អតីតនាយករដ្ឋមន្ត្រីចិន បដិសេធ មិនបានជួយគ្រួសារឱ្យឡើងមានក្នុងពេលកាន់អំណាច
លោក វេន ជាប៉ាវ អតីតនាយករដ្ឋមន្ត្រីចិន បានធ្វើសេចក្តីបដិសេធ ជាលាយលក្ខណ៍អក្សរ នៅក្នុងសារព័ត៌មានហុងកុង ថាភាពមានបាន កើនប្រាក់រាប់រយលានដុល្លារអាមេរិក របស់ក្រុមគ្រួសារ មិនមែនបានមកពីការប្រើអំណាច ក្នុងអំឡុងមួយទសវត្សលោកជានាយករដ្ឋមន្ត្រីចិន ដូចដែលកាសែតអាមេរិក ធ្លាប់អះអាងកាលពីឆ្នាំ២០១២នោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
“ខ្ញុំមិនដែលប្រើអំណាច ហើយក៏នឹងមិនប្រើអំណាចដើម្បីប្រយោជន៍ផ្ទាល់ខ្លួនទេ ! ខ្ញុំចង់រស់ដោយមោទនៈ ព្រោះខ្ញុំជឿស៊ប់ថា កើតមកខ្លួនទទេ និងស្លាប់ទៅក៏ទទេ តែជាមួយនឹងភាពស្អាតស្អំ" នេះជាសម្រង់ខ្លឹមសារនៃលិខិតរបស់លោកវេន ជាប៉ាវ ទៅកាន់អ្នកនិពន្ធវិចារណកថាកាសែតហុងកុង Ming Pao ជាភាសាចិន។
លិខិតចុះថ្ងៃទី ២៧ ធ្នូ តែទើបត្រូវបានកាសែតហុងកុង -ល្បីខាងស្និទ្ធនឹងលោកអតីតនាយករដ្ឋមន្ត្រី យកមកចុះផ្សាយនៅថ្ងៃសៅរ៍ទី ១៨មករាម្សិលមិញ ក្នុងខណៈដែលរដ្ឋាភិបាលថ្មី ក្រោមការដឹកនាំរបស់ប្រធានាធិបតីថ្មី ស៊ី ជិនពីង កំពុងធ្វើយុទ្ធនាការបំបាត់អំពើពុករលួយ ក្នុងជួរបក្ស រាប់ទាំងថ្នាក់ដឹកនាំកំពូលៗផង។
បើតាមអ្នកវិភាគ លោក វេន ជាប៉ាវ នាយករដ្ឋមន្ត្រីចិន ពីឆ្នាំ២០០៣ -២០១៣ ទំនងជាគ្មានគ្រោះឡើងតុលាការក្នុងសំណុំរឿងពុករលួយទេ ប៉ុន្តែដោយហេតុមានគំនាបខ្លាំង លោកត្រូវបង្ខំចិត្តលុបលាងឈ្មោះឱ្យបានជ្រះស្រឡះ ពីការចោទប្រកាន់ទាំងឡាយ។
►សូមអាន ៖ រឿងអាស្រូវញាំញីបក្សកុម្មុយនិស្តចិន
កាលពីខែតុលាឆ្នាំ២០១២ កាសែតNYT បានចុះផ្សាយបទអង្កេតមួយ ប៉ាន់ប្រមាណទ្រព្យធនរបស់គ្រួសារលោកវេនជាវប៉ាវ ថាមានប្រមាណជា ២,២ពាន់លានដុល្លារ នៅឆ្នាំ២០០៧។ គ្រួសារលោក វេន មានរកស៊ីក្នុងធនាគារ គ្រឿងអលង្ការ ស្ថានីយ៍ទេសចរណ៍ ក្រុមហ៊ុនទូរគមនាគមន៍ និងគម្រោងសាងសង់ហេដ្ឋារចនាសម្ព័ន្ធ ដោយពេលខ្លះប្រើអត្តសញ្ញាណ offshore ផង។ កាសែតអាមេរិកមិនបានរកឃើញការបង្វិលលុយកាក់អ្វីទាក់ទងនឹងរូបលោកអតីតនាយករដ្ឋមន្ត្រីទេ ប៉ុន្តែទោះបីមានការបដិសេធយ៉ាងណាក៏ដោយ ក៏កាសែតនៅតែរក្សាតម្លៃព័ត៌មានរបស់ខ្លួន។ វិបសៃត៍អ៊ីនធឺណែតរបស់កាសែត New York Time នៅចិន ត្រូវបិទខ្ទប់ ក្រោយពីការផ្សព្វផ្សាយដំណឹងនោះភ្លាម។
ពេលនេះជាមន្ត្រីចូលនិវត្តន៍ លោកវេន ជាប៉ាវ នាយករដ្ឋមន្ត្រីចិនរយៈពេល១០ឆ្នាំ ទើបត្រូវបន្តតំណែងដោយលោក លី ខឺឈាំង កាលពីខែមីនា ២០១៣។ ចិនប្តូរមេដឹកនាំជារៀងរាល់១០ឆ្នាំម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ