សហរដ្ឋអាមេរិកអនុញ្ញាតអោយបុរសស្រលាញ់ភេទដូចគ្នាបរិច្ចាកឈាម
ចុះផ្សាយនៅថ្ងៃ៖
ស្តាប់ - ០៤:២២
ចាប់ពីថ្ងៃនេះតទៅ បុរសស្រលាញ់ភេទដូចគ្នា ឬទាំងពីរភេទនៅទូទាំងសហរដ្ឋអាមេរិកមានសិទ្ធិអាចបរិច្ចាកឈាមរបស់ខ្លួនបានហើយ។ តាមពិតទៅ គឺអស់រយៈពេល ៣២ ឆ្នាំមកហើយ ដែលសហរដ្ឋអាមេរិកបានដាក់បំរាមមិនអោយមនុស្សប្រុសស្រលាញ់ភេទដូចគ្នាផ្តល់ឈាមក្នុងន័យមនុស្សធម៌។ ប៉ុន្តែ ការអនុញ្ញាតថ្មីនេះតម្រូវអោយបុរសស្រលាញ់ភេទដូចគ្នាត្រូវគោរពល័ក្ខខ័ណ្ឌតឹងរ៉ឹងមួយចំនួន។ ពោល គឺមុននឹងបរិច្ចាកឈាមដល់សាធារណជន បុរសស្រលាញ់ភេទដូចគ្នា ឬស្រលាញ់ទាំងពីរភេទមិនត្រូវមានទំនាក់ទំនងផ្លូវភេទឡើយ ក្នុងរយៈពេល ១២ ខែ។
នយោបាយថ្មីក្នុងការបរិច្ចាកឈាម
កាលពីថ្ងៃទី១៨ ខែធ្នូ ឆ្នាំ២០១៥ កន្លងទៅនេះ សហរដ្ឋអាមេរិកបានលុបចោលបំរាម ដែលបានហាមឃាត់មិនអោយបុរសស្រលាញ់ភេទដូចគ្នាបរិច្ចាកឈាម។ សេចក្តីសំរេចចិត្តនេះត្រូវបានធ្វើឡើងដោយទីភ្នាក់ងារឱសថ និងចំណីអាហារអាមេរិក (FDA)។ ក្រៅពីក្រុមបុរសជាអ្នកស្រលាញ់ភេទដូចគ្នា ក្រុមបុរសជាអ្នកស្រលាញ់ទាំងពីរភេទ (មានន័យថាបុរសផង ស្រ្តីផង) ក៏មានសិទ្ធិអាចផ្តល់ឈាមរបស់ខ្លួនទៅមនុស្សដទៃបានផងដែរ។ ប៉ុន្តែ ការហាមឃាត់មិនអោយបរិច្ចាកឈាមនៅតែបន្តចូលជាធរមាន ចំពោះក្រុមមនុស្សមួយចំនួន។ ក្នុងនោះមានដូចជា៖ អ្នកធ្វើការផ្លូវភេទ អ្នកចាក់គ្រឿងញៀនតាមសរសៃឈាម និងអ្នកមានជំងឺឈាមក្រកក។
ជំនួសអោយការហាមឃាត់ទាំងស្រុង ច្បាប់ថ្មីនេះអនុញ្ញាតអោយបុរសស្រលាញ់ភេទដូចគ្នាអាចធ្វើការផ្តល់ឈាមបាន ប៉ុន្តែ ពួកគេត្រូវគោរពល័ក្ខខ័ណ្ឌដ៏តឹងរ៉ឹងមួយ។ នោះគឺ ការចៀសវាងមិនរួមភេទរយៈពេល ១២ ខែមុននឹងទៅបរិច្ចាកឈាម។ ក្រៅពីក្រុមបុរសស្រលាញ់បុរសដូចគ្នា ឬទាំងពីរភេទ ការដាក់កំហិតថ្មីនេះក៏នឹងត្រូវអនុវត្តផងដែរ ចំពោះស្រ្តីដែលមានទំនាក់ទំនងផ្លូវភេទជាមួយបុរស ហើយដែលបុរសនោះផ្ទាល់ធ្លាប់មានចំណងផ្លូវភេទជាមួយបុរសដូចគ្នាក្នុងកំឡុងពេលមួយឆ្នាំមុន។
ច្បាប់ហាមឃាត់កាលពីឆ្នាំ ១៩៨៣
សហរដ្ឋអាមេរិកបានហាមឃាត់មិនអោយបុរសស្រលាញ់ភេទដូចគ្នាផ្តល់ឈាមចាប់តាំងពីឆ្នាំ ១៩៨៣ មកម្ល៉េះ។ បំរាមនេះ គឺត្រូវបានធ្វើឡើងនៅពេលដែលជំងឺអេដស៍ចាប់ផ្តើមរាតត្បាតនៅសហរដ្ឋអាមេរិក។ កាលពីទសវត្សរ៍ទី៨០ មេរោគហ៊ីវដែលបង្កអោយមានជំងឺអេដស៍ គឺជាប្រភេទជំងឺថ្មីមួយពុំទាន់ស្គាល់ឡើយ។
មុននឹងផ្តល់ឈាមជាសាធារណៈ គ្រប់មនុស្សប្រុសអាមេរិកទាំងអស់ត្រូវឆ្លើយកំរងសំណួរឈាមមួយ។ ប្រសិនបើបុរសនោះឆ្លើយថាខ្លួនធ្លាប់បានរួមភេទជាមួយបុរសដូចគ្នាចាប់តាំងពីឆ្នាំ ១៩៧៧ មក បុរសនោះនឹងមិនអាចបរិច្ចាកឈាមរបស់ខ្លួនបានឡើយ។ សម័យកាលនោះ អ្នកជំនាញសុខាភិបាលអាមេរិកបានចាត់វិធានការហាមឃាត់ការផ្តល់ឈាមបែបនេះ ក្នុងគោលបំណងដើម្បីចៀសវាងមិនអោយមេរោគហ៊ីវចម្លងនៅក្នុងចំណោមឈាមបំរុងសំរាប់ផ្តល់អោយអ្នកជំងឺ។
ល័ក្ខខ័ណ្ឌថ្មីដ៏ចម្រូងចម្រាស
បើទោះបីជាអាជ្ញាធរអាមេរិកបានបន្ធូរបន្ថយឧបសគ្គក៏ពិតមែន ប៉ុន្តែ ក្រុមអ្នកការពារសិទ្ធិអ្នកស្រលាញ់ភេទដូចគ្នានៅតែចាត់ទុកថា វិធានការថ្មីនេះនៅតែមានលក្ខណៈរើសអើងដដែល។ ពួកគេបានបង្ហាញការខកចិត្តដោយយល់ឃើញថា ការដាក់ល័ក្ខខ័ណ្ឌថ្មីនេះ គឺផ្អែកលើទំនោរផ្លូវភេទទៅវិញ។ លោកវេជ្ជបណ្ឌិត Dan Bruner ជាអ្នកទទួលខុសត្រូវម្នាក់ប្រចាំក្លីនិក Whitman-Walker Health ទាមទារអោយអាជ្ញាធរអាមេរិកបន្ធូរបន្ថយរយៈពេលផ្អាកការរួមភេទនោះមកត្រឹមតែរយៈពេល ៣០ ថ្ងៃ។
នៅក្នុងសេចក្តីប្រកាសព័ត៌មានមួយ ទីភ្នាក់ងារឱសថ និងចំណីអាហារអាមេរិក (FDA)បានការពារវិធានការណ៍របស់ខ្លួន ដែលតម្រូវអោយបុរសស្រលាញ់ភេទដូចគ្នាផ្អាកការរួមភេទរយៈពេល ១២ ខែមុននឹងបរិច្ចាកឈាម។ FDA បានពន្យល់ថា ខ្លួនបានសិក្សាស្រាវជ្រាវលើទិន្នន័យថ្មីៗជាច្រើន ជាពិសេសការសិក្សាស្តីពីការរីករាលដាលនៃមេរោគ និងរបាយការណ៍នៃប្រទេសមួយចំនួនទៀត។
ការដាក់កំហិតមិនអោយរួមភេទរយៈពេល ១២ ខែនេះ គឺបានចូលជាធរមាននៅតាមប្រទេសមួយចំនួនដូចជា អង់គ្លេស អូស្រ្តាលី ជប៉ុន និងបារាំង ជាដើម។ នយោបាយថ្មីរបស់អាមេរិកនេះ គឺស្រដៀងគ្នាបេះបិទទៅនឹងនយោបាយនៅប្រទេសអូស្រ្តាលី ដែលគេបានអនុវត្តចាប់តាំងពី ១០ ឆ្នាំមុនម្ល៉េះ។ នៅប្រទេសកាណាដាក្បែរខាង វិធានការដាក់កំហិត គឺតឹងតែងជាងអាមេរិកទៅទៀត។ ក្រសួងសុខាភិបាលកាណាដាតម្រូវអោយបុរសស្រលាញ់ភេទដូចគ្នា ផ្អាកការរួមភេទរយៈពេល ៥ ឆ្នាំ មុននឹងធ្វើការផ្តល់ឈាម។
ក្នុងឱកាសសន្នីសិទកាសែតមួយ លោកវេជ្ជបណ្ឌិត Peter Marks ប្រចាំទីភ្នាក់ងារឱសថ និងចំណីអាហារអាមេរិក (FDA) បានអះអាងថា ការដាក់កំហិតល័ក្ខខ័ណ្ឌបែបនេះ គឺ សុទ្ធសឹងតែផ្អែកលើភស្តុតាងវិទ្យាសាស្រ្តទាំងស្រុង។ នយោបាយនេះនឹងបន្តការពារធនាគារឈាមមិនអោយឆ្លងមេរោគហ៊ីវ។ ប្រសិនបើគេមិនដាក់ល័ក្ខខ័ណ្ឌបែបនេះទេ ឱកាសចំលងមេរោគហ៊ីវអាចកើនឡើងរហូតដល់ ៤០០%។
សូមបញ្ជាក់ថា រាល់ការបរិច្ចាកឈាមគ្រប់ទ្រង់ទ្រាយសុទ្ធសឹងតែឆ្លងកាត់ការធ្វើតេស្តរកមើលមេរោគហ៊ីវ។ ប៉ុន្តែ សំរាប់ការធ្វើតេស្តបច្ចុប្បន្ន វាអាចមានរយៈកាលចំហក្នុងរយៈពេល ១០ ថ្ងៃចន្លោះពីពេលឆ្លងមេរោគ និងពេលធ្វើតេស្តឈាម ដែលគេមិនអាចរកឃើញមេរោគហ៊ីវ។ លោកវេជ្ជបណ្ឌិត Peter Marks បានសង្កត់ធ្ងន់ថា ការដាក់ល័ក្ខខ័ណ្ឌត្រូវបានផ្អែកលើរយៈកាលចន្លោះប្រហោងនៃការធ្វើតេស្តនេះ។ ថ្វីត្បិតតែបច្ចេកវិទ្យានៃការធ្វើតេស្តថ្មីៗគួរអោយជឿទុកចិត្តក៏ពិតមែន ប៉ុន្តែ វាមិនមែនល្អឥតខ្ចោះនោះឡើយ។ ដូចនេះ គេចាំបាច់ត្រូវតែដាក់ល័ក្ខខ័ណ្ឌបែបនេះសំរាប់ក្រុមបុរសស្រលាញ់ភេទដូចគ្នា។
កាកបាទក្រហមអាមេរិកបានប៉ាន់ប្រមាណថា គ្រោះថ្នាក់ចំលងមេរោគហ៊ីវតាមរយៈការផ្តល់ឈាមនៅសហរដ្ឋអាមេរិក គឺមនុស្សម្នាក់ក្នុងចំណោមមនុស្ស ១,៥ លាន។ សព្វថ្ងៃនេះ ចំនួនបរិច្ចាកឈាមជារៀងរាល់ឆ្នាំនៅសហរដ្ឋអាមេរិក គឺស្ថិតក្នុងរង្វង់ចំនួន ១៥,៧ លានដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ