អាមេរិកឡាទីន សមរភូមិថ្មីនៃការប្រកួតប្រជែងចិន-ជប៉ុន ?!
ចុះផ្សាយនៅថ្ងៃ៖
ស្តាប់ - ០៤:៣៦
លោក នាយករដ្ឋមន្ត្រីជប៉ុន ស៊ីនហ្សូ អាបេ ត្រូវផ្តើមទស្សនកិច្ចមួយជុំនៅទ្វីបអាមេរិកខាងត្បូង ចាប់ពីថ្ងៃសៅរ៍ទី ២៦ កក្កដា តទៅ។ ដំណើរទស្សនកិច្ចរយៈពេលវែង ដែលនាំលោកនាយករដ្ឋមន្ត្រីទៅកាន់ប្រទេស ម៉ិចស៊ិក ទ្រីនីដាដ តូបាហ្គោ កូឡុំប៊ី ឈីលី និងប្រេស៊ីល ប្រព្រឹត្តទៅតែពីរបីថ្ងៃក្រោយដំណើរទស្សនកិច្ចរបស់ប្រធានាធិបតីចិន លោកស៊ីជីនពីង នៅអាមេរិកឡាទីនប៉ុណ្ណោះ។ តើនេះជាកាលវិភាគចៃដន្យ ? ឬមួយក៏ជប៉ុនកំពុងតែស្វែងរកទីតាំងប្រកួតប្រជែងថ្មី នៅកន្លែងណាដែលចិនបានទៅវិនិយោគច្រើនរួចមកហើយ ?!
ដំណើរទស្សនកិច្ចមួយជុំនៅអាមេរិកឡាទីន របស់លោកនាយករដ្ឋមន្ត្រីជប៉ុន ស៊ីនហ្សូអាបេ ពីថ្ងៃទី២៥កក្កដា ដល់ថ្ងៃទី ៤សីហា គឺដើម្បីពង្រឹងពង្រីកទំនាក់ទំនងសេដ្ឋកិច្ចរវាងជប៉ុនជាមួយនឹងចំណែកមួយដុំនៃភពផែនដី ដែលមានសក្តានុពលសេដ្ឋកិច្ចគ្មានព្រំដែន។ នេះបើតាមប្រសាសន៍របស់លោកនាយករដ្ឋមន្ត្រី នៅថ្ងៃសុក្រទី ២៥ កក្កដា មុនពេលចាកចេញពីទីក្រុងតូក្យូ។
តំណាងប្រតិភូវិនិយោគិន គ្រាក់ៗ ជាច្រើនរូប ព្រមទាំងប្រធាននាយកសហគ្រាសជប៉ុនបានអមដំណើរនាយករដ្ឋមន្ត្រីក្នុងឱកាសទស្សនកិច្ចផ្លូវរដ្ឋនេះ។ ប្រសិនបើគេជឿតាមសារព័ត៌មានជប៉ុន នៅប្រទេសប្រេស៊ីល ធនាគារជប៉ុនអាចនឹងរកឃើញកិច្ចព្រមព្រៀងកម្ចីប្រាក់៥០០រយលានទៅឱ្យក្រុមហ៊ុមថាមពលជាតិប្រេស៊ីលដើម្បីរុករកប្រេង offshorse។ កិច្ចចរចាពាណិជ្ជកម្មដើម្បីឈានដល់ការព្រមព្រៀងបង្កើតតំបន់ផ្តោះប្តូរពាណិជ្ជកម្មសេរី អន្តរប៉ាស៊ីហ្វិក ស្នើឡើងដោយសហរដ្ឋអាមេរិក ទំនងជាត្រូវលើកយកទៅពិភាក្សានៅនៅម៉ិចស៊ិក និងឈីលី ព្រោះទាំងពីរក៏មានជាប់ពាក់ព័ន្ធដំណើរការកិច្ចព្រមព្រៀងនេះដែរ។ ជាចុងក្រោយ ជប៉ុននឹងចូលរួមជាលើកទីមួយជំនួបជប៉ុននិងសហគមន៍ការ៉ាអ៊ីប ដែលមានសមាជិកចំនួន១៥ ប្រទេស។
អាមេរិកឡាទីនសង្វៀនពាណិជ្ជកម្មថ្មី រវាងចិន-ជប៉ុន
ដំណើរទស្សនកិច្ចរបស់លោកនាយករដ្ឋមន្ត្រីជប៉ុននៅអាមេរិកឡាទីនរយៈពេល១១ថ្ងៃ ក្នុងប្រទេសចំនួន៥ ធ្វើឡើងក្នុងខណៈដែលសេដ្ឋកិច្ចជប៉ុនបាននិងកំពុងស្គាល់ឱនភាពពាណិជ្ជកម្មកំពូល នៅឆមាសទីមួយឆ្នាំ២០១៤នេះ។ ប៉ុន្តែអ្វីជាការកត់សម្គាល់កាន់តែខ្លាំងជាងនេះទៅទៀត គឺការប្រកួតប្រជែងជាមួយនឹងប្រទេសជិតខាងចិន។ លោកប្រធានាធិបតីចិន ស៊ីជិនពីង ទើបបញ្ចប់ទស្សនកិច្ច និងហោះចាកចេញពីទ្វីបអាមេរិកឡាទីន នៅថ្ងៃព្រហស្បតិ៍ទី ២៤កក្កដា ជាមួយគំនរកិច្ចព្រមព្រៀងពាណិជ្ជកម្មកំពស់មេឃ ទៅផុតមិនទាន់ស្រួលបួលផង យន្តហោះរបស់លោក ស៊ីនហ្សូ អាបេ ត្រូវចុះចតម្តង។ តើនេះមិនមែនជាការចៃដន្យដែលមានលក្ខណៈប្រកួតប្រជែង ដែលឆ្លងរាលដាលដល់ត្រើយម្ខាងទៀតនៃមហាសមុទ្ទប៉ាស៊ីហ្វិកទេឬ ?!
លោក ស៊ីនហ្សូ អាបេ ប្រាថ្នាផ្តល់សន្ទុះដល់ការផ្តោះប្តូរពាណិជ្ជកម្មជាមួយអាមេរិកឡាទីន ដែលបច្ចុប្បន្ននេះមានទំហំត្រឹមតែ៥%នៃការនាំចេញជប៉ុន និងតិចជាង៤%នៃការនាំចូល។ ការនាំចេញនាំចូលជប៉ុន-អាមេរិកឡាទីន ផ្តោតជាពិសេសលើធនធានធម្មជាតិនិងផលិតផលកសិចំណីអាហារ។ ជប៉ុនដើរតាម-ដានរបស់ចិន ដែលមានលក្ខណៈប្រកួតប្រជែងជាស្រេចទៅហើយជាមួយនឹងសហរដ្ឋអាមេរិក លើដែនទ្វីបនេះ។
ដំណើរទស្សនកិច្ចរបស់លោក ស៊ី ជីនពីង នៅប្រេស៊ីល និងគុយបា ដល់ទៅពីរលើក គិតចាប់តាំងបានក្លាយជាប្រធានាធិបតីចិននៅខែមីនា២០១៣ បានមគ្គបានផលច្រើនណាស់។ នៅប្រទេសប្រេស៊ីល ចិនគឺដៃគូពាណិជ្ជកម្មទីមួយ ៖ ចិនបានប្រកាសជាអាទិ៍ទិញយន្តហោះ Embraer ក្នុងតម្លៃទឹកប្រាក់ ៣,២ពាន់លាន បើកបណ្តាញកម្ចីប្រាក់ទំហំ ៥ពាន់លាន និងទិញក្រុមហ៊ុនយក្សរ៉ែដែក។ ចិនសន្យាធ្វើវិនិយោគ ផ្នែកថាមពលនិងដឹកជញ្ជូនជាមួយអាហ្សង់ទីន ក្នុងទំហំ៧៥០០លានដុល្លារ ព្រមទាំងកំពុងសំឡឹងទីផ្សារសណ្តែកអាហ្សង់ទីនយ៉ាងជក់ចិត្ត។ ជាមួយគុយបាវិញ ចិនបានចុះកិច្ចព្រមព្រៀងចំនួន២៩ ក្នុងនោះមួយសម្រាប់ឧបត្ថម្ភការស្រាវជ្រាវរុករកប្រេងក្នុងឈូងសមុទ្ទម៉ិចស៊ិក។
អាសនៈនៅក្រុមប្រឹក្សាសន្តិសុខអង្គការសហប្រជាជាតិ
វិស័យថាមពល ចំណីអាហារ ហេដ្ឋារចនាសម្ព័ន្ធ ... កំណត់ហេតុរបស់លោកស៊ីនហ្សូ អាបេ ដូចខ្លាំងណាស់ទៅនឹងកំណត់ហេតុរបស់ប្រធានាធិបតីចិន។ តាំងពីបញ្ហាដែនដីដល់សេដ្ឋកិច្ច លោក អាបេ ការពារមិនឱ្យរបេះដីសូម្បីតែមួយដុំតូចទៅចិន ! ព្រួញទីបីនៃនយោបាយសេដ្ឋកិច្ច Abenomics គឺបើកទ្វារសេដ្ឋកិច្ចប្រកួតប្រជែងជាលក្ខណៈអន្តរជាតិនេះឯង ! ក្រោយវិបត្តិនុយក្លេអ៊ែរនៅហ្វូគូស្ហ៊ីម៉ា ជប៉ុនត្រូវការពង្រីកប្រភពថាមពល ឱ្យសម្បួរបែបនិងត្រូវតែឆក់ឱ្យបានប្រភពប្រេងនៅអាមេរិកខាងត្បូង។ បើតាមសារព័ត៌មានជប៉ុន លោកស៊ីនហ្សូ អាបេ និងលោកស្រីឌីលម៉ា រ៉ូសេហ្វប្រធានាធិបតីប្រេស៊ីល នឹងប្រកាសរួមគ្នាសាងសង់រោងចក្រស្ថានីយ៍បូមប្រេងបណ្តែតទឹក ដោយប្រើបច្ចេកវិទ្យាជប៉ុន។ ជំនួបកំពូលជប៉ុនសហគមន៍ការ៉ាអ៊ីប ក៏ផ្តោតតែលើបញ្ហាថាមពល នេសាទ និងគម្រោងការពារគ្រោះធម្មជាតិ។
លើសពីនេះទៅទៀត ដំណើរទស្សនកិច្ចរបស់លោកស៊ីនហ្សូ អាបេ ជើងនេះ ក៏មានបង្កប់ផងដែរ នូវផលប្រយោជន៍ការទូត។ ជប៉ុនមានទិសដៅដណ្តើមយកអាសនៈជាសមាជិកមិនអចិន្ត្រៃយ៍ប្រចាំក្រុមប្រឹក្សាសន្តិសុខអង្គការសហប្រជាជាតិ សម្រាប់ឆ្នាំ២០១៦ ទល់នឹងប្រទេសបង់ក្លាដែស។ លោកស៊ីនហ្សូអាបេ ត្រូវការតាំងខ្លួន និងឱ្យពិភពលោកទទួលស្គាល់ថាជប៉ុនជាមហាអំណាចប្រចាំតំបន់អាស៊ី ដោយពិតៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ