បក្សកម្មុយនិស្តវៀតណាមប្រយុទ្ធប្រឆាំងអំពើពុករលួយផ្ទៃក្នុង
គណបក្សកុម្មុយនិស្តវៀតណាមបានបិទបញ្ចប់សន្និសីទថ្នាក់ជាតិរយៈពេល បីថ្ងៃ នៅថ្ងៃពុធ ទី ២៩ កុម្ភៈនេះ ដោយបានសន្យាធ្វើកំណែទម្រង់ផ្ទៃក្នុងគណបក្ស។ គណបក្សសន្យាប្រយុទ្ធប្រឆាំងអំពើពុករលួយក្នុងជួរបក្ស និងដោះស្រាយបញ្ហាចម្បងមួយចំនួនទាក់ទងនឹងអាកប្បកិរិយាខុសឆ្គងរបស់សមាជិកគណបក្សឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៤៥
អំពើពុករលួយ និងអយុត្តិធម៌គឺជាមូលហេតុចំបងដែលបានទាញប្រជាប្រិយភាពរបស់គណបក្សកាន់អំណាចឲ្យបានធ្លាក់ចុះ ទាំងក្នុងចំណោមប្រជាជន និងសមាជិកជាន់ទាបរបស់បក្ស ក្នុងរយៈប៉ុន្មានឆ្នាំចុងក្រោយនេះ។
គណបក្សបានសន្យាប្រយុទ្ធប្រឆាំងអំពើពុករលួយ និងកែតម្រង់អាកប្បកិរិយារបស់សមាជិកខ្លួនឯងវិញ ព្រោះ តែគេបានសង្កេតឃើញថា អំពើពុករលួយដែលបង្កដោយ មន្រ្តីថ្នាក់មូលដ្ឋានមួយចំនួនបានបង្កឲ្យមានកំហឹង តវ៉ាកាន់តែច្រើនរបស់ប្រជាជនវៀតណាម។ មន្រ្តីថ្នាក់មូលដ្ឋាន ភាគច្រើន គឺជា សមាជិកគណបក្សវៀតណាម ដែលត្រូវប្រជាជនរិះគន់ថា បានប្រព្រឹត្តអំពើពុករលួយលក់ដីធ្លីរបស់ប្រជាជនទៅឲ្យក្រុមហ៊ុនឯកជន។ លើសពីនោះ មន្រ្តីប៉ូលិសកាន់តែច្រើនជាមុខសញ្ញាប្រឆាំងរបស់ប្រជាជនដែលបានធ្វើការតវ៉ាចំពោះអំពើអយុត្តិធម៌ ក្នុងសង្គម។
បច្ចុប្បន្ននេះ បក្សកុម្មុយនិស្តវៀតណាមមានសមាជិកបច្ចុប្បន្នជិត ៤លាននាក់ និងចង់ស្វែងរកសមាជិកបន្ថែមទៀត ក្នុងចំណោមប្រជាជនជាង ៨៦លាននាក់ ដើម្បីទ្រទ្រង់និរន្តភាពរបស់បក្សកុម្មុយនិស្ត ដែលជាគណបក្សតែមួយ គត់ និងគ្រប់គ្រងអំណាចនៅវៀតណាម។
លោកអគ្គលេខាធិការបក្សកុម្មុយនិស្តវៀតណាម ង្វៀន ភូទ្រុងបាននិយាយប្រាប់សមាជិកជាន់ខ្ពស់បក្សកាលពីថ្ងៃបើកសន្និសីទ ថា អំពើពុករលួយ និងអាកប្បកិរិយាមិនល្អរបស់សមាជិកគណបក្ស គឺជាគ្រោះថ្នាក់សម្រាប់អនាគតគណបក្ស។ លោកបានចោទជាសំណួរថា តើគណបក្សនឹងជារបស់អ្នកណាទៅថ្ងៃមុខ ប្រសិនបើមន្រ្តីមួយចំនួនរបស់បក្សកំពុងរកស៊ី មានបាន យ៉ាងឆាប់ រហ័ស និងរស់នៅយ៉ាងស្រួល គឺខុសឆ្ងាយពេកពីអ្នកធ្វើការដទៃទៀត ដែលកំពុងរស់នៅក្នុងជីវភាពទន់ខ្សោយ។
ដើម្បីទាក់ទាញប្រជាជន អគ្គលេខាធិការបក្សកុម្មុយនិស្ត បានប្រកាស គំាទ្រឲ្យគេបង្កើតប្រព័ន្ធ បោះឆ្នោតទំនុកចិត្តមួយដែលអនុញ្ញាតឲ្យប្រជាជនអាចបោះឆ្នោតប្រឆាំងសមាជិកគណបក្សណាដែលមិនបានអនុវត្តមុខងាររបស់ខ្លួនឲ្យបានសមរម្យ។ នេះ ជាលើកទីមួយក្នុងប្រវត្តិបក្សកុម្មុយនិស្តវៀតណាមដែលប្រជាជនសាមញ្ញត្រូវគេអនុញ្ញាតឲ្យចូលរួមរិះគន់សមាជិកគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ