អំពើពុករលួយស៊ីរូងអយស្ម័យយានចិន
នៅថ្ងៃចន្ទនេះ សារព័ត៌មានចិនបានបង្ហាញពីរឿងអាស្រូវពុករលួយទៀតហើយ នៅក្នុងផ្នែកអយស្ម័យយានចិន។ រឿងនោះ គឺថាតុលាការក្រុងប៉េកាំងនឹងកាត់ទោសស្ត្រីពាណិជ្ជករម្នាក់ ដែលធ្លាប់ជាប់ពាក់ព័ន្ធនឹងអតីតរដ្ឋមន្ត្រីផ្លូវដែកចិន ដែលជាប់ទោសពីបទពុករលួយផងដែរ។ ស្ត្រីពាណិជ្ជកររូបនេះ ជាប់ចោទពីបទកេងបន្លំថវិការដ្ឋច្រើនលើសលុប ក្នុងក្របខណ្ឌកិច្ចសន្យាជាច្រើន គឺបន្លំប្រាក់រដ្ឋហួសពី ២២ពាន់លានអឺរ៉ូ ឯណោះ។ ទឹកប្រាក់នេះគឺស្មើមួយភាគបួននៃទឹកប្រាក់វិនិយោគប្រព័ន្ធផ្លូវដែកចិន នៅឆ្នាំ២០១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
លោកស្រី Ding Shumiao ទិង ស៊ូមាវជាប់ចោទពីបទបន្លំថវិការដ្ឋចិននឹងឡើងសវនាការតុលាការក្រុងប៉េកាំង នៅពេលខាងមុខនេះ ដើម្បីឆ្លើយសំណួរពាក់ព័ន្ធនឹងរឿងពុករលួយ។ Ding Shumiao ធ្លាប់បានឆ្លើយតបទៅនឹងសំណើដាក់ដេញថ្លៃចំនួនជាង១២ ក្នុងគំរោងផ្លូវដែកជាច្រើនគំរោង ដែលមានតំលៃទឹកប្រាក់រហូតដល់ជាង២២ពាន់លានអឺរ៉ូ។
គួរបញ្ជាក់ថា លោកស្រី ទិង ធ្លាប់មានពាក់ព័ន្ធក្នុងរឿងពុករលួយជាច្រើន ជាមួយអតីតរដ្ឋមន្ត្រីផ្លូវដែកចិន គឺលោក Liu Zhijun លាវ ជីជីន។ កាលពីខែកក្កដាកន្លងទៅ លោក Liu បានត្រូវតុលាការដាក់ទោសប្រហារជីវិត ពីបទពុករលួយ។ ទោសនេះអាចបន្ថយមកនៅទោសជាប់ពន្ធនាគារមួយជីវិតវិញ។ យោងតាមកាសែតចិន China Daily លោកស្រីឌីង ជាប់ចោទពីបទសូកលុយអតីតរដ្ឋមន្ត្រីផ្លូវដែកLiu Zhijun ប្រមាណ៦លានអឺរ៉ូ និងបញ្ជូនស្រីបំរើផ្លូវភេទជាច្រើននាក់អោយទៅបំរើលោក Liu។ ដោយសារការសូកប៉ាន់នេះ លោកLiu ប្រហែលជាបានជួយសំរួលកិច្ចសន្យាដល់ក្រុមហ៊ុនចំនួន២៣។
យោងតាមរដ្ឋអាជ្ញានានាដែលធ្វើការក្នុងរឿងក្តីលោកLiu លោកLiu បានជួយសំរួលកិច្ចសន្យាផ្លូវដែក ធ្វើអោយលោកស្រីឌីង និងក្រុមគ្រួសារ បានទទួលប្រាក់រហូតដល់ទៅ៤ពាន់លានយ័ន។
ទឹកប្រាក់ជាង២២ពាន់លានអឺរ៉ូ ដែលលោកស្រីឌីងកេងបន្លំរដ្ឋនេះ គឺស្មើមួយភាគបួននៃទឹកប្រាក់វិនិយោគប្រព័ន្ធផ្លូវដែកចិន កាលពីឆ្នាំ២០១០។ តាំងពីឆ្នាំ២០០៧មក ចិនបានចំណាយប្រាក់ស្ថាបនាផ្លូវដែក ជាងរយពាន់លានដុល្លារ។ ចិនបានសង់ផ្លូវដែកដ៏វែងបំផុតមួយ សំរាប់រថភ្លើងល្បឿនលឿន ភ្ជាប់ក្រុងប៉េកាំងទៅនឹងខេត្តកង់តុងទៀតផង។ ដោយសារតែមានគ្រោះថ្នាក់រថភ្លើងបុកគ្នា សម្លាប់មនុស្ស៤០នាក់ កាលពីឆ្នាំ២០១១ និងអំពើពុករលួយជាច្រើននៅផ្នែកអយស្ម័យយាន ក្រសួងដឹកជញ្ជូនចិនបានសំរេចគ្រប់គ្រងផ្ទាល់លើផ្នែកផ្លូវដែកវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ