លោក ដូណាល់ ត្រាំ ស្នើសុំលប់ចោលកម្មវិធីចាប់ឆ្នោតផ្សងសំណាងទៅរស់នៅសហរដ្ឋអាមេរិក
ចុះផ្សាយនៅថ្ងៃ៖
ស្តាប់ - ០៤:៣១
ក្រោយពីមានភេរវកម្មបើកឡានបុកមនុស្សនៅទីក្រុងញ៉ូវយកកាលពីសប្តាហ៍មុន លោកប្រធានាធិបតីអាមេរិក ដូណាល់ ត្រាំ បានទាមទារឲ្យពិនិត្យមើលឡើងវិញ និងរឹតបន្តឹងកម្មវិធីចាប់ឆ្នោតផ្សងសំណាងមករស់នៅសហរដ្ឋអាមេរិក។ លោក ត្រាំ ក៏ថែមទាំងបានអំពាវនាវលប់ចោលកម្មវិធីនេះទៀតផង។ តាមរយៈកម្មវិធីអន្តោប្រវេសន្តនេះហើយ ដែលភេរវជនដើមកំណើតអ៊ូសបេគីស្ថានបានឈានជើងចូលមករស់ជាអចិន្រ្តៃយ៍ ដោយស្របច្បាប់នៅសហរដ្ឋអាមេរិក។
តើកម្មវិធីចាប់ឆ្នោតផ្សងសំណាងនេះត្រូវបានបង្កើតចាប់តាំងពីពេលណា? តើហេតុអ្វីបានជាសហរដ្ឋអាមេរិកបង្កើតកម្មវិធីនេះ?
ក្រោយពីចាប់ខ្លួនភេរវជន Sayfullo Saipov ដើមកំណើតអ៊ូសបេគីស្ថាន អាជ្ញាធរអាមេរិកបានរកឃើញថា ភេរវជនរូបនេះបានចូលមកសហរដ្ឋអាមេរិកចាប់តាំងពីឆ្នាំ២០១០ មកម្ល៉េះ។ ភេរវជនរូបនេះបានទទួលទិដ្ឋាការស្នាក់នៅអចិន្ត្រៃយ៍ ក្នុងក្របខ័ណ្ឌនៃកម្មវិធីចាប់ឆ្នោតផ្សងសំណាង។ ដូចតាមទំលាប់ធម្មតា លោកប្រធានាធិបតី ដូណាល់ ត្រាំ បានឆ្លៀតឱកាសសរសេរនៅលើបណ្តាញសង្គម Twitter ដោយបានរិះគន់ខ្លាំងៗ ចំពោះកម្មវិធីអន្តោប្រវេសន្តចាប់ឆ្នោតផ្សងសំណាងនេះ។
លោកប្រធានាធិបតីក៏បានស្នើឲ្យអាជ្ញាធរអន្តោប្រវេសន្តអាមេរិកពិនិត្យឡើងវិញ និងរឹតបន្តឹងការផ្តល់ប័ណ្ណបៃតងស្នាក់នៅអចិន្រ្តៃយ៍ដល់ជនអន្តោប្រវេសន្ត។ ដោយបានស្នើសុំលប់ចោលប្រព័ន្ធកម្មវិធីចាប់ឆ្នោតផ្សងសំណាងមករស់នៅសហរដ្ឋអាមេរិក លោក ដូណាល់ ត្រាំ បានអំពាវនាវជំរុញឲ្យសភាទាំងពីរថ្នាក់ចាប់ផ្តើមការងារពិនិត្យស្វែងរកយន្តការច្បាប់ ដើម្បីដកចោលកម្មវិធីនេះចេញពីច្បាប់អន្តោប្រវេសន្ត។
គួររំលឹកជូនផងដែរ កម្មវិធីចាប់ឆ្នោតផ្សងសំណាងទៅរស់នៅសហរដ្ឋអាមេរិកត្រូវបានគេស្គាល់តាមរយៈឈ្មោះជាផ្លូវការថា កម្មវិធីទិដ្ឋាការសំរាប់ជនអន្តោប្រវេសនន្តចំរុះជាតិសាសន៍ (Diversity Immigrant Visa Program)។ កម្មវិធីនេះមានគោលដៅផ្តល់ប័ណ្ណបៃតង (Green Card) ដើម្បីអនុញ្ញាតឲ្យជនអន្តោប្រវេសន្តអាចស្នាក់នៅជាអចិន្ត្រៃយ៍នៅលើទឹកដីអាមេរិក។ កម្មវិធីនេះត្រូវបានគេអនុវត្តសាកល្បងចាប់តាំងពីឆ្នាំ១៩៨៦មកម្ល៉េះ។ ប៉ុន្តែ រហូតមកដល់ឆ្នាំ១៩៩០ ទើបកម្មវិធីនេះត្រូវបានដាក់បញ្ជូលទៅក្នុងច្បាប់អន្តោប្រវេសន្តអាមេរិក (Immigration Act)។ ហើយគេត្រូវរង់ចាំរយៈពេល ៥ ឆ្នាំ ពោលគឺ ឆ្នាំ១៩៩៥ ទើបគេឃើញមានទិដ្ឋាការអន្តោប្រវេសន្តតំបូងតាមរយៈកម្មវិធីនេះត្រូវបានចេញដោយអាជ្ញាធរអាមេរិក។
មូលហេតុដែលរដ្ឋាភិបាលអាមេរិកបង្កើតកម្មវិធីចាប់ឆ្នោតផ្សងសំណាងនេះ គឺក្នុងគោលបំណងផ្តល់ឱកាសដល់បណ្តាប្រទេសណា ដែលពុំសូវមានប្រជាពលរដ្ឋទទួលបានទិដ្ឋាការអាមេរិក ដើម្បីឲ្យពលរដ្ឋនោះអាចទទួលបានសិទ្ធិរស់នៅស្របច្បាប់លើទឹកដីសហរដ្ឋអាមេរិក តាមរយៈប្រព័ន្ធចាប់ឆ្នោតស្ម័គ្រចិត្ត។ ដើម្បីចុះឈ្មោះក្នុងប្រព័ន្ធចាប់ឆ្នោតនេះ មានល័ក្ខខ័ណ្ឌមួយចំនួន ដែលបេក្ខជនម្នាក់ៗត្រូវពិនិត្យ។
ជាបឋម បេក្ខជនត្រូវផ្ទៀងផ្ទាត់ថា តើប្រទេសកំណើតរបស់ខ្លួនស្ថិតនៅក្នុងបញ្ជីនៃកម្មវិធីនេះដែរឬទេ? ជាធម្មតា ប្រទេសដែលស្ថិតនៅក្នុងបញ្ជីចាប់ឆ្នោតផ្សងសំណាងនេះ គឺជាប្រទេសដែលមានចំនួនពលរដ្ឋរបស់ខ្លួនតិចជាង ៥ ម៉ឺននាក់ ដែលបានទទួលទិដ្ឋាការអាមេរិកក្នុងរយៈពេល ៥ ឆ្នាំចុងក្រោយ។ មានពលរដ្ឋមកពីប្រទេសមួយចំនួនមិនត្រូវបានអនុញ្ញាតឲ្យចូលរួមក្នុងកម្មវិធីចាប់ឆ្នោតផ្សងសំណាងទិដ្ឋាការអាមេរិកនេះទេ។ ក្នុងចំណោមនោះ គឺមានប្រទេសកាណាដា ចិន ឥណ្ឌា អង់គ្លេស និងសាធារណរដ្ឋដូមីនិក ជាដើម។
បន្ទាប់មក ដើម្បីអាចដាក់ពាក្យសុំចូលរួមក្នុងកម្មវិធីចាប់ឆ្នោតនេះ រាល់បេក្ខជនទាំងអស់ត្រូវឆ្លើយកម្រងសំណួរដ៏ខ្លីមួយ។ ការដាក់ពាក្យតែងធ្វើឡើងជារៀងរាល់ឆ្នាំ ចន្លោះពីខែតុលា ដល់ខែវិច្ឆិការ។ បេក្ខជនត្រូវមានកំរិតវប្បធម៌យ៉ាងហោចណាស់ត្រឹមសញ្ញាប័ត្រមធ្យមសិក្សាទុទិយភូមិ។ បើនិយាយឲ្យស្រួលស្តាប់ គឺត្រូវបញ្ចប់ការសិក្សានៅថ្នាក់វិទ្យាល័យ។ ក្រោយពីបេក្ខជនត្រូវបានជ្រើសរើសតាមរយៈចាប់ឆ្នោត អាជ្ញាធរអន្តោប្រវេសន្តអាមេរិកនឹងត្រួតពិនិត្យលើបេក្ខជននោះ ដោយផ្តោតលើចំនុចសំខាន់ចំនួន ២។ ទីមួយ គឺត្រូវធានាថា ជននោះពុំធ្លាប់មានប្រវត្តិជាប់ទោសទេ។ ទីពីរ គឺត្រូវធានាថា បេក្ខជននោះមានសុខភាពល្អ។ បើល័ក្ខខ័ណ្ឌទាំងពីរត្រូវបានបំពេញសព្វគ្រប់ អាជ្ញាធរអាមេរិកនឹងផ្តល់ទិដ្ឋាការអនុញ្ញាតឲ្យបេក្ខជនអាចធ្វើដំណើរមករស់នៅជាអចិន្រ្តៃយ៍លើទឹកដីអាមេរិក។
បើយោងតាមស្ថានីយ៍ទូរទស្សន៍ CNN បានឲ្យដឹងថា ជារៀងរាល់ឆ្នាំ សហរដ្ឋអាមេរិកផ្តល់ប័ណ្ណបៃតងចំនួន ១ លានដល់អ្នកដាក់ពាក្យសុំធ្វើអន្តោប្រវេសន្តមករស់នៅលើទឹកដីខ្លួន។ ភាគច្រើននៃអ្នកបានសិទ្ធិរស់នៅ គឺតាមរយៈការធានាពីក្រុមគ្រួសារ។ មួយចំនួនទៀត គឺជាអ្នកបានសិទ្ធិរស់នៅតាមរយៈការសុំសិទ្ធិជ្រកកោន ក្នុងឋានៈជាជនភៀសខ្លួន។ ចំណែកអ្នកទទួលបានសិទ្ធិរស់នៅតាមរយៈការចាប់ឆ្នោតស្ម័គ្រចិត្តផ្សងសំណាងវិញ គឺមានចំនួន ៥ ម៉ឺននាក់ក្នុងមួយឆ្នាំ។ បើផ្អែកលើទិន្នន័យរបស់ក្រសួងការបរទេសអាមេរិកបានឲ្យដឹងថា កាលពីឆ្នាំ២០១៦ មានបេក្ខជនជាង ១៧ លាននាក់មកពីជុំវិញពិភពលោកបានដាក់ពាក្យសុំចូលរួមក្នុងកម្មវិធីចាប់ឆ្នោតផ្សងសំណាងនេះ។ ប៉ុន្តែ មានបេក្ខជនចំនួនតែ ១% ប៉ុណ្ណោះ ដែលបានទទួលជ័យលាភីទិដ្ឋាការសហរដ្ឋអាមេរិក។
កន្លងមក កម្មវិធីអន្តោប្រវេសន្តនេះតែងបានទទួលការរិះគន់ជាហូរហែរ ចាប់តាំងពីសភាអាមេរិកទាំងពីរថ្នាក់បានអនុម័តដាក់ឲ្យដំណើរការ។ ក្រុមអ្នករិះគន់បានសំដែងថា កម្មវិធីនេះងាយស្រួលប្រឈមនឹងបណ្តាញក្រុមទុច្ចរឹតកុហកបោកប្រាស់។ ហើយកម្មវិធីនេះក៏ងាយអនុញ្ញាតឲ្យជនអន្តោប្រវេសន្ត ដែលពុំសូវបានរៀនសូត្រជ្រៅជ្រះអាចចូលមករស់នៅលើទឹកដីអាមេរិក។ ម៉្យាងទៀត ជនទាំងនោះក៏គ្មានមនោសញ្ចេតនាស្រលាញ់ចូលចិត្តអាមេរិកឡើយ។
ជារឿយៗ ក្រុមអ្នកតំណាងរាស្រ្ត និងក្រុមសមាជិកព្រឹទ្ធសភាអាមេរិក មកពីគណបក្សសាធារណរដ្ឋ ក៏ដូចជាគណបក្សប្រជាធិបតេយ្យ ក៏ធ្លាប់បានបង្ហាញពីបំណងចង់ធ្វើកំណែទម្រង់កម្មវិធីអន្តោប្រវេសន្តនេះដែរ។ ប៉ុន្តែ ការប៉ុនប៉ងធ្វើកំណែទម្រង់តែងជួបបរាជ័យជានិច្ច។ កាលពីឆ្នាំ២០១៣ កំណែទម្រង់នេះសឹងតែជិតបានសំរេចទៅហើយ។ កាលនោះ គណបក្សទាំងពីរបានដាក់សំណើរួមគ្នា ដើម្បីធ្វើវិសោដនកម្មកម្មវិធីចាប់ឆ្នោតផ្សងសំណាងនេះ។ នៅក្នុងដំណាក់កាលតំបូង សំណើនេះត្រូវបានព្រឹទ្ធិសភាអាមេរិកអនុម័តយ៉ាងរលូន។ ប៉ុន្តែ ចៃដន្យអាក្រក់ សំណើនេះត្រូវបានសភាតំណាងរាស្រ្តទាត់ចោលទាំងស្រុង។ សម័យកាលនោះ សភាតំណាងរាស្រ្តស្ថិតនៅក្នុងកណ្តាប់ដៃគណបក្សសាធារណរដ្ឋ ដែលមានចំនួនតំណាងរាស្រ្តច្រើនលើសលុប។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ