ហេតុអ្វីរដ្ឋាភិបាលកាណាដាមិនលប់ចោលកិច្ចសន្យាលក់រថពាសដែកទៅអោយអារ៉ាប៊ីសាអូឌីត?
ចុះផ្សាយនៅថ្ងៃ៖
ស្តាប់ - ០៤:០៤
ក្រុមអង្គការការពារសិទ្ធិមនុស្សបានរិះគន់រដ្ឋាភិបាលកាណាដាក្រោមការដឹកនាំរបស់លោកនាយករដ្ឋមន្រ្តី Justin Trudeau ពីការរក្សាជំហរយល់ព្រមលក់រថពាសដែកទៅអោយរាជាណាចក្រអារ៉ាប៊ីសាអូឌីត។ ការរិះគន់នេះត្រូវបានធ្វើឡើងក្រោយពីរដ្ឋាភិបាលកាណាដាពុំសូវសំដែងប្រតិកម្មខ្លាំង ក្នុងការផ្តល់មេរៀនសិទ្ធិមនុស្សដល់អារ៉ាប៊ីសាអូឌីត ទាក់ទងសំណុំរឿងកាត់ទោសប្រហារជីវិតមនុស្សចំនួន ៤៧ នាក់កាលពីថ្ងៃទី ២ ខែមករាកន្លងទៅនេះ។ គេមានការបារម្ភខ្លាចក្រែងរដ្ឋាភិបាលអារ៉ាប៊ីសាអូឌីតយករថពាសដែកទិញពីកាណាដាទៅ បង្ក្រាបប្រជាជនស៊ីវិល ឬក្រុមប្រឆាំងរបបរាជានិយមអារ៉ាប៊ីសាអូឌីត។
រយៈពេលតែពីរថ្ងៃប៉ុណ្ណោះក្រោយឆ្លងឆ្នាំសកលថ្មី រាជាណាចក្រអារ៉ាប៊ីសាអូឌីតបានកាត់ទោសប្រហារជីវិតមនុស្សចំនួន ៤៧ នាក់ ដែលក្នុងនោះភាគច្រើនគឺជាសកម្មជនប្រឆាំងមកពីនិកាយឈីអីត។ អ្នកទោសទាំងនោះ ខ្លះត្រូវបានប្រហារជីវិតដោយការកាត់ក្បាល ខ្លះទៀតដោយសារគ្រាប់កាំភ្លើង។ មួយថ្ងៃក្រោយហេតុការណ៍នេះ ក្រសួងការបរទេសកាណាដាបានចេញសេចក្តីប្រកាសព័ត៌មានមួយបង្ហាញការសោកស្តាយ ដោយបានថ្កោលទោសការប្រហារជីវិតបែបនេះ។
លោក Alex Neve ប្រធានអង្គការ Amnesty Internationale Canada បានរិះគន់ថា ប្រតិកម្មរបស់ក្រសួងការបរទេសកាណាដាហាក់មានលក្ខណៈទន់ភ្លន់ពុំខ្លាំងក្លាឡើយ។ ក្រុមអង្គការ សិទ្ធិមនុស្សចង់អោយកាណាដាដាក់ទណ្ឌកម្មអារ៉ាប៊ីសាអូឌីត ចំពោះការរំលោភសិទ្ធិមនុស្ស សិទ្ធិស្រ្តី និងការកាត់ទោសប្រហារជីវិតដ៏ឃោរឃៅ។ លើសពីនេះ ក្រុមអ្នកការពារសិទ្ធិមនុស្សចង់អោយកាណាដាលប់ចោលកិច្ចព្រមព្រៀងលក់រថពាសដែកទៅអោយអារ៉ាប៊ីសាអូឌីត។ អំណះអំណាងរបស់ពួកគេ គឺ ខ្លាចក្រែងរបបដឹកនាំអារ៉ាប៊ីសាអូឌីតប្រើប្រាស់រថពាសដែកនេះបង្ក្រាបក្រុមប្រឆាំង ឬប្រជាជនស៊ីវិល។
រថពាសដែកបំពាក់គ្រាប់មីស៊ីល
សូមបញ្ជាក់ថា កាលពីឆ្នាំ ២០១៤ រដ្ឋាភិបាលកាណាដាក្នុងអាណត្តិមុនបានចុះកិច្ចសន្យាលក់រថពាសដែកពិសេសទៅអោយអារ៉ាប៊ីសាអូឌីត ក្នុងរង្វង់ទឹកប្រាក់ ១៥ ពាន់លានដុល្លារ។ ក្រុមហ៊ុនកាណាដាឈ្មោះ General Dynamics Land Systems ជាអ្នកផលិតរថពាសដែកទាំងនោះ។ ដោយសារតែប្រទេសទាំងពីរបានចុះកិច្ចព្រមព្រៀងរក្សាការសំងាត់ចំពោះភាពលម្អិតនៃកិច្ចសន្យានេះ គេមិនអាចដឹងពីចំនួនរថពាសដែកដែលត្រូវផលិតឡើយ។
ប៉ុន្តែ បើយោងតាមសារព័ត៌មានកាណាដា Globe and Mail ក្រុមហ៊ុនកាណាដានឹងផលិតរថពាសដែកប្រមាណ ៧០០ គ្រឿងទៅអោយអារ៉ាប៊ីសាអូឌីត។ វាជារថពាសដែកធន់ស្រាលពិសេស ដោយមានបំពាក់កាណុងកាំភ្លើង និង ភ្ជាប់ជាមួយនូវបច្ចេកវិទ្យា ដែលអាចបញ្ជាផ្លូវគ្រាប់មីស៊ីលបានទៀតផង។ រថយន្តយោធាពិសេសនេះអាចមានលទ្ធភាពបាញ់គ្រាប់មីស៊ីល ទោះបីក្នុងស្ថានភាពដី ឬផ្លូវពិបាកយ៉ាងណាក៏ដោយ។ លើសពីនេះ វាអាចបាញ់កំទេចរថក្រោះរបស់សត្រូវស្ថិតនៅចំងាយប្រវែង ៥ គីឡូមែត្រ។ កិច្ចសន្យាក្នុងទឹកប្រាក់ដ៏សន្ធឹកសន្ធាប់នេះនឹងផ្តល់កាងារចំនួន ៣០០០ កន្លែងដល់ប្រជាជនកាណាដា ដែលរស់នៅទីក្រុង London ខេត្ត Ontario។
ដៃគូមិនអាចរំលងបាន
ជាការឆ្លើយតបទៅនឹងការរិះគន់នេះ លោក Stéphane Dion រដ្ឋមន្រ្តីការបរទេសកាណាដាបានអះអាងថា រដ្ឋាភិបាលកាណាដានៅតែរក្សាជំហរគោរពកិច្ចសន្យាលក់រថពាសដែកទៅអោយប្រទេសអារ៉ាប៊ីសាអូឌីត។ កាណាដាចាត់ទុតអារ៉ាប៊ីសាអូឌីតជាដៃគូយុទ្ធសាស្រ្តមួយក្នុងតំបន់មជ្ឈិមបូព៌ា។ មិនមែនមានតែកាណាដាម្នាក់ឯងទេ សូម្បីតែសហរដ្ឋអាមេរិក និងអឺរ៉ុបក៏សំឡឹងឃើញផលប្រយោជន៍បែបនេះដែរ។
លោករដ្ឋមន្រ្តីការបរទេសក៏បានបញ្ជាក់ផងដែរថា រដ្ឋាភិបាលកាណាដាមានចំណុចជាច្រើនមិនឯកភាពជាមួយរបបដឹកនាំអារ៉ាប៊ីសាអូឌីតក្នុងសំណុំរឿងសិទ្ធិមនុស្ស។ ប៉ុន្តែ ប្រទេសនេះជាដៃគូដ៏សំខាន់មួយដែលកាណាដាត្រូវធ្វើការជាមួយ ដូចជាសំណុំរឿងស៊ីរី អ៊ីរ៉ាក់ និងយេម៉ែនជាដើម។ រដ្ឋាភិបាលកាណាដានឹងពិនិត្យគ្រប់ជ្រុងជ្រោយបន្ថែមទៀតដើម្បីធានាច្បាស់ថា រថពាសដែកនោះនឹងមិនត្រូវយកទៅប្រើប្រាស់ក្នុងន័យបង្ក្រាបប្រឆាំងនឹងប្រជាជនស៊ីវិលស្លូតត្រង់។
រដ្ឋាភិបាលកាណាដាមានយន្តការណ៍ពិសេសក្នុងការតាមដានបញ្ហានេះមុននឹងប្រគល់រថពាសដែកយោធានេះទៅអោយប្រទេសអារ៉ាប៊ីសាអូឌីត។ យោងលើច្បាប់កាណាដាមួយកាលពីឆ្នាំ ១៩៤៧ ក្រុមហ៊ុនផលិតសម្ភារៈយោធាត្រូវទទួលការយល់ព្រមពីរដ្ឋាភិបាលជាមុនសិន មុននឹងនាំចេញសម្ភារៈយោធាទៅបរទេស។ ហើយក្រុមហ៊ុននោះត្រូវធានាថា សម្ភារៈយោធានឹងមិនត្រូវយកទៅប្រើប្រាស់ប្រឆាំងនឹងប្រជាជនស្លូតត្រង់ឡើយ។ ម៉្យាងទៀត កាណាដានឹងដាក់ល័ក្ខខ័ណ្ឌមួយ គឺបដិសេធកិច្ចសន្យាណាមួយនាពេលអនាគត ក្នុងករណីដែលអារ៉ាប៊ីសាអូឌីតយករថយន្តយោធានោះទៅប្រើប្រាស់ផ្ទុយពីការសន្យា។
បើយោងតាមឯកសារមួយចុះផ្សាយកាលពីចុងសប្តាហ៍ដោយសារព័ត៌មានកាណាដា La Presse បានរាយការណ៍អោយដឹងថា មន្រ្តីទីប្រឹក្សាជាន់ខ្ពស់របស់រដ្ឋាភិបាលកាណាដាបានផ្តល់អនុសាសន៍អោយលោកនាយករដ្ឋមន្រ្តីថ្មី Justin Trudeau រក្សាពង្រឹងទំនាក់ទំនងយុទ្ធសាស្រ្តអោយកាន់តែស៊ីជំរៅជាមួយអារ៉ាប៊ីសាអូឌីត ដែលកំពុងដើរតួនាទីយ៉ាងសំខាន់ក្នុងតំបន់។ អនុសាសន៍នោះក៏បានស្នើអោយរដ្ឋាភិបាលកាណាដាផ្តោតលើផលប្រយោធន៍ពាណិជ្ជកម្ម និងការវិនិយោគជាមួយបណ្តាប្រទេសសមាជិកក្រុមប្រឹក្សាសហប្រតិបត្តិការឈូងសមុទ្រពែក្ស ដែលមានអារ៉ាប៊ីសាអូឌីតជាក្បាលម៉ាស៊ីន និងមានប្រទេសជាសមាជិកដូចជា៖ អេមីរ៉ាតអារ៉ាប់រួម បារ៉ែន កូវ៉ែត អូម៉ង់ និងកាតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ