តុលាការចិនដាក់ទោសប្រហារជីវិតមនុស្ស៣នាក់ ពីបទហិង្សានៅស៊ីនជាំងក្នុងខែមិថុនា
នៅថ្ងៃព្រហស្បតិ៍ម្សិលមិញនេះ តុលាការចិនបានដាក់ទោសប្រហារជីវិតមនុស្ស៣នាក់ និងម្នាក់ទៀត អោយទទួលទោសជាប់ពន្ធនាគារ២៥ឆ្នាំ ក្នុងអំពើហិង្សាសម្លាប់មនុស្ស នៅខេត្តស៊ីនជាំង កាលពីខែមិថុនាកន្លងទៅ។ គួររំលឹកថា កាលពីខែមិថុនា បាតុកម្មហិង្សានៅ ខេត្តស៊ីនជាំង ដែលជាតំបន់សំបូរដោយអ្នកកាន់សាសនាអ៊ីស្លាមរស់នៅ បានបង្កអោយមានមនុស្សស្លាប់ជាង១០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
ចិនបានចាត់ទុកអំពោះហិង្សាថ្ងៃ ២៦មិថុនា កន្លងទៅ នៅខេត្តស៊ីនជាំង ថាជាការវាយប្រហារភេរវកម្មសម្លាប់មនុស្ស។ ក្នុងហេតុផលនេះ អាជ្ញាធរចិនបានពង្រឹងសន្តិសុខយ៉ាងតឹងតែង នៅក្នុងតំបន់ និងបានសន្យាថា មិនលើកលែងដល់បណ្តាជនដែលទទួលខុសត្រូវក្នុងអំពើហិង្សាបែបនេះឡើយ។
ជាក់ស្តែង នៅថ្ងៃព្រហស្បតិ៍នេះ តុលាការបានដាក់ទោសជន៣នាក់ អោយទទួលទោសប្រហារជីវិត និងជនម្នាក់ទៀតអោយជាប់គុក២៥ឆ្នាំ ពីបទបង្កអំពើហិង្សាកាលពីខែមិថុនានោះឯង។ យោងតាមកាសែតចិនថ្មី ក្នុងបាតុកម្មហិង្សានៅខែមិថុនាកន្លងទៅ នៅខេត្តស៊ីនជាំង គេសង្កេតឃើញមានក្រុមមនុស្សប្រដាប់ដោយកាំបិត បាននាំគ្នាមកវាយប្រហារការិយាល័យប៉ូលិស និងទីកន្លែងជាច្រើនទៀតនៅក្នុងឃុំ Lukqun។ បន្ទាប់មក ប៉ូលិសបានបាញ់តបទៅវិញ បណ្តាលអោយមានមនុស្សស្លាប់៣៥នាក់។
កាលពីខែសីហា កន្លងទៅ តុលាការចិនក៏ធ្លាប់បានដាក់ទោសប្រហារជីវិតដល់មនុស្សពីរនាក់ផ្សេងទៀតផងដែរ ពីបទភេរវកម្មហិង្សាកាលពីខែមេសា ដែលបានធ្វើអោយមនុស្ស២១នាក់បាត់បង់ជីវិត។ អំពើហិង្សាដែលគេមិនអាចបំភ្លេចបាននៅខេត្តស៊ីនជាំង គឺអំពើហិង្សាឆ្នាំ២០០៩ រវាងជនជាតិអ៊ុយហ្គួរ និងជនជាតិហាន ដែលបានសម្លាប់មនុស្សប្រមាណ២០០នាក់។
ខេត្តស៊ីនជាំង សំបូរដោយអ្នកកាន់សាសនាអ៊ីស្លាមជាជនជាតិអ៊ុយហ្គួររស់នៅ។ ខេត្តនេះស្ថិតក្នុងតំបន់សំបូរដោយធនធាតិធម្មជាតិ។ រដ្ឋាភិបាលចិនបានពង្រឹងសន្តិសុខ និងបង្កើនការវិនិយោគនៅទីនោះ។ ប្រជាជនអ៊ុយហ្គួរខេត្តស៊ីនជាំង បានតវ៉ាប្រឆាំងនឹងនយោបាយរដ្ឋាភិបាលចិន។ ពួកគេចាត់ទុកថា នយោបាយរដ្ឋាភិបាលចិន បានគាបសង្កត់ ប៉ះពាល់ដល់វប្បធម៌ ប្រពៃណី និងសាសនាជនជាតិអ៊ុយហ្គួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ