តើប្រព័ន្ធទឹកសម័យបុរាណមានលក្ខណៈយ៉ាងណា ហើយតើវាដើរតួនាទីសំខាន់យ៉ាងណា នៅសម័យអង្គរ និងពេលបច្ចុប្បន្ននេះ? លោកបណ្ឌិត ហង់ ពៅ អគ្គនាយករង អាជ្ញាធរអប្សរ៉ា បានបង្ហាញការរកឃើញរបស់ក្រុមលោក នៅក្នុងសន្និសីទមួយ ដែលរៀបចំឡើង កាលពីថ្ងៃសុក្រទី ៩ឧសភា នៅទីក្រុងប៉ារីស ដោយ បណ្ឌិតសភាអក្សរសិល្ប៍ និងអក្សរសាស្រ្តបារាំង។ លោកហង់ ពៅ លើកនិយាយពីការគ្រប់គ្រងទឹក នៅអង្គរ រាជធានី របស់អាណាចក្រខ្មែរ។ បច្ចុប្បន្ន អាជ្ញាធរអប្សរ៉ាកំពុងស្វែងរក និងជួសជុលស្តារឡើងវិញ ប្រព័ន្ធទឹកសម័យបុរាណ ដើម្បីដោះស្រាយបញ្ហាខ្វះទឹកប្រើប្រាស់ និងទប់ទល់ទឹកជំនន់ នៅខេត្តសៀមរាប។
នៅថ្ងៃសុក្រទី៩ ឧសភានេះ បណ្ឌិតសភា អក្សរចារឹក និងអក្សរសាស្រ្តបារាំង ក្នុងទីក្រុង ប៉ារីស បានប្រារព្ធខួប ២០ឆ្នាំនៃសហប្រតិបត្តិការបារាំងកម្ពុជា ក្នុងវិស័យបុរាណវិទ្យា។ នៅក្រោម ព្រះរាជអធិបតីភាពរបស់ព្រះមហាក្សត្រ កម្ពុជា ព្រះបាទ នរោត្តម សីហមុនី ដែលជាសមាជិកមួយអង្គ របស់បណ្ឌិតសភាបារាំង ក្រុមអ្នកជំនាញ បារាំងមកពីសាលាចុងបូព៌ាបទេស និងមន្រ្តីខ្មែរ ពីអាជ្ញាធរអប្សរ៉ា នឹងបង្ហាញពីការងារស្រាវជ្រាវ របស់ ពួកគេ ទាក់ទង នឹងការថែរក្សា និងរបកគំហើញថ្មីៗ នៅក្នុងតំបន់អង្គរ។
ព្រះរាជបន្ទូលរបស់ព្រះបាទនរោត្តម សីហមុនីនៅក្នុងសន្និសីទនៅបណ្ឌិតសភាបារាំង
នៅក្នុងសន្និសីទ សមាជិកសភាបារាំងនឹករំលឹក ផងដែរទៅដល់លោក Pascal Royère ប្រធានក្រុមសិក្សាស្រាវជ្រាវ នៅសាលាចុងបូព៌ាបទេស ដែលបានទទួល មរណភាព នៅដើមឆ្នាំ ២០១៤ ក្នុងវ័យ ៤៨ឆ្នាំ។ លោក Pascal Royère បណ្ឌិតខាងប្រវត្តិសិល្បៈ ធ្លាប់ទទួលខុសត្រូវលើការដ្ឋានជួសជុលប្រាសាទបាពួន ដែលបានបញ្ចប់ការជួសជុលជាស្ថាពរ នៅឆ្នាំ ២០១១។ បន្ទាប់មក បើទោះបីជាមានជម្ងឺបៀតបៀន លោកPascal Royère នៅកាន់ការងារជួសជុលប្រាសាទមេបុណ្យក្នុង បារាយ៍ខាងលិច។
នៅក្នុងសន្និសីទរយៈពេលមួយថ្ងៃ ព្រះមហាក្សត្រកម្ពុជា បានថ្លែងបិទបញ្ចប់សន្និសីទ បន្ទាប់ពី បទអន្តរាគមន៍ របស់ វាគ្មិនខ្មែរ និងបារាំង ដូចជា លោក Jacques GAUCHER គ្រូសន្និសីទរបស់សាលា ចុងបូព៌ាបទេស ដែលត្រូវនិយាយពីទីលានប្រាសាទអង្គរធំ និងកាលបរិច្ឆេទរបស់រាជធានីមួយនេះ។ លោក Christophe Pottier អ្នកទទួលខុសត្រូវរបស់ សាលាចុងបូព៌ាបទេស នៅទីក្រុង បាងកក និយាយពី ទិន្នន័យថ្មីៗ របស់រាជធានីដំបូងៗ នៅសម័យអង្គរ។ ចំណែកវាគ្មិនម្នាក់ទៀត មកពីអាជ្ញាធរអប្សរ៉ា គឺលោក បណ្ឌិត ហង់ ពៅនឹង លើកបង្ហាញពីប្រព័ន្ធទឹករបស់តំបន់អង្គរ ដោយលើកយកឧទាហរណ៍ ជាក់ស្តែង ទៅលើ បារាយ៍ខាងជើង និងប្រាសាទនាគព័ន្ធ ដែលលោកធ្វើការស្រាវជ្រាវ ដោយផ្ទាល់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ