ក្រុមហ៊ុនប្រេងអង់គ្លេស BP យល់ព្រមបង់លុយសងជំងឺចិត្តចំនួន ១៨,៧ ពាន់លានដុល្លារ
ចុះផ្សាយនៅថ្ងៃ៖
ស្តាប់ - ០៤:៣៣
បន្ទាប់ពីមានរឿងក្តីក្តាំអស់រយៈពេល ៥ ឆ្នាំ ជាមួយសហរដ្ឋអាមេរិក ពាក់ព័ន្ធនឹងការហៀរប្រេងអណែ្តតលើផ្ទៃសមុទ្រ កាលពីឆ្នាំ ២០១០ ក្រុមហ៊ុនប្រេងដ៏ធំរបស់អង់គ្លេស BP បានសុខចិត្តបង់ប្រាក់សងជម្ងឺចិត្តចំនួន ១៨,៧ ពាន់លានដុល្លារ។ ក្រសួងយុត្តិធម៌អាមេរិកបានប្រកាសព័ត៌មាននេះជាផ្លូវការ ក្រោយពីភាគីក្រុមហ៊ុនបានយល់ព្រមជាគោលការណ៍ក្នុងការបង់ប្រាក់ពិន័យនេះ ដើម្បីជួសជុលផលការខូចខាតប្រព័ន្ធបរិស្ថានក្នុងឈូងសមុទ្រម៉ិចសិក និងជាពិសេសស្តារសេដ្ឋកិច្ច និងជីវភាពប្រជាជនរស់នៅតាមបណ្តារដ្ឋជាប់ឆ្នេរសមុទ្រ។ នេះជាលើកទីមួយហើយក្នុងប្រវត្តិសាស្រ្តអាមេរិក ដែលក្រុមហ៊ុនឯកជនមួយសុខចិត្តបង់ប្រាក់ពិន័យដ៏ច្រើនលើសលប់បែបនេះ។
ទីបំផុត ក្រុមហ៊ុនប្រេងអង់គ្លេស British Petroleum (BP) បានឯកភាពជាគោលការណ៍ សុខចិត្តបង់ថ្លៃសំណងខូចខាត ក្រោយគ្រោះមហន្តរាយហៀរប្រេងឆៅអណែ្តតលើផ្ទៃឈូងសមុទ្រម៉ិចសិក ស្ថិតនៅភាគខាងត្បូងសហរដ្ឋអាមេរិក កាលពីឆ្នាំ ២០១០។ រដ្ឋាភិបាលសហព័ន្ធអាមេរិក និងរដ្ឋចំនួនប្រាំ ដែលរួមមាន៖ រដ្ឋ Louisiane រដ្ឋ Mississippi រដ្ឋ Alabama រដ្ឋ Texas និង រដ្ឋ Florida បានដាក់ពាក្យបណ្តឹងតាមនិតិរដ្ឋប្បវេណីប្រឆាំងនឹងក្រុមហ៊ុនអង់គ្លេសដ៏ធំនេះ។
ប្រាក់សំណងដ៏ច្រើនមហិមាពុំធ្លាប់មាន
បើតាមលោកស្រី Loretta Lynch រដ្ឋមន្រ្តីក្រសួងយុត្តិធម៌អាមេរិក ប្រាក់សងជម្ងឺចិត្តសរុបចំនួន ១៨,៧ ពាន់លានដុល្លារនេះនឹងយកទៅប្រើប្រាស់ជាប្រយោធន៍ ដើម្បីជួសជុលការខូចខាតលើវិស័យនានា មានជាអាទិ វិស័យសេដ្ឋកិច្ចក្នុងឈូងសមុទ្រម៉ិចសិក វិស័យឧស្សាហកម្មនេសាទក្នុងតំបន់ និងជាពិសេសប្រព័ន្ធជីវចំរុះសមុទ្រ។ ទឹកប្រាក់ដ៏មហាសាលនេះនឹងត្រូវបែងចែកជាបួនផែ្នកធំៗ។ ទីមួយ ទឹកប្រាក់ចំនួន ៥,៥ ពាន់លានដុល្លារនឹងត្រូវបង់ក្នុងនាមជាប្រាក់ពិន័យ តាមផ្លូវបណ្តឹងរដ្ឋប្បវេណី ដោយយោងទៅលើច្បាប់ការពារទឹក។ ទីពីរ ទឹកប្រាក់ ៧,១ ពាន់លានដុល្លារគឺជាប្រាក់សំណងថ្លៃខូចខាតផែ្នកបរិស្ថាន ដោយត្រូវបង់អោយរដ្ឋាភិបាលសហព័ន្ធអាមេរិក និងរដ្ឋចំនួន ៥ ស្ថិតនៅជុំវិញឈូងសមុទ្រម៉ិចសិក។ ក្នុងនោះផងដែរ កញ្ចប់ថវិការចំនួន ២៣២ លានដុល្លារផេ្សងទៀត នឹងត្រូវយកទៅប៉ះប៉ូវថ្លៃខូចខាតនានាក្នុងពេលអនាគត ដែលគេពុំទាន់អាចកំណត់បាននៅឡើយ។
ផែ្នកទីបីគឺ ទឹកប្រាក់ ៤,៩ ពាន់លានដុល្លារ នឹងយកទៅប្រើប្រាស់ជាប្រាក់សងជម្ងឺចិត្តបន្ថែម សំរាប់សងថ្លៃខូចខាតសេដ្ឋកិច្ចក្រោយព្រឹត្តិការណ៍ប្រេងហៀរលើផ្ទៃទឹកសមុទ្រ។ ផ្នែកចុងក្រោយគឺ ទឹកប្រាក់ ១ ពាន់លានដុល្លារនឹងត្រូវបង់ជូនអាជ្ញាធមូលដ្ឋាននានានៅសហរដ្ឋអាមេរិក ដែលបានដុតដៃដុតជើងទប់ស្កាត់គ្រោះមហន្តរាយនាពេលនោះ។
យោងតាមកិច្ចព្រមព្រៀងជាគោលការណ៍រវាងតំណាងក្រុមហ៊ុន BP និងក្រសួងយុត្តិធម៌អាមេរិកប្រាក់ពិន័យ និងប្រាក់សងជម្ងឺចិត្តដ៏ច្រើនសន្ធឹកសន្ធាប់នេះ នឹងត្រូវបង់បណ្តាក់សំរាប់រយៈពេលចន្លោះពី ១៥ ទៅ ១៨ ឆ្នាំ។ ជាសរុប បើគិតរាប់បញ្ចូលទាំងប្រាក់បង់ពិន័យនេះ និងប្រាក់ចំណាយលើថ្លៃបោសសំអាតប្រេងលើផ្ទៃសមុទ្រកន្លងមក ក្រុមហ៊ុន BP បានចំណាយថវិការអស់ចំនួន ៥៤ ពាន់លានដុល្លារ។ ជាថ្នូរមកវិញ រដ្ឋាភិបាលអាមេរិក និងក្រុមភាគីដើមបណ្តឹងដ៏ទៃទៀតសុខចិត្តបោះបង់ចោលពាក្យបណ្តឹងប្រឆាំងក្រុមហ៊ុនយក្សអង់គ្លេសនេះ។
ហេតុអ្វីបានជាក្រុមហ៊ុនប្រេង BP អូសបន្លាយបង់ប្រាក់ពិន័យ?
សូមបញ្ជាក់ថា កិច្ចព្រមព្រៀងនេះបានលេចចេញជារូបរាងឡើង បីថ្ងៃបន្ទាប់ពីក្រុមហ៊ុនប្រេង BP បរាជ័យក្នុងការជំទាស់សាលដិការ នៅតុលាការកំពូលអាមេរិក។ កាលពីដើមសប្តាហ៍មុននេះ តុលាការកំពូលអាមេរិកបានសំរេចទាត់ចោលការជំទាស់របស់ក្រុមហ៊ុន ដែលស្នើសុំពិនិត្យទំហំទឹកប្រាក់សំណងឡើងវិញ ក្រោយសាលដិការតុលាការថ្នាក់ក្រោម កាលពីឆ្នាំ ២០១២។ តាមពិតទៅ កាលពីខែឧសភា ឆ្នាំ ២០១៤ ក្រុមហ៊ុនប្រេងអង់គ្លេស BP និងក្រុមហ៊ុនអាមេរិកដៃគូ Anadarko Petroleum (មកពីរដ្ឋតិចសាស់) បានរួមគ្នាដាក់ពាក្យបណ្តឹងជំទាស់នេះ។ ចំនុចសំខាន់គឺ ពាក់ព័ន្ធនឹងក្រុមហ៊ុននានា ដែលបានប្រកាសការខូចខាត ប៉ុន្តែ ការខូចខាតនោះគ្មានពាក់ព័ន្ធអ្វីបន្តិចទាល់តែសោះជាមួយនឹងមហន្តរាយនេះ។ លើសពីនេះ ក្រុមមេធាវីក្រុមហ៊ុនបានផ្អែកលើសំអាងថា ការខូចខាតទាំងនោះបានកើតឡើងមុនមហន្តរាយនេះទៅទៀត។
ប៉ុន្តែ ទោះបីជាយ៉ាងណាក៏ដោយ តុលាការកំពូលអាមេរិកបានទាត់ចោលទឡ្ហីករណ៍នេះ។ កន្លងមក ក្រុមហ៊ុន BP ធ្លាប់បានព្រមានថា ការសំរេចណាមួយរបស់តុលាការកំពូលអាចបង្កផលប៉ះពាល់អវិជ្ជមាន ពុំបានផ្តល់ភាពយុត្តិធម៌ដល់ក្រុមហ៊ុនឯកជន។ លើសពីនេះ ក្រុមហ៊ុនប្រេងអង់គ្លេសនេះក៏បានគំរាមថា ខ្លួននឹងបន្តស្វះស្វែងរកយុត្តិធម៌បន្ថែមទៀត តាមរយៈការដាក់ពាក្យបណ្តឹងទៅស្ថាប័នដ៏ទៃទៀត ដើម្បីអូសបន្លាយសងជម្ងឺចិត្តដល់ជនរងគ្រោះពិតប្រាកដ។ ប៉ុន្តែ ជាចុងបញ្ជប់ ក្រុមហ៊ុនប្រេង BP និងរដ្ឋាភិបាលអាមេរិកបានសំរេចកិច្ចព្រមព្រៀងមួយ។ ឥឡូវនេះ គេនៅរង់ចាំតែយោបល់ពីតុលាការអាមេរិកនៅតាមបណ្តារដ្ឋពាក់ព័ន្ធ មុននឹងផ្តល់សុពលភាពដល់កិច្ចព្រមព្រៀងបង់ប្រាក់ពិន័យ និងសងជម្ងឺចិត្តនេះ។
ក្រោយពីការប្រកាសដំណឹងនេះ ទីផ្សារភាគហ៊ុនប្រចាំទីក្រុងឡុងរបស់ក្រុមហ៊ុនយក្សអង់គ្លេសមួយនេះបានឡើងចំនួន ៤,៣៥% ស្មើនឹង ៤៣៧,៤០ ផោនក្នុងមួយហ៊ុន។ យើងគួរដឹងផងដែរថា ដើម្បីបានប្រាក់បង់ពិន័យ និងសងជម្ងឺចិត្តនេះ ក្រុមហ៊ុន BP បានលក់ទ្រព្យសកម្មរបស់ខ្លួនក្នុងតំលៃរាប់សែនកោដិដុល្លារ។
គ្រោះមហន្តរាមដ៏អាក្រក់បំផុតក្នុងប្រវត្តិសាស្ត្រហៀរប្រេង
សូមរលឹកផងដែរថា កាលពីថ្ងៃទី ២០ ខែមេសា ឆ្នាំ ២០១០ ស្ថានីយបូមប្រេង Deepwater Horizon ស្ថិតនៅប៉ែកខាងត្បូងសហរដ្ឋងាមេរិក បានឆេះផ្ទុះ។ ហេតុការណ៍នេះបានបណ្តាលអោយបាត់បង់អាយុជីវិតមនុស្សចំនួន ១១ នាក់ និងបានបង្កអោយប្រេងឆៅក្នុងបរិមាណរាប់លានលីត្រអណែ្តត អស់រយៈពេលរាប់ខែ លើផ្ទៃឈូងសមុទ្រម៉ិចសិក។ កាលនោះ គេត្រូវការរយៈពេលជាច្រើនខែ ដើម្បីបិទបំពង់អណ្តូងប្រេងក្រោមបាតសមុទ្រ ដែលស្ថិតនៅជម្រៅ ១៥០០ ម៉ែត្រ។ ឧបត្តិហេតុនេះត្រូវបានគេចាត់ទុកថា ជាសោកនាដកម្មដ៏អាក្រក់បំផុត នៅក្នុងប្រវត្តិមហន្តរាយហៀរប្រេងនៅសហរដ្ឋអាមេរិក។
ប្រាំឆ្នាំក្រោយមហន្តរាយហៀរប្រេងឆៅខ្មៅនេះ ធនធានធម្មជាតិ និងជីវិតសត្វសមុទ្រក្នុងតំបន់នោះនៅតែបន្តទទួលរងផលប៉ះពាល់។ បើតាមការសិក្សារបស់អង្គការបរិស្ថានអាមេរិក National Wildlife Federation កាលពីខែមេសាកន្លងទៅនេះ បានអោយដឹងថា បណ្តាសត្វត្រីដូហ្វាំង សត្វអណ្តើក និងត្រីតុងជាដើម បានរងគ្រោះខ្លាំងជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ