លោកស្រី Hillary Clinton រិះគន់ក្រុមអ្នកការពារសិទ្ធិប្រើប្រាស់កាំភ្លើង
ចុះផ្សាយនៅថ្ងៃ៖
ស្តាប់ - ០៤:២៩
ក្នុងយុទ្ធនាការឃោសនាស្វែងរកការគាំទ្រ ក្នុងក្របខ័ណ្ឌនៃការបោះឆ្នោតជ្រើសរើសបេក្ខជនប្រធានាធិបតីផ្លូវការប្រចាំបក្ស លោកស្រី Hillary Clinton បានលើកយកប្រធានបទហឹង្សាដោយសារកាំភ្លើងមកជជែកដេញដោល។ លោកស្រីបានរិះគន់ក្រុមអ្នកធ្វើ lobby ការពារសិទ្ធិប្រើប្រាស់កាំភ្លើង ជាពិសេសការពារផលប្រយោជន៍ក្រុមហ៊ុនផលិតកាំភ្លើង។ លើសពីនេះ លោកស្រី Hillary Clinton កំពុងដឹកនាំយុទ្ធនាការយ៉ាងសកម្មនៅភាគខាងកើតសហរដ្ឋអាមេរិក ដើម្បីការបោះឆ្នោតជ្រើសរើសបេក្ខជនបក្ស នាថ្ងៃស្អែកនេះ។
កាលពីថ្ងៃព្រហស្បត្តិ៍សប្តាហ៍មុន លោកស្រី Hillary Clinton បានទៅជួបសំណេះសំណាលជាមួយសាច់ញាតិជនរងគ្រោះដោយសារហឹង្សាបង្កឡើងដោយកាំភ្លើងនៅទីក្រុង Hartford ក្នុងរដ្ឋ Connecticut ។ នាឱកាសនោះ សាច់ញាតិជនរងគ្រោះក្នុងព្រឹត្តិការណ៍បាញ់ប្រហារនៅសាលាបឋមសិក្សា Sandy Hook ក៏មានវត្តមានផងដែរ។
សូមរំលឹកថា កាលពីខែធ្នូ ឆ្នាំ២០១២ យុវជនមានបញ្ហាផ្លូវចិត្តម្នាក់បានបាញ់សម្លាប់កុមារចំនួន ២០ នាក់ និងបុគ្គលិកសិក្សាចំនួន ៦ នាក់ នៅក្នុងសាលារៀនបឋមសិក្សា Sandy Hook នៃរដ្ឋ Connecticut នេះ។
ការសម្លាប់រង្គាលដោយសារការប្រើប្រាស់កាំភ្លើងយ៉ាងសេរីបែបនេះត្រូវបានលោកស្រី Hillary Clinton លើកយកមកធ្វើប្រធានបទឃោសនាស្វែងរកសម្លេងគាំទ្រ។ អតីតៈប្រមុខការទូតអាមេរិករូបនេះបាននិយាយរិះគន់ដល់ក្រុម lobby ដែលការពារសិទ្ធិប្រើប្រាស់កាំភ្លើងនៅសហរដ្ឋអាមេរិក។ លោកស្រីយល់ឃើញថា វាជាការមិនអាចទទួលយកបានឡើយ ចំពោះការធ្វើអំណះអំណាង ឬការដឹកនាំយុទ្ធនាការរបស់ពួកក្រុម lobby ការពារផលប្រយោធន៍ឲ្យរោងចក្រផលិតកាំភ្លើង។
ដោយពុំបាននិយាយលំអិតអំពីផែនការរបស់ខ្លួន លោកស្រីបានប្រកាសជំហរធ្វើកំណែទម្រង់ទូទៅស្តីពីសន្តិសុខកាំភ្លើងនៅសហរដ្ឋអាមេរិក។ លើសពីនេះ លោកស្រីក៏បានតាំងចិត្តថានឹងលើកយកប្រធានបទហាមឃាត់ការប្រើប្រាស់កាំភ្លើងនេះ មកដាក់ចូលក្នុងកម្មវិធីនយោបាយរបស់គាត់។ បើតាមលោកស្រី កាំភ្លើងត្រូវបានគេដោះដូរទិញ និងធ្វើចរចារណ៍ដោយសេរីនៅសហរដ្ឋអាមេរិក។ អ្វីដែលព្រួយបារម្ភបំផុតនោះគឺ កាំភ្លើងទាំងនោះកំពុងតែធ្លាក់ទៅក្នុងដៃមនុស្សមិនល្អ។
បើយោងតាមស្ថិតិ ជារៀងរាល់ឆ្នាំ មានពលរដ្ឋអាមេរិកប្រមាណ ៣២ ០០០ នាក់បានស្លាប់បាត់បង់អាយុជីវិត ដោយសារតែការប្រើប្រាស់កាំភ្លើងដោយសេរីបែបនេះ។ ពីរភាគបីនៃការបាត់បង់ជីវិត គឺតាមរយៈការយកអាវុធមកធ្វើអត្តឃាតខ្លួនឯង។ ម៉្យាងទៀត លោកស្រីក៏បានរិះគន់ដល់ការបំភិតបំភ័យតាមអ៊ិនធើណែតផងដែរ។ ជាពិសេស គឺការបំភិតបំភ័យចំពោះអ្នកហ៊ានបញ្ចេញយោបល់ ឬអ្នកចង់ដឹកនាំសកម្មភាពប្រឆាំងនឹងការប្រើប្រាស់កាំភ្លើង។ លោកស្រីបានចាត់ទុកថា យុទ្ធនាការតាមអ៊ិនធើណេតបែបនេះរបស់ពួកក្រុម lobby ការពារសិទ្ធិប្រើប្រាស់កាំភ្លើង គឺមិនអាចទទួលយកបានឡើយ។
នៅក្នុងជំនួបពិភាក្សានោះផងដែរ លោកស្រី Clinton បានឆ្លៀតដាក់ផ្លែផ្កា ដោយបានប្រើពាក្យពេចន៍វាយប្រហារគូប្រជែង គឺលោក Bernie Sanders។ លោកស្រីបានរំលឹកអ្នកចូលរួមស្តាប់ប្រមាណជាង ១០០ នាក់ថា លោក Sanders សមាជិកព្រឹទ្ធសភាប្រចាំរដ្ឋ Vermont រូបនេះធ្លាប់បានបោះឆ្នោតគាំទ្រច្បាប់មួយហាមឃាត់មិនឲ្យប្តឹងផ្តល់ក្រុមហ៊ុនផលិតកាំភ្លើង។ ផ្ទុយទៅវិញ លោកស្រីបានបោះឆ្នោតប្រឆាំងនឹងច្បាប់នេះ។
សូមបញ្ជាក់ថា បច្ចុប្បន្ននេះ លោកស្រី Hillary Clinton កំពុងដឹកនាំយុទ្ធនាការចែចង់ស្វែងរកសម្លេងគាំទ្រ នៅភាគខាងកើតសហរដ្ឋអាមេរិក។ នៅថ្ងៃអង្គារ៍ទី ២៦ មេសា ស្អែកនេះ គឺជាព្រឹត្តិការណ៍សំខាន់មួយមិនអាចរំលងបានឡើយ។ មានរដ្ឋចំនួន ៥ គឺរដ្ឋ Connecticut, រដ្ឋ Rhode Island, រដ្ឋ Pennsylvanie, រដ្ឋ Delaware និងរដ្ឋ Maryland នឹងរៀបចំការបោះឆ្នោតជ្រើសរើសបេក្ខជនតំណាងបក្ស។
សំរាប់គណបក្សប្រជាធិបតេយ្យ លោកស្រី Hillary Clinton និងលោក Bernie Sanders នឹងប្រកួតប្រជែងគ្នាដណ្តើមយកប្រតិភូចំនួន ៤៦៣ នាក់ នៅក្នុងរដ្ឋចំនួន ៥ នេះ។ ចំពោះលោកស្រី Hillary Clinton ផ្លូវឆ្ពោះទៅកាន់ការតែងតាំងជាអ្នកតំណាងផ្លូវការឲ្យគណបក្សប្រជាធិបតេយ្យ កំពុងតែក្លាយជាការពិតហើយ។ ក្រោយពីការឈ្នះឆ្នោតយ៉ាងត្រចះត្រចង់នៅរដ្ឋញូវយ៉កកាលពីថ្ងៃអង្គារ៍សប្តាហ៍មុន គិតមកដល់ពេលនេះ លោកស្រី Hillary Clinton ប្រមូលបានប្រតិភូចំនួន ១ ៤២៨ នាក់។ ហើយលោក Sanders ប្រមូលបានតែ ១ ១៥១ នាក់ប៉ុណ្ណោះ។
បើយោងតាមវេបសាយ៍ FiveThirtyEight ជំនាញផ្នែកវិភាគការស្ទង់មតិបានឲ្យដឹងថា លោកស្រី Hillary Clinton មានឱកាសច្រើនក្នុងការឈ្នះទទួលបានការតែងតាំង។ បើយោងតាមការគណនាជាបឋម ក្រៅពីប្រតិភូតំណាងឲ្យបេក្ខជននៅតាមរដ្ឋនិមួយៗ នៅមានឥស្សរជនប្រចាំបក្សផ្សេងទៀត ដែលមានសិទ្ធិបោះឆ្នោត នាសមាជតែងតាំងបេក្ខជនផ្លូវការតំណាងបក្ស។
ឥស្សរជនទាំងនោះត្រូវបានគេហៅ Superdélégués ឬប្រតិភូជាន់ខ្ពស់។ ប្រតិភូជាន់ខ្ពស់នេះមានសរុប ចំនួន ៧១៤ នាក់។ ក្នុងនោះមាន ៤៤៦ នាក់ជាសមាជិកបក្ស, ២២៩ នាក់ជាតំណាងរាស្រ្ត និងសមាជិកព្រឹទ្ធសភា, ១៧ នាក់ជាអភិបាលរដ្ឋ និង២២ នាក់ជាឥស្សរជនល្បីឈ្មោះ ឬអតីតៈប្រធានាធិបតីរបស់បក្ស។ បើតាមការស្ទាបស្ទង់កន្លងមក មានប្រតិភូជាន់ខ្ពស់ចំនួន ៥០២ នាក់បានសំដែងការគាំទ្រចំពោះលោកស្រី Hillary Clinton។ ហើយមានតែ ៣៨ នាក់ប៉ុណ្ណោះ ដែលបានប្រកាសគាំទ្រលោក Bernie Sanders។
គណបក្សប្រជាធិបតេយ្យនឹងរៀបចំសមាជតែងតាំងបេក្ខជនប្រធានាធិបតីផ្លូវការប្រចាំបក្ស ចន្លោះពីថ្ងៃទី២៥ ដល់ថ្ងៃទី២៨ កក្កដា នាទីក្រុង Philadelphie រដ្ឋ Pennsylvanie។ មានប្រតិភូសរុបទាំងអស់ចំនួន ៤ ៧៦៥ នាក់នឹងចូលរួមបោះឆ្នោតនាវគ្គផ្តាច់ព្រ័តនេះ។ ដើម្បីអាចទទួលបានការតែងតាំងជាផ្លូវការតែម្តង បេក្ខជនម្នាក់ត្រូវទទួលការគាំទ្រពីប្រតិភូចំនួន ២ ៣៨៣ នាក់។ ចំនួននេះគឺ ជាការទាមទាររបស់គណបក្សប្រជាធិបតេយ្យ សំរាប់បេក្ខជនប្រកួតប្រជែងការបោះឆ្នោតជ្រើសតាំងអ្នកតំណាងប្រចាំបក្ស ក្នុងក្របខ័ណ្ឌនៃការបោះឆ្នោតប្រធានាធិបតី នាខែវិច្ឆិការខាងមុខនេះ។
ជាសរុប បើគិតទាំងប្រតិភូសាមញ្ញ និងប្រតិភូជាន់ខ្ពស់ លោកស្រី Hillary Clinton ប្រមូលបាន ៨១% ហើយ។ បើប្រៀបធៀបជាមួយលោក Bernie Sanders គឺគាត់ទទួលបានមិនដល់ ៥០% ផង។ ដូចនេះ ផ្លូវឆ្ពោះទៅកាន់ការតែងតាំងផ្លូវការកាន់តែកៀកមែនទែនហើយសំរាប់លោកស្រី Clinton៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ