អង្គភាពប្រឆាំងអំពើពុករលួយប្រកាសចាប់បានក្រុមHacker ពីរនាក់ផ្សេងទៀត
អង្គភាពប្រឆាំងអំពើពុករលួយនៅថ្ងៃសុក្រទី ០២ ឧសភានេះ បានប្រកាសថា ខ្លួនបានឃាត់ខ្លួនក្រុមវាយប្រហារអ៊ិនធើណិត ឫ Hacker ពីរនាក់ផ្សេងទៀតក្រោយពីបានវាយប្រហារគេហទំព័រអង្គភាពប្រឆាំងអំពើពុករលួយកាលពីថ្ងៃទី ២៩មេសា កន្លងទៅ។អង្គភាពប្រឆាំងអំពើពុករលួយមិនទាន់បានបញ្ជាក់ពីអត្តសញ្ញាណរបស់ជនទាំងពីរនោះនៅឡើយទេ ដោយគ្រាន់តែអះអាងថា ជាសមាជិកនៃក្រុមអនាមិកកម្ពុជា( Anonymous Cambodia)។ ជនទាំងពីរនាក់នេះកំពុងត្រូវបានអង្គភាពប្រឆាំងអំពើពុករលួយធ្វើការសាកសួរ និងត្រៀមបញ្ជូនទៅកាន់តុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
សមាជិកក្រុមអនាមិកកម្ពុជាពីរនាក់ផ្សេងទៀតត្រូវបានអាជ្ញាធរចាប់ខ្លួនពីរថ្ងៃបន្ទាប់ពីបានវាយប្រហារគេហទំព័រអង្គភាពប្រឆាំងអំពើពុករលួយកាលពីថ្ងៃទី២៩ មេសា កន្លងទៅ។នេះបើតាមការប្រកាសឲ្យដឹងរបស់អង្គភាពប្រឆាំងអំពើពុករលួយនៅថ្ងៃសុក្រទី ០២ ឧសភានេះ។
លោក ឱម យិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយបានឲ្យដឹង ថា ជនអនាមិកទាំងពីរនាក់នោះត្រូវបានបញ្ជូនមកដល់អង្គភាពប្រឆាំងអំពើពុករលួយកាលវេលា ម៉ោង ២យប់មិញ។យ៉ាងណាក៏ដោយ លោកឱម យិនទៀង មិនទាន់បានបង្ហាញពីអត្តសញ្ញាណនៃជនទាំងពីរនេះនៅឡើយនោះទេ ដោយគ្រាន់តែបញ្ជាក់ថា ជាសមាជិកនៃក្រុមអនាមិកកម្ពុជាដែលបានប្រកាសថានឹងផ្តួលរំលំរាជរដ្ឋាភិបាលកម្ពុជា។ លោក រដ្ឋមន្ត្រីបានឲ្យដឹងដែរថា ពេលនេះអង្គភាពប្រឆាំងអំពើពុករលួយកំពុងធ្វើការសាកសួរជនទាំងពីរនាក់នោះដើម្បីកសាងសំណុំរឿងបញ្ជូនទៅកាន់តុលាការ។
ភ្លាមៗក្រោយពីមានដំណឹងនៃការចាប់ខ្លួននេះ នៅលើទំព័របណ្តាញទំនាក់ទំនងសង្គមFacebookរបស់ខ្លួននៅព្រឹកថ្ងៃសុក្រនេះ ក្រុមអនាមិកកម្ពុជាបានសរសេរបែបចំអកយ៉ាងខ្លីក្នុងន័យថា អ្នកដែលបានចូលវាយប្រហារគេហទំព័រអង្គភាពប្រឆាំងអំពើរលួយនោះមិនត្រូវបានចាប់ខ្លួននោះទេ។
ដោយឡែកកាលពីថ្ងៃព្រហស្បត្តិ៍ ម្សិលមិញក្រុមអនាមិកកម្ពុជា ឫ Anonymous Cambodia បានបន្តវាយប្រហារគេហទំព័រមួយចំនួនទៀតរបស់ស្ថាប័នរដ្ឋ និងឯកជនរួមមានដូចជា គេហទំព័រកងរាជអាវុធហត្ថលើផ្ទៃប្រទេស ធនាគារកាណាឌីយ៉ា និង បុរីភ្នំពេញថ្មីជាដើម។ប៉ុន្តែគេហទំព័រកងរាជអាវុធហត្ថលើផ្ទៃប្រទេសបានដំណើរការធម្មតាឡើងវិញហើយនៅព្រឹកថ្ងៃសុក្រ ទី ០២ ឧសភានេះ។នៅព្រឹកដដែលនេះ ក្រុមអនាមិកកម្ពុជាបានប្រកាសថា ខ្លួនបានចូលលួចនិងលុបចោលទិន្នន័យសំខាន់ៗនៅក្នុងគេហទំព័រទីស្តីការគណៈរដ្ឋមន្ត្រី ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។
សូមបញ្ជាក់ថា នេះជាការចាប់ខ្លួនលើកទីពីរហើយពីសំណាក់អាជ្ញាធររដ្ឋាភិបាលលើក្រុមអនាមិកវាយប្រហារអ៊ិនធើណិត។កាលពីចុងខែមេសាកន្លងទៅ អគ្គស្នងការដ្ឋាននគរបាលជាតិ សហការជាមួយស្ថាប័នFBIប្រចាំនៅកម្ពុជាបានឃាត់ខ្លួនក្រុមអនាមិកកម្ពុជាចំនួនពីរនាក់ដែលបានវាយប្រហារគេហទំព័រស្ថាប័នរដ្ឋជាច្រើននាកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ