តើប្រេស៊ីលរៀបចំខ្លួនទាន់ដើម្បីទទួលការប្រកួតកីឡាបាល់ទាត់ ហើយ ឬនៅ?
ចុះផ្សាយនៅថ្ងៃ៖
ស្តាប់ - ០៤:៥៥
ប្រេស៊ីលមានពេល៦ខែទៀត ដើម្បីធ្វើយ៉ាងម៉េចឲ្យការប្រកួតបាល់ទាត់ពិភពលោកប្រព្រឹត្តទៅដោយរលូន។ នៅមួយខែទៀត ប្រេស៊ីលនឹងទទួលបើកការប្រកួតបាល់ទាត់ពិភពលោក។ ប៉ុន្តែតើស្តាតរបស់ប្រេស៊ីលត្រៀមខ្លួនទទួលទស្សនិកជនហើយឬនៅ។ តើការដ្ឋានសាងសង់ស្តាតបានឈានដល់កម្រិតណាហើយ? បន្ទាប់ពីមានករណីធ្លាក់ស្លាប់កម្មករពីរនាក់ នៅក្នុងការដ្ឋានស្តាត នៅSao Polo បញ្ហារបស់ប្រេស៊ីលដែលត្រូវធ្វើជាម្ចាស់ផ្ទះនៃការប្រកួតកីឡាបាល់ទាត់ពិភពលោកបានលេចចេញរូបរាងកាន់តែច្បាស់។
រហូតមកដល់ម៉ោងនេះ គេពិបាកនឹងនិយាយណាស់ថា តើគេគួរតែមានសុទិដ្ឋិនិយម ឬមួយក៏ត្រូវចាប់ផ្តើមចោទសួរឡើងវិញ ពីរឿងប្រកួតបាល់ទាត់ពិភពលោកឆ្នាំ២០១៤។ អង្គការFIFA បានដាក់កំហិតឲ្យប្រេស៊ីលបញ្ចប់ការសាងសង់ស្តាតទាំងអស់នៅចុងឆ្នាំនេះ។ ប៉ុន្តែ នៅលើទីតាំងជាក់ស្តែង ការបញ្ចប់ការសាងសង់ស្តាត ឲ្យរួចរាល់ នៅចុងឆ្នាំ នេះ ពិតជាមិនអាចទៅរួចឡើយ។ ស្តាតនៅទីក្រុង Sao Polo ដែលកម្មករពីរនាក់បានជួបគ្រោះថ្នាក់ដល់ស្លាប់ជីវិត កាលពីចុងខែវិច្ឆិកា កំពុងស្ថិតនៅស្រកាក នៅឡើយ និងមិនអាចបញ្ចប់ទាន់កាលកំណត់របស់FIFA ឡើយ។ តាមអាជ្ញាធរប្រេស៊ីល ទទួលបន្ទុកការសាងសង់ គេត្រូវការដល់ទៅជាង២ខែ ដើម្បីបញ្ចប់សព្វគ្រប់ការងារសាងសង់ស្តាត នៅSao Polo។
ការដែល FIFAដាក់កំហិតឲ្យស្តាតទំាងអស់បញ្ចប់ការសាងសង់ជាស្ថាពរ នៅចុងឆ្នាំ នេះ ក៏ព្រោះតែ FIFA ត្រូវការស្តាតដើម្បីធ្វើតេស្ត រៀបចំការប្រកួតសាកល្បងយ៉ាងហោចឲ្យបានបីដង នៅមុនការប្រកួតកីឡាបាល់ទាត់ ជាផ្លូវការចាប់ផ្តើម។ បច្ចុប្បន្ននេះទៀត បន្ទាប់ពីមានគ្រោះថ្នាក់បាត់បង់ជីវិតរបស់កម្មករ រដ្ឋអាជ្ញាធរប្រេស៊ីលកំពុងចាប់ផ្តើមស៊ើបអង្កេតលើករណីមិនប្រក្រតីនៅក្នុងការសាងសង់ស្តាត។ គម្រោងសាងសង់ស្តាតត្រូវបានគេកែតម្រូវចុះឡើង។ ឧទាហរណ៍ចំនួនកៅអីនៅស្តាត Sao Polo ត្រូវបានកាត់បន្ថយពីជាង៥ម៉ឺនកៅអី មិននៅជាង៤ម៉ឺន កៅអី។ រដ្ឋអាជ្ញាបានបញ្ជាឲ្យក្រុមហ៊ុនទទួលបន្ទុកសាងសង់ពិនិត្យមើលឡើងវិញ និងត្រូវធានាថា ការរុះរើគម្រោងនឹងមិនប៉ះពាល់ដល់ប្រព័ន្ធគ្រឹះរបស់ស្តាត។
ដើមឡើយ អង្គការ FIFAបានទាមទារឲ្យមានស្តាតយ៉ាងតិច ៨សម្រាប់ទទួលការប្រកួតបាល់ទាត់ពិភពលោក ប៉ុន្តែ ប្រេស៊ីលវិញ បានសម្រេចសាងសង់ស្តាតឲ្យបាន១២ នោះមិនមែនដើម្បី ឆ្លើយតបនឹងតម្រូវការនៃចំនួនអ្នកចូលមើលទេ ប៉ុន្តែ ដើម្បីឆ្លើយតបទៅនឹងការទាមទាររបស់ទីក្រុងនីមួយៗ ពោល គឺដូចជាការបែងចែកនំចំណីឲ្យស្មើៗគ្នា ដើម្បីកុំឲ្យមានការច្រណែនគ្នាតែប៉ុណ្ណោះ។
នៅចំកណ្តាលប្រេស៊ីល គឺស្តាតនៅManaus ដែលបង្កឲ្យមានការរិះគន់ខ្លាំងជាងគេ។ នៅពេលដែលតំបន់ជុំវិញស្តាតគ្មានក្រុមបាល់ទាត់ជម្រើសថ្នាក់ជាតិ កម្មករជិត២ពាន់នាក់កំពុងធ្វើការយ៉ាងញាប់ដៃជើង ដើម្បីបញ្ចប់ការសាងសង់ស្តាតArena da Amazonia មានសមត្ថភាពទទួលទស្សនិកជនដល់ទៅ ៤ម៉ឺន ៤ពាន់នាក់។ អ្វីដែលចម្លែក គឺអាជ្ញាធរប្រេស៊ីលបានចំណាយលុយដល់ទៅជាង២០០លានអឺរ៉ូ ដើម្បីសង់បញ្ចប់ស្តាតនេះ ដែលតាមពិតទៅ វានឹងទទួលការប្រកួតតែបួនប៉ុណ្ណោះ ក្នុងអំឡុងការប្រកួតបាល់ទាត់ពិភពលោក។ ការសាងសង់ស្តាត នេះទៀត ត្រូវបានគេវាយតម្លៃថា មានតម្លៃថ្លៃ គឺច្រើនជាងក្នុងពេលគេសាងសង់ស្តាតសម្រាប់ការប្រកួតកីឡាបាល់ទាត់ពិភពលោក ក្នុងប្រទេសអាហ្រ្វិកខាងត្បូង។ នេះគេនៅមិនទាន់និយាយដល់អំពើពុករលួយដែលកាន់តែរីករាលដាល បន្ទាប់ពីរដ្ឋាភិបាល ដែលចង់ចំណេញពេលវេលាបានលុបចោល ច្បាប់ដែលធ្លាប់តម្រូវឲ្យមានការដាក់ដេញថ្លៃ។ គ្មានការដាក់ដេញថ្លៃ គឺលុយសំណូកដែលកំណត់មុខក្រុមហ៊ុនដែលទទួលបន្ទុកសាងសង់ស្តាត ឬហេដ្ឋារចនាសម្ព័ន្ធដែលពាក់ព័ន្ធនឹងការប្រកួតកីឡាបាល់ទាត់ពិភពលោក។
ការល្មោភចង់បានលើសសមត្ថភាព នេះហើយជាអ្វីដែលគេកំពុងបន្ទោសអាជ្ញាធរប្រេស៊ីល។ នៅក្នុងស្រុក រដ្ឋាភិបាលប្រេស៊ីលកំពុងរងការរិះគន់មិនតិចដែរ និងកំពុងជួបចលនាប្រឆាំងរបស់មហាជន ដែលបានបន្ទោសរដ្ឋាភិបាលថា មិនបានយកចិត្តទុកដាក់លើវិស័យសង្គម ប៉ុន្តែ បែរជាទៅចំណាយលុយរាប់លានដុល្លារ ដើម្បីសាងសង់ស្តាត ទទួលការប្រកួតបាល់ទាត់ទៅវិញ។ ក្រុមបាតុករបានសន្យាថា នឹងធ្វើបាតុកម្មតវ៉ា ជានិច្ច ចាប់ពីពេលនេះ រហូតដល់ពេលកំពុងប្រកួតកីឡាបាល់ទាត់ ដែលនឹងត្រូវចាប់ផ្តើមពីខែមិថុនា ដល់ពាក់កណ្តាលខែកក្កដា ឆ្នាំក្រោយ។
សូមរំលឹកឡើងវិញថា កាលពីឆ្នាំ ២០០៧ ប្រជាជនប្រេស៊ីលជាទូទៅ បានធ្វើបុណ្យអបអរដែលប្រទេសប្រេស៊ីលជាប់ឆ្នោតដើម្បីធ្វើជាម្ចាស់ផ្ទះរៀបចំការប្រកួតបាល់ទាត់ពិភពលោក។ ប៉ុន្តែ ក្តីសប្បាយរីករាយកើតមាន ដោយមកពីលោកប្រធានាធិបតី ជំនាន់នោះបានសន្យាថា ការចំណាយដើម្បីរៀបចំការប្រកួតនឹងត្រូវធានាដោយក្រុមហ៊ុនឯកជន ហើយរដ្ឋាភិបាលនឹងបង្ហាញតម្លាភាពក្នុងការចំណាយនានាដល់មហាជន។ ប៉ុន្តែ ៥ឆ្នាំក្រោយការសន្យា អ្វីៗផ្ទុយស្រលះ។ រដ្ឋាភិបាលប្រេស៊ីលត្រូវបង្ខំចិត្តចេញលុយហោប៉ៅ ដោយសារតែខ្វះការចូលរួមវិនិយោគពីឯកជន។
ប្រជាជនដែលចុះតវ៉ានៅតាមផ្លូវ បាននិយាយថា ពួកគេមិនបានប្រឆាំងនឹងគំនិតរៀបចំកីឡាបាល់ទាត់ពិភពលោកនៅប្រេស៊ីលទេ។ វាជាកិត្តិយសដ៏ធំធេងសម្រាប់ប្រេស៊ីល ប្រទេសនិយមបាល់ទាត់ ដែលមានឱកាសទទួលរៀបចំកីឡាបាល់ទាត់។ ប៉ុន្តែ អ្វីដែលប្រជាជនប្រេស៊ីលតវ៉ាប្រឆាំងបច្ចុប្បន្ន គឺ របៀប ដំណើរការដែលរដ្ឋាភិបាលចាត់ចែងដើម្បីរៀបចំទទួលការប្រកួតកីឡាបាល់ទាត់ពិភពលោក។ សម្រាប់ប្រជាជនប្រេស៊ីល រដ្ឋាភិបាលបានចំណាយថវិការដ្ឋរាប់រយលាន ដុល្លារ ដើម្បីសាងសង់ស្តាត ក្នុងពេលដែលប្រជាជនប្រេស៊ីលរាប់លាននាក់កំពុងរស់នៅក្នុងភាពក្រីក្រ។ លើសពីនោះ រដ្ឋាភិបាលមិនបានអើពើចំណាយលុយដើម្បីពង្រឹងសេវាសុខភាព និងអប់រំ ដែលតាមពិត ប្រជាជនប្រេស៊ីលត្រូវការក្នុងពេលបច្ចុប្បន្ននេះ ប៉ុន្តែ មិនមែនការប្រកួតបាល់ទាត់។ ការប្រកួតបាល់ទាត់បានក្លាយជាប្រភពចង្រៃដល់ប្រជាជនប្រេស៊ីល។ តម្លៃទំនិញឡើងថ្លៃ ក្នុងពេលប្រាក់ខែរបស់ប្រជាជនប្រេស៊ីលមានមិនច្រើនជាង ២៣០អឺរ៉ូ ក្នុងមួយខែ។ តម្លៃអចលនទ្រព្យវិញបានឡើងបាន កប់ពពក រហូតធ្វើឲ្យរដ្ឋធានីប្រេស៊ីលក្លាយជាទីក្រុងទីបីដែលថ្លៃជាងគេ នៅក្នុងពិភពលោក។ នៅ៦ខែមុនការប្រកួតបាល់ទាត់ពិភពលោក បន្ទប់សណ្ឋាគារឡើងថ្លៃរួចហើយ ដល់៨០ភាគរយ រហូតដល់តម្លៃ ជាង២៤០ដុល្លារ សម្រាប់បន្ទប់ធម្មតា។ នេះគេមិនទាន់និយាយតម្លៃសំបុត្រហោះហើរ ដែលត្រៀមនឹងបោះពួយឡើងខ្ពស់ នៅពេលការប្រកួតបាល់ទាត់ពិភពលោកកាន់តែខិតជិតមកដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ