លោកស្រីប៉ាក់ គិនហឺ សុខចិត្តបាត់បង់អំណាចខ្លះក្នុងរដ្ឋាភិបាល ដើម្បីបញ្ចប់វិបត្តិ
លោកស្រីប៉ាក់ គិនហឺ ប្រធានាធិបតីកូរ៉េខាងត្បូង បានបញ្ជាក់ប្រាប់ប្រធានសភាថា លោកស្រីសុខចិត្តយល់ព្រមប្រគល់អំណាចខ្លះក្នុងការគ្រប់គ្រងរដ្ឋាភិបាល ទៅដល់នាយករដ្ឋមន្ត្រីថ្មី ដែលសភាជាអ្នកជ្រើសរើស។ ការធ្វើសម្បទាននយោបាយ របស់លោកស្រីប្រធានាធិបតីកូរ៉េខាងត្បូងនាពេលនេះ គឺលោកស្រីមានចេតនាលួងចិត្ត គណបក្សប្រឆាំង ដើម្បីឈានទៅបិទបញ្ចប់វិបត្តិនយោបាយ និងការរិះគន់លើលោកស្រី ទាក់ទិននឹងរឿងអាស្រូវដែលថា លោកស្រីស្ថិតក្រោមឥទ្ធិពលរបស់មនុស្សស្រីម្នាក់ឈ្មោះ ឆយ ស៊ុនស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
បន្ទាប់ពីបានរុះរើគណរដ្ឋមន្ត្រីជាច្រើនលើក កាលពីសប្តាហ៍មុន លោកស្រីប៉ាក់ គិនហឺ បានប្រកាសថាលោកស្រី នឹងតែងតាំងលោក គីម ព្យុងជុន ឲ្យកាន់តំណែងជានាយករដ្ឋមន្ត្រី។ លោក គីម ព្យុងជុន គឺជាមនុស្សមកពីគណបក្សប្រឆាំង តែមិនសូវមាននិន្នាកាតឹងតែងប្រឆាំង នឹងគណបក្សអភិរក្សនិយមរបស់លោកស្រីប៉ាក់ គិនហឺទេ។ គម្រោងតែងតាំងនេះ មិនត្រូវបានគណបក្សប្រឆាំងទទួលយល់ព្រមទេ។
ស្រាប់តែនៅថ្ងៃអង្គារទី ៨ វិច្ឆិកានេះ នៅក្នុងជំនួបជាមួយលោកប្រធានរដ្ឋសភាកូរ៉េខាងត្បូង លោកស្រី ប៉ាក់ គិនហឺ បានបញ្ជាក់ប្រាប់ថា លោកស្រីសុខចិត្តប្រគល់តួនាទីឲ្យរដ្ឋសភា ជាអ្នកតែងតាំងមនុស្សម្នាក់ថ្មី មកធ្វើជានាយករដ្ឋមន្ត្រី ហើយបន្ថែមពីនេះទៀត លោកស្រីសុខចិត្តធ្វើការបែងចែកអំណាច ក្នុងការគ្រប់គ្រងរដ្ឋាភិបាល ទៅឲ្យនាយករដ្ឋមន្ត្រីថ្មីនោះ។
សូមបញ្ជាក់ថា ជាទំលាប់នៃការអនុវត្តអំណាចប្រតិបត្តិនៅកូរ៉េខាងត្បូង មុខដំណែងនាយករដ្ឋមន្ត្រីគ្រាន់តែជាតំណែងនិម្មិតរូបតែប៉ុណ្ណោះ ឯការដឹកនាំរដ្ឋាភិបាលស្ទើរតែទាំងស្រុង គឺស្ថិតក្នុងកណ្តាប់ដៃរបស់ប្រធានាធិបតី។ ថ្វីបើមានការប្រកាសរបស់លោកស្រីប៉ាក់ គិនហឺនាពេលនេះ តែគេមិនទាន់ដឹងថាលោកស្រីនឹងសុខចិត្តបែងចែកអំណាចអ្វីខ្លះទៅឲ្យនាយករដ្ឋមន្ត្រីទេ ហើយក៏មិនបានបញ្ជាក់ថា នឹងប្រព្រឹត្តិធ្វើទៅដោយរបៀបណាដែរ។
សូមរំលឹកថា លោកស្រីប៉ាក់ គិនហឺ ត្រូវបានមតិសាធារណៈនិងគណបក្សប្រឆាំងធ្វើការទាមទារឲ្យចុះចេញពីតំណែង បន្ទាប់ពីបានបែកធ្លាយរឿងអាស្រូវ ដែលគេចោទថាលោកស្រីស្ថិតក្រោមឥទ្ធិពលទាំងស្រុង នៃមនុស្សស្រីម្នាក់ ឈ្មោះ ឆយ ស៊ុនស៊ីល។ មនុស្សស្រីឈ្មោះឆយ ស៊ុនស៊ីលនេះ ត្រូវពាក្យចចាមអារ៉ាមចោទថា ជាមនុស្សចេះអំពើមន្តអាគម ហើយបានប្រើឈ្មោះលោកស្រីប៉ាក់ គិនហឺ ទៅដើរបោកប្រាស់ និងប្រមូលប្រាក់ ពីក្រុមហ៊ុនឯកជនយ៉ាងច្រើនសន្ធឹកសន្ធាប់។ យ៉ាងណាមិញ សមត្ថកិច្ចកូរ៉េខាងត្បូង ទើបតែបានចុះទៅឆែកឆេរ និងរឹបអូសភស្តុតាង នៅក្រុមហ៊ុនSamsung បន្ទាប់ពីមានការសង្ស័យថា ក្រុមហ៊ុនអេឡិចត្រូនិកដ៏ធំនេះ បានផ្តល់ប្រាក់ដោយលួចលាក់ ទៅឲ្យក្រុមហ៊ុនមួយដែលបង្កើតឡើងដោយលោកស្រី ឆយ ស៊ុនស៊ីល និងកូនស្រីរបស់គាត់។
ពីមួយថ្ងៃទៅមួយថ្ងៃ គេកាន់តែឃើញច្បាស់ អំពីភាពទ័លច្រករបស់លោកស្រីប៉ាក់ គិនហឺ ក្នុងការដោះស្រាយវិបត្តិនយោបាយ ដែលខ្លួនលោកស្រីផ្ទាល់ គឺជាចំណុចស្នូលនៃរឿងអាស្រូវ។ លោកស្រីបានរិះរកគ្រប់មធ្យោបាយ ដើម្បីយកចិត្តគណបក្សប្រឆាំង ដែលកំពុងតែដឹកនាំចលនារិះគន់ប្រឆាំងលោកស្រីយ៉ាងពេញទំហឹង។ យ៉ាងណាក៏ដោយ បើទោះបីជាប្រឹងយកចិត្តគណបក្សប្រឆាំង តាមរយៈការបែងចែកអំណាច និងធ្វើការសុំទោសជាសាធារណៈ ដល់ទៅ២លើក តែគេមិនសង្ឃឹមថា វានឹងអាចធ្វើឲ្យប្រជាជនកូរ៉េខាងត្បូង ស្ងប់ចិត្តបំភ្លេចរឿងអសោចិ៍នេះទេ។ យោងតាមការស្ទាបស្ទង់មតិ លោកស្រីប៉ាក់ គិនហឺ មានអ្នកស្រលាញ់គាំទ្រតែ៥% តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ