អង់គ្លេសចង់ដើរចេញពីអឺរ៉ុប ៖ តើនរណាខាត នរណាចំណេញ ?!
ចុះផ្សាយនៅថ្ងៃ៖
ស្តាប់ - ០៣:៣១
ក្រោយពីតាមចរចាគ្នា អស់ជាច្រើនថ្ងៃ នៅទីបំផុតថ្នាក់ដឹកនាំអឺរ៉ុបនិងអង់គ្លេស បានព្រមព្រៀងគ្នា មិនឱ្យអង់គ្លេសដើរចេញពីសហភាពទេ ! ចាប់ពីពេលនេះទៅទល់នឹងថ្ងៃទី ២៣មិថុនា លោក ដេវីតកាមឺរោន មានភារៈទៅបញ្ចុះបញ្ចូលពលរដ្ឋអង់គ្លេស កុំឱ្យធ្វើការសម្រេចចិត្តដកអង់គ្លេសចេញពីអឺរ៉ុបឱ្យសោះ។ សម្រាប់លោកនាយករដ្ឋមន្ត្រី ថ្វីបើបានធ្វើការទាមទារខ្លាំងពីអឺរ៉ុប សំឡុតចង់ដើរចេញមែន ប៉ុន្តែមិនមែនមានន័យថាលោកចង់នាំប្រទេសចេញពីសហភាពឡើយ តែគឺដើម្បីមានហេតុផលគ្រប់គ្រាន់សម្រាប់ទៅការពារបេក្ខភាពអង់គ្លេសក្នុងអឺរ៉ុបតែប៉ុណ្ណោះ។
គ្រាន់តែទទួលបានកិច្ចព្រមព្រៀងជាមួយអឺរ៉ុបភ្លាម និងដូចដែលបានសន្យា លោក ដេវីត កាមឺរោន បានចេញមុខឃោសនាការពារបេក្ខភាពអង់គ្លេសក្នុងអឺរ៉ុប ដោយជ្រើសរើសការចេញពន្យល់ជាលើកដំបូង នៅចំពោះមុខសភា និងដោយបានលើកឡើង អំពីការខាតបង់ផ្សេងៗប្រសិនបើអង់គ្លេសបែកចេញពីអឺរ៉ុប។
បើតាមមជ្ឈមណ្ឌលសម្រាប់កំណែទម្រង់អឺរ៉ុប Centre for european Reform “Think Tank” បានចេញរបាយការណ៍មួយស្តីអំពីផលវិបាកដែលអាចកើតមាន ប្រសិនបើអង់គ្លេសសម្រេចដើរចេញពីអឺរ៉ុប។ សម្រាប់មជ្ឈមណ្ឌលដែលល្បីខាងមិនចេះទប់ការរិះគន់ប្រឆាំងអឺរ៉ុបនោះ ជម្រើសដើរចេញពីអឺរ៉ុប មិនគួរឱ្យពេញចិត្តទេ។ ផលប្រយោជន៍នៃការដកខ្លួនចេញអឺរ៉ុបតាមរយៈប្រជាមតិ មានលក្ខណៈបំភ័ន្ត ខ្លាំងណាស់។
បើតាមការគុណគិតរបស់មជ្ឈមណ្ឌល គ្រាន់តែមានឈ្មោះជាសមាជិកអឺរ៉ុបនេះ អង់គ្លេសបានបង្កើតការផ្តោះប្តូរទំនិញជាមួយអឺរ៉ុបបានដល់ទៅ ៥៥% ពោលគឺស្មើនឹង១៣០ពាន់លានលីវ នៅឆ្នាំ២០១៣ បើប្រៀបទៅនឹងជាមួយចិនដែលមានត្រឹម៤៣ពាន់លានលីវ។ សម្មតិកម្មមួយទៀត ដែលអង់គ្លេសចង់ចេញពីអឺរ៉ុបផង គឺដើម្បីបើកទម្លាយសេរីភាពទីផ្សារ ប៉ុន្តែបើតាមកំណត់សម្គាល់របស់អង្គការសហប្រតិបត្តិការនិងអភិវឌ្ឍន៍សេដ្ឋកិច្ច OCDE អង់គ្លេសមានទីផ្សារដែលយ៉ាប់ជាងគេ នៅពីក្រោយប្រទេសហូឡង់ផង ឯទីផ្សារការងារវិញ មិនរឹងប៉ឹងជាងសហរដ្ឋអាមេរិក ឬកាណាដា ឬអូស្ត្រាលីទេ នេះអង់គ្លេសមានជាប់ឈ្មោះអត្តសញ្ញាណជាមួយសហភាពផង។ បើអង់គ្លេសដើរចេញពីអឺរ៉ុប បានន័យថាដើរចេញពីទីផ្សាររួមតែមួយ តែមិនប្រាកដអាចនាំអង់គ្លេសទៅរកទីផ្សារអន្តរជាតិទេ ព្រោះជាឧទាហរណ៍ជាក់ស្តែងអាល្លឺម៉ង់ ស្ថាបនិកដ៏ពេញលេញស្មោះស្ម័គ្រនឹងអឺរ៉ុប នៅជាអឺរ៉ុប តែក៏អាចមានទីផ្សារផ្តោះប្តូរអន្តរជាតិយ៉ាងទូលំទូលាយ។
ចំណុចសំខាន់មួយទៀតដែលអង់គ្លេសភ្លេចគិត ឬមិនសូវលើកយកនិយាយគឺ ទីផ្សារហិរញ្ញវត្ថុ។ សហភាពអឺរ៉ុប ពិតចង់ឃើញទីផ្សារហិរញ្ញវត្ថុរបស់ខ្លួនស្ថិតក្នុងរង្វង់ដែនដីអឺរ៉ុប ដើម្បី ងាយស្រួលគ្រប់គ្រងហើយ មិនបណ្តោយទុកឱ្យរីកធំធាត់ដូចសព្វថ្ងៃនៅកណ្តាលទីក្រុងឡុងដ៍ទៀតទេ។ បើឧបមាថាក្រោយពេលដើរចេញពីអឺរ៉ុបទៅ អង់គ្លេសអាចចុះហត្ថលេខាលើកិច្ចព្រមព្រៀងរកស៊ីជាមួយអឺរ៉ុបបាន ដូចករណីប្រទេសស្វីសក្តី អង់គ្លេសអាចចំណេញប្រាក់វិភាគទាន ប៉ុន្តែអង់គ្លេសត្រូវអូសលុយចេញពីហៅប៉ៅខ្លួនឯងសម្រាប់បង់ទៅខាងអៀរឡង់ខាងជើង និងប្រទេសហ្គាល់ ដែលបច្ចុប្បន្ននេះជាបន្ទុកហូតចេញពីហិបមូលនិធិអឺរ៉ុប។
ជាមួយហេតុផលខាងលើទាំងអម្បាលម៉ាននេះ គេក៏មិនប្រាកដអាចយកឈ្នះលើក្រុមជាតិនិយមអង់គ្លេសដែលប្រឆាំងសហភាពអឺរ៉ុប។ ព្រោះអង់គ្លេសជាអ្នកចូលចិត្តប្រថុយប្រថានខ្លាំងណាស់។ អត្តចរិត ដែលចង់បានតែចំណេញមិនហ៊ានចំណាយអ្វី តថ្លៃ យកអឺរ៉ុបមកធ្វើជាចំណាប់ថ្នូរដើម្បីទាមទារអ្វីមួយ ទាំងបារាំងទាំងអាល្លឺម៉ង់ ពេលខ្លះមិនចិត្តទេ ប៉ុន្តែត្រូវការរក្សារូបភាពល្អ សាមគ្គីភាពក្នុងសហភាព និងក្តីសង្ឃឹមរបស់ពលរដ្ឋអឺរ៉ុប ទើបត្រូវការអោបក្រសោបមិនចង់អង់គ្លេសដើរចេញ។ ក្នុងករណីលោកស្រីប្រមុខរដ្ឋាភិបាលអាល្លឺមង់ គឺដើម្បីរក្សាការពារប្រយោជន៍ប្រទេសផ្ទាល់ផង។ ហេតុដូច្នេះហើយបានជា សម្រាប់អ្នកនយោបាយខ្លះ អឺរ៉ុបគ្មានអ្វីត្រូវខាតបង់នឹងធ្វើកំណែទម្រង់ ទុកប្រទេសណាដែលពេញចិត្តឱ្យក្នុងសហភាព ហើយបើប្រមុខដឹកនាំម្នាក់មិនពេញចិត្តហើយ មិនគួរទុកឱ្យនៅរស់ពលរដ្ឋអឺរ៉ុបឡើយ។ អ្នកដែលខាតបង់ច្រើនគឺអង់គ្លេស មិនមែនសហភាពអឺរ៉ុបទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ