តើតួនាទីកាណាដាលើឆាកអន្តរជាតិនឹងប្រែប្រួលបែបណាខ្លះ ក្រោមការដឹកនាំរបស់លោកនាយករដ្ឋមន្រ្តីថ្មី Justin Trudeau?
ចុះផ្សាយនៅថ្ងៃ៖
ស្តាប់ - ០៤:២៥
កាលពីសប្តាហ៍មុន ប្រទេសកាណាដាបានរៀបចំបោះឆ្នោតជ្រើសរើសនាយករដ្ឋមន្រ្តី ដឹកនាំរដ្ឋាភិបាលថ្មី។ លោក Justin Trudeau មកពីគណបក្សសេរីនិយម ដែលជាបក្សប្រឆាំងមួយ បានឈ្នះឆ្នោត ទទួលបានសំលេងច្រើនលើសលប់។ គណបក្សនេះនឹងបង្កើតរដ្ឋាភិបាលម្នាក់ឯង ដោយសារតែទទួលបានទទួលអាសនៈចំនួន ១៨៤ លើ ៣៣៨។ រយៈពេល ១០ ឆ្នាំចុងក្រោយនេះ ក្រោមការដឹកនាំរបស់គណបក្សចាញ់ឆ្នោត គឺគណបក្សអភិរក្សនិយម ប្រទេសកាណាដាតែងរងការរិះគន់ថា ពុំសូវសកម្មលើផ្នែកការទូតលើឆាកអន្តរជាតិ ជាពិសេសសំណុំរឿងទប់ស្កាត់ការប្រែប្រួលអាកាសធាតុ។
ក្រោយពីអវត្តមានពីអំណាចអស់រយៈពេលជិត ១០ ឆ្នាំ ដោយសាររឿងអាស្រូវមួយចំនួន កាលពីអតីតៈកាល ឥឡូវនេះ គណបក្សសេរីនិយមនឹងដឹកនាំរដ្ឋាភិបាលថ្មី ចាប់ពីថ្ងៃទី ៤ ខែវិច្ឆិការ ខាងមុខនេះ។ ការត្រលប់មកកាន់អំណាចវិញរបស់គណបក្ស ដែលមាននិន្នការកណ្តាលនិយមនេះ ជាសញ្ញាបញ្ជាក់ថា កម្មវិធីនយោបាយក្នុងស្រុកនឹងផ្លាស់ប្តូរ។ ចំណែក នយោបាយការបរទេសកាណាដា នៅលើឆាកអន្តរជាតិក៏អាចនឹងប្តូរផងដែរ។
កាណាដាក្រោមរជ្ជកាលរបស់គណបក្សអភិរក្សនិយម
សូមបញ្ជាក់ថា ក្នុងរយៈជិតដប់ឆ្នាំកន្លងមកនេះ ពោលគឺ ចាប់ពីឆ្នាំ ២០០៦ ក្រោមការដឹកនាំរយៈពេល ៣ អាណត្តិជាប់គ្នា របស់លោកនាយករដ្ឋមន្រ្តីកំពុងផុតអាណ្ណតិ Stephen Harper កាណាដាបានអនុវត្ត កំណែទម្រង់សេដ្ឋកិច្ចក្នុងស្រុក ដោយព្យាយាមបើកចំហជើងមេឃ បង្កើតកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសនានា និងតំបន់នានាលើពិភពលោក។ ជាសរុប កាណាដាបានចុះហត្ថលេខាលើសន្ធិសញ្ញាដោះដូរសេរីចំនួន ៤៦។
គួបផ្សំនឹងវិបត្តិសេដ្ឋកិច្ចកាលពីឆ្នាំ ២០០៨ គណបក្សអភិរក្សនិយម ដែលមាននិន្នាការស្តាំនិយមរបស់លោក Stephen Harper បានចាប់ផ្តើមអនុវត្តនយោបាយត្បិតត្បៀតថវិកា។
លើសពីនេះ រដ្ឋាភិបាលបានចេញច្បាប់កំណត់អំណាចសហជីព និងធ្វើកំណែទម្រង់លើច្បាប់ស្តីពីការធានារ៉ាប់រងការងារជាដើម។ វិធានការណ៍នេះបានធ្វើអោយប្រជាជនកាណាដាមួយចំនួន ដែលរងប៉ះពាល់មិនសប្បាយចិត្តឡើយ។ លើសពីនេះ រដ្ឋាភិបាលរបស់លោក Harper ក៏បានសំរេចចិត្តដកខ្លួនចេញពីពិធីសារក្រុងក្យូតូ ស្តីពីការប្រែប្រួលអាកាសធាតុ កាលពីឆ្នាំ២០១១។ សម័យកាលនេះ រដ្ឋាភិបាលគណបក្សអភិរក្សនិយមបានពន្យល់ថា សេចក្តីសំរេចចិត្តនេះ គឺ ដោយសារតែប្រទេសបំពុលបរិស្ថានធំៗដូចជាអាមេរិក និងចិន ជាដើម មិនបានចុះហត្ថលេខាលើពិធីសារនេះទេ។ ទាក់ទងនឹងនយោបាយការបរទេស កាណាដាក្រោមរជ្ជកាលរបស់លោក Harper ជាញឹកញយ បានដើរស្របតាមសហរដ្ឋអាមេរិក។
ជាក់ស្តែង អន្តរាគមន៍នៅប្រទេសអាហ្វហ្គានីស្ថានក្នុងរយៈពេលមួយទសវត្សរ៍ចុងក្រោយនេះ។ ជាពិសេស គឺការចូលរួមជាមួយក្រុមសម្ព័ន្ធមិត្តអន្តជាតិ បើកការវាយប្រហារលើក្រុមអង្គការរដ្ឋអ៊ីស្លាម នៅប្រទេសស៊ីរី និងអីរ៉ាក់។ កាណាដាបានកាត់បន្ថយតួនាទីរបស់ខ្លួននៅតាមស្ថាប័ននានារបស់ អ.ស.ប កាត់បន្ថយការចំណាយលើជំនួយអន្តរជាតិ និងមនុស្សធម៌ ដោយក្នុងនោះមានការបិទស្ថានទូតមួយចំនួននៅលើពិភពលោក ដោយរាប់បញ្ជូលទាំងប្រទេសកម្ពុជាផងដែរ។ ប៉ុន្តែ ជាសរុប ការគ្រប់គ្រងអំណាចរបស់លោក Stephen Harper រយៈពេលជិត ១០ ឆ្នាំ បានធ្វើអោយសេដ្ឋកិច្ចកាណាដាមានលំនឹងមាំ។
តើរដ្ឋាភិបាលថ្មីរបស់គណបក្សសេរីនិយមកាណាដាផ្តោតលើអ្វីខ្លះលើឆាកអន្តរជាតិ?
ក្នុងរយៈពេលប៉ុន្មានសប្តាហ៍ខាងមុខទៀតនេះ លោកនាយករដ្ឋមន្រ្តីថ្មី Justin Trudeau នឹងមមាញឹកលើសំណុំរឿងអន្តរជាតិសំខាន់ៗ មានជាអាទិ៍ កិច្ចប្រជុំក្រុមប្រទេសសេដ្ឋកិច្ចទាំង ២០ (G20) នៅប្រទេសតួគី ពីថ្ងៃទី១៥ ដល់១៦ ខែវិច្ឆិការ ជំនួបកំពូលសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសហ្វីលីពីន ពីថ្ងៃទី ១៨ ដល់១៩ ខែវិច្ឆិការ និង សន្និសីទអង្គការសហប្រជាជាតិស្តីពីអាកាសធាតុ នៅទីក្រុងប៉ារីស ប្រទេសបារាំង ពីថ្ងៃទី៣០ វិច្ឆិការ ដល់ ១១ ឆ្នូ។
ទាក់ទងនឹងតួនាទីកាណាដាលើឆាកអន្តរជាតិ លោក Justin Trudeau ធ្លាប់បានប្រកាសថា កាណាដានឹងវិលត្រលប់មកលើឆាកអន្តរជាតិវិញ ក្រោមនយោបាយការបរទេសរបស់បក្សសេរីនិយមរបស់លោក។ ក្រោមរដ្ឋាភិបាលមុន កាណាដាបានផ្តោតលើតួនាទីកំលាំងយោធា ជាជាងការទូត។ ក្នុងជម្លោះអ៊ីស្រាអែល-ប៉ាឡេស្ទីន កាណាដាបានបង្ហាញពីជំហរការពារអ៊ីស្រាអែល។ បើតាមលោកស្រី Lauchlan Munro អ្នកស្រាវជ្រាវផែ្នកអភិវឌ្ឍន៍អន្តរជាតិ ប្រចាំសាកលវិទ្យាល័យអូតាវ៉ា បានអោយដឹងថា គេត្រូវតាមដានមើលការសន្យារបស់រដ្ឋាភិបាលថ្មីជាមុនសិន ជាពិសេសការចូលខ្លួនឡើងវិញរបស់កាណាដា នៅតាមស្ថាប័នអន្តរជាតិធំៗ របស់ អ.ស.ប។
គួរកត់សំគាល់ថា បន្ទាប់ពីបានជាប់ឆ្នោតភ្លាមៗ លោកនាយករដ្ឋមន្រ្តីថ្មី Justin Trudeau សន្ទនាតាមទូរស័ព្ទជាមួយលោកប្រធានាធិបតីអាមេរិក បារ៉ាក់ អូបាម៉ា។ លោក Trudeau បានប្រកាសពីជំហរថ្មីរបស់កាណាដា ក្នុងការដកខ្លួនចេញពីបេសកកម្មវាយប្រហារទំលាក់គ្រាប់បែកតាមផ្លូវអាកាស ប្រឆាំងក្រុមអង្គការរដ្ឋអ៊ីស្លាម នៅអ៊ីរ៉ាក់ និងស៊ីរី។ ហើយរដ្ឋាភិបាលថ្មីនឹងនឹងបង្វែរការយកចិត្តទុកដាក់លើសកម្មភាពជំនួយមនុស្សធម៌ និងបច្ចេកទេស។
ក្នុងសំណុំរឿងអាកាសធាតុ លោក Trudeau បានសំណេះសំណាលជាមួយលោក François Hollande ប្រធានាធិបតីបារាំង។ ប្រមុខដឹកនាំនៃប្រទេសទាំងពីរប្រាថ្នាចង់អោយសន្និសីទ អ.ស.ប ស្តីពីអាកាសធាតុ សំរេចបានផ្លែផ្កាជោគជ័យ។ ពោលគឺ ការសន្យារបស់ប្រទេសនីមួយៗក្នុងការកាត់បន្ថយឧស្ម័នផ្ទះកញ្ចក់។
ដោយឡែក ក្នុងសំណុំរឿងជនភៀសខ្លួនស៊ីរី លោក Justin Trudeau បានសន្យានៅក្នុងយុទ្ធនាការឃោសនាសំលេងឆ្នោតថា រដ្ឋាភិបាលថ្មីដឹកនាំដោយគណបក្សសេរីនិយមរបស់លោក នឹងទទួលជនភៀសខ្លួនស៊ីរីចំនួន ២៥ ០០០ នាក់អោយបានមុនដើមឆ្នាំ ២០១៦។ បើតាមយោបល់លោក Stephan Reichhold ប្រធានផែ្នកសំរបសំរួលអង្គការជួយជនភៀសខ្លួន និងអន្តោរប្រវេសន៍ បានពន្យល់ថា ការសន្យានេះពិបាកសំរេចបានណាស់។ គេត្រូវការយន្តហោះដឹកជញ្ជូនយ៉ាងហោចណាស់ចំនួន ៨០ គ្រឿង ដើម្បីដឹកជន្លៀសជនភៀសខ្លួនទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ