រូបភាពផ្កាយរណបបង្ហាញថាកូរ៉េខាងជើងអាចកំពុងតែត្រៀមបាញ់កាំជ្រួចបាលីស្ទីក
យោងតាមការផ្សាយរបស់ភ្នាក់ងារព័ត៌មានរបស់ជប៉ុន គឺកូរ៉េខាងជើង អាចនឹងកំពុងតែរៀបចំធ្វើការបាញ់សាកល្បងកាំជ្រួចបាលីស្ទីក ថ្មីមួយទៀត ដោយឆ្លងកាត់ការសន្និដ្ឋានទៅលើរូបភាព ដែលផ្តល់ឲ្យដោយផ្កាយរណប។ បើជាការពិតមែន មានន័យថា កូរ៉េខាងជើងកំពុងតែផ្គើនសហគមន៍អន្តរជាតិកាន់តែខ្លាំង បន្ទាប់ពីរបបផ្តាច់ការនេះ បានបាញ់សាកល្បងគ្រាប់នុយក្លេអ៊ែរប្រភេទអ៊ីដ្រូហ្សែន កាលពីថ្ងៃទី៦ មករាកន្លងទៅថ្មីៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ទីភ្នាក់ងារព័ត៌មាន Kyodo របស់ជប៉ុនបានផ្សព្វផ្សាយថា ដោយយោងទៅលើការវិភាគរូបភាព បានមកពីផ្កាយរណប គឺបង្ហាញថា កូរ៉េខាងជើងកំពុងតែត្រៀមរៀបចំបាញ់សាកល្បង អាវុធថ្មីមួយទៀត គឺកាំជ្រួចមីស៊ីលបាលីស្ទីកចំងាយឆ្ងាយ។ ចំណែកទូរទស្សន៍ NHK របស់ជប៉ុន ក៏បានផ្សាយផងដែរថា យោងតាមរូបភាពផ្កាយរណបគឺ គេសង្កេតឃើញមានសកម្មភាពរៀបចំ សម្ភារៈ និងចលនាមនុស្សទៅមក ប្លែកខុសធម្មតា នៅតំបន់ Dongchang-ri ភាគខាងលិចកូរ៉េខាងជើង។ ការបាញ់សាកល្បងកាំជ្រួចមីស៊ីល បាលីស្ទីក អាចនឹងប្រព្រឹត្តិទៅ ក្នុងកំឡុងពេលមួយសប្តាហ៍ទៀត។
គួររំលឹកថា កាលពី ថ្ងៃទី ៦មករា កូរ៉េខាងជើង បានធ្វើឲ្យគេភ្ញាក់ផ្អើល ដោយបានបាញ់សាកល្បងអាវុធនុយក្លេអ៊ែរមួយគ្រាប់ ដែលរបបនេះអះអាងថា ជាគ្រាប់នុយក្លេអ៊ែរប្រភេទអ៊ីដ្រូហ្សែន។ តែទោះជាយ៉ាងណា អ្នកជំនាញបរទេសជាច្រើននាក់ បានសន្និដ្ឋានថាគ្រាប់នុយក្លេអ៊ែរនោះ មិនមែនជាគ្រាប់ប្រភេទអ៊ីដ្រូហ្សែននោះទេ។ យ៉ាងណាក៏ដោយ ការបាញ់គ្រាប់នុយក្លេអ៊ែររបស់កូរ៉េខាងជើង កាលពីថ្ងៃទី ៦មករា បានធ្វើឲ្យសហគមន៍អន្តរជាតិ ជាពិសេសប្រទេសជិតខាង មានកូរ៉េខាងត្បូង ជប៉ុន និងចិន ខឹងមួរម៉ៅជាខ្លាំង។ ក្រុមប្រឹក្សាសន្តិសុខអង្គការសហប្រជាជាតិ បានសម្រេចជាឯកច្ឆ័ន ថានឹងដាក់ទណ្ឌកម្មឲ្យធ្ងន់ទៅលើរបបផ្តាច់ការព្យុងយ៉ាង។
មិនដល់មួយខែក្រោយមកផង ពេលនេះគេកំពុងសង្ស័យថា កូរ៉េខាងជើងកំពុងត្រៀមបាញ់កាំជ្រួចបាលីស្ទីក ថ្មីមួយទៀត។ បើការសន្និដ្ឋានទៅលើរូបភាពផ្កាយរណបនេះ ជាការពិត នេះសបង្ហាញថា របបកុម្មុយនីស្តកូរ៉េខាងជើង ពិតជាមិនខ្លាចអង្គការសហប្រជាជាតិ រឺមួយទណ្ឌកម្មអ្វីទាំងអស់។
សម្រាប់ពេលនេះ គេឃើញតែប្រព័ន្ធព័ត៌មានជប៉ុនតែប៉ុណ្ណោះ ដែលផុះផុលផ្សព្វផ្សាយពីរូបភាពផ្កាយរណប។ ចំណែកកូរ៉េខាងត្បូង បានបដិសេធមិនធ្វើអត្ថាធិប្បាយអ្វីទាំងអស់ ដោយលើកហេតុផលថា គេមិនធ្វើការវិភាគទៅលើទិន្នន័យនៃការស៊ើបការណ៍របស់បរទេសទេ។ សូមបញ្ជាក់ថា បន្ទាប់ពីសហរដ្ឋអាមេរិក ជប៉ុនបានបើកប្រតិបត្តិការស៊ើបអង្កេតជាប្រចាំ ទៅលើកូរ៉េខាងជើង តាមរយៈរូបភាពផ្កាយរណប នៅឆ្នាំ២០០៣។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ