មូលនិធិ Clinton សន្យាធ្វើកំណែទម្រង់របៀបដំណើរការរបស់ខ្លួន
ចុះផ្សាយនៅថ្ងៃ៖
ស្តាប់ - ០៤:២៨
ក្រោមគំនាបសម្ពាភជាហូរហែ ទីបំផុត មូលនិធិ Clinton បានប្រកាសសន្យាធ្វើកំណែទម្រង់របៀបដំណើរការរបស់ខ្លួនទាំងមូល។ សេចក្តីប្រកាសព័ត៌មាននេះត្រូវបានធ្វើឡើង បន្ទាប់ពីមូលនិធិមួយនេះបានក្លាយជាផ្ទាំងស៊ីបរិះគន់ពីគូបដិបក្ខមកពីគណបក្សសាធារណរដ្ឋ។ លោក Bill Clinton (អតីតៈប្រធានាធិបតីអាមេរិកចន្លោះពីឆ្នាំ ១៩៩៣ ដល់ឆ្នាំ២០០១) បានរៀបរាប់លំអិតពីវិធានការណ៍មួយចំនួន ដែលត្រូវអនុវត្តដើម្បីចៀសវាងជម្លោះផលប្រយោជន៍ ក្នុងករណីដែលលោកស្រី Hillary Clinton ឈ្នះឆ្នោតក្លាយជាប្រធានាធិបតីអាមេរិកនាខែវិច្ឆិការខាងមុខនេះ។
នៅក្នុងសារលិខិតមួយទៅកាន់អ្នកជួយគាំទ្រមូលនិធិរបស់ខ្លួន លោក Bill Clinton បានសារសេរលំអិតអំពីវិធានការណ៍ធំៗឈានទៅធ្វើកំណែទម្រង់មូលនិធិ Clinton។ គោលបំណងនៃការផ្លាស់ប្តូរស៊ីជម្រៅនេះគឺ ដើម្បីចៀសវាងការព្រួយបារម្ភជុំវិញជម្លោះផលប្រយោធន៍ណាមួយ។ វិធានការណ៍នោះគឺ មូលនិធិនឹងយល់ព្រមទទួលប្រាក់ ដែលមានប្រភពតែពីសប្បុរសជនសញ្ជាតិអាមេរិក, ពីអ្នករស់នៅអចិន្ត្រៃយ៍លើទឹកដីអាមេរិកតែពុំមានសញ្ជាតិ ឬពីបណ្តាអង្គការអាមេរិកផេ្សង ដែលមានគោលជំហរឯករាជ្យ។ ហើយលោក Bill Clinton នឹងលាលែងតំណែងចេញពីក្រុមប្រឹក្សាភិបាលរបស់មូលនិធិ Clinton នេះ។
សូមរំលឹកជូនផងដែរថា មូលនិធិ Clinton ត្រូវបានបង្កើតឡើងចាប់តាំងពីឆ្នាំ ២០០១ មកម្ល៉េះ។ មូលនិធិនេះធ្វើសកម្មភាពមនុស្សធម៌នៅតាមប្រទេសក្រីក្រជុំវិញពិភពលោក ដោយផ្តោតលើផែ្នកសុខាភិបាល (ជំងឺអេដស៍ និងជំងឺគ្រុនចាញ់), ផែ្នកអភិវឌ្ឈន៍ និងផែ្នកអាកាសធាតុ។ គិតមកដល់ពេលនេះ មូលនិធិ Clinton បានរៃអង្គាសថវិការសរុបចំនួន ២ ពាន់លានដុល្លារ។
ចំណែកសកម្មភាពអន្តរជាតិរបស់មូលនិធិនេះនៅតាមប្រទេសនានា ដែលទទួលបានជំនួយហិរញ្ញវត្ថុពីរដ្ឋាភិបាលបរទេសនានា គម្រោងទាំងនោះនឹងត្រូវផ្ទេរទៅឲ្យអង្គការដ៏ទៃទៀតគ្រប់គ្រងបន្ត។ ចំពោះជំនួបប្រចាំឆ្នាំ Clinton Global Initiative ដែលតែងរៀបចំជារៀងរាល់ឆ្នាំនៅទីក្រុងញ៉ូវយក គឺនឹងត្រូវធ្វើឡើងជាលើកចុងក្រោយនាខែកញ្ញាខាងមុខនេះ។ សូមបញ្ជាក់ថា ជំនួបប្រចាំឆ្នាំ មានការចូលរួមពីមនុស្សរាប់ពាន់នាក់ ដែលមានជាអាទិដូចជា មន្រ្តីជាន់ខ្ពស់របស់រដ្ឋាភិបាលនានា, អ្នកនយោបាយ,ប្រធានអង្គការ ឬប្រធានក្រុមហ៊ុនឯកជននានាជុំវិញពិភពលោក។
កន្លងមក ពួកគណបក្សសាធារណរដ្ឋតែងរិះគន់ឥតសំចៃចំពោះមូលនិធិនេះ ដោយចោទប្រកាន់ថា លោក Bill Clinton និងលោកស្រី Hillary Clinton យកមូលនិធិនេះធ្វើជាឧបករណ៍ប្រើប្រាស់ដើម្បីបម្រើឥទ្ធិពលរបស់ខ្លួន។ ជាក់ស្តែង ក្រុមគណបក្សសាធារណរដ្ឋបានចោទលោកស្រី Hillary Clinton នៅពេលដែលលោកស្រីបំពេញមុខងារជារដ្ឋមន្រ្តីក្រសួងការបរទេសអាមេរិកចន្លោះពីឆ្នាំ ២០០៩ ដល់ឆ្នាំ ២០១៣។ ក្រុមសាធារណរដ្ឋរកឃើញថា ចន្លោះពេលនោះ មានសប្បុរសជនបរទេស ក្រុមហ៊ុនឯកជនបរទេស និងមន្រ្តីជាន់ខ្ពស់បំរើការឲ្យរដ្ឋាភិបាលបរទេសមួយចំនួនតែងបរិច្ចាកថវិការជូនមូលនិធិ Clinton។ ជាថ្នូរមកវិញ សប្បុរសជនបរទេសទាំងនោះតែងទទួលបានប្រយោជន៍ ឬការអន្តរាគមន៍សម្របសម្រួលក្នុងសំណុំរឿងកិច្ចការណាមួយពីលោកស្រី Hillary Clinton និងពីរដ្ឋាភិបាលអាមេរិក។
កាលពីសប្តាហ៍មុន នាជំនួបជាមួយអ្នកគាំទ្រនៅទីក្រុង Akron ក្នុងរដ្ឋ Ohio លោក Donald Trump បេក្ខជនប្រធានាធិបតីតំណាងគណបក្សសាធារណរដ្ឋបានចាត់ទុកថានេះជារឿងអាស្រូវមួយរបស់មូលនិធិ Clinton ហើយលោក Trump កំពុងយកលេសនេះដើម្បីបើកការវាយប្រហារលើលោកស្រី Hillary Clinton ដោយចោទលោកស្រីថាជាមនុស្សមិនស្មោះត្រង់ ពុករលួយ និងអាចទិញទឹកចិត្តបាន។
ក្រៅពីស្នើឲ្យបិទសកម្មភាពមូលនិធិនេះជាបន្ទាន់ លោក Trump ក៏ថែមទាំងបានទទូចឲ្យតុលាការអាមេរិកតែងតាំងរដ្ឋអាជ្ញាពិសេសម្នាក់ ដើម្បីបើកការស៊ើបអង្កេតលើលោកស្រី Hillary Clinton។ ហើយលោក Trump ក៏បានសំដែងការខកចិត្ត និងចាត់ទុកការស៊ើបអង្កេតកន្លងមករបស់ FBI និងក្រសួងការបរទេសអាមេរិកគឺ ជាបរាជ័យ។ បរាជ័យត្រង់ថាស្ថាប័នទាំងពីរបានទំលាក់ចោលការចោទប្រកាន់លើលោកស្រី Hillary Clinton ជុំវិញការប្រើប្រាស់ស៊ែរវើ (serveur) ឯកជនផ្ទុកព័ត៌មានឆ្លើយឆ្លងអ៊ីមែលផ្លូវការក្នុងកំឡុងពេលដែលលោកស្រីជារដ្ឋមន្រ្តីការបរទេសអាមេរិក។
អង្គការ Judicial Watch ដែលជាស្ថាប័នមួយរបស់គណបក្សសាធារណរដ្ឋបានដឹកនាំយុទ្ធនាការមួយប្តឹងផ្តល់លោកស្រី Hillary Clinton។ ចាប់តាំងពីថ្ងៃច័ន្ទសប្តាហ៍មុនមកម្ល៉េះ អង្គការនេះទម្លាយឯកសារឆ្លើយឆ្លងតាមអ៊ីមែលរបស់លោកស្រី Hillary Clinton។ ការទម្លាយឯកសារនេះ គឺបន្ទាប់ពីចៅក្រម James Boasberg បានអនុញ្ញាតិឲ្យផ្សព្វផ្សាយដោយយោងទៅលើច្បាប់ស្តីពីតម្លារភាព។ ឯកសារនេះបានបង្ហាញឲ្យដឹងថា សប្បុរសជនមួយចំនួនរបស់មូលនិធិ Clinton តែងស្នើសុំជួបលោកស្រី Hillary Clinton។ សប្បុរសជនទាំងនោះបានសរសេរសារទៅកាន់លោកស្រី Huma Abedin ដែលជាមនុស្សជំនិតម្នាក់បំរើការឲ្យលោកស្រី Hillary Clinton។ ប៉ុន្តែ ខ្លឹមសារនៃសារឆ្លើយឆ្លងនោះពុំមានភស្តុតាងបង្ហាញថា លោកស្រីរដ្ឋមន្រ្តីការបរទេសអាមេរិកបានផ្តល់ផលប្រយោធន៍អ្វីខ្លះដល់ពួកសប្បុរសជនទាំងនោះជាថ្នូរមកវិញឡើយ។
ឯកសារឆ្លើយឆ្លងតាមអ៊ីមែលមួយចំនួនបានបង្ហាញឲ្យដឹងថា លោក Doug Band ដែលជាមនុស្សជំនិតម្នាក់របស់លោក Bill Clinton ហើយក៏ជាបុគ្គលិកបំរើការឲ្យមូលនិធិ Clinton បានសរសេរសារទាក់ទងមនុស្សជំនិតពីរនាក់របស់លោកស្រី Hillary Clinton។ មនុស្សជំនិតពីរនាក់នោះសុទ្ធតែជាមន្រ្តីរដ្ឋការប្រចាំក្រសួងការបរទេស។ ខ្លឹមសារឆ្លើយឆ្លងនោះគឺ លោក Doug Band ស្នើសុំការសម្របសម្រួលដើម្បីឲ្យមានជំនួបមួយ រវាងមន្រ្តីការទូតអាមេរិកប្រចាំប្រទេសលីបង់ និងសម្បុរសជនម្នាក់ដែលបានបរិច្ចាកប្រាក់ដល់មូលនិធិ Clinton។ សប្បុរសជនរូបនោះត្រូវបានគេដឹងជាមហាសេដ្ឋីសញ្ជាតិលីបង់ និងនីហេ្សរីយ៉ាឈ្មោះ Gilbert Chagoury។
ថ្មីៗនេះ នៅក្នុងការស៊ើបអង្កេតរបស់ខ្លួន នគរបាលសហព័ន្ធ (FBI) បានប្រគល់ឯកសារថ្មីចំនួន ១៤ ៩០០ អ៊ីមែលរបស់លោកស្រី Hillary Clinton ទៅឲ្យក្រសួងការបរទេសអាមេរិក។ ឯកសារទាំងនោះ គឺសុទ្ធសឹងតែជាអ៊ីមែលការងារ និងឯកជនរបស់លោកស្រី Clinton។ ហើយ ជាសន្សឹមៗ ក្រសួងការបរទេសអាមេរិកគ្រោងផ្សព្វផ្សាយឯកសារទាំងនោះជាសាធារណៈនាខែតុលាខាងមុខនេះ។ រយៈពេលប៉ុន្មានខែកន្លងមកនេះ ក្រសួងការបរទេសអាមេរិកបានទម្លាយឯកសារចំនួន ៥៥ ០០០ អ៊ីមែលរបស់លោកស្រី Clinton ម្តងរួចមកហើយ។ សូមបញ្ជាក់ថា នៅក្នុងសំណុំរឿងផ្ទុកអ៊ីមែលការងារនៅលើស៊ែរវើ (serveur) ឯកជននេះ លោកស្រី Hillary Clinton បានរួចផុតពីការចោទប្រកាន់ពីតុលាការ ប៉ុន្តែ នាយក FBI បានចាត់ទុកថា ទង្វើរបស់លោកស្រី គឺជាការធ្វេសប្រហែសដ៏ធ្ងន់ធ្ងរមួយក្នុងការឆ្លើយឆ្លងព័ត៌មានការងារជាតិតាមរយៈស៊ែរវើឯកជន ដែលពុំអាចមានសុវត្ថិភាពគ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ