តើការប្រកួតកីឡាអូឡាំពិក JO ២០១៦ មានតុល្យការយ៉ាងណា ?
ចុះផ្សាយនៅថ្ងៃ៖
ស្តាប់ - ០៤:៥១
ភ្លើងអូឡាំពិកក្រុងរីយ៉ូ ត្រូវពន្លត់ ! ទង់ជាតិអូឡាំពិក ក៏បានប្រគល់ទៅឱ្យជប៉ុន សម្រាប់បួនឆ្នាំខាងមុខ។ ការប្រកួតកីឡាអូឡាំពិក ឆ្នាំ២០១៦ បានបិទបញ្ចប់ត្រឹមថ្ងៃអាទិត្យទី ២១សីហា។ គណៈកម្មការអូឡាំពិក បានប្រកាសអបអរ និងសរសើរប្រេស៊ីល ដែលបានធ្វើម្ចាស់ផ្ទះទទួលរៀបចំកីឡាអូឡាំពិក យ៉ាងអស់ពីសមត្ថភាព។ តុល្យការទូទៅ មានលក្ខណៈវិជ្ជមានខ្លាំង តែរឿងអាស្រូវក៏មានច្រើនមិនខ្វះ។ តើអ្វីខ្លះជាចំណុចខ្លាំង និង ជាចំណុចខ្សោយនៃការរៀបចំអូឡាំពិក នៅប្រេស៊ីល ?
នៅមុនពេលកីឡាអូឡាំពិកក្រុងរីយ៉ូចាប់ផ្តើម គេនាំគ្នាព្រួយបារម្ភខ្លាំងខ្លាចប្រេស៊ីល ដែលកំពុងឆ្លងកាត់វិបត្តិសេដ្ឋកិច្ចនិងនយោបាយយ៉ាងធ្ងន់ធ្ងរ គ្មានសមត្ថភាពគ្រប់គ្រាន់នឹងទទួលការប្រកួតប្រជែងកីឡាខ្នាតអន្តរជាតិ បើទោះបីជាប្រេស៊ីធ្លាប់ធ្វើបានសម្រេចការប្រកួតកីឡាបាល់ទាត់ពិភពលោកបានល្អក៏ដោយ។ ពីរបីថ្ងៃមុនពេលចាប់ប្រកួត គេនាំគ្នានិយាយអំពីការគំរាមកំហែងភេរវកម្ម ប៉ុន្តែក្នុងអំឡុងពេលអូឡាំពិកថ្ងៃ គ្មានសោះការវាយប្រហារ ឬគំរាមកំហែងភេរវកម្ម រំខានដល់ព្រឹត្តិការណ៍កីឡាដ៏អឹកអធឹក ព្រោះប្រេស៊ីលបានពង្រាយកម្លាំងប៉ូលិសនិងយោធាដល់ទៅ៨៥០០០នាក់។
ថ្វីបើជាទូទៅ ការរៀបចំកម្មវិធីអូឡាំពិកប្រេស៊ីល មានលក្ខណៈវិជ្ជមាន គណៈកម្មការអូឡាំពិក បានអបអរសរសើរប្រេស៊ីល ហេដ្ឋារចនាសម្ព័ន្ធផ្លូវថ្នល់ដឹកជញ្ជូនដែលក៏ជាប្រភពនៃការរិះគន់ខ្លាំង គ្មានកើតគ្រោះគួរឱ្យកត់សម្គាល់មែន តែការធ្វើដំណើរក្នុងក្រុងនិងទៅកាន់កន្លែងប្រកួតកីឡា ប្រៀបបាននឹងការផ្សងព្រេង។
ការរៀបចំមានភាពមិនប្រក្រតីច្រើន ដូចជាផ្ទាំងផ្តល់ព័ត៌មានខុស គ្មានអ្នកចូលទស្សនា កៅអីសល់ទំនេរ កន្លះៗស្តាត ក្រុមបុគ្គលិកស្ម័គ្រចិត្តបម្រើការងារពេលអូឡាំពិក អវត្តមានដល់ទៅប្រមាណជាង៣០% ព្រោះតែលក្ខខណ្ឌការងារលំបាកពេក និងជាពិសេស រូបភាពដែលគេមិនអាចបំភ្លេចបាន គឺទឹកក្នុងអាងហែល ស្រាប់ប្រែពណ៌ទៅបៃតង គួរឱ្យព្រឺខ្លាចបំផុតសម្រាប់កីឡាករ។
អត្រាកីឡាករអត្តពលិប្រើថ្នាំលើកកម្លាំង ចាប់បានក្នុងអំឡុងពេលប្រកួតកីឡាអូឡាំពិក មានមិនតិចជាង ១២នាក់។ នៅមានរឿងអាស្រូវមួយ ដែលទំនងជារឿងអាស្រូវធំបំផុតក្នុងប្រវត្តិគណៈកម្មការអូឡាំពិក គឺអំពើពុករលួយ។ ប្រធានគណៈកម្មការអូឡាំពិកអឺរ៉ុបជាតិអៀរឡង់ ត្រូវប៉ូលិសប្រេស៊ីលចាប់ខ្លួន នៅក្រុងរីយ៉ូ ពីបទសង្ស័យលក់សំបុត្រចូលទស្សនា ពេលបើកកម្មវិធី ខុសច្បាប់ដោយដំឡើងតម្លៃដល់ទៅ៨ពាន់ដុល្លារ ទល់នឹងតម្លៃដើមតែ១៣០០ដុល្លារ។
ពលរដ្ឋប្រេស៊ីលល្បីខាងរួសរាយរាក់ទាក់ តែនៅពេលក្លាយជាទស្សនិកជនអូឡាំពិក ពួកគេបែរជាមានឥរិយាបថមិនល្អ (គ្មានវិន័យ) ឡូឡា ជាតិនិយមជ្រុល ស្រែកជេរប្រទេចបង្អាប់កីឡាករជាគូប្រជែងជាមួយកីឡាករប្រេស៊ីលខ្លួនឯង ដោយមិនសំចៃឡើយ។ តែបើគូប្រកួតជាបរទេសទាំងអស់ នោះប្រេស៊ីលការពារលើកទឹកចិត្តតែអ្នកប្រុងចាញ់។ បរិយាកាសបែបនេះបានធ្វើគេឱ្យភ្លេចអំពីកង្វះខាតបន្តិចបន្តួចក្នុងការរៀបចំកម្មវិធី។
ទាក់ទងនឹងលទ្ធផលនៃការប្រកួតវិញ សហរដ្ឋអាមេរិកបានទទួលមេដាយច្រើនជាងគេ ដល់ទៅ ១២១មេដាយ ក្នុងនោះ ៤៦ជាមាស។ ជាមួយមេដាយសរុប៧០ ក្នុងនោះ ២៦ជាមាស ចិនបានធ្លាក់ទាំងចំនួនមេដាយបើប្រៀបទៅឆ្នាំ២០១២ និងធ្លាក់ទាំងចំណាត់ថ្នាក់ ដោយបានធ្លាក់មកនៅពីក្រោយអង់គ្លេស (មាស២៧) ទៀត ក្នុងការប្រកួតអូឡាំពិកលើកនេះ។
ប៉ុន្តែអ្វីជាការកត់សម្គាល់ខ្លាំង គឺបរាជ័យក្នុងវិញ្ញាសាដែលចិនធ្លាប់តែខ្លាំង។ គ្មានអត្តពលិកចិនណាម្នាក់ដណ្តើមបានមេដាយមាសជាជើងឯកអូឡាំពិកអត្តពលកម្មសោះ។ ហេតុអ្វីបានជាយ៉ាងដូច្នេះ ?! បើតាមអ្នកវិភាគសារព័ត៌មានអង់គ្លេស ចិនប្តូរផ្លាស់ឥវិយាបថ ចេះស្រលាញ់និងឱ្យតម្លៃកីឡាពិតៗ។ នៅទសវត្សរ៍ឆ្នាំ១៩៨០ ចិនមានកម្មវិធីជាតិផ្នែកកីឡា រហូតបង្កើតសាលាទទួលសិស្សចាប់ពីអាយុ៦ឆ្នាំ បំពាក់បំប៉ន ស្ទើរក្លាយជាទារុណកម្ម ឱ្យក្លាយទៅជាជើងឯកអូឡាំពិក។ ដោយសារការអភិវឌ្ឍ និងជីវភាព ឱពុកម្តាយកុមារលែងបញ្ជូនកូនឱ្យរៀនកីឡា ! សាលាឯកទេសភាគច្រើនបានបិទ និងខ្លះក៏លែងអនុវត្តការហាត់កីឡាបែបលត់ដំ។ រង្វាន់មេដាយមាសផ្តល់ដោយរដ្ឋាភិបាល ត្រូវបានកាត់បន្ថយ ពី ៦៥០០០អឺរ៉ូ និងផ្ទះមួយខ្នងនៅឆ្នាំ២០០៨ មកត្រឹម ២៥០០០អឺរ៉ូនៅឆ្នាំ២០១៦។ មានន័យថាសូម្បីតែ អាជ្ញាធរប៉េកាំងក៏ប្តូរឥរិយាបថ លែងសូវងប់ងុលប្រដេញដណ្តើមមេដាយមាសដូចមុនទៀតដែរ។
ជាចុងក្រោយអ្នកប្រទេសដែលរីករាយខ្លាំង គឺបារាំង ! ស្ថិតក្នុងចំណាត់ថ្នាក់លេខ៧មែន តែបារាំងឆ្នាំនេះ បានបំបែកឯកទត្តកម្មខ្លួនឯង ដោយប្រមូលបានមេដាយ ដល់ទៅ ៤២ ក្នុងនោះ ១០ជាមាស ពោលគឺធ្វើបានល្អជាងការប្រកួតកីឡាអូឡាំពិកនៅទីក្រុងឡុងដ៍ឆ្នាំ២០១២ ដែលបារាំងប្រមូលមេដាយបានតែ៣៨។ ជាមួយនឹងលទ្ធផលនេះ បារាំងហាក់ដូចជាកាន់តែមានឆន្ទៈទ្វេឡើង ចង់ក្លាយជាម្ចាស់ផ្ទះទទួល ពិភពលោក ដើម្បីរៀបចំកីឡាអូឡាំពិកឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ