លោកស្រីKaren Bass ទាមទារឲ្យលោក Donald Trump ទៅទទួលពិនិត្យជំងឺវិកលចរិក
ចុះផ្សាយនៅថ្ងៃ៖
ស្តាប់ - ០៤:១៧
មួយសប្តាហ៍ក្រោយបើកយុទ្ធនាការឃោសនាស្វែងរកសំលេងឆ្នោត លោក Donald Trump បេក្ខជនប្រធានាធិបតីតំណាងគណបក្សសាធារណរដ្ឋបានជួបភាពល្វីងជូរចត់ពុំធ្លាប់មាន។ លោក Trump បានទទួលការរិះគន់ពីគ្រប់មជ្ឈដ្ឋាន ជុំវិញការប្រមាថមើលងាយសាកសពទាហានអាមេរិកដើមកំណើតឥស្លាមម្នាក់។ មិនត្រឹមតែប៉ុណ្ណោះ លោក Trump ក៏បានប្រទាញប្រទង់គ្នាតាមពាក្យសំដីជាមួយឱពុកម្តាយទាហាននោះទៀតផង។ ទន្ទឹមគ្នានេះ លទ្ធផលស្ទង់មតិបានបង្ហាញថា លោកស្រី Hillary Clinton កំពុងតែមានពិន្ទុខ្ពស់ដឹកមុខគូប្រជែង។ ហើយគាប់ជួនគ្នានេះផងដែរ ដំណឹងអាក្រក់ថ្មីមួយកំពុងតែធ្វើឲ្យរូបភាពលោក Donald Trump កាន់តែអាប់អោនថែមទៀត។ នោះ គឺញត្តិមួយរបស់លោកស្រី Karen Bass តំណាងរាស្រ្តអាមេរិកមកពីគណបក្សប្រជាធិបតេយ្យ ដែលទាមទារឲ្យលោក Donald Trump ទៅជួបគ្រូពេទ្យជំនាញដើម្បីស្វែងរករោគវិនិច្ឆ័យជំងឺវិកលចរិក។
ស៊យជាន់លើស៊យ ! បេក្ខជនប្រធានាធិបតីតំណាងគណបក្សសាធារណរដ្ឋគឺ លោក Donald Trump កំពុងតែទទួលរងការវាយប្រហារពីគ្រប់មជ្ឈដ្ឋាន។ លោកស្រី Karen Bass តំណាងរាស្រ្តអាមេរិកមកពីគណបក្សប្រជាធិបតេយ្យ ប្រចាំមណ្ឌលក្រុង Los Angeles នៃរដ្ឋកាលីហ្វ័រញ៉ា បានស្នើឲ្យគណបក្សសាធារណរដ្ឋជំរុញ លោក Donald Trump ទៅជួបគ្រូពេទ្យជំនាញ ដើម្បីស្វែងរករោគវិនិច្ឆ័យជំងឺវិកលចរិក។ ដោយមានអាជីពក្នុងផែ្នកសុខាភិបាលមុននឹងជាប់ឆ្នោតជាតំណាងរាស្រ្តចាប់តាំងពីឆ្នាំ ២០១០ មក លោកស្រី Karen Bass កំពុងដឹកនាំយុទ្ធនាការដាក់ញត្តិសុំការគាំទ្រពីសាធារណជន។
ញត្តិទាមទារនេះត្រូវបានផ្សព្វផ្សាយនៅលើវេបសាយ៍ដ៏ល្បីមួយ គឺ Change.org។ ញត្តិនេះបានត្រូវបង្ហោះតាមអ៊ិនធើណេតចាប់តាំងពីថ្ងៃពុធ ទី៣ សីហាមកម្ល៉េះ។ រយៈពេលតែបីថ្ងៃប៉ុណ្ណោះ មានមនុស្សចំនួន ១៥ ០០០ នាក់បានចុះហត្ថលេខាគាំទ្រ។ លើសពីនេះ យុទ្ធនាការទាមទារដដែលក៏ត្រូវបានដឹកនាំផងដែរនៅតាមបណ្តាញសង្គម Twitter ក្រោមពាក្យគន្លឹះ #DiagnoseTrump។ បើយោងតាមខ្លឹមសារញត្តិនេះ លោកស្រីតំណាងរាស្រ្តកំពុងតែសង្ស័យថា លោក Donald Trump មានអាការៈជំងឺច្របូកច្របល់ស្រលាញ់បុគ្គលិកលក្ខណៈខ្លួនឯង (trouble de la personnalité narcissique)។
ខ្លឹមសាររបស់ញត្តិនោះក៏បានសង្កត់ធ្ងន់ផងដែរថា លោក Donald Trump ជាមនុស្សគ្រោះថ្នាក់ដោយសារតែចូលចិត្តនិយាយគ្មានពិចារណា និងមិនចេះគ្រប់គ្រងអារម្មណ៍ខ្លួនឯង។ លោកស្រីតំណាងរាស្រ្តរូបនេះក៏បានសរសេរបញ្ជាក់ផងដែរថា នេះជាកាតព្វកិច្ចស្នេហាជាតិដែលសាធារណជនអាមេរិកត្រូវតែចោទសំណួរជុំវិញស្ថានភាពផ្លូវចិត្តរបស់លោក Donald Trump ដែលគេតែងចោទថាជាបេក្ខជនប្រធានាធិបតីដ៏មហាចម្រូងចម្រាស់ពុំដែលធ្លាប់មានពីមុនមក។
លោកស្រី Karen Bass បានលើកយកនិយមន័យ ដែលមានចែងនៅក្នុងឯកសារព្យាបាលរោគផ្លូវចិត្តរបស់សមាគមអាមេរិកផែ្នកជំងឺវិកលចរិកមកធ្វើសេចក្តីសំអាងផងដែរ។ និយមន័យនោះបញ្ជាក់ថា គេអាចកំណត់ថាមនុស្សម្នាក់មានជំងឺច្របូកច្របល់ស្រលាញ់បុគ្គលិកលក្ខណៈខ្លួនឯង តាមរយៈពាក្យពេចន៍ ឬអាក្បកិរិយារបស់បុគ្គលនោះ។ ជាបុគ្គលដែលចូលចិត្តលើកខ្លួនឯងខ្ពង់ខ្ពស់ហួសប្រមាណ ចូលចិត្តនិយាយបំប៉ោងពីស្នាដៃខ្លួនឯង, ចូលចិត្តស្រម័យសំរេចជោគជ័យគ្មានដែនកំណត់, ចូលចិត្តឲ្យគេកោតសរសើរខ្លួនឯងឥតឈប់ឈរ ចូលចិត្តស្វែងរកវិធីកេងចំណេញពីអ្នកដទៃ និងជាមនុស្សគ្មានសមត្ថភាពស្វែងយល់សេចក្តីត្រូវការរបស់អ្នកដទៃ។
លោកស្រីតំណាងរាស្រ្តក៏លើកយកអំណះអំណាងថា យោងតាមពាក្យពេចន៍ និងអាក្បកិរិយាកន្លងមករបស់លោក Donald Trump សាធារណជនអាមេរិកត្រូវការស្វែងយល់ពីសុខភាពផ្លូវចិត្តរបស់លោក Trump ឲ្យបានច្បាស់សិនមុននឹងទៅបោះឆ្នោតនាថ្ងៃទី៨ វិច្ឆិកាខាងមុខនេះ។ ខ្លឹមសារញត្តិនោះក៏បាន បានអំពាវនាវឲ្យគ្រប់សមាគមគ្រូពេទ្យឯកទេសជំងឺវិកលចរិក និងជំងឺផ្លូវចិត្តនៅសហរដ្ឋអាមេរិកដាក់សម្ពាធទាមទារឲ្យគណបក្សសាធារណរដ្ឋយកបេក្ខជនប្រធានាធិបតីរបស់ខ្លួនទៅទទួលការត្រួតពិនិត្យស្វែងរករោគវិនិច្ឆ័យវិកលចរិក។
ការផ្តួចផ្តើមធ្វើញត្តិប្រឆាំងលោក Donald Trump បែបនេះក៏ស្របពេលគ្នាផងដែរ ខណៈថ្នាក់ដឹកនាំគណបក្សប្រជាធិបតេយ្យ និងអ្នកជំនាញផែ្នកនយោបាយការបរទេសជាច្រើននាក់របស់គណបក្សសាធារណរដ្ឋ កំពុងតែចោទសួរពីសមត្ថភាពរបស់មហាសេដ្ឋី Donald Trump និងការត្រៀមលក្ខណៈរបស់គាត់ ក្នុងការបំពេញបំពេញមុខងារក្នុងឋានៈជាអគ្គមេបញ្ជាការកងទ័ពអាមេរិក ជាពិសេសក្នុងការបញ្ជាអាវុធនុយក្លេអ៊ែរ។
សូមបញ្ជាក់ផងដែរថា កាលពីថ្ងៃសប្តាហ៍មុន លោក Mike Morell អតីតនាយកបណ្តោះអាសន្នទីភ្នាក់ងារស៊ើបការណ៍សំងាត់អាមេរិក (CIA) បានរិះគន់ឥតសំចៃចំពោះលោក Donald Trump។ ដោយចុះផ្សាយលើទំព័រសារព័ត៌មាន New York Times អតីតប្រមុខ CIA ចន្លោះពីឆ្នាំ២០០១-២០០៣ រូបនេះបានសរសេរពន្យល់ថា លោក Trump ពុំត្រឹមតែពុំទាន់ត្រៀមខ្លួនដឹកនាំប្រទេសប៉ុណ្ណោះទេ ប៉ុន្តែថែមទាំងអាចបង្កឲ្យសន្តិសុខជាតិអាមេរិកស្ថិតក្នុងសភាពគ្រោះថ្នាក់ទៀតផង។ លោក Mike Morell បានលើកឧទាហរណ៍មួយបង្ហាញពីភាពឆោតល្ងង់របស់លោក Trump ដែលបានបណ្តោយខ្លួនឲ្យចូលអន្ទាក់របស់លោក Vladimir Poutine ប្រធានាធិបតីរុស្សីបច្ចុប្បន្ន។
លោក Poutine ដែលធ្លាប់បំរើការជាប្រមុខចារកម្មរុស្សីបាននិយាយសរសើរលោក Trump ហើយជាការតបស្នងលោក Trump ក៏បានសំដែងពាក្យពេចន៍សរសើរដូចគ្នាទៅកាន់ប្រមុខរដ្ឋរុស្សី ដូចអ្វីដែលលោក Poutine បានគិតទុកជាមុនហើយស្រេច។ បើតាមការវិភាគរបស់លោក Mike Morell ទង្វើបែបនេះរបស់លោក Trump បង្ហាញឲ្យឃើញពីការខ្វះភាពពិចារណាគ្រប់ជ្រុងជ្រោយ។ សំរាប់ពិភពស៊ើបការណ៍សំងាត់ ទង្វើបែបនេះបង្ហាញថាលោក Trump បំរើផលប្រយោធន៍ឲ្យរុស្សីដោយមិនដឹងខ្លួន ហើយលោក Trump ត្រូវលោក Poutine ជ្រើសរើសជាភ្នាក់ងារចារកម្មរុស្សីដោយមិនដឹងខ្លួនផងដែរ។
នេះជាលើកទីមួយហើយដែលតំណាងរាស្រ្តជាន់ខ្ពស់អាមេរិកម្នាក់ចោទសួរពីស្ថានភាពផ្លូវចិត្តរបស់លោក Donald Trump។ ប៉ុន្តែ ញត្តិនេះក៏ទទួលការរិះគន់ផងដែរ។ មនុស្សមួយចំនួនយល់ឃើញថា លោក Donald Trump មិនមែនជាមនុស្សមានជំងឺវិកលចរិកបែបនេះទេ ប៉ុន្តែ លោក Trump ជាមនុស្សរើសអើងជាតិសាសន៍។ ការណ៍ដែលយកជំងឺវិកលចរិកចោទប្រកាន់បែបនេះ គឺជាការលាក់កំបាំងការរើសអើងពូជសាសន៍ក្នុងចំណោមអ្នកគាំទ្រគណបក្សសាធារណរដ្ឋ ដែលភាគច្រើនជាពលរដ្ឋអាមេរិកស្បែក-ស មានទស្សនៈអភិរក្សនិយម។ ចំណែកក្រុមគ្រូពេទ្យឯកទេសជំងឺវិកចរិក និងក្រុមគ្រួសារអ្នកជំងឺក៏បានរិះគន់យុទ្ធនាការរបស់លោកស្រី Karen Bass ថាកំពុងតែរើសអើងមនុស្សរាប់ពាន់ ដែលកំពុងតែមានជំងឺច្របូកច្របល់ស្រលាញ់បុគ្គលិកលក្ខណៈខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ