ចិន៖ សិស្សសាលារាប់រយនាក់ មានជំងឺចម្លែក បណ្តាលមកពីជាតិពុលរោងចក្រ
អាណាព្យាបាលសិស្សសាលារៀនមួយ នៅក្រុងឆាងចូវ ក្បែរក្រុងសៀងហៃ ភាគខាងកើតប្រទេសចិន បានអំពាវនាវសុំអន្តរាគមន៍ពីរដ្ឋាភិបាល បន្ទាប់ពីមានសិស្សសាលាជិត៥រយនាក់ មានអការៈជំងឺចម្លែកព្រមៗគ្នា។ តាមការប៉ាន់ស្មានរបស់អាណាព្យាបាលសិស្ស ជំងឺនេះ អាចបណ្តាលមកពីជាតិពុល ដែលបន្សល់ទុកនៅលើទីតាំងរបស់រោងចក្រជាច្រើនកន្លែង ដែលនៅមិនឆ្ងាយប៉ុន្មានពីទីតាំងសាលារៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
សាលារៀនអន្តរជាតិដ៏ល្បីមួយនៅក្រុងឆាងចូវ ដែលមានឈ្មោះថា Trina International school of Changzhou កំពុងរងការគៀបសង្កត់ ជុំវិញបញ្ហាសុខភាពរបស់សិស្សសាលា។ យោងតាមការរាយការណ៍របស់ទូរទស្សន៍CCTV បានឲ្យដឹងថា យ៉ាងហោចណាស់មានសិស្សសាលាចំនួន៤៩៣នាក់ ដែលកំពុងតែមានអការៈជំងឺខុសធម្មតា ព្រមៗគ្នា។ មួយចំនួនធំ មានកើតចេញជាកន្ទួលរមាស់ នៅលើស្បែក អ្នកខ្លះចេញជាកូនកណ្តុរ ហើយអ្នកខ្លះគឺស្ថិតក្នុងករណីធ្ងន់ធ្ងរ ដូចជាជំងឺមហារីកគ្រាប់ឈាម និងមហារីកប្រព័ន្ធផលិតកោសិកាឈាមសជាដើម។ សិស្សសាលាជាច្រើននាក់ បានបញ្ជាក់ថានៅក្នុងកន្លែងស្នាក់នៅរបស់ពួកគេក្នុងសាលា គឺខ្យល់ដកដង្ហើមមានក្លិនចម្លែក ខុសពីធម្មតា។
អាណាព្យាបាលសិស្ស បានធ្វើការសង្ស័យទៅលើទីតាំងអតីតរោងចក្រផលិតជាតិគីមី ចំនួន៣កន្លែងដែលស្ថិតនៅក្បែរទីតាំងសាលារៀន។ ថ្វីត្បិតតែរោងចក្រត្រូវបានរុះរើចោល ជាច្រើនឆ្នាំមកហើយ ក៏ប៉ុន្តែជាតិពុលអាចមាននៅសេសសល់ដដែរ។ យ៉ាងណាមិញ ទូរទស្សន៍ចិនដដែល បានផ្សាយថា ឆ្លងតាមការវិភាគទៅក្នុងស្រទាប់ដី និងដង្ហើមទឹកដែលនៅខាងក្រោមទីតាំងរោងចក្រទាំងនោះ បានបង្ហាញពីកម្រិតជាតិពុល ដែលមានកំរិតខ្ពស់ខ្លាំងបំផុត លើសពីអ្វីដែលច្បាប់អនុញ្ញាតិ។
សូមបញ្ជាក់ថា សាលាអន្តរជាតិនេះ បានមកតាំងទីនៅទីតាំងបច្ចុប្បន្ននេះនៅឆ្នាំ២០១៤ ហើយសម្រាប់បវេសនកាលថ្មីនេះ សាលាមានសិស្សសរុបចំនួន ២៤៥១នាក់។ ប្រឈមមុខនឹងបញ្ហានេះ ថ្នាក់ដឹកនាំសាលាបានបដិសេធមិនធ្វើអត្ថាធិប្បាយអ្វីទាំងអស់។ ចំណែកសាលាក្រុងឆាងចូវ បានធ្វើការផ្សាយសេចក្តីប្រកាសមួយយ៉ាងវែងអន្លាយថា ទីតាំងសាលានេះ ត្រូវបានអនុញ្ញាតិឲ្យសាងសង់ បន្ទាប់ពីបានធ្វើការវិភាគស្រាវជ្រាវយ៉ាងម៉ដ្ឋចត់ ដោយគោរពទៅតាមក្រិត្យក្រមបរិស្ថាន។ ដោយឡែកក្រសួងបរិស្ថាន និងក្រសួងអប់រំចិន បានចេញសេចក្តីប្រកាសផងដែរ ថាគេនឹងចាប់ផ្តើមធ្វើនិតិវិធី ដើម្បីស្វែងយល់ពីបញ្ហានេះ។
គួររំលឹកផងដែរ ករណីសារធាតុពុលដែលបន្សល់ទុក រឺបញ្ចេញចោលដោយរោងចក្រនានានៅប្រទេសចិន តែងតែត្រូវបានគេដឹងឮជាញឹកញាប់។ ទឹកទន្លេ ស្ទឹង បឹង ព្រមទាំងប្រព័ន្ធដង្ហើមទឹកស្អាតក្រោមដី ត្រូវបានបំពុល ដោយការហូរច្រោះចូលជ្រាប នៃសារធាតុពុល ដែលគេប្រើប្រាស់ក្នុងរោងចក្រ តែមិនត្រូវបានយកទៅចម្រាញ់ចោល ទៅតាមក្រិត្យក្រមច្បាប់ទេ។ លើសពីនេះទៀត អាជ្ញាធរចិន ដែលផ្តល់អាទិភាព តែទៅលើកត្តាពង្រីកសកម្មភាពសេដ្ឋកិច្ច ក្នុងមូលដ្ឋានខ្លួន មិនដែលយកចិត្តទុកដាក់ត្រួតពិនិត្យ ជុំវិញការគោរពលក្ខខណ្ឌបរិស្ថាន របស់រោងចក្រទាំងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ