អង្គការរដ្ឋអ៊ីស្លាមកំពុងសិក្សាពីលទ្ធភាពជ្រើសរើសសកម្មជនប្រយុទ្ធនៅប្រទេសអាហ្វហ្កានីស្ថាន
ចុះផ្សាយនៅថ្ងៃ៖
ស្តាប់ - ០៤:១០
របាយការណ៍របស់ក្រសួងការពារជាតិអាមេរិកបានអោយដឹងថា អង្គការរដ្ឋអ៊ីស្លាមកំពុងស្ថិតក្នុងដំណាក់សិក្សាដំបូង ស្ទាបស្ទង់ពីលទ្ធភាពជ្រើសរើសយុទ្ធជនជីហាត ដើម្បីធ្វើសង្គ្រាមគ្រប់គ្រងប្រទេសអាហ្វហ្កានីស្ថាន។ ការប៉ុនប៉ងវាតទីរបស់អង្គការរដ្ឋអ៊ីស្លាមនេះមិនត្រឹមតែធ្វើអោយសហរដ្ឋអាមេរិកព្រួយបារម្ភប៉ុណ្ណោះទេ សូម្បីតែចលនាឧទ្ទាមតាលីបង់នៅអាហ្វហ្កានីស្ថានក៏មិនសប្បាយចិត្តដែរ។ មកដល់ពេលនេះ កំលាំងយោធាអាមេរិកប្រចាំការនៅទីនោះបានទទួលតំរុយខ្លះៗថា ការជ្រើសរើសកំលាំងយុទ្ធជនគឺ ស្ថិតនៅក្នុងកំរិតតូចមួយ ចេញពីក្រុមឧទ្ទាមតូចៗផ្សេងទៀត។ ក្រុមជីហាតថ្មីនេះហៅឈ្មោះខ្លួនឯងថា «ក្រុមខេត្តខូរាសាន» ដោយអះអាងថា ពួកខ្លួនជាសាខារបស់អង្គការរដ្ឋអ៊ីស្លាមនៅអាហ្វហ្កានីស្ថាន។
អង្គការរដ្ឋអ៊ីស្លាមកំពុងជ្រើសរើសសកម្មជនប្រយុទ្ធក្នុងជួរពួកតាលីបង់
កាលពីខែឧសភាកន្លងទៅនេះ លោកឧត្តមសេនីយអាមេរិក John Campbell ប្រមុខបេសកកម្មអូតង់ប្រចាំការនៅប្រទេសអាហ្វហ្កានីស្ថានបានប្រកាសអោយដឹងថា ក្រុមអង្គការរដ្ឋអ៊ីស្លាមបានចាប់ផ្តើមរើសកំលាំងប្រយុទ្ធបណ្តើរៗ ប៉ុន្តែ កំលាំងនេះពុំទាន់មានលទ្ធភាពអាចដឹកនាំប្រតិបត្តិការវាយប្រយុទ្ធនៅឡើយទេ។ នៅក្នុងរបាយការណ៍របស់ក្រសួងការពារជាតិអាមេរិក ដែលបានដាក់ជូនសភាទាំងពីរថ្នាក់ កាលពីសប្តាហ៍មុន អ្នកជំនាញអាមេរិកបានវិភាគអោយដឹងថា ការព្យាយាមវាតទីសមរភូមិប្រយុទ្ធរបស់អង្គការរដ្ឋអ៊ីស្លាម ក្នុងទឹកដីប្រទេសអាហ្វហ្កានីស្ថាន កំពុងបង្កើនក្តីព្រួយបារម្ភយ៉ាងខ្លាំងដល់ សម្ព័ន្ធមិត្តអន្តរជាតិ រដ្ឋាភិបាលអាហ្វហ្កានីស្ថាន និងបាគីស្ថាន ជាពិសេសក្រុមឧទ្ទាមតាលីបង់ផ្ទាល់តែម្តង។ យោងតាមការវិភាគនេះ ក្រុមអង្គការរដ្ឋអ៊ីស្លាមប្រហែលកំពុងសាកល្បងបន្តបង្កើនវត្តមានរបស់ខ្លួន នៅប្រទេសអាហ្វហ្កានីស្ថាន ក្នុងរយៈប៉ុន្មានឆ្នាំខាងមុខទៀតនេះ។
ប្រតិកម្មរបស់ចលនាតាលីបង់
លើសពីនេះ ក្រុមជីហាតជ្រុលនិយមនេះក៏កំពុងព្យាយាមប្រជែងជាមួយក្រុមឧទ្ទាមតាលីបង់ និងក្រុមឧទ្ទាមបះបោរផ្សេងៗទៀតផងដែរ។ កាលពីសប្តាហ៍មុននេះ ចលនាតាលីបង់ក៏បានព្រមានជាមុនដល់ប្រមុខអង្គការរដ្ឋអ៊ីស្លាម កុំអោយព្យាយាមបង្កើតសាខា ឬបណ្តាញប្រយុទ្ធអោយសោះ នៅលើទឹកដីអាហ្វហ្កានីស្ថាន។ នៅក្នុងលិខិតមួយផ្សព្វផ្សាយ កាលពីថ្ងៃអង្គារកន្លងទៅនេះ ប្រមុខទីពីរតាលីបង់ឈ្មោះ Akhtar Mohammed Mansour បានពន្យល់ថា រាល់ការប្រយុទ្ធតស៊ូប្រឆាំងទល់នឹងកងកំលាំងលោកខាងលិច និងសម្ព័ន្ធមិត្តរបស់ពួកគេ នៅលើទឹកដីអាហ្វហ្កានីស្ថានគឺ ត្រូវតែស្ថិតនៅជ្រកក្រោមដំបូលបញ្ជាតែមួយ។ ក្រុមតាលីបង់នឹងឆ្លើយតបដោយអាវុធ ប្រសិនបើក្រុមអង្គការរដ្ឋអ៊ីស្លាមនៅតែចចេសព្យាយាមចាក់ឬសគល់ និងព្យាយាមយកអាហ្វហ្កានីស្ថានជាឈ្នាន់។ សូមបញ្ជាក់ថា សេចក្តីព្រមាននេះត្រូវបានធ្វើឡើង ក្រោយពីមានការប៉ះទង្គិចគ្នាដោយអាវុធកាលពីថ្មីៗនេះ នៅភាគខាងកើតប្រទេសអាហ្វហ្កានីស្ថាន រវាងយុទ្ធជនតាលីបង់ និងយុទ្ធជនដែលអះអាងខ្លួនថា ជាក្រុមអង្គការរដ្ឋអ៊ីស្លាម។
ក្រុមតាលីបង់នៅតែគ្រោះថ្នាក់បំផុត
ទោះបីជាយ៉ាងណាក៏ដោយ មន្រ្តីយោធាអាមេរិកគូសបញ្ជាក់ថា ចលនាតាលីបង់នៅតែជាក្រុមសកម្មប្រយុទ្ធតស៊ូដ៏ស្វិតស្វាញបំផុត និងនៅតែបន្តបញ្ចុះបញ្ចូលប្រជាជនអាហ្វហ្កានីស្ថានអោយគាំទ្រខ្លួន។ ក្នុងចំណោមក្រុមឧទ្ទាមទាំងអស់ក្រោមចំណុះពួកតាលីបង់ បណ្តាញ Haqqani ត្រូវបានគេចាត់ទុកថាជា ក្រុមគ្រោះថ្នាក់ជាងគេបង្អស់ ដែលតែងគំរាមកំហែងដល់កំលាំងយោធាអាមេរិក និងអាហ្វហ្កានីស្ថាន។ ជាពិសេស ក្រុមនេះគឺជា គោលត្រីវិស័យមួយដ៏សំខាន់បំផុតរបស់បណ្តាញភេរវនិយមអាល់កៃដា។ មន្ទីរបញ្ចកោណក៏កត់សំគាល់ផងដែរថា សាខាដ៏មានឥទ្ធិពលរបស់បណ្តាញអាល់កៃដាមួយនេះ នៅតែមានលទ្ធភាពអាចធ្វើផែនការ និងដឹកនាំការប្រយុទ្ធបានគ្រប់ពេលវេលា។
បច្ចុប្បន្ននេះ ទាហានអាមេរិកចំនួន ៩ ៨០០ នាក់កំពុងត្រូវបានដាក់ពង្រាយនៅប្រទេសអាហ្វហ្កានីស្ថាន ក្នុងក្របខ័ណ្ឌនៃបេសកកម្មសម្ព័ន្ធមិត្តអាត្លង់ទិក ដែលមានទាហានសរុបចំនួន ១២ ៥០០ នាក់។ បេសកកម្មយោធានេះបានបន្តវេនពីកងកំលាំងជំនួយសន្តិសុខអន្តរជាតិ (ISAF) ដែលបានដកចេញ កាលពីខែធ្នូ ឆ្នាំ ២០១៤ ។ សហរដ្ឋអាមេរិកគ្រោងដកកំលាំងយោធារបស់ខ្លួន ចំនួនពាក់កណ្តាល គិតចាប់ពីឆ្នាំនេះតទៅ។ ប៉ុន្តែ លោកប្រធានាធិបតី បារ៉ាក់ អូបាម៉ា បានសំរេចចិត្តរក្សាអោយនៅចំនួនដដែលវិញសិន។
សូមរំលឹកថា ពួកតាលីបង់ត្រូវបានសម្ព័ន្ធមិត្តលោកខាងលិចបណ្តេញចេញពីអំណាចកាលពីខែធ្នូ ឆ្នាំ ២០០១។ ចាប់ពីពេលនោះមក ពួកតាលីបង់បានដឹកនាំការប្រយុទ្ធប្រឆាំងនឹងរដ្ឋាភិបាលក្រុងកាប៊ូល និងសម្ព័ន្ធមិត្តបរទេស។ ដូចនេះ ការប៉ុនប៉ងរបស់អង្គការរដ្ឋអ៊ីស្លាមក្នុងការដឹកនាំការប្រយុទ្ធនៅអាហ្វហ្កានីស្ថានមិនត្រូវបានពួកតាលីបង់ស្វាគមន៍ឡើយ។
តើក្រុមតាលីបង់ និងក្រុមអង្គការរដ្ឋអ៊ីស្លាមខុសគ្នាដូចម្តេចខ្លះ?
បើតាមយោបល់របស់អ្នកជំនាញផែ្នកវិទ្យាសាស្ត្រនយោបាយ លោក Ahmad Saeedi បានអោយដឹងថា អ្នកគាំទ្រក្រុមតាលីបង់អស់រយៈពេលជាយូរអង្វែងមកហើយនោះ ពួកគេនៅតែបន្តជួយពួកតាលីបង់ដដែល។ កាលពីអតីតៈកាល ពេលកំពុងកាន់កាប់អំណាច គឺក្រុមតាលីបង់នេះហើយ ដែលធ្លាប់ផ្តល់ទីកន្លែងជ្រកកោនអោយ អ៊ូសាម៉ា ប៊ិនឡាដិន ក្នុងទឹកដីរបស់ខ្លួន។ ផ្ទុយពីក្រុមអង្គការរដ្ឋអ៊ីស្លាម ក្រុមតាលីបង់ផ្តោតការវាយប្រហារតែលើទឹកដីអាហ្វហ្កានីស្ថានមួយប៉ុណ្ណោះ។ ហើយ គោលដៅសំខាន់របស់ក្រុមនោះគឺ ទាហាន ឬប៉ូលីសរបស់អាហ្គានីស្ថាន និងសម្ព័ន្ធមិត្តបរទេសលោកខាងលិច ដែលកំពុងឈរជើងនៅលើទឹកដីរបស់ខ្លួន។ ប៉ុន្តែ ទោះបីជាយ៉ាងណាក៏ដោយ រាល់ការវាយប្រហារកន្លងមករបស់ពួកតាលីបង់ ភាគច្រើននៃជនរងគ្រោះច្រើនតែបានប៉ះពាល់ដល់ប្រជាជនស៊ីវិល។
ផ្ទុយទៅវិញ ពួកអង្គការរដ្ឋអ៊ីស្លាមត្រូវបានគេចាត់ទុកថាជា ក្រុមជីហាតជ្រុលនិយម។ ពួកអ៊ីស្លាមនិកាយស៊ុយនីតនេះធ្លាប់បានអះអាងជាច្រើនដងរួចមកហើយថា ពួកគេចង់ពង្រីកវិសាលភាពទឹកដីហួសឆ្ងាយពីព្រំដែនប្រទេសស៊ីរី និងអ៊ីរ៉ាក់ ដោយប្រើប្រាស់ច្បាប់អ៊ីស្លាមដ៏តឹងរឹងមកគ្រប់គ្រង។ ក្រុមសកម្មជនប្រយុទ្ធថ្មីឈ្មោះ «ក្រុមខេត្តខូរូសាន» នៅអាហ្វហ្កានីស្ថាននេះគឺជា ការបង្ហាញពីមហិច្ឆតារបស់ពួកភេរនិយមនេះ។ បើតាមប្រវត្តិសាស្រ្តបានអោយដឹងថា ពាក្យថា «ខេត្តខូរូសាន» នេះគឺ សំដៅទៅលើឈ្មោះប្រទេសអាហ្វហ្កានីស្ថានកាលពីមជ្ឈិមសម័យ។ ហើយ ទឹកដីខូរូសានពីកាលអតីតៈកាលគឺ រាប់បញ្ជូលទឹកដីអាហ្វនីស្ថានបច្ចុប្បន្ន ដែលលាតសន្ធឹងរហូតដល់ទឹកដីភាគឥសានប្រទេសអ៊ីរ៉ង់ និងតំបន់ភាគខាងត្បូងប្រទេសតួកម៉េនីស្ថាន អ៊ូសបេគីស្ថាន និងតាហ្ស៊ីគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ