ក្រុម Anonymous ៖ ឧក្រិដ្ឋជនអ៊ីនធ័រនែត ឬអ្នកតស៊ូដើម្បីសិទ្ធិសេរីភាព?
ចុះផ្សាយនៅថ្ងៃ៖
ស្តាប់ - ០៤:០៤
ក្រុមអនាមិក ឬ Anonymous ត្រូវបានគេស្គាល់កាន់តែច្រើន នៅក្នុងប្រទេសកម្ពុជា ក្រោយពីសមាជិករបស់ពួកគេ ត្រូវបានអាជ្ញាធរកម្ពុជា ដោយមានកិច្ចសហការជាមួយទីភ្នាក់ងារស៊ើបអង្កេត FBI របស់អាមេរិក ចាប់ខ្លួន ជាបន្តបន្ទាប់ កាលពីពេលថ្មីៗនេះ។ តើក្រុម Anonymous នេះជានរណា? មានដើមកំណើតមកពីណា? តើសកម្មភាពរបស់ពួកគេគឺជាអំពើល្មើសច្បាប់ ឬក៏ជាការតវ៉ាប្រឆាំង ដើម្បីទាមទារសិទ្ធិសេរីភាព?
ក្រុម « Anonymous » (ដែលមានន័យជាភាសាខ្មែរថា “ក្រុមអនាមិក”) បានចាប់កំណើតឡើង កាលពីក្នុងអំឡុងឆ្នាំ២០០៣-២០០៤ ហើយសកម្មភាពរបស់ពួកគេត្រូវបានគេចាប់ផ្តើមស្គាល់ច្រើន នៅទូទាំងពិភពលោក ចាប់តាំងពីឆ្នាំ២០០៨។
ក្រុមនេះបានប្រកាសខ្លួនឯងថា ជាក្រុម Hackers អនាមិក ដែលគ្មានមេដឹកនាំ គ្មានអ្នកនាំពាក្យ ហើយគ្មានអង្គការចាត់តាំង។ តាមការពិត « Anonymous » គ្រាន់តែជាឈ្មោះ ឬស្លាកមួយ ដែលអ្នកណាក៏អាចជ្រកពីខាងក្រោមបាន។
អ្នកណាក៏អាចប្រកាសខ្លួនថាជាសមាជិករបស់ Anonymous បានដែរ ឲ្យតែប្រកាន់យកតាមគោលការណ៍ជាមូលដ្ឋានរបស់ក្រុម គឺប្រើការវាយប្រហារតាមប្រព័ន្ធអ៊ីនធ័រនែត ដើម្បីទាមទារសិទ្ធិសេរីភាពក្នុងការបញ្ចេញមតិ និងសិទ្ធិសេរីភាពក្នុងការប្រើប្រព័ន្ធអ៊ីនធ័រនែត ដោយគ្មានការរឹតត្បឹត ឬការឃ្លាំមើលពីអាជ្ញាធរ។
ចាប់តាំងពីកកើតឡើងមក គេឃើញក្រុម Anonymous បានធ្វើការវាយប្រហារទៅលើវិបសៃត៍ជាច្រើន ទាំងវិបសៃត៍របស់ស្ថាប័នរដ្ឋ ដូចជា FBI ឬ CIA របស់អាមេរិក វិបសៃត៍ដែលចុះផ្សាយរូបភាពអាសអាភាសរបស់កុមារ វិបសៃត៍របស់វិហារកាតូលិក ដែលប្រឆាំងនឹងការរៀបអាពាហ៍ពិពាហ៍អ្នកស្រឡាញ់ភេទដូចគ្នា និងរហូតដល់វិបសៃត៍របស់ក្រុមហ៊ុនឯកជនធំៗជាច្រើនផ្សេងទៀត។
នៅក្នុងអំឡុងបដិវត្តន៍អារ៉ាប់ គេក៏ឃើញ ក្រុម Anonymous បានបញ្ចេញសកម្មភាពយ៉ាងសកម្មផងដែរ ក្នុងការគាំទ្រចលនាបដិវត្តន៍ តាមរយៈការវាយប្រហារលើវិបសៃត៍របស់រដ្ឋាភិបាលនៃរបបផ្តាច់ការអារ៉ាប់មួយចំនួន ដូចជា រដ្ឋាភិបាលទុយនីស៊ី លីប៊ី និងអេហ្ស៊ីប ជាដើម។
កាលពីឆ្នាំ២០១២ ទស្សនាវដ្តី Times របស់អាមេរិក បានចាត់បញ្ចូលក្រុម Anonymous ទៅក្នុងចំណោមបញ្ជីឈ្មោះមនុស្សទាំង១០០នាក់ ដែលមានឥទ្ធិពលបំផុត នៅលើពិភពលោក។
ក៏ប៉ុន្តែ គេឃើញថា ក្រុម Anonymous ក៏ជាចំណុចស៊ីបនៃការតាមប្រមាញ់របស់អាជ្ញាធរផងដែរ ហើយកន្លងមក សមាជិកក្រុម Anonymous ជាច្រើននាក់ត្រូវបានអាជ្ញាធរចាប់ខ្លួន ជាពិសេស នៅសហរដ្ឋអាមេរិក នៅអង់គ្លេស និងចុងក្រោយថ្មីៗនេះ នៅក្នុងប្រទេសកម្ពុជា។ ជាទូទៅ គេឃើញថា នៅក្នុងពេលដែលក្រុម Anonymous ខ្លួនឯង ព្រមទាំងអ្នកគាំទ្រសកម្មភាពរបស់ពួកគេ តែងតែប្រកាសខ្លួនថាជាអ្នកតស៊ូដើម្បីសិទ្ធិសេរីភាព អាជ្ញាធរមានសមត្ថកិច្ចវិញ នៅស្ទើរតែគ្រប់ប្រទេសទាំងអស់ តែងតែចាត់ទុកក្រុម Anonymous ថា ជាឧក្រិដ្ឋជន (Cyber criminal) ឬជាភេរវជនតាមប្រព័ន្ធអ៊ីនធ័រនែត (Cyber terrorist) ទៅវិញ។
បើដូច្នេះ តើក្រុម Anonymous ជាអ្វីពិតប្រាកដ ? ជាឧក្រិដ្ឋជន ឬក៏ជាអ្នកតស៊ូដើម្បីសិទ្ធិសេរីភាព? ការពិតជាក់ស្តែង គឺវាអាចនៅចន្លោះកណ្តាល។
ក្រុម Anonymous ពិតប្រាកដ គឺជាក្រុមមនុស្ស ដែលមានគោលដៅធ្វើសកម្មភាពប្រឆាំងនឹងការរឹតត្បឹតសិទ្ធិសេរីភាព ពីសំណាក់អាជ្ញាធរ ពីអ្នកមានលុយ ឬអ្នកមានអំណាចផ្សេងៗទៀត។ ក៏ប៉ុន្តែ ការទាមទារសិទ្ធិសេរីភាពនេះធ្វើឡើង តាមរយៈសកម្មភាពខ្លះ ដែលជាអំពើល្មើសនឹងច្បាប់ ដូចជា ការលួចចូលទៅក្នុងប្រព័ន្ធអ៊ីនធ័រនែត ដើម្បីលួចយកឯកសារ ឬទិន្នន័យឯកជន ជាដើម គឺជាបទល្មើសព្រហ្មទណ្ឌ ដែលអាចត្រូវផ្តន្ទាទោសពិន័យជាប្រាក់ ឬដាក់ពន្ធនាគាររាប់ឆ្នាំ អាស្រ័យទៅតាមច្បាប់របស់ប្រទេសនីមួយៗ។
ការចូលទៅលួចទិន្នន័យឯកជន នៅក្នុងប្រព័ន្ធអ៊ីនធ័រនែតនេះក៏អាចមានព័ត៌មានផ្ទាល់ខ្លួនរបស់អ្នកប្រើប្រាស់អ៊ីនធ័រនែតខ្លះៗផងដែរ ដែលនេះអាចជាការប៉ះពាល់ទៅដល់សិទ្ធិឯកជនរបស់អ្នកប្រើប្រាស់។ ហេតុដូច្នេះហើយបានជាមានអ្នករិះគន់ខ្លះលើកឡើងថា ក្រុម Anonymous នេះ ថ្វីដ្បិតតែមានគោលដៅល្អ គឺការការពារសិទ្ធិសេរីភាព ក៏ប៉ុន្តែ សកម្មភាពខ្លះរបស់ពួកគេបែរជាធ្វើឲ្យប៉ះពាល់ទៅដល់សិទ្ធិសេរីភាពទៅវិញ។
ក៏ប៉ុន្តែ គេក៏សង្កេតឃើញជាទូទៅផងដែរថា ការចូលលួចទិន្នន័យក្នុងប្រព័ន្ធអ៊ីនធ័រនែតមិនមែនជាសកម្មភាព ដែលក្រុម Anonymous ច្រើនធ្វើជាទូទៅនោះទេ។ សកម្មភាព ដែលគេធ្លាប់ឃើញច្រើនជាងគេ គឺការធ្វើឲ្យវិបសៃត៍ណាមួយត្រូវគាំងលែងដំណើរការ តាមរយៈការវាយប្រហារដោយប្រើវិធី ដែលគេហៅតាមភាសាអង់គ្លេសថា Denial of Service (DoS)។ ការវាយប្រហារក្នុងទ្រង់ទ្រាយបែបនេះហើយ ដែលក្រុម Anonymous កម្ពុជា បានធ្វើទៅលើវិបសៃត៍នៃស្ថាប័នរដ្ឋធំមួយចំនួននាពេលកន្លងមក។
តាមការពិត ការវាយប្រហារទៅលើវិបសៃត៍របស់រដ្ឋ ឬឯកជន ដោយប្រើវិធីនេះ ក៏មិនមែនជាសកម្មភាពស្របច្បាប់នោះដែរ។ ក៏ប៉ុន្តែ ការរំខានដល់ដំណើរការវិបសៃត៍ត្រូវធ្វើឡើងជាលក្ខណៈបណ្តោះអាសន្នក្នុងរយៈពេលខ្លីតែប៉ុណ្ណោះ ហើយក៏មិនសូវជាបណ្តាលឲ្យមានការខូចខាតធ្ងន់ធ្ងរនោះដែរ។ ហេតុដូច្នេះហើយបានជាគេច្រើនតែមានការអត់ឱនចំពោះទង្វើបែបនេះ ដោយចាត់ទុកថា វាជាទម្រង់មួយ នៃការធ្វើបាតុកម្មប្រឆាំង គ្រាន់តែបាតុកម្មនេះមិនមែនធ្វើតាមដងផ្លូវ តែធ្វើតាមប្រព័ន្ធអ៊ីនធ័រនែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ