសំរេចចិត្តបើកឡើងវិញឱ្យនាវាចម្បាំងបរទេសនូវមូលដ្ឋានយោធានៅCam Ranh (នៅខាងត្បូងប្រទេស) ដែលនៅក្នុងប្រវត្តិសាស្ត្រខ្លួន ត្រូវបានប្រើប្រាស់ដោយកងទ័ពអាមេរិកាំង បន្ទាប់មក ដោយកងទ័ពរុស្ស៊ី -នេះជាការបញ្ជាក់ប្រាប់របស់លោកនាយករដ្ឋមន្ត្រី Nguyen Tan Dungឱ្យដឹងនៅថ្ងៃសៅរ៍ម្សិលមិញ៣០តុលា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
“នៅពហុដ្ឋានកំពង់ផែ Cam Ranh វៀតណាមត្រៀមលក្ខណៈនឹងផ្តល់សេវាឱ្យនាវាមកពីគ្រប់ប្រទេស រួមទាំងនាវាមុជទឹកផងដែរ” -នេះជាការថ្លែងរបស់លោកនាយករដ្ឋមន្ត្រីវៀតណាម Nguyen Tan Dung នៅឱកាសសន្និសីទសារព័ត៌មានបិទជំនួបកំពូលអាស៊ីខាងកើតរៀបចំធ្វើនៅទីក្រុងហាណូយពីថ្ងៃព្រហស្បតិ៍មកដល់ថ្ងៃសៅរ៍ម្សិលមិញ និងត្រូវបានគ្របដណ្តប់ដោយមហិច្ឆតារបស់ចិនទាមទារចង់បានដែនដី។
ហេដ្ឋារចនាសម្ព័ន្ធថ្មីនឹងត្រូវសាងសង់ ដោយមានជំនួយពីប្រទេសរុស្ស៊ី។មូលដ្ឋាននៅខាងត្បូងប្រទេសនេះត្រូវបានប្រើប្រាស់ដោយកងទ័ពអាមេរិកាំងជាសម្ព័ន្ធមិត្តនៃរបបSaïgonប្រឆាំងនឹងកុម្មុយនិស្ត ក្នុងអំឡុងពេលសង្គ្រាមនៅវៀតណាមដែលត្រូវបានបញ្ចប់នៅឆ្នាំ១៩៧៥។សហភាពសូវៀត បន្ទាប់មក រុស្ស៊ីបានប្រើប្រាស់មូលដ្ឋាននេះ បន្ទាប់ពីវៀតណាមខាងត្បូងនិងខាងជើងបានរួបរួមគ្នាជាប្រទេសតែមួយមក។ម៉ូស្គូបានដកខ្លួនថយចេញពីមូលដ្ឋាននេះកាលពី៧ឆ្នាំមុន។
ចាប់តាំងពីចប់សង្គ្រាមនិងការធ្វើឱ្យទៅជាប្រក្រតីឡើងវិញ ចំណងទូតរវាងវៀតណាមនិងស.រ.អា.នៅឆ្នាំ១៩៩៥មក ប្រទេសទាំងពីរបានក្លាយទៅជាដៃគូចំណាត់ថ្នាក់លេខមួយ។ ប្រទេសទាំងពីរមានរហូតដល់ទៅទំនាក់ទំនងយោធាយ៉ាងខ្ជាប់ខ្ជួន ទោះបីជាមានការខ្វែងគំនិតគ្នា និងឥរិយាបថទីទើររួញរា ក្នុងចំណោមមជ្ឈដ្ឋាននយោបាយខ្លះ នៅក្នុងប្រទេសទាំងពីរក្តី។
ហាណូយ និងវ៉ាស៊ីនតោន មានក្តីព្រួយបារម្ភរួម អំពីឥទ្ធិពលកាន់តែកើនឡើងរបស់ប្រទេសចិន នៅក្នុងភូមិភាគ។ មានមុខនៅក្នុងជំនួបកំពូលអាស៊ី នៅហាណូយ លោកស្រី ហ៊ីលឡារី គ្លីនតុន បានបញ្ជាក់ប្រាប់ថា បានពិភាក្សាជាមួយថ្នាក់ដឹកនាំវៀតណាម អំពីសារៈសំខាន់នៃ"សហប្រតិបត្តិការកាន់តែរីកកើនឡើង" ស្តីពីសន្តិសុខក្នុងនាវាចរណ៍តាមសមុទ្ទ ប្រតិបត្តិការជួយសង្គ្រោះនៅសមុទ្ទ និងការគ្រប់គ្រងលើគ្រោះធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ