វិបត្តិនយោបាយនៅប្រទេសយេម៉ែនកំពុងធ្វើឲ្យអារ៉ាប៊ីសាអូឌីតឈឺក្បាលខ្លំាង
ចុះផ្សាយនៅថ្ងៃ៖
ស្តាប់ - ០៥:២២
ប្រទេសយេម៉ែនកំពុងពើបប្រទះនឹងវិបត្តិនយោបាយមួយយ៉ាងធ្ងន់ធ្ងរ ពិសេសតំាងពីក្រោយបដិវត្តន៍ផ្តួលរំលំលោកប្រធានាធិបតីអាលី អាប់ដាឡា សាឡេក្នុងឆ្នំា ២០១១។ តំាងពីថ្ងៃទី១៨ កញ្ញាមកម្ល៉េះដែលទីក្រុងសាណាបានធ្លាក់ក្នុងកណ្តាប់ដៃពួកឧទ្ទាមហ៊ូទីសអ្នកកាន់សាសនាអ៊ីស្លាមនិកាយឈីអ៊ីត។ មួយវិញទៀត និងក្រៅពីពួកហ៊ូទីស រដ្ឋាភិបាលក៏កំពុងប្រឈមមុខនឹងការគំរាមកំហែងរបស់ពួកអាល់កៃដា និងក្រុមអ្នកទាមទារផ្តាច់ទឹកដីនៅតំបន់ប៉ែកខាងត្បូងប្រទេស។ អ្វីដែលគ្រប់គ្នាកំពុងបារម្ភខ្លំាងជាងគេនោះ គឺជម្លោះប្រដាប់អាវុធរបស់ពួកហ៊ូទីសឈីអ៊ីត និងពួកអាល់កៃដាស៊ុយនីតដែលអាចនឹងជម្រុញយេម៉ែនឲ្យធ្លាក់ទៅក្នុងសង្រ្គាមស៊ីវិល។ អ្នកដែលកំពុងឈឺក្បាលជាងគេ គឺប្រទេសអារ៉ាប៊ីសាអូឌីតដែលខ្លាចយេម៉ែនធ្លាក់ទៅក្នុងកណ្តាប់ដៃពួកឈីអ៊ីត។
សំណួរដែលប្រទេសអារ៉ាប៊ីសាអូឌីតកំពុងចោទសួរនៅពេលនេះគឺថា តើខ្លួនត្រូវប្រកាន់ជំហរបែបណាចំពោះប្រទេសយេម៉ែននៅពេលនេះ?។ វាពិតជាសំណួរមួយដែលមិនមែនកើតឡើងដោយចៃដន្យឡើយ ព្រោះថា វាបានចោទសួរឡើងចំពេលដែលស្ថានការណ៍នយោបាយនៅយេម៉ែនកំពុងវិវត្តន៍ទៅរកផ្លូវមួយប្រកបដោយគ្រោះថ្នាក់ខ្លំាងចំពោះប្រទេសអារ៉ាប៊ីសាអូឌីត ពិសេសតំាងពីពួកឧទ្ទាមហ៊ូទីសអ្នកកាន់សាសនាអ៊ីស្លាមនិកាយឈីអ៊ីតបានដណ្តើមកាន់កាប់ទីក្រុងសាណាកាលពីថ្ងៃទី១៨ កញ្ញាថ្មីៗនេះ។ ហ៊ូទីស គឺជាក្រុមប្រដាប់អាវុធដែលគេស្គាល់ក្រោមឈ្មោះថា ចលនាហ្សៃឌីសដែលជាសាខារបស់សាសនាអ៊ីស្លាមនិកាយឈីអ៊ីត និងដែលមានវត្តមានតែនៅក្នុងប្រទេសយេម៉ែនតែមួយគត់។ សព្វថ្ងៃ ពួកហ៊ូទីសកំពុងត្រួតត្រាទីក្រុងសាណា និងកំពុងប្រើឥទ្ធិពលរបស់ខ្លួនទៅលើកម្លំាងនយោបាយដទៃទៀត ក្នុងនោះ ក៏មានកម្លំាងនយោបាយរបស់លោកប្រធានាធិបតីអាប់ រ៉ាប់បូ មែនស៊ូ ហាឌីផងដែរ។ តែអ្វីដែលប្រទេសអារ៉ាប៊ីសាអូឌីតកំពុងបារម្ភខ្លំាងនោះ គឺមកពីពួកហ៊ូឌីសនេះជាសម្ព័ន្ធមិត្តរបស់អ៊ីរ៉ង់ដែលជាសត្រូវរបស់អារ៉ាប៊ីសាអូឌីត។ ដូច្នេះបើយេម៉ែនត្រូវធ្លាក់ក្នុងការកាន់កាប់របស់ពួកហ៊ូឌីសទំាងស្រុងមែននោះ នោះអារ៉ាប៊ីសាអូឌីតនឹងត្រូវឡោមព័ទ្ធដោយក្រុមប្រទេសដែលកាន់អំណាចដោយពួកឈីអ៊ីត។
នេះពិតជាស្ថានការណ៍មួយដែលកំពុងធ្វើឲ្យរដ្ឋអំណាចអារ៉ាប៊ីសាអូឌីតឈឺក្បាលខ្លំាង។ តែគេក៏មិនត្រូវភ្លេចនិយាយទេថា ទំនាក់ទំនងរវាងយេម៉ែន និងអារ៉ាប៊ីសាអូឌីតជាទំនាក់ទំនងមួយដែលជានិច្ចជាកាលស្មុគស្មាញ និងសុំាញំា។ នៅពេលដែលយេម៉ែនធ្លាក់ក្នុងសង្រ្គាមស៊ីវិលពីឆ្នំា ១៩៦២ ដល់ឆ្នំា ១៩៧០ អារ៉ាប៊ីសាអូឌីតបានចេញមុខគំាទ្ររាជានិយមដឹកនំាដោយចលនាហ្សៃឌីរបស់ពួកហ៊ូឌីសប្រឆំាងនឹងពួកសាធារណរដ្ឋ។ ស្រាប់តែឥឡូវ បែរជាកំពុងបារម្ភពីការឡើងកាន់អំណាចរបស់ពួកហ៊ូឌីសទៅវិញ។ យ៉ាងណាក៏ដោយ ករណីយេម៉ែននឹងអាចធ្វើឲ្យពិភពអារ៉ាប់ក្រឡាប់ចាក់ជាថ្មីបន្ថែមលើបញ្ហាដែលកំពុងកើតមាននៅក្នុងប្រទេសស៊ីរី និងអ៊ីរ៉ាក់សព្វថ្ងៃ។ គួររម្លឹកជូនថាកាលពី ២ឆ្នំាមុន ពោលក្នុងឆ្នំា ២០១១ យេម៉ែនបានចម្លងយកបដិវត្តន៍អារ៉ាប់ដូចករណីប្រទេសអារ៉ាប់មួយចំនួននៅក្នុងតំបន់។
ក្រុមយុវជនយេម៉ែនដែលស្រេកឃ្លានសិទ្ធិសេរីភាព និងលទ្ធិប្រជាធិបតេយ្យបានចុះផ្លូវធ្វើបាតុកម្មរយៈពេលពេញមួយឆ្នំាក្នុងគោលដៅផ្តួលរំលំរបបផ្តាច់ការ កំចាត់ប្រព័ន្ធបក្សពួកនិយម និងជនពុករលួយ។ កាលណោះ ពួកបាតុករយុវជនយេម៉ែនបានប្តូរជីវិតដើម្បីទាមទារឲ្យលោកប្រធានាធិបតីអាលី អាប់ដាឡា សាឡេចុះចេញពីមុខតំណែងដោយពួកគេយល់ថា លោកសាឡេជាឆ្អឹងទទឹង ក ឬមួយក៏ថា ជាឧបសគ្គដែលបានរារំាងសុបិន្តរបស់ពួកគេមិនឲ្យក្លាយជាការពិត។ នៅទីបំផុត លោកសាឡេបានធ្លាក់ពីអំណាចដូចដែលក្រុមយុវជនចង់បាន តែបញ្ហានៅត្រង់ថា លោកសាឡេបានខ្ទាតបាត់មែន តែរបបរបស់លោកមិនបានរលត់រលាយតាមលោកឯណា ព្រោះថា យេម៉ែនជាមួយនឹងថ្នាក់ដឹកនំាថ្មីនៅតែមិនទាន់អាចនិយាយចុះសម្រុងគ្នាក្នុងការបង្កើតរដ្ឋាភិបាលអន្តរកាលមួយនៅឡើយទេ។ គឺនៅត្រង់ចំណុចនេះហើយដែលបានធ្វើឲ្យក្រុមយុវជនដែលបានខំធ្វើបដិវត្តន៍មានការខកចិត្តជាពន់ពេក។
គឺកង្វះឆន្ទៈនយោបាយ និងកង្វះសមត្ថភាពក្នុងការបង្រួបបង្រួមជាតិនេះហើយដែលបានជម្រុញឲ្យពួកហ៊ូឌីសឆក់យកឱកាសដ៏កម្រមួយនេះ។ ពួកហ៊ូឌីសអាចនឹងទម្លាក់លោកហាឌីចេញពីតំណែងប្រធានាធិបតីស្តីទី និងរៀបចំរដ្ឋាភិបាលថ្មីមួយដោយខ្លួនឯង។ នៅក្នុងករណីនេះ យេម៉ែននឹងធ្លាក់ទៅក្នុងស្ថានការណ៍បាក់បែកមួយកាន់តែខ្លំាងដែលសូម្បីតែពួកហ៊ូឌីខ្លួនឯងក៏មិនអាចគ្រប់គ្រងបានដែរ។ អ៊ីចឹងហើយបានជាគេមិនធ្វើដោយសុខចិត្តរក្សាទុកឲ្យនៅដដែល តែពួកគេជាអ្នកត្រួតត្រាវិញ។ តែអ្វីដែលពួកហ៊ូឌីសគិតមិនដល់នោះនៅត្រង់ថា ពួកគេបាន និងកំពុងប្រឈមមុខនឹងសត្រូវចំនួនពីរទៀត គឺពួកអាល់កៃដា និងក្រុមអ្នកទាមទារផ្តាច់ទឹកដីនៅតំបន់ប៉ែកខាងត្បូង។ តែនៅចំពោះមុខ គឺក្រុមភាតរៈអ៊ីស្លាម និងពួកអ្នកធ្វើបដិវត្តន៍កាលពីជាង ២ឆ្នំាមុនដែលពួកហ៊ូឌីសត្រូវជម្រះបញ្ជីមុនគេ ព្រោះគឺពួកនេះហើយដែលពួកហ៊ូឌីសចាត់ទុកជាកម្លំាងនយោបាយមួយដែលនឹងប្រជែងយកអំណាចនៅក្នុងការបោះឆ្នោតនាពេលខាងមុខ។
ចំពោះប្រទេសណាមិនដឹងទេ តែបើប្រទេសអារ៉ាប៊ីសាអូឌីតដែលមានព្រំដែនជាប់នឹងយេម៉ែនបានតាមដានស្ថានការណ៍នៅយេម៉ែនដោយមិនប៉ប្រិចភ្នែកម្តងណាសោះ។ មិនប៉ប្រិចភ្នែកព្រោះថា អ្វីៗដែលកំពុងកើតមាន និងដែលត្រូវកើតមាននៅយេម៉ែននាពេលខាងមុខ ពិតជាជះឥទ្ធិពលដល់ស្ថានការណ៍នៅអារ៉ាប៊ីសាអូឌីតដោយមិនអាចចៀសរួច។ រហូតមកដល់ពេលនេះ គ្មានអ្នកណាម្នាក់អាចកំចាត់ពួកហ៊ូឌីសបានឡើយ នោះបើទោះបីជាកាលពីពួកនេះនៅមានគ្នាតិចតួចស្ថិតប៉ែកខាងជើងយេម៉ែនក៏ដោយ។ មួយវិញទៀត ក៏គ្មាននរណាម្នាក់អាចបង្គាប់ពួកនេះឲ្យជ្រើសរើសមិត្ត និងសត្រូវរបស់គេដែរ។ គ្មាននរណាម្នាក់អាចដឹងមុនថា ពួកហ៊ូឌីសបានជ្រើសយកអ៊ីរ៉ង់ធ្វើជាសម្ព័ន្ធមិត្តរបស់ខ្លួនឯណា។
តែអ្វីដែលរដ្ឋអំណាចអារ៉ាប៊ីសាអូឌីតព្យាយាមទប់ស្កាត់នោះ គឺរារំាងកុំឲ្យពួកហ៊ូឌីសយកអ៊ីរ៉ង់មកធ្វើជាបង្អែកនយោបាយរបស់ខ្លួន។ មួយវិញទៀត ទីក្រុងរីយ៉ាដត្រូវប្រឹងប្រែងគ្រប់បែបយ៉ាងទំាងអស់ដើម្បីស្វែងរកដៃគូនយោបាយយេម៉ែនណាដែលត្រូវការជំនួយគំាទ្រពីខ្លួនក្នុងការប្រជែងជាមួយនឹងពួកហ៊ូឌីស។ ធ្វើយ៉ាងនេះ គឺដើម្បីរារំាងកុំឲ្យពួកហ៊ូឌីសឡើងកាន់អំណាចនៅយេម៉ែនដែលនឹងនំាឲ្យប៉ះពាល់ដល់ផលប្រយោជន៍របស់អារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ