នយោបាយការបរទេសរបស់រដ្ឋាភិបាលអាមេរិកថ្មីនៅតែបង្កប់ភាពស្រពិចស្រពិល និងមិនច្បាស់លាស់ចំពោះអឺរ៉ុប
ចុះផ្សាយនៅថ្ងៃ៖
ស្តាប់ - ០៤:២៩
វត្តមានរបស់មន្រ្តីកំពូលអាមេរិកចំនួនបីរូបកាលពីសប្តាហ៍មុននៅតំបន់អឺរុបត្រូវបានគេប្រសិទ្ធនាមឲ្យថាជាសប្តាហ៍អាមេរិក-អឺរ៉ុប។ អនុប្រធានាធិបតីអាមេរិក រដ្ឋមន្រ្តីការបរទេស និងរដ្ឋមន្រ្តីការពារជាតិអាមេរិកសុទ្ធតែបានបង្ហាញវត្តមានក្នុងជំនួបកំពូលបីដាច់ដោយឡែកពីគ្នា។ ឆ្លើយតបនឹងការទន្ទឹងរង់ចាំពីសំណាក់ដៃគូអឺរ៉ុប មន្រ្តីជាន់ខ្ពស់អាមេរិកទាំងបីរូបបានធានាប្រាប់ដៃគូសម្ព័ន្ធមិត្តអំពីគោលជំហរអាមេរិកចំពោះអឺរ៉ុប។ ពោល គឺអាមេរិកនៅតែជាមិត្តរបស់អឺរ៉ុប។ ប៉ុន្តែ សេចក្តីថ្លែងការណ៍នេះនៅតែមិនទាន់ធ្វើឲ្យអឺរុបកក់ក្តៅក្នុងចិត្តនៅឡើយ ព្រោះគេនៅតែមិនទាន់ដឹងអំពីជំហរផ្ទាល់ខ្លួនរបស់លោកប្រធានាធិបតី ដូណាល់ ត្រាំ ដែលញឹកញយតែងនិយាយផ្ទុយស្រឡះពីមន្រ្តីរបស់ខ្លួន។
ចំពោះមុខសេចក្តីថ្លែងការណ៍កន្លងមករបស់លោកប្រធានាធិបតី ដូណាល់ ត្រាំ ដែលតែងនិយាយត្រឡប់ត្រឡិនមិនអាចទុកចិត្តបាន លោក Mike Pence អនុប្រធានាធិបតីអាមេរិក, លោក Rex Tillerson រដ្ឋមន្រ្តីការបរទេស និងលោក James Mattis រដ្ឋមន្រ្តីការពារជាតិ បានខិតខំប្រឹងប្រែងបញ្ជាក់គោលជំហររបស់អាមេរិកចំពោះដៃគូសម្ព័ន្ធមិត្តអឺរ៉ុប។ ឥស្សរជនទាំងបីរូបខំប្រឹងបញ្ជាក់ថា សហរដ្ឋអាមេរិកនៅតែជាដៃគូអឺរ៉ុបដដែល។ សម្តីនេះមើលទៅហាក់មានខ្លឹមសារស៊ីជំរៅខ្លាំងធ្វើឲ្យដៃគូអឺរ៉ុបមានការកក់ក្តៅក្នុងចិត្ត។ ក៏ប៉ុន្តែ បើយើងសាកល្បងពិនិត្យមើលសំណុំរឿងអន្តរជាតិម្តងមួយៗ យើងនឹងឃើញថា ភាពស្រពិចស្រពិលនៅតែបន្តមានជុំវិញគោលនយោបាយការបរទេសរបស់រដ្ឋាភិបាលអាមេរិកថ្មី។
សំណុំរឿងអូតង់ (OTAN)
រយៈកន្លងមក លោកប្រធានាធិបតី ដូណាល់ ត្រាំ តែងថ្លែងថា អង្គការសហប្រតិបត្តិការអាត្លង់ទិកខាងជើង ហៅកាត់ថា OTAN ជាស្ថាប័ន ចាស់គំរិល និង គ្មានសារៈសំខាន់។ ត្រង់ចំនុចនេះ មន្រ្តីកំពូលអាមេរិកបានធានាប្រាប់អឺរុបថា ចំណងសម្ព័ន្ធមិត្តរវាងអាមេរិក និងអឺរ៉ុប គឺគ្មានអ្វីមកអាចបំបែកបានទេ។ ក្នុងន័យនេះ អាមេរិក នៅតែជាមិត្ត និងបន្តដើរតួនាទីក្នុងការការពារសន្តិសុខ ក្នុងក្របខណ្ឌអង្គការ OTAN ដដែល។ ប៉ុន្តែ សូមកុំភ្លេចថា សម្ព័ន្ធមិត្តនេះមានជាប់លក្ខខ័ណ្ឌ។ គឺ អឺរ៉ុបត្រូវបង្កើនការចំណាយបន្ថែមទៀត ដើម្បីបរិច្ចាកដល់ដំណើរការអង្គការ OTAN។
នៅក្នុងកិច្ចប្រជុំអូតង់ នាទីក្រុងព្រុចសែល ប្រទេសប៊ែលហ្សិក លោក James Mattis រដ្ឋមន្រ្តីការពារជាតិអាមេរិកបានគំរាមថា សហរដ្ឋអាមេរិកអាចនឹងបន្ថយសកម្មភាពរបស់ខ្លួនក្នុងក្របខ័ណ្ឌ OTAN ប្រសិនបើសម្ព័ន្ធមិត្តអឺរ៉ុបមិនព្រមបង្កើនថវិកាយោធារបស់ខ្លួន។ ពោល គឺប្រទេសជាសមាជិកនិមួយៗត្រូវតែបង្កើនថវិកាយោធាឲ្យបាន ២% នៃផលិតផលដុលសរុបក្នុងស្រុករបស់ខ្លួន។
ទាក់ទិននឹងចំនុចនេះ ប្រទេសអឺរ៉ុបដែលជាសមាជិកអង្គការ OTAN ហាក់មិនប្រឆាំងជំទាស់នឹងការបង្កើនការចំណាយរបស់ខ្លួនឡើយ។ ប៉ុន្តែ ប្រទេសទាំងនោះក៏បានបញ្ជាក់ប្រាប់សហរដ្ឋអាមេរិកដែរថា ការបង្កើនចំណាយយោធាមិនមែនជាដំណោះស្រាយតែមួយប៉ុណ្ណោះទេ។ ការផ្តល់ជំនួយផែ្នកអភិវឌ្ឍន៍ដល់ប្រទេសក្រីក្រ និងការទទួលយកជនភៀសខ្លួនក៏ចាំបាច់ផងដែរ។ វិធានការណ៍ទាំងពីរនេះត្រូវការចំណាយថវិកាច្រើន ហើយវាក៏ចាំបាច់ផងដែរក្នុងការរក្សាស្ថេរភាពពិភពលោក ក៏ដូចជាសន្តិសុខអន្តរអាត្លង់ទិក។
សំណុំរឿងរុស្ស៊ី និងអ៊ុយក្រែន
ថ្មីៗនេះ មន្រ្តីកំពូលអាមេរិកបានបង្ហាញជំហរដកខ្លួនឲ្យឆ្ងាយពីរុស្ស៊ី បើទោះបីជាកន្លងមក លោកប្រធានាធិបតី ដូណាល់ ត្រាំ តែងបានប្រកាសក្តែងៗចង់ស្តារទំនាក់ទំនងអាមេរិក-រុស្សីឡើងវិញ។ លោក ត្រាំ ធ្លាប់បានថ្លែងថា ចង់បង្កើតភាពដៃគូរវាងប្រទេសមហាអំណាចទាំងពីរ ក្នុងការដោះស្រាយសំណុំរឿងអន្តរជាតិស្មុគស្មាញ។ ប៉ុន្តែ ក្តីសង្ឃឹមនេះហាក់កំពុងរលត់ទៅវិញ បន្ទាប់ពីលោក Michael Flynn ទីប្រឹក្សាសន្តិសុខរបស់លោក ដូណាល់ ត្រាំ បានលាលែងពីតំណែង។ ទីប្រឹក្សារូបនេះបានទទួលរងការចោទប្រកាន់ ក្រោយពីបាននិយាយកុហកចំពោះទំនាក់ទំនងខ្លួនជាមួយរុស្ស៊ី។
សំរាប់សម្ព័ន្ធមិត្តអឺរ៉ុប សំណុំរឿងអ៊ុយក្រែន គឺជារឿងសំខាន់បំផុត ព្រោះអឺរ៉ុបតែងភ័យខ្លាចនយោបាយវាតទីនិយមរបស់រុស្ស៊ី។ ក្នុងបរិបទនេះ លោកអនុប្រធានាធិបតី Mike Pence បានអំពាវនាវឲ្យរុស្ស៊ីគោរពកិច្ចព្រមព្រៀងសន្តិភាព ទីក្រុងមីនស្គ៍ ហើយលោកសង្ឃឹមថានឹងអាចស្វែងរកចំណុចរួមគ្នាមួយជាមួយរុស្ស៊ី។ ប៉ុន្តែ ទាំងលោក Mike Pence ទាំងលោក លោក Rex Tillerson រដ្ឋមន្រ្តីការបរទេស ហាក់ពុំមានភាពប្រាកដប្រជាឡើយ ក្នុងសំណុំរឿងនេះ ព្រោះពួកគាត់ពុំបានបញ្ជាក់អំពីផែនការ និងគោលដៅអ្វីឡើយ ដើម្បីឈានទៅរកដំណោះស្រាយ។
ក្នុងសំណុំរឿងអ៊ុយក្រែននេះ លោកស្រី Ursula Van der Leyen រដ្ឋមន្រ្តីការពារជាតិអាល្លឺម៉ង់បានអំពាវនាវឲ្យសហរដ្ឋអាមេរិក កុំធ្វើអ្វីមួយជាលក្ខណៈទ្វេភាគីជាមួយរុស្ស៊ី ដោយរំលងក្បាលអឺរ៉ុប ដែលជាដៃគូ។ មានវត្តមានក្នុងសន្និសីទក្រុងមុយនិចស្តីពីបញ្ហាសន្តិសុខ លោក Sergueï Lavrov រដ្ឋមន្រ្តីការបរទេសរុស្ស៊ីបានអំពាវនាវឲ្យសហរដ្ឋអាមេរិកបង្កើតទំនាក់ទំនងបែបប្រាកដនិយមជាក់ស្តែងមួយជាមួយរុស្ស៊ី។ ហើយរុស្ស៊ីទាមទារចង់បានសណ្តាប់ធ្នាប់ពិភពលោកថ្មីមួយ ដោយសណ្តាប់ធ្នាប់ថ្មីនេះត្រូវផ្តាច់ខ្លួនចេញពីគំនាបគ្របដណ្តប់ពីប្រទេសលោកខាងលិច ដែលចាក់ឬសជាយូរអង្វែងមកហើយ។
សំណុំរឿងសហភាពអឺរ៉ុប និង Brexit
កន្លងមក លោកប្រធានាធិបតី ដូណាល់ ត្រាំ តែងធ្វើឲ្យបណ្តាប្រទេសសមាជិកសភាពអឺរ៉ុបភ្ញាក់ផ្អើល។ ភ្ញាក់ផ្អើលត្រង់សេចក្តីថ្លែងការណ៍របស់គាត់អបអរសាទរចំពោះសំណុំរឿង Brexit គឺការដកខ្លួនរបស់ប្រទេសអង់គ្លេសចេញពីសហភាពអឺរ៉ុប។ ហើយសំដីរបស់លោក ត្រាំ ទំនងបង្ហាញពីបំណងរបស់គាត់ចង់ឃើញសហភាពអឺរ៉ុបបែកបាក់គ្នាជាចំរៀកៗ។ ក្នុងសំណុំរឿងនេះ យើងឃើញថា គ្មានមន្រ្តីកំពូលអាមេរិកណាម្នាក់បានលើកនិយាយឡើយ ដើម្បីបញ្ជាក់គោលជំហររដ្ឋាភិបាលអាមេរិកថ្មី។ លោក Jean-Marc Ayrault រដ្ឋមន្រ្តីការបរទេសបារាំងបានសំដែងការសោកស្តាយ ដោយសារតែក្នុងសម្តីរបស់លោកអនុប្រធានាធិបតីអាមេរិក គឺមិនមានលើកឡើងពីសហភាពអឺរ៉ុបសូម្បីតែមួយម៉ាត់។
បុគ្គលិកលក្ខណៈរបស់លោក ដូណាល់ ត្រាំ
នេះជាចំនុចសំខាន់មួយដែលម្នាក់ៗនៅតែស្រពិចស្រពិល។ បើទោះបីជាមន្រ្តីកំពូលអាមេរិកខិតខំពន្យល់បញ្ចុះបញ្ចូលដៃគូអឺរ៉ុប តើលោកប្រធានាធិបតី ដូណាល់ ត្រាំ នឹងរក្សាសំដីដូចអ្វីដែលមន្រ្តីរបស់ខ្លួនបាននិយាយដែរឬទេ? តើលោក ដូណាល់ ត្រាំ នឹងខ្ជាក់សំដីទាំងនោះចោលវិញ តាមការធ្វើព្យុះធ្វើភ្លៀងបញ្ចេញមតិលើបណ្តាញសង្គម Twitter? ជុំវិញចំនុចនេះ លោក John McCain សមាជិកព្រឹទ្ធសភាគណបក្សសាធារណរដ្ឋបានថ្លែងថា វាជាការពិបាកក្នុងការយល់ចិត្តលោក ត្រាំ។ ពេលខ្លះ លោក ត្រាំ និយាយម្តងអញ្ចេះម្តងអញ្ចុះ ជួននិយាយជាន់កែងខ្លួនឯងទៀតផង។ យកល្អ គេគួរប្រយ័ត្នចំពោះអ្វីដែលលោក ត្រាំ នឹងត្រូវធ្វើ ជាជាងប្រយ័ត្នចំពោះសំដីរបស់គាត់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ