កូរ៉េខាងជើងបាញ់មួយគ្រាប់ទៀត ផ្គើនជំនួបកំពូលស្តីពីនុយក្លេអ៊ែរនៅសហរដ្ឋអាមេរិក
នៅថ្ងៃសុក្រ ទី១ មករានេះ ស្របពេលដែល ប្រទេសមហាអំណាចនុយក្លេអ៊ែរ កំពុងតែជួបប្រជុំគ្នានៅទីក្រុងវ៉ាស៊ីនតោន របបផ្តាច់ការកូរ៉េខាងជើង បានធ្វើការបាញ់គ្រាប់មីស៊ីលមួយទៀត ឆ្ពោះទៅកាន់សមុទ្រ ដែលនេះគឺជាសកម្មភាពផ្គើនដោយចំហរ ទៅដល់សហគមន៍អន្តរជាតិ។ ភាពតានតឹងនៅឧបទ្វីបកូរ៉េ កំពុងតែរុញច្រានតំបន់ប៉ាស៊ីហ្វិកទាំងមូល ឲ្យមានការព្រួយបារម្ភ ព្រោះគេមិនអាចស្មាន ដឹងចិត្តមេដឹកនាំកូរ៉េខាងជើងបាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
យោងតាមសេចក្តីរាយការណ៍របស់ក្រសួងការពារជាតិកូរ៉េខាងត្បូងបានឲ្យដឹងថា កូរ៉េខាងជើងបានធ្វើការបាញ់គ្រាប់មីស៊ីលចំងាយខ្លីមួយគ្រាប់ទៀត នៅថ្ងៃសុក្រ ទី១ មេសានៅវេលាម៉ោងប្រហែលជា១២ និង៤៥នាទី។ ការបាញ់នេះបានប្រព្រឹត្តិទៅនៅក្រុងសុនឌុក ភាគខាងកើតកូរ៉េខាងត្បូង។ ចំណែកទីភ្នាក់ងារព័ត៌មានយុនហាប់របស់កូរ៉េខាងត្បូង បានផ្សាយផងដែរថា គ្រាប់មីស៊ីលបានរត់បានចំងាយប្រមាណជា១០០គីឡូម៉ែត្រ មុននឹងធ្លាក់ទៅក្នុងសមុទ្រជប៉ុន ប៉ុន្តែគេមិនអាចដឹងពីគំនូសទិសដៅរបស់គ្រាប់មីស៊ីលនេះទេ។
បន្ថែមពីនេះ អាជ្ញាធរកូរ៉េខាងត្បូងបានចោទប្រកាន់កូរ៉េខាងជើង ថាបានបំផ្លាញប្រព័ន្ធរ៉ាដា GPS របស់កូរ៉េខាងត្បូងដោយចេតនា តាមរយៈការដាក់តាំងម៉ាស៊ីនបញ្ជូនរលកសញ្ញាជាច្រើនចំណុច នៅក្បែរព្រំដែនកូរ៉េខាងត្បូង។ ការបំផ្លាញប្រព័ន្ធ GPS នេះបានធ្វើឲ្យរំខានដល់ចរាចរណ៍នាវា រថយន្ត និងយន្តហោះជាច្រើនគ្រឿង ដែលត្រូវការប្រព័ន្ធនេះ ដើម្បីបង្ហាញផ្លូវធ្វើដំណើរ។
សូមបញ្ជាក់ថា ការបាញ់គ្រាប់មីស៊ីលចំងាយជិត មួយគ្រាប់ថ្មីនេះ គឺបង្ហាញអំពីអាកប្បកិរិយាព្រហើន ក្អេងក្អាង កាន់តែខ្លាំងឡើង ក្នុងខណៈដែលប្រទេសមហាអំណាចនុយក្លេអ៊ែរ កំពុងតែជួបប្រជុំគ្នានៅសហរដ្ឋអាមេរិក ដើម្បីរកវិធីគ្រប់គ្រងការប្រើប្រាស់ថាមពលនុយក្លេអ៊ែរ ឲ្យបានត្រឹមត្រូវ និងមានសុវត្ថិភាព។ សំណុំរឿងនុយក្លេអ៊ែរកូរ៉េខាងជើង ក៏ជាចំណុចសំខាន់នៃការប្រជុំនេះដែរ។
កាលពីដើមឆ្នាំនេះ កូរ៉េខាងជើងបានធ្វើការសាកល្បងគ្រាប់នុយក្លេអ៊ែរ ប្រភេទអ៊ីដ្រូហ្សែន ដ៏ធំមួយ ដែលធ្វើឲ្យមានការភ្ញាក់ផ្អើលនិង ព្រួយបារម្ភជាខ្លាំង។ ក្រោយមកបន្តិច កាលពីខែកុម្ភះ កូរ៉េខាងជើងបានបាញ់គ្រាប់មីស៊ីលបាលីស្ទីក ចំងាយមធ្យម និងចំងាយឆ្ងាយ ពីគ្រាប់ផ្ទួនៗគ្នា។ ហើយចុងក្រោយនេះ របបផ្តាច់ការកូរ៉េខាងជើង បានទាំងធ្វើខ្សែវីដេអូឃោសនា បង្ហាញពីរូបភាពវាយប្រហារកំទេចសហរដ្ឋអាមេរិក ដោយអាវុធនុយក្លេអ៊ែរកូរ៉េខាងជើងទៀតផង។
ក្នុងឱកាសជំនួបកំពូលស្តីពីនុយក្លេអ៊ែរ លោកអូបាម៉ា ត្រូវជួបប្រជុំជាមួយលោកស៊ិនហ្សូអាបេ និងលោកស្រីប៉ាក់ គិនហ៊ឺ ដើម្បីនិយាយពីទណ្ឌកម្មលើកូរ៉េខាងជើង ព្រមទាំងគម្រោងការដាក់តាំងប្រព័ន្ធការពារគ្រាប់មីស៊ីលនៅកូរ៉េខាងត្បូង។ ការបាញ់បន្ថែមគ្រាប់មីស៊ីលនាពេលនេះ គឺរឹតតែពន្លឿនគម្រោងការដាក់តាំងប្រព័ន្ធរ៉ាដាកម្ទេចគ្រាប់មីស៊ីល ឲ្យកាន់តែឆាប់សម្រេចបានជាស្ថាពរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ