ក្រុមហ៊ុនអាកាសចរណ៍នៅមានមន្ទិលសង្ស័យចំពោះប្រសិទ្ធិភាពនៃវិធានការណ៍សន្តិសុខរបស់សហរដ្ឋអាមេរិក
ចុះផ្សាយនៅថ្ងៃ៖
ស្តាប់ - ០៤:១៤
ក្រុមហ៊ុនអាកាសចរណ៍បានសំដែងការព្រួយបារម្ភចំពោះ វិធានការណ៍រឹតបន្តឹងសន្តិសុខតាមយន្តហោះរបស់សហរដ្ឋអាមេរិក។ បណ្តាក្រុមហ៊ុនទាំងអាចនឹងចំណាយប្រាក់ជាង ២ ពាន់លានដុល្លារ ប្រសិនបើសហរដ្ឋអាមេរិកសំរេចហាមឃាត់អ្នកដំណើរហោះមកពីគ្រប់ ទីកន្លែងមិនឲ្យយកឧបករណ៍អេឡិចត្រូនិចតាមខ្លួន។ តំណាងក្រុមហ៊ុនអាកាសចរណ៍ជុំវិញពិភពលោកក៏បានចោទសួរអំពី ប្រសិទ្ធិភាពនៃវិធានការណ៍សន្តិសុខនេះផងដែរ។ ក្រៅពីទប់ស្កាត់ការគំរាមកំហែងភេរវកម្ម តើវិធានការណ៍អាមេរិកមានបង្កប់អ្វីខ្លឹមសារនយោបាយអ្វីខ្លះ?
កាលពីថ្ងៃទី៥ ដល់ទី៧ មិថុនាកន្លងទៅនេះ សមាគមអន្តរជាតិផែ្នកដឹកជញ្ជូនតាមផ្លូវអាកាស (AITA) បានរៀបចំមហាសន្និបាទលើកទី៧៣ របស់ខ្លួននៅទីក្រុង Cancun ប្រទេសម៉ិចសិក។ សមាគមនេះមានក្រុមហ៊ុនអាកាសចរណ៍ចំនួន ២៧៥ ជាសមាជិក។ ប្រធានបទនៃជំនួបនេះ គឺទាក់ទងបញ្ហាសន្តិសុខ និងការគំរាមកំហែងវាយប្រហារភេរវកម្មពីសំណាក់ពួកជីហាតជ្រុលនិយម។ ការជ្រើសរើសប្រធានបទនេះមកជជែកពិភាក្សា គឺមិនមែនដោយចៃដន្យឡើយ។
សូមរំលឹកជូនថា កាលពីថ្ងៃទី២១ មិនាកន្លងទៅនេះ សហរដ្ឋអាមេរិកបានចេញបំរាមពិសេសមួយចំពោះអ្នកដំណើរមកពីអាកាសយានដ្ឋានចំនួន ១០ នៃប្រទេសចំនួន ៩ ក្នុងនោះមានដូចជា៖ ហ្សកដានី អេហ្សីប តួកគី អារ៉ាប៊ីសាអ៊ូឌីត កូវ៉ែត កាតា សហភាពអារ៉ាប់រួម និងម៉ារ៉ុក។ ប្រទេសទាំងនោះ ខ្លះជាសម្ព័ន្ធមិត្ត ខ្លះជាដៃគូអាមេរិក ។ បំរាមនោះ គឺមិនអនុញ្ញាតឲ្យអ្នកដំណើរតាមយន្តហោះចេញមកពីប្រទេសទាំងនោះ មិនឲ្យយកឧបករណ៍អេឡិចត្រូនិចតាមខ្លួន ក្រៅពីទូរស័ព្ទដៃតែប៉ុណ្ណោះ។ គ្រឿងអេឡិចត្រូនិចដែលហាមឃាត់ និងមានទំហំធំជាងទូរស័ព្ទដៃមានដូចជា៖ កុំព្យូទ័រយួរដៃ ថាបឡែត ម៉ាស៊ីនថតរូប ក្តារអានសៀវភៅអេឡិចត្រូនិច ឧបករណ៍លេងហ្គេមតាមខ្លួន និងឧបករណ៍ចាក់ឌីវីឌីតាមខ្លួនជាដើម។ ឧបករណ៍ហាមឃាត់ទាំងនោះតម្រូវឲ្យដាក់នៅក្នុងវ៉ាលីសបិទជិត ដើម្បីទុកនៅបាតយន្តហោះ។
បើតាមការបញ្ជាក់ សហរដ្ឋអាមេរិកបានសំអាងថា ខ្លួនបានទទួលព័ត៌មានពីក្រុមចារកម្មសម្ងាត់ដែលជឿជាក់ថា ពួកភេរវករអាចប្រើប្រាស់ឧបករណ៍ទាំងនោះធ្វើជាគ្រឿងបំផ្ទុះលើយន្តហោះ។ តាមរយៈទ្រឹស្តីនេះ គឺក្រុមភេរវជនអាចលាក់សារជាតិផ្ទុះទៅក្នុងឧបករណ៍អេឡិចត្រូនិច ដែលមានទំហំធំជាងទូរស័ព្ទដៃ។ ហើយគេអាចតំឡើងកម្មវិធីមួយមានសមត្ថភាពអាចបញ្ជាគ្រឿងផ្ទុះនៅលើឧបករណ៍នោះ។ តាមការសន្និដ្ឋាន កម្មវិធីនោះអាចធ្វើឲ្យថ្ម Lithium-ion របស់ឧបករណ៍អេឡិចត្រូនិចទាំងនោះឡើងកំដៅខ្ពស់ ដែលជាហេតុអាចបង្កឲ្យមានអគិ្គភ័យផ្ទុះឆាបឆេះនៅក្នុងយន្តហោះពេលកំពុងហោះហើរនៅលើអាកាស។
ប៉ុន្តែ ជាក់ស្តែង ពុំទាន់មានហេតុការណ៍ណាមួយបានកើតឡើងនៅឡើយទេ។ ដូចនេះ វិធានការណ៍នេះ គឺត្រូវបានធ្វើឡើងក្នុងន័យប្រយុទ្ធប្រឆាំងការគំរាមកំហែងភេរវកម្ម។ បច្ចុប្បន្ននេះ មានតែសហរដ្ឋអាមេរិក និងអង់គ្លេសប៉ុណ្ណោះដែលបានសំរេចចិត្តចាត់វិធានការណ៍នេះ ដោយពុំបានពិគ្រោះយោបល់ជាមួយសមាគមអន្តរជាតិផែ្នកដឹកជញ្ជូនតាមផ្លូវអាកាស (AITA) ឡើយ។ ហើយនៅពេលខាងមុខនេះ ប្រទេសកាណាដាក៏អាចតាមគន្លងនេះផងដែរ។ ប្រទេសនិមួយៗសុទ្ធតែផែ្អកលើព័ត៌មានផ្តល់ដោយក្រុមចារកម្មរបស់ប្រទេសគេ។
គិតមកត្រឹមពេលនេះ សហរដ្ឋអាមេរិកដាក់បំរាមសំរាប់តែការហោះហើរចេញមកពីប្រទេសចំនួន ៩ ដូចដែលបានរៀបរាប់ខាងលើ។ ថ្លែងនៅក្នុងបទសម្ភាសន៍មួយនៅលើស្ថានីយ៍ទូរទស្សន៍ Fox លោក John Kelly រដ្ឋមន្រ្តីក្រសួងមហាផ្ទៃអាមេរិកបានថ្លែងថា អាជ្ញាធរអាមេរិកបានត្រៀមខ្លួនរួចជាស្រេចក្នុងការដាក់បំរាមចំពោះការហោះហើរមកពីអឺរ៉ុប។ ការពង្រីកដែនដី ឬចំនួនប្រទេសក្នុងបញ្ជីហាមឃាត់នេះនឹងត្រូវធ្វើឡើង ក្នុងករណីកំរិតគំរាមកំហែងឡើងខ្ពស់។ បើយោងតាម សមាគមអន្តរជាតិផែ្នកដឹកជញ្ជូនតាមផ្លូវអាកាស (AITA) ក្រុមហ៊ុនអាកាសចរណ៍ទាំងអស់នោះបានប៉ាន់ប្រមាណអំពីទំហំចំណាយបន្ថែមក្នុងករណីដែលសហរដ្ឋអាមេរិកកាន់តែរឹតបន្តឹងវិធានការណ៍សន្តិសុខ។
គ្រាន់តែចំពោះការហោះហើររវាងសហរដ្ឋអាមេរិក និងអឺរ៉ុប ការចំណាយបន្ថែមលើការពង្រឹងសន្តិសុខអាចឡើងរហូតទៅដល់ទឹកប្រាក់ចំនួន ១,២ពាន់លានដុល្លារ។ ក្នុងករណីណាដែលសហរដ្ឋអាមេរិកចេញបទបញ្ជានេះ អាកាសយានដ្ឋាននានានៅអឺរ៉ុបនឹងជួបភាពរំជើបរំជួល។ សព្វថ្ងៃនេះ រវាងអឺរ៉ុប និងសហរដ្ឋអាមេរិក មានជើងហោះហើរចំនួន ៣ ២៥០ លើកក្នុងមួយសប្តាហ៍។ ហើយប្រសិនបើសហរដ្ឋអាមេរិកចេញបំរាមទូទៅមួយមិនឲ្យអ្នកដំណើរហោះមកពីទីកន្លែងទាំងអស់នៅជុំវិញពិភពលោកយកឧបករណ៍អេឡិចត្រូនិចតាមខ្លួនពេលកំពុងជិះយន្តហោះ ក្រុមហ៊ុនអាកាសចរណ៍នឹងចំណាយប្រាក់ប្រមាណជាង ២,៥ ពាន់លានដុល្លារ។
បើតាមលោក Gérard Feldzer អ្នកផ្តល់ប្រឹក្សាយោបល់ផែ្នកដឹកជញ្ជូនផ្លូវអាកាសបានវិភាគថា វិធានការណ៍អាមេរិកគ្រាន់តែជាសារនយោបាយមួយតែប៉ុណ្ណោះ។ សហរដ្ឋអាមេរិកចង់ប្រាប់ទៅពួកភេរវករថា ពួកគេស្ថិតនៅក្រោមការតាមឃ្លាំមើលជានិច្ច។ អាមេរិកចង់បង្ហាញថា ខ្លួនប្រយ័ត្នប្រយ៉ែង មុនជានិច្ច និងត្រៀមការពារខ្លួនទុកមុនជានិច្ច។ បើយើងពិនិត្យមើលបញ្ជីឈ្មោះប្រទេសទាំងនោះ គឺសុទ្ធសឹងតែជាប្រទេសអារ៉ាប់នៅតំបន់មជ្ឈិមបូព៌ា។ ផ្ទុយទៅវិញ ក្រុមហ៊ុនអាកាសចរណ៍នៅប្រទេសទាំងនោះមានជាអាទិក្រុមហ៊ុន Qatar Airways, Fly Emirates និង Etihad Airways ជាដើម គឺសុទ្ធសឹងតែជាក្រុមហ៊ុនធំៗអាចជឿជាក់បានចំពោះសុវត្ថិភាព។
តើឧបករណ៍អេឡិចត្រូនិចពិតជាគ្រោះថ្នាក់មែនដែរឬទេ? បើយោងតាមការិយាល័យស៊ើបអង្កេត និងវិភាគសុវត្ថិភាពដឹកជញ្ជូនតាមផ្លូវអាកាសបានឲ្យដឹងថា គិតមកដល់ពេលនេះ ពុំមានភស្តុតាងបង្ហាញថាឧបករណ៍ទាំងនេះអាចបង្កឲ្យមានអគ្គិភ័យក្នុងយន្តហោះឡើយ។ ហើយក៏ពុំទាន់មានការសិក្សាស៊ីជំរៅណាមួយលើបញ្ហានេះនៅឡើយទេ។ ប៉ុន្តែ នេះវាគ្រាន់តែជាការព្រួយបារម្ភតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ