បក្សប្រឆាំងធ្វើបាតុកម្មជាថ្មី មួយថ្ងៃមុនការបោះឆ្នោតព្រឹទ្ធសភា
សកម្មជនបក្សប្រឆាំងថៃ រាប់សិបពាន់នាក់បាននាំគ្នាប្រមូលផ្តុំធ្វើបាតុកម្មជាថ្មីទៀត នៅថ្ងៃសៅរ៍ទី ២៩ មីនា នាទីក្រុងបាងកក ដើម្បីទាមទារ ដូចលើកមុនៗ ឱ្យនាយករដ្ឋមន្ត្រី លោកស្រី យីងឡាក់ ស៊ីណាវ៉ាត់ ដែលកំពុងជាប់ក្តីក្តាំជាមួយគណៈកម្មការប្រឆាំងអំពើពុករលួយ ចុះចេញពីតំណែង។ អ្វីជាការកត់សម្គាល់ បាតុកម្មលើកនេះធ្វើឡើងនាឱកាសដែលនឹងមានប្រព្រឹត្តទៅ នៅថ្ងៃអាទិត្យស្អែក ការបោះឆ្នោតព្រឹទ្ធសភា។
ចុះផ្សាយនៅថ្ងៃ៖
ស្តាប់ - ០១:៥២
សង្កាត់ពាណិជ្ជកម្មដ៏ល្បីល្បាញ ដែលសកម្មជនបក្សប្រឆាំងទើបដកខ្លួនថយ បានក្លាយទិសដៅបាតុកម្មជាថ្មីទៀត នៅថ្ងៃសៅរ៍នេះ។ កម្លាំងបាតុកម្ម ថ្វីបើមានបរិមាណតិចជាងលើកមុនមែន ប៉ុន្តែគ្រប់គ្រាន់នឹងធ្វើឱ្យចរាចរណ៍ក្នុងក្រុងកកស្ទះរំខានយ៉ាងខ្លាំង។ ប៉ូលិសប្រមាណ៨ពាន់នាក់ កំពុងស្ថិតក្នុងស្ថានភាពត្រៀមអាសន្ន ក្រែងអាចមានផ្ទុះអំពើហិង្សាជាយថាហេតុណាមួយកើតឡើង។
នៅព្រឹកមិញ មានអ្នកចូលរួមដង្ហែក្បួនបាតុកម្មប្រមាណជាងបីម៉ឺននាក់។ បើតាមប៉ូលិស។ សកម្មជនជាបណ្តាញនិស្សិត និងប្រជាជនគាំទ្រកំណែទម្រង់បោះឆ្នោត បាននាំគ្នាសម្រុកចូលក្នុងវិមានរដ្ឋាភិបាលទៀតនៅព្រឹកមិញ ប៉ុន្តែអាគារនេះគ្មានបុគ្គលិក ឬតំណាងសមាជិករដ្ឋាភិបាលណាម្នាក់មានវត្តមាននៅខាងក្នុងតាំងពីជាច្រើនខែមក។
បាតុកម្មលើកនេះ គឺជាភាគបន្តនៃវិបត្តិនយោបាយថៃ ដែលរង្គោះរង្គើខ្លាំង តាំងពី៨ឆ្នាំមក ម្តងជាបាតុកម្មរបស់ក្រុមអាវក្រហមប្រឆាំងនឹងក្រុមអ្នកមាន អ្នកក្រុង រដ្ឋាភិបាលស្និទ្ធនឹងរាជវង្ស និងម្តងជាក្រុមសកម្មជនអ្នកលឿង ប្រឆាំងនឹងត្រកូលថាក់ស៊ីន និងប្អូនស្រី យីងឡាក់ ក្នុងបំណងតែមួយ គឺទាមទារឱ្យធ្វើកំណែទម្រង់ការបោះឆ្នោត ព្រោះសម្រាប់ពួកគេប្រព័ន្ធបោះឆ្នោតសព្វថ្ងៃនេះ ត្រូវបានតាក់តែងនិងច្នៃឡើង ដើម្បីតែជោគជ័យត្រកូលថាក់ស៊ីនប៉ុណ្ណោះ។ បក្សថាក់ស៊ីន ដែលតែងឈ្នះរាល់ការបោះឆ្នោត តាំងពីឆ្នាំ២០០១មក។
ប៉ុន្តែការបោះឆ្នោតមុនអាណត្តិ កាលពីថ្ងៃទី ២កុម្ភៈ ស្នើឡើងដោយលោកស្រីនាយករដ្ឋមន្ត្រី យីងឡាក់ ស៊ីណាវាត់ ដើម្បីដោះស្រាយវិបត្តិ ត្រូវបានតុលាការធម្មនុញ្ញ ច្រានចោលមិនទទួលស្គាល់។ ជាងនេះទៅទៀត លោកស្រីនាយករដ្ឋមន្ត្រី កំពុងជាប់រឿងក្តីក្តាំនៅតុលាការ។ គណៈកម្មការជាតិប្រឆាំងនឹងអំពើពុករលួយអាចយកផែនការទិញអង្កររបស់លោកស្រីយីងឡាក់ ទៅប្តឹងព្រឹទ្ធសភា ដែលគណបក្សប្រឆាំងអាចនឹងមានសំឡេងភាគច្រើននៅក្នុងការបោះឆ្នោតនៅថ្ងៃស្អែក និងដែលអាច ទម្លាក់លោកស្រីប្រមុខរដ្ឋាភិបាលពីអំណាចបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ