ក្រុមអ្នកវិទ្យាសាស្រ្តតវ៉ាហាមមិនអោយផលិតមនុស្សយន្តពិឃាដ
ចុះផ្សាយនៅថ្ងៃ៖
ស្តាប់ - ០៤:២៣
នៅក្នុងសន្និសីទអន្តរជាតិស្តីពីបញ្ញាញានសប្បនិម្មិត ដែលបានប្រព្រឹត្តទៅពីថ្ងៃទី ២៥ ដល់ ៣១ ខែកក្កដា កន្លងទៅនេះ នៅប្រទេសអាហ្សង់ទីន ក្រុមអ្នកវិទ្យាសាស្រ្ត និងឥស្សរជនល្បីឈ្មោះជាច្រើននាក់បានចុះហត្ថលេខាលើលិខិតចំហមួយ ទាមទារអោយទប់ស្កាត់ការផលិតមនុស្សយន្តពិឃាដ (killer robots)។ គេមានក្តីព្រួយបារម្ភខ្លាចបណ្តាប្រទេសមហាអំណាចផែ្នកយោធាមួយចំនួន ផលិតអាវុធប្រភេទថ្មីនេះដើម្បីធ្វើសង្គ្រាម។ តើអ្វីទៅជាមនុស្សយន្តពិឃាដ? តើមានប្រទេសចំនួនប៉ុន្មានកំពុងអភិវឌ្ឍន៍បច្ចេកវិទ្យានេះ? តើមានច្បាប់គ្រប់គ្រងប្រភេទអាវុធនេះដែរឬទេ?
នៅក្នុងលិខិតចំហមួយ ផ្សព្វផ្សាយកាលពីសប្តាហ៍កន្លងទៅនេះ ក្រុមអ្នកវិទ្យាសាស្រ្តល្បីឈ្មោះជាងមួយពាន់នាក់បានទាមទារអោយមានការដាក់បំរាម ហាមឃាត់ការផលិតអាវុធស្វ័យត ពោលគឺ នុស្សយន្តពិឃាដ។ ភាគច្រើននៃក្រុមអ្នកវិទ្យាសាស្រ្តទាំងនោះជាអ្នកស្រាវជ្រាវលើផែ្នកបញ្ញាញាណសប្បនិមិ្មត (Intelligence artificielle) និងផ្នែកមនុស្សយន្ត។ ក្នុងចំណោមនោះមានអ្នកវិទ្យាសាស្រ្តល្បីឈ្មោះបោះសំលេងដូចជា លោក Stephen Hawking (តារាវិទូរូបវិទ្យា) និងលោក Noam Chomsky (ភាសាវិទូ)។
ឥស្សរជនដទៃទៀតក្នុងផែ្នកជំនួញក៏គាំទ្រការតវ៉ានេះដែរ មានជាអាទិ៍ លោក Elon Musk (ស្ថាបនិកក្រុមហ៊ុនរថយន្តអគ្គិសនីម៉ាក Tesla និងក្រុមហ៊ុន SpaceX ជំនាញផែ្នកផលិតម៉ូទ័រយានអាវកាស និងការដឹកជញ្ជូនទៅកាន់ទីអវកាស) លោក Steve Wozniak សហស្ថាបនិកក្រុមហ៊ុន Apple លោក Demis Hassabis ស្ថាបនិកក្រុមហ៊ុន DeepMind ជំនាញផែ្នកបញ្ញាញាណសប្បនិម្មិត ដែលត្រូវបានទិញដោយក្រុមហ៊ុន Google ជាដើម។ អ្នកវិទ្យាសាស្រ្ត និងបុគ្គលល្បីៗទាំងនោះសំដែងក្តីបារម្ភចំពោះអនាគតនៃភាពជឿនលឿនផែ្នកបញ្ញាញាណសប្បនិម្មិត ដែលគេអាចយកទៅបំលែងប្រើប្រាស់នៅក្នុងវិស័យយោធា។
ការប្រជែងផែ្នកសព្វាវុធ
នៅក្នុងលិខិតតវ៉ានោះ ក្រុមអ្នកជំនាញបានលើកអំណះអំណាងថា មកដល់ពេលនេះ ការស្រាវជ្រាវផែ្នកបញ្ញាញាណសប្បនិម្មិតបានដើរដល់ចំណុចមួយ ដែលការដាក់ពង្រាយប្រព័ន្ធបែបនេះអាចនឹងធ្វើទៅបាន និងចេញជារូបរាងពិតប្រាកដ ក្នុងរយៈពេលប៉ុន្មានឆ្នាំខាងមុខទៀតនេះ។ គេមិនចាំបាច់រង់ចាំដល់រាប់សិបទសវត្សរ៍ ដូចការគិតពីមុនឡើយ។ អាវុធបែបស្វ័យត តួយ៉ាងដូចមនុស្សយន្តពិឃាដនេះនឹងត្រូវចាត់ទុកថា ជាការវិវត្តន៍ថ្មីទីបីនៃបច្ចេកទេសធ្វើសង្គ្រាម។ ការវិវត្តន៍ដំបូង គឺផ្តើមចេញពីកាំភ្លើង និងគ្រាប់រំសេវ។ ចំណែកការវិវត្តន៍ពីរ គឺគ្រាប់បែកបរមណូ។
មនុស្សយន្តពិឃាដគឺ ជាប្រភេទមនុស្សយន្តបំពាក់ដោយអាវុធ មានលទ្ធភាពអាចបើកការវាយប្រហារលើគោលដៅណាមួយ ដោយមិនចាំបាច់មានអន្តរាគមន៍ពីមនុស្សឡើយ។ និយាយាជាសាមញ្ញ គឺជាប្រភេទម៉ាស៊ីនមានរូបលក្ខណៈស្រដៀងគ្នាទៅនឹងមនុស្ស។ ម៉ាស៊ីននេះបំពាក់ទៅដោយប្រព័ន្ធកុំព្យូទ័រ មានខួរក្បាលសិប្បនិម្មិត ។ ក្រុមអ្នកស្រាវជ្រាវខ្លាចក្រែងប្រទេសមហាអំណាចប្រជែងគ្នាផែ្នកសព្វាវុធយោធា យកបច្ចេកវិទ្យាបញ្ញាញាណសិប្បនិម្មិតទៅផលិតជាមនុស្សយន្តពិឃាដ។ ហើយ គេប្រហែលអាចប្រើប្រាស់មនុស្សយន្តនេះ ជំនួសមនុស្សធម្មតា ឬទាហាននៅលើដី។ សំរាប់ក្រុមអ្នកជំនាញ គេពិតជាមិនអាចចៀសផុតពីសង្គ្រាមលោកមួយមិនខាននាពេលអនាគត ប្រសិនបើប្រទេសមហាអំណាចយោធាប្រជែងគ្នាផលិតមនុស្សយន្តពិឃាដ។
តើអាវុធស្វ័យតប្រភេទមនុស្សយន្តពិឃាដអាចបង្កគ្រោះថ្នាក់អ្វីខ្លះ? តើប្រទេសណាខ្លះកំពុងអភិវឌ្ឍបច្ចេកវិទ្យានេះ?
រាល់គ្រប់បច្ចេកវិទ្យាទាំងអស់អាចយកទៅប្រើប្រាស់ ក្នុងផ្លូវល្អផង អាក្រក់ផង។ ភាពខុសគ្នារវាងមនុស្សយន្តពិឃាដ និងយន្តហោះ Drone គ្មានមនុស្សបើក គឺនៅត្រង់ការសំរេចចិត្ត។ សំរាប់មនុស្សយន្តពិឃាដ វានឹងដំណើរការជាលក្ខណឯករាជ្យ អាចសំរេចចិត្តបាញ់លើគោលដៅពេលណាក៏បាន ដោយអាស្រ័យលើការវិនិច្ឆ័យរបស់វា។ មនុស្សយន្តនោះមានសមត្ថភាពទុកជីវិត ឬសំលាប់គោលដៅរបស់វា។ នេះហើយជាគ្រោះថ្នាក់ធំ។ ចំណែកយន្តហោះ Drone ទោះបីជាយន្តហោះនោះមានបច្ចេកវិទ្យាខ្លះអាចអោយវាប្រតិបត្តិការដោយស្វ័យប្រវត្តិដោយខ្លួនឯង។
ក៏ប៉ុន្តែ ចំពោះការបាញ់គ្រាប់មីស៊ីល ឬទំលាក់គ្រាប់បែកលើគោលដៅណាមួយ គឺជាសេចក្តីសំរេច ឬបញ្ជាពីចំងាយដោយមនុស្ស។មកដល់ពេលនេះ គេមិនទាន់ដឹងថា មានប្រទេសចំនួនប៉ុន្មានគ្រោងផលិតមនុស្សយន្តពិឃាដឡើយ។ ប៉ុន្តែ គេជឿជាក់ថា សហរដ្ឋអាមេរិក ចិន និងប្រទេសអភិវឌ្ឍន៍ខ្លះមានបច្ចេកវិទ្យានេះ។ អ្វីដែលត្រូវបារម្ភគឺ ការយកបច្ចេកវិទ្យាបញ្ញាញាណសប្បនិម្មិតនេះទៅធ្វើជាអាវុធសំរាប់អភិវឌ្ឍវិស័យយោធា។
តើនរណានឹងទទួលខុសត្រូវចំពោះមុខច្បាប់?
យើងអាចលើកឧទាហរណ៍ថា មនុស្សយន្តពិឃាដភ័ន្តច្រឡំបាញ់សំលាប់ជនស្លូតត្រង់ម្នាក់។ សំណួរសួរថា តើភាគីណាមួយជាអ្នកទទួលខុសត្រូវចំពោះមុខច្បាប់? ក្រុមហ៊ុនផលិតមនុស្សយន្តនោះ? ក្រុមហ៊ុនផលិតកម្មវិធីកុំព្យូទ័របំពាក់ខួរក្បាលមនុស្សយន្តនោះ? ឬមនុស្សយន្តនោះតែម្តង? ចំលើយ គឺមកពេលនេះ គ្មានច្បាប់អ្វីមួយបញ្ជាក់អំពីទំនួលខុសត្រូវទាំងនោះឡើយ។ ដោយសារបច្ចេកវិទ្យានេះអាចនឹងលេចចេញជារូបរាងក្នុងរយៈពេលប៉ុន្មានឆ្នាំខាងមុខ ដូចនេះ គេត្រូវការក្របខ័ណ្ឌគតិយុត្តមួយ ដើម្បីគ្រប់គ្រងការប្រើប្រាស់អាវុធប្រភេទថ្មីនេះ។
ម៉្យាង គេបារម្ភខ្លាចអាវុធនេះធ្លាក់ក្នុងដៃក្រុមភេរវករ។ ម៉្យាងទៀត គេខ្លាចក្រុមមេដឹកនាំផ្តាច់ការមួយចំនួននៅលើពិភពលោកទិញគ្រាន់ទុកគ្រប់គ្រង គាបសង្កត់ប្រជាជនពួកគេ ឬប្រព្រឹត្តអំពើប្រល័យពូជសាសន៍បោសសំអាតជាតិសាសន៍ណាមួយ។ សូមបញ្ជាក់ថា យុទ្ធនាការអន្តរជាតិក្នុងកិច្ចបង្ការហាមឃាត់មិនអោយមានមនុស្សយន្តពិឃាដ ត្រូវបានចាប់ផ្តើមផ្សព្វផ្សាយ កាលពីខែមេសា ឆ្នាំ២០១៣ ដោយក្រុមអង្គការក្រៅរដ្ឋាភិបាលមួយចំនួន។ យុទ្ធនាការនេះត្រូវបានដឹកនាំ និងសំរបសំរួលដោយអង្គការ Human Rights Watch មានមូលដ្ឋាននៅទីក្រុងញូវយ៉ក។
ក្រុមសកម្មជនអង្គការក្រៅរដ្ឋាភិបាលនេះក៏បានសហការជាមួយអ្នករាយការណ៍ពិសេសរបស់ អ.ស.ប គឺលោក Christof Heyns។ កិច្ចប្រជុំអ្នកជំនាញចំនួនពីរលើកត្រូវបានធ្វើឡើង នៅទីក្រុងហ្សឺណែវប្រទេសស្វីស។ គេត្រូវការចំណាយពេលច្រើនឆ្នាំបន្ថែមទៀត ក្នុងការចរចារផែ្នកការទូត ដើម្បីបង្កើតសន្ធិសញ្ញាអន្តរជាតិមួយស្តីពីអាវុធប្រភេទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ