ម៉ាលី៖ រដ្ឋាភិបាល និងក្រុមឧទ្ទាមបានចុះហត្ថលេខាលើកិច្ចព្រមព្រៀងមួយ
ចុះផ្សាយនៅថ្ងៃ៖
ស្តាប់ - ០៤:២៩
នៅក្នុងប្រទេសម៉ាលី ក្រោយពីបានអង្គុយចរចាគ្នាយ៉ាងតានតឹងអស់រយៈពេល ១១ថ្ងៃក្នុងទីក្រុងអៅហ្គាឌូហ្គូ ប្រទេសបួគីណាហ្វាសូមក រដ្ឋាភិបាល និងក្រុមឧទ្ទាម Touaregs បានចុះហត្ថលេខាលើកិច្ចព្រមព្រៀងមួយ។ អ្នកចុះហត្ថលេខាខាងរដ្ឋាភិបាលក្រុងបាម៉ាកូ តំណាងដោយរដ្ឋមន្រ្តីក្រសួងរដ្ឋបាលដែនដី និងខាងក្រុមឧទ្ទាម តំណាងដោយអ្នកតំណាងរបស់ចលនាពីររបស់ក្រុម Touaregs។ ពិធីចុះហត្ថលេខាត្រូវបានធ្វើឡើង ក្រោមវត្តមានរបស់លោកប្រធានាធិបតីនៃប្រទេសបួគីណាហ្វាសូដែលជាប្រទេសអន្តរការី។
នៅទីបំផុត និងបន្ទាប់ពីបានជជែកគ្នាដោយមានការប្រយ័ត្នប្រយែងរវាងគ្នាមក កិច្ចព្រមព្រៀងមួយត្រូវបានរកឃើញហើយរវាងរដ្ឋាភិបាលក្រុងបាម៉ាកូ និងក្រុមឧទ្ទាម Touaregs ដែលកំពុងកាន់កាប់តំបន់គីដាល់នៅប៉ែកខាងជើងប្រទេសម៉ាលី។ កិច្ចព្រមព្រៀងដែលមាន ១២ទំព័រ និង ២៥មាត្រាត្រូវបានភាគីជម្លោះទំាងពីរចុះហត្ថលេខាក្នុងទីក្រុងអៅហ្គាឌូហ្គូ ប្រទេសបួគីណាហ្វាសូ ក្រោមអន្តរការីរបស់លោកប្រធានាធិបតី Blaise Compaoré។ គម្រោងនៃកិច្ចចរចាដំបូងត្រូវបានចាប់ផ្តើមនៅក្នុងបរិយាកាសមួយដែលភាគីនីមួយៗមិនទុកចិត្តគ្នាទាល់តែសោះ។
បន្ទាប់ពីបានផ្តើមកិច្ចចរចាជាមួយនឹងការយឺតយ៉ាវចំនួន ៣ថ្ងៃមក ភាពមិនចុះសម្រុងគ្នាក៏បានកើតមានភ្លាមៗជុំវិញបញ្ហាសន្តិសុខ។ រដ្ឋាភិបាលទីក្រុងបាម៉ាកូចង់ឲ្យក្រុមឧទ្ទាម Touaregs ទម្លាក់អាវុធចុះភ្លាម នៅពេលដែលកម្លំាងរដ្ឋាភិបាលបានដាក់ជើងជាន់តំបន់គីដាល់។ នៅខាងក្រុមឧទ្ទាមវិញ ពួកគេបានទាមទារឲ្យរដ្ឋាភិបាលបញ្ឈប់ការតាមរករឿងចាប់បញ្ជូនថ្នាក់ដឹកនំាមួយចំនួនរបស់ខ្លួនទៅកាន់តុលាការ។ ភាពទាល់ច្រកក៏បានកើតមានឡើងដោយបានបង្ខំលោក Djibril Bassolé រដ្ឋមន្រ្តីក្រសួងការបរទេសបួគីណាហ្វាសូឲ្យធ្វើដំណើរទៅកាន់ទីក្រុងបាម៉ាកូ។ នៅទីនោះ អន្តរការី បួគីណាហ្វាសូរូបនេះបានព្យាយាមនិយាយជំនះរដ្ឋាភិបាលម៉ាលីថា សំណើទាមទារឲ្យក្រុមឧទ្ទាម Touaregs ទម្លាក់អាវុធ គឺជារឿងស្មុគស្មាញ និងត្រូវការពេលវេលាយូរអង្វែង។
ក្រោយពីបានធ្វើការកែប្រែ បន្ថែមបន្ថយលើចំណុចខ្វែងគំនិតគ្នាមួយចំនួនមក ភាគីទំាងពីរក៏បានព្រមព្រៀងគ្នាលើអត្ថបទមួយ។ ក៏ប៉ុន្តែ ស្រាប់តែលោកប្រធានាធិបតីម៉ាលីបានទាមទារឲ្យមានការកែប្រែថ្មីទៀត។ នៅថ្ងៃច័ន្ទ ទី១៧ មិថុនាដើមសប្តាហ៍នេះ លោកប្រធានាធិបតីបារំាង François Hollande និងលោកប្រធានាធិបតីនៃប្រទេសកូដឌីវ័រ Alassane Ouatarra បានចេញមុខធ្វើអន្តរាគមន៍ ដោយទូរស័ព្ទជជែកជាមួយលោកប្រធានាធិបតីម៉ាលី។ ទីបំផុត នៅល្ងាចថ្ងៃទី១៨ មិថុនា កិច្ចព្រមព្រៀមមួយត្រូវបានចុះហត្ថលេខាដែលនេះ គឺជាជំហានដំបូងនៃផ្លូវឆ្ពោះទៅរកការបង្រួបបង្រួម និងសន្តិភាពនៅក្នុងប្រទេសម៉ាលី។
កិច្ចព្រមព្រៀងនោះត្រូវបានចែកចេញជាពីរវគ្គ ទីមួយ គឺការរៀបចំបន្ទាន់ដើម្បីអនុញ្ញាតឲ្យមានការរៀបចំបោះឆ្នោតប្រធានាធិបតីថ្មីនៅក្នុងតំបន់គីដាល់ ក៏ដូចជានៅតំបន់ផ្សេងៗទៀតនៅប៉ែកខាងជើង ដោយមានការធានាសន្តិសុខ និងសុវត្ថិភាពត្រឹមត្រូវ។ នេះជារឿងមួយដែលត្រូវចាត់វិធានការយ៉ាងបន្ទាន់ ពីព្រោះការបោះឆ្នោតជុំទីមួយនឹងគ្រោងរៀបចំនៅថ្ងៃទី២៨ កក្កដាខាងមុខ។ ដើម្បីអាចធានាសន្តិសុខឲ្យបានល្អនៅក្នុងការបោះឆ្នោតខាងមុខ គណៈកម្មការយោធាចម្រុះមួយនឹងត្រូវបង្កើតឡើង ដោយមានការចូលរួមពីភាគីជម្លោះផ្ទៃក្នុង ព្រមទំាងអង្គការសហប្រជាជាតិ ទាហានបារំាង និងទាហានរបស់កងកម្លំាងរក្សាសន្តិភាពរបស់អង្គការសហប្រជាជាតិ ហៅកាត់ថា Minusma។
នៅក្នុងវគ្គទីមួយនេះដដែល ក៏មានចែងពីការឈប់បាញ់គ្នា និងការដាក់ពង្រាយកម្លំាងរដ្ឋាភិបាល ព្រមទំាងបុគ្គលិករដ្ឋបាលនៅក្នុងដែនដីរបស់ក្រុមឧទ្ទាម Touaregs ដែរ។ ជាថ្នូរត្រឡប់វិញ រដ្ឋាភិបាលក្រុងបាម៉ាកូបានលើកចេញនូវការទាមទារឲ្យក្រុមឧទ្ទាម Touaregs ទម្លាក់អាវុធចុះ។ នេះហើយជាចំណុចខ្វែងគ្នាមួយដែលបានរំាងស្ទះកិច្ចប្រជុំតំាងពីដើមទី។ រីឯចំណុចខ្វែងគ្នាទីពីរ គឺក្រុមឧទ្ទាម Touaregs បានទាមទារឲ្យដាក់ពាក្យ Azarwad ដែលជាឈ្មោះនៃដែនដីស្វ័យយ័តរបស់ខ្លួននៅក្នុងកិច្ចព្រមព្រៀង។ ចំណុចនេះ ក៏ត្រូវបានរដ្ឋាភិបាលក្រុងបាម៉ាកូយល់ព្រមដែរ។ តែជាថ្នូរពីក្រុមឧទ្ទាម Touaregs ដែលទាមទារឲ្យរដ្ឋាភិបាលបញ្ឈប់ការតាមរករឿងចាប់បញ្ជូនមេកើយមួយចំនួនរបស់ខ្លួនទៅកាន់តុលាការនោះ រដ្ឋាភិបាលបាម៉ាកូមិនបានយល់ព្រមទំាងស្រុងទេ។
បន្ទាប់ពីការងារនៅក្នុងវគ្គទីមួយបញ្ចប់សព្វគ្រប់បាន ៦០ថ្ងៃមក ពោលគឺក្រោយការរៀបចំបោះឆ្នោតប្រធានាធិបតីមក រូបប្រធានាធិបតីថ្មីនឹងត្រូវរៀបចំឲ្យមានកិច្ចប្រជុំថ្នាក់ជាតិរវាងភាគីជម្លោះ។ គោលដៅ គឺដើម្បីកំណត់លក្ខន្តិករដ្ឋបាលរបស់តំបន់ Azarwad និងរៀបចំរចនាសម្ព័ន្ធនៅក្នុងតំបន់នោះ។
ដើម្បីធានា និងតាមដានការអនុវត្តន៍នូវកិច្ចព្រមព្រៀងនោះឲ្យបានត្រឹមត្រូវ សាក្សីដែលមិនអាចខ្វះបាន និងដែលមានហត្ថលេខានៅក្នុងកិច្ចព្រមព្រៀងដែរនោះ គឺអង្គការសហប្រជាជាតិ សហភាពអឺរ៉ុប និងសហភាពអាហ្រ្វិក។ តែសូមកុំភ្លេចថា តួអង្គនៃជោគជ័យ ឬបរាជ័យនៃកិច្ចព្រមព្រៀងនោះ វាអាស្រ័យទំាងស្រុងទៅនឹងឆន្ទៈរបស់រដ្ឋាភិបាលបាម៉ាកូ និងក្រុមឧទ្ទាម Touaregs៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ