ការសម្រាកមាតុភាពមានប្រាក់ឧបត្ថម្ភកំពុងក្លាយជាប្រធានបទឃោសនាបោះឆ្នោតប្រធានាធិបតីអាមេរិក
ចុះផ្សាយនៅថ្ងៃ៖
ស្តាប់ - ០៤:២៨
ការឈប់សម្រាកសម្រាលកូនដោយមានប្រាក់ឧបត្ថម្ភ គឺជាប្រធានបទដ៏សំខាន់មួយនៅសហរដ្ឋអាមេរិក។ សហរដ្ឋអាមេរិក គឺជាប្រទេសតែមួយគត់ក្នុងចំណោមប្រទេសជឿនលឿន ដែលពុំមានគោលនយោបាយថ្នាក់ជាតិបែបនេះឡើយ។ ខុសពីបណ្តាប្រទេសនៅអឺរ៉ុប ការឈប់សម្រាកសម្រាលកូននៅសហរដ្ឋអាមេរិកពុំមានប្រាក់ឧបត្ថម្ភទេ។ ស្ថាប័នរដ្ឋ ឬក្រុមហ៊ុនឯកជននានាមានគោលនយោបាយខុសៗគ្នាសំរាប់បុគ្គលិករបស់ខ្លួន។ បច្ចុប្បន្ននេះ បេក្ខជនប្រធានាធិបតីអាមេរិកកំពុងស្នើគោលនយោបាយគ្រួសារ ដើម្បីទាក់សម្លេងគាំទ្រពីពលរដ្ឋអាមេរិក។
នាជំនួបជាមួយអ្នកគាំទ្រកាលពីថ្ងៃអង្គារសប្តាហ៍មុននៅទីក្រុង Aston រដ្ឋ Pennsylvanie លោក Donald Trump បេក្ខជនគណបក្សសាធារណរដ្ឋបានសន្យាថា ប្រសិនបើលោកឈ្នះឆ្នោតក្លាយជាប្រធានាធិបតីអាមេរិក លោកនឹងបង្កើតគោលនយោបាយមួយ ដើម្បីជួយគ្រួសារអាមេរិកដែលមានកូន។ កម្មវិធីនយោបាយនោះ គឺការឈប់សម្រាកមាតុភាព ឬការឈប់សម្រាកសម្រាលកូនរយៈពេល ៦ សប្តាហ៍ដោយផ្តល់ប្រាក់ឧបត្ថម្ភដល់មាតាក្នុងកំឡុងពេលឈប់សម្រាកនោះ។ មានតែស្រ្តីដែលជាអ្នកសម្រាលកូន និងមានការងារធ្វើពិតប្រាកដតែប៉ុណ្ណោះ ដែលអាចទទួលបានប្រាក់ឧបត្ថម្ភនេះ។ ប្រាក់ឧបត្ថម្ភដែលស្រ្តីនោះនឹងទទួល គឺមានចំនួនតិចជាងប្រាក់បៀវត្សរ៍របស់ខ្លួន។ មានន័យថាវាស្មើនឹងប្រាក់ឧបត្ថម្ភសម្រាប់អ្នកអត់ការងារធ្វើ។ ហើយរង្វង់ទឹកប្រាក់នេះខុសគ្នានៅតាមរដ្ឋនីមួយ។ កម្មវិធីនេះ គឺអនុវត្តតែនៅតាមសហគ្រាស ឬក្រុមហ៊ុនណា ដែលពុំមានកម្មវិធីបង់ប្រាក់ឈ្នួលបែបនេះដល់បុគ្គលិកខ្លួន ពេលឈប់ក្រោយសម្រាលកូន។
លើសពីនេះ ដើម្បីទាក់ទាញសម្លេងឆ្នោតឲ្យបានកាន់តែច្រើន ជាពិសេសគឺស្រ្តី លោក Trump ក៏ថែមទាំងគ្រោងបង្កើតកម្មវិធីជួយឧបត្ថម្ភការចំណាយលើសេវាកម្មមើលថែកូន ដើម្បីអនុញ្ញាតឲ្យស្រ្តីអាចទៅធ្វើការបាន។ លោក Trump បាននិយាយអួតអាងថា វិធានការណ៍ឧបត្ថម្ភលើការចំណាយមើលថែក្មេងនេះគឺ ធ្វើឡើងតាមរយៈការបន្ធូរបន្ថយពន្ធសំរាប់អ្នកមានចំណូលមធ្យម ឬចំណូលខ្ពស់។ ការកាត់បន្ថយពន្ធប្រាក់បៀវត្សរ៍នេះនឹងអនុញ្ញាតឲ្យមាតាបិតាអាមេរិកមានខ្ទង់ចំណាយគ្រប់គ្រាន់លើសេវាកម្មមើលថែកូនរហូតដល់អាយុ ១៣ ឆ្នាំ។ ចំពោះអ្នកមានចំណូលទាបដែលមិនត្រូវបង់ពន្ធលើប្រាក់បៀវត្សរ៍ ពួកគេនឹងទទួលបានប្រាក់ជំនួយចំនួន ១ ២០០ ដុល្លារក្នុងមួយឆ្នាំសំរាប់ជាសោហ៊ុយចំណាយលើសេវាកម្មមើលថែក្មេងនេះ។ ហើយលោក Trump ក៏គ្រោងបង្កើតកម្មវិធីមួយចំនួនទៀត ក្នុងន័យជំរុញលើកទឹកចិត្តឲ្យនិយោជក (ម្ចាស់ក្រុមហ៊ុន) បង្កើតមណ្ឌលមើលថែក្មេងនៅទីកន្លែងធ្វើការផ្ទាល់តែម្តង។ សូមបញ្ជាក់ថា ជាទូទៅ នៅសហរដ្ឋអាមេរិក សេវាកម្មមើលថែក្មេងនៅតាមមណ្ឌលសិក្សាឯកជនមុនថ្នាក់មតេ្តយ្យមានតម្លៃខ្ពស់កប់ពពក។
ដោយមានកូនស្រីរបស់ខ្លួន គឺនាង Ivanka ឈរនៅពីក្រោយ លោក Donald Trump ក៏បានពន្យល់ថាផែនការសំរាប់គ្រួសារអាមេរិកនេះគឺ ជាកម្មវិធីនយោបាយគាំទ្រគ្រួសារ គាំទ្រកុមារ និងគាំទ្រនិយោជិត (បុគ្គលិក-កម្មករ)។ មានអាយុ ៣៤ ឆ្នាំ ហើយជាម្តាយមានកូនបីនាក់ នាង Ivanka ជាបុគ្គលិកបំរើការឲ្យក្រុមហ៊ុន Trump Organization។ លោក Trump បានអួតសរសើរថា កូនស្រីខ្លួនបានផ្តោតការងារលើគោលនយោបាយនេះអស់រយៈពេលជាយូរមកហើយ។ ហើយលោក Trump និងកូនស្រីក៏បានឆ្លៀតដាក់ផ្លែផ្កាចំអកឲ្យលោកស្រី Hillary Clinton ដែលតែងតែសន្យាការពារគ្រួសារពលរដ្ឋអាមេរិក ប៉ុន្តែពុំដែលបានចេញគោលនយោបាយច្បាស់លាស់មួយ។
ជាការឆ្លើយតប គណបក្សប្រជាធិបតេយ្យបានសំដែងប្រតិកម្មដោយប្រកាសថា គោលនយោបាយគ្រួសាររបស់លោក Trump ពុំមានភាពស៊ីសង្វាក់ និងពុំមានលំនឹងឡើយ។ តាមពិតទៅ អស់រយៈពេល ជាងមួយឆ្នាំមកហើយ ដែលលោកស្រី Hillary Clinton បានធ្វើយុទ្ធនាការឃោសនាលើកម្មវិធីនយោបាយស្រដៀងគ្នានេះ។ លោកស្រី Clinton បានស្នើបង្កើតការឈប់សម្រាកចាំបាច់មួយ ដោយផ្តល់ប្រាក់ឧបត្ថម្ភរយៈពេល ១២ សប្តាហ៍។ ខុសពីកម្មវិធីរបស់លោក Trump ការឈប់សម្រាកក្រោយសម្រាលកូនរបស់លោកស្រី Clinton គឺអាចអនុវត្តបានសម្រាប់ឱពុក ឬម្តាយ។ ហើយប្រាក់ឧបត្ថម្ភពេលឈប់សម្រាកនោះ គឺស្មើនឹងពីរភាគបីនៃប្រាក់បៀវត្សរ៍របស់បុគ្គលិកនោះ។ មែនទែនទៅ គឺខ្ពស់ជាងប្រាក់ឧបត្ថម្ភ ដែលលោក Trump បានស្នើក្នុងកម្មវិធីរបស់ខ្លួន។ ចំណែកការឧបត្ថម្ភចំណាយលើការមើលថែក្មេងវិញ កម្មវិធីរបស់លោកស្រី Clinton គឺជួយរហូតដល់ ១០% នៃប្រាក់ចំណូលប្រចាំគ្រួសារ។
ការដាក់ចេញគោលនយោបាយថ្មីរបស់លោក Trump បែបនេះត្រូវបានគេយល់ឃើញថាជាការចង់ទាក់ទាញសម្លេងគាំទ្រពីស្រ្តីអាមេរិក។ សូមរំលឹកជូនថា ភាគច្រើននៃស្រ្តីអាមេរិកមានអាយុបោះឆ្នោត មានទំនោរគាំទ្រលោកស្រី Hillary Clinton។ បើតាមការស្ទង់មតិមួយនាពេលថ្មីៗនេះដោយសារព័ត៌មាន ABC News និងWashington Post បានឲ្យដឹងថា លោកស្រី Hillary Clinton ទទួលបានការគាំទ្រពីស្រ្តីចំនួន ៥២% ខណៈពេលដែលលោក Donald Trump ទួលបានតែ ៣៧% តែប៉ុណ្ណោះ។ ដូចនេះ លោកស្រី Clinton មានពិន្ទុដឹកមុខចំនួន ១៥%។ ប្រហែលជាក្នុងន័យបន្ថយគម្លាតដឹកមុខនេះហើយទើបលោក Trump កំពុងព្យាយាមស្នើកម្មវិធីនយោបាយផ្គាប់ចិត្តស្រ្តី។ ម៉្យាងទៀត លោក Trump ក៍កំពុងស្តារមុខមាត់ផងដែរ ព្រោះកន្លងមកគាត់តែងបញ្ចេញពាក្យពេចន៍មិនសមរម្យមើលងាយស្រ្តី។
សូមបញ្ជាក់ផងដែរថា សហរដ្ឋអាមេរិក គឺជាប្រទេសតែមួយគត់ក្នុងចំណោមប្រទេសជឿនលឿន ដែលពុំមានគោលនយោបាយថ្នាក់ជាតិផ្តល់ប្រាក់ឧបត្ថម្ភពេលឈប់សម្រាកសម្រាលកូន។ ច្បាប់សហព័ន្ធអាមេរិក (Family Medical Leave Act) ដែលបានចូលជាធរមានតាំងពីឆ្នាំ ១៩៩៣ បានត្រឹមតែអនុញ្ញាតឲ្យពលរដ្ឋអាមេរិកមានសិទ្ធិទទួលការឈប់សម្រាកមាតាបិតាចំនួន ១២ សប្តាហ៍ប៉ុណ្ណោះ។ ច្បាប់នេះធានាជូនដល់ស្រ្តី (ឬបុរស) អាចឈប់បណ្តោះអាសន្នពីការងាររយៈពេល ១២ សប្តាហ៍ក្រោមហេតុផលគ្រួសារ។ ប៉ុន្តែ ក្នុងកំឡុងពេលឈប់សម្រាកនោះ ស្រ្តី ឬបុរសពុំទទួលបានប្រាក់ឧបត្ថម្ភឡើយ។ លើសពីនេះ ដើម្បីអាចទទួលបានការឈប់សម្រាកបែបនេះ បុគ្គលិកនោះត្រូវមានអតីតៈភាពការងារយ៉ាងហោចណាស់មួយឆ្នាំ ហើយត្រូវធ្វើការពេញម៉ោង។ ចំណែកទំហំរបស់ក្រុមហ៊ុន ឬសហគ្រាសនោះ គឺត្រូវមានបុគ្គលិកចាប់ពី ៥០ នាក់ឡើងទៅ។
ក្រុមហ៊ុនអាមេរិកធំៗមួយចំនួនដូចជា Facebook, Google, Netflix, Yahoo និងធានាគារធំៗជាដើមមានគោលនយោបាយផ្តល់ការឈប់សម្រាកសម្រាលកូនមានប្រាក់ឧបត្ថម្ភដល់បុគ្គលិករបស់ខ្លួន។ជាសរុប បើតាមការិយាល័យស្ថិតិការងារអាមេរិកបានឲ្យដឹងថា មានពលរដ្ឋអាមេរិកតែ ១៣% ប៉ុណ្ណោះដែលទទួលបានការឈប់សម្រាកមានប្រាក់ឧបត្ថម្ភបែបនេះ។ តួលេខនេះ គឺពុំច្រើនឡើយបើប្រៀបធៀបជាមួយនឹងប្រទេសជឿនលឿនដទៃទៀត។ ហេតុដូចនេះហើយបានជាមួយភាគបួននៃស្រ្តីអាមេរិកត្រូវបង្ខំចិត្តត្រលប់ទៅធ្វើការវិញ ក្រោយពីសម្រាលកូនហើយបានពីរសប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ