ការកំញើញរបស់កូរ៉េខាងជើង កាន់តែជំរុញជប៉ុន ឲ្យចង់មានកងទ័ពជាតិទុកការពារខ្លួន
ចុះផ្សាយនៅថ្ងៃ៖
ស្តាប់ - ០៦:១៤
សម្រាប់កាលៈទេសៈបច្ចុប្បន្ននេះ ជាមួយនឹងការកំញើញធ្វើសង្រ្គាម របស់កូរ៉េខាងជើង បានធ្វើឲ្យក្រុមអ្នកជាតិនិយមជប៉ុន ដែលមានលោកនាយករដ្ឋមន្ត្រីស៊ិនហ្សូ អាបេតែម្តង ជាអ្នកនាំមុខ ខិតខំជំរុញ ស្វែងរកការគាំទ្រ ដើម្បីកែប្រែរដ្ឋធម្មនុញ្ញ ដែលមានចំណាស់៧០ឆ្នាំ ដើម្បីអាចបើកផ្លូវឲ្យជប៉ុន អាចមានកងទ័ពដើម្បីការពារខ្លួន។ ថ្ងៃទី៣ឧសភា ម្សិលមិញ គឺជាបុណ្យខួបគំរប់៧០ឆ្នាំ នៃរដ្ឋធម្មនុញ្ញជប៉ុន ដែលត្រូវបានអនុម័តនៅឆ្នាំ១៩៤៧ ក្រោយពេលដែលជប៉ុន បានចាញ់សង្រ្គាមលោកលើកទៅពីរ។ រដ្ឋធម្មនុញ្ញ ដែលដាក់កំហិតដោយប្រទេសឈ្នះសង្រ្គាម គឺសហរដ្ឋអាមេរិកនោះ គឺជារដ្ឋធម្មនុញ្ញ ដែលមានលក្ខណៈសន្តិភាពនិយម ពោលគឺជប៉ុនត្រូវបង្ខំចិត្ត ហាមខ្លួនឯង មិនឲ្យមានកងទ័ព ហើយក៏មិនអាចធ្វើសង្រ្គាមបានទាំងអស់។
រដ្ឋធម្មនុញ្ញសន្តិភាពនិយម ដែលចាប់ចងជប៉ុន មិនឲ្យមានកងទ័ព និងធ្វើសង្រ្គាម
រដ្ឋធម្មនុញ្ញជប៉ុន ដែលបានចូលជាធរមាន នៅថ្ងៃទី៣ ឧសភា ឆ្នាំ១៩៤៧ គឺជារដ្ឋធម្មនុញ្ញ ដែលមានលក្ខណៈសន្តិភាពនិយម។ ក្នុងនាមជាប្រទេស ដែលចាញ់សង្រ្គាម លោកលើកទី២ ជប៉ុនមិនអាចមានសិទ្ធិ មានកងទ័ព ហើយក៏មិនអាចទៅធ្វើសង្រ្គាម នៅទីណាបានទាំងអស់។ នេះគឺជាអ្វីដែលមានចែងនៅក្នុងមាត្រា៩ នៃរដ្ឋធម្មនុញ្ញនេះ។
ភាពព្រៃផ្សៃ អំពើសាហាវយោងឃ្នង ដែលកងទ័ពជប៉ុនបានប្រព្រឹត្តិ នៅក្នុងពេលឈ្លានពាន ប្រទេសជិតខាង នៅមុន និងក្នុងកំឡុងពេលសង្រ្គាម គឺជាមូលហេតុ ដែលបានជំរុញឲ្យគេហាមឃាត់ជប៉ុន មិនឲ្យមានកងទ័ព ដើម្បីទប់មហិច្ឆិតាចក្រព័ទ្ធរបស់ជប៉ុន។ សង្រ្គាមលោក ក៏បានធ្វើឲ្យប្រជាជនជប៉ុនខ្លួន ឯងបានស្គាល់ នូវសេចក្តីឈឺចាប់ និងសោកនាដកម្មដែរ ដោយសារតែគ្រាប់បែកបរមាណូ ទាំងពីរគ្រាប់របស់អាមេរិក។ ទោះបីរដ្ឋធម្មនុញ្ញសន្តិភាពនិយម ឆ្នាំ១៩៤៧ ជារដ្ឋធម្មនុញ្ញ ដែលអាមេរិកជាអ្នកដាក់កំហិត ក៏សម្រាប់ប្រជាជនជប៉ុន វាគឺជាជំរើសដ៏ល្អបំផុត ដើម្បីកសាងអនាគតថ្មី ក្នុងន័យសន្តិភាព ឈប់ធ្វើសង្រ្គាម ហើយកុំឲ្យប្រវត្តិសាស្ត្រដើរជាន់ដានចាស់ ទៅថ្ងៃខាងមុខ។
ក៏ប៉ុន្តែសម្រាប់ក្រុមអ្នកជាតិនិយមជប៉ុន រដ្ឋធម្មនុញ្ញដែលចាប់បង្ខំជប៉ុនមិនឲ្យមានកងទ័ព មិនឲ្យធ្វើសង្រ្គាមនេះ វាគឺជារឿងអម៉ាសបំផុតសម្រាប់ជប៉ុន។ ចរន្តនយោបាយជាតិនិយមនេះ មិនដែលរលត់ឡើយ។ មិនត្រឹមតែមិនរលត់ តែចរន្តនេះ កាន់តែមានសន្ទុះខ្លាំងក្លា នារយៈពេលចុងក្រោយ ជាមួយនឹងការដឹកនាំរបស់លោក ស៊ិនហ្សូ អាបេ។
ស្ថានការណ៍ភូមិសាស្ត្រនយោបាយបានផ្លាស់ប្តូរ
លោកស៊ិនហ្សូ អាបេមកពីគណបក្សសេរី ប្រជាធិបតេយ្យ។ គណបក្សនេះ បានឈ្នះឆ្នោតសឹងតែរាល់អាណត្តិ តាំងតែពីឆ្នាំ១៩៥៥។ គឺគណបក្សនេះហើយ ដែលតែងតែចិញ្ចឹមចិត្ត ចង់ធ្វើការកែប្រែរដ្ឋធម្មនុញ្ញ នៅថ្ងៃណាមួយ។ កាលៈទេសៈបច្ចុប្បន្ននេះ បានផ្តល់ក្តីសង្ឃឹមឲ្យក្រុមអ្នកនយោបាយចរន្តជាតិនិយមនេះ ច្រើនលើលពេលណាៗ ទាំងអស់។
ម្ខាងមានចិន ដែលកាន់តែធំធាត់ បញ្ចេញឥទ្ធិពលយោធា ហើយម្ខាងមានកូរ៉េខាងជើង ដែលកំញើញប្រើគ្រាប់មីស៊ីល និងគ្រាប់នុយក្លេអ៊ែរ ជប៉ុនដែលគ្មានអ្វីសោះ ប្រៀបបានមនុស្សពិកាទាំងស្រុង កំពុងតែរកវិធីការពារខ្លួន។ គឺស្ថានភាពនេះហើយ ដែលកំពុងជំរុញឲ្យលោកនាយករដ្ឋមន្ត្រីជប៉ុន ប្រឹងប្រែងស្វែងរកការគាំទ្រ ក្នុងការធ្វើកំណែទំរង់រដ្ឋធម្មនុញ្ញ ដើម្បីអាចឲ្យជប៉ុនអាចមានលទ្ធភាព មានកងទ័ពដើម្បីការពារខ្លួន។
ឆ្នាំ២០២០ ជប៉ុននឹងមានរដ្ឋធម្មនុញ្ញថ្មី?
ថ្លែងក្នុងសារវីដេអូ នៅថ្ងៃខួបគំរប់៧០ឆ្នាំនៃរដ្ឋធម្មនុញ្ញ កាលពីថ្ងៃទី៣ ឧសភានេះ លោកស៊ិនហ្សូ អាបេ បាននិយាយថា ពេលវេលាដែលទន្ទឹងរងចាំជាយូរមកហើយនោះ បានមកដល់ហើយ។ យើងនឹងប្រឹងប្រែងឲ្យអស់ពីសមត្ថភាព នៅក្នុងឆ្នាំនេះ ដើម្បីឈានទៅសម្រេចឲ្យបាន នូវការធ្វើកំណែទំរង់រដ្ឋធម្មនុញ្ញ។ លោក ស៊ិនហ្សូ អាបេ បានបន្តថា លោកសង្ឃឹមថា រដ្ឋធម្មនុញ្ញថ្មី នឹងត្រូវចូលជាធរមាននៅ ឆ្នាំ២០២០។
លោក អាបេ បានសន្យាជាយូរមកហើយ ថាលោកចង់ធ្វើកំណែទំរង់រដ្ឋធម្មនុញ្ញ ដើម្បីឲ្យវាឆ្លើយតបទៅនឹងស្ថានភាពភូមិសាស្ត្រនយោបាយបច្ចុប្បន្ន ហើយនឹងធ្វើឲ្យតម្លៃមូលដ្ឋាននៃសង្គមជាតិជប៉ុន ដែលក្រុមអភិរក្សនិយមរបស់លោកចង់បាននោះ ត្រូវបានទទួលស្គាល់ នៅក្នុងរដ្ឋធម្មនុញ្ញថ្មី។
តាមការស្មាន មាត្រា៩នៃរដ្ឋធម្មនុញ្ញ នឹងមិនត្រូវគេលប់ចោលទេ។ គេអាចនឹងកែប្រែពាក្យពេចន៍ ឃ្លាប្រយោគខ្លះ ធ្វើយ៉ាងណា បើកផ្លូវ អាចឲ្យជប៉ុន អាចបង្កើតកងទ័ពជាតិ ដើម្បីការពារខ្លួន។ ក្រៅពីនេះ គំរោងកំណែទម្រង់ នឹងសង្កត់ធ្ងន់ទៅលើចំណុចផ្សេងៗទៀត ដែលទាក់ទិនទៅនឹងការធានារក្សាតំលៃមូលដ្ឋាន របស់សង្គមជប៉ុន។
ស្ថានការផ្លាស់ប្តូរ សមាជិកសភាគាំទ្រវិសោធនកម្មរដ្ឋធម្មនុញ្ញ កាន់តែច្រើន
៧០ឆ្នាំមកនេះ ជប៉ុនមិនដែលបានប៉ះពាល់ ពាក្យពេចន៍ ក្នុងរដ្ឋធម្មនុញ្ញនេះទេ។ ក៏ប៉ុន្តែមាត្រា ៩ ដែលជាមាត្រាចាប់ចងជប៉ុន មិនឲ្យមានកងទ័ព និងមិនឲ្យធ្វើសង្រ្គាមនោះ ត្រូវបានយកមកបកស្រាយ ក្នុងន័យសម្រួល ផ្តល់លទ្ធភាពទៅឲ្យជប៉ុន អាចមានផ្លូវដើរ បានខ្លះ ក្នុងវិស័យយោធា។ ជាក់ស្តែង កាលពីឆ្នាំ២០១៥ ខែកញ្ញា រដ្ឋសភាជប៉ុន ដោយមានការស្នើពីរដ្ឋាភិបាល បានបកស្រាយមាត្រា៩នេះ ដោយបានបើកផ្លូវឲ្យជប៉ុនអាចបញ្ជូនកំលាំងពិសេស ទៅអន្តរាគមន៍នៅក្រៅប្រទេស ដើម្បីជួយប្រទេសជាមិត្តណាមួយ ដែលត្រូវការជំនួយនេះ។ តែដំណាក់កាលនេះ អ្វីដែលក្រុមអ្នកជាតិនិយមជប៉ុនចង់បាន គឺសិទ្ធិអាចមានកងទ័ពជាតិ ដើម្បីការពារខ្លួន។
ជាការពិត ស្ថានភាពភូមិសាស្ត្រនយោបាយបច្ចុប្បន្ននេះ កំពុងបើកផ្លូវឲ្យរដ្ឋាភិបាលលោកស៊ិនហ្សូ អាបេ អាចទទួលបានការគាំទ្រច្រើន ពីសំណាក់សមាជិកសភាទាំងពីរអង្គរបស់ជប៉ុន។ បើតាមការវិភាគរបស់លោក Kenneth Ruoff សាស្ត្រាចារ្យជំនាញប្រវត្តិសាស្ត្រជប៉ុន នៅសកលវិទ្យាល័យ Portland បានពន្យល់ថា ក្រុមសមាជិកសភាទាំងជាន់ទាប ទាំងជាន់ខ្ពស់ មានប្រហែលជា២ភាគ៣ហើយ ដែលគាំទ្រគំរោងធ្វើវិសោធនកម្មរដ្ឋធម្មនុញ្ញនេះ។ ដូច្នេះចំនួននេះគ្រប់គ្រាន់ហើយ ដើម្បីបើកផ្លូវឲ្យបោះឆ្នោតច្បាប់អនុញ្ញាឲ្យធ្វើវិសោធនកម្ម។
ក៏ប៉ុន្តយ៉ាងណា ឧបសគ្គចុងក្រោយសម្រាប់លោកស៊ិនហ្សូ អាបេ និងអ្នកជាតិនិយមជប៉ុននោះ គឺប្រជាជនជប៉ុនទូទាំងប្រទេស ព្រោះគំរោងធ្វើវិសោធនកម្មនេះ នឹងត្រូវតែយកមកសួរចិត្តប្រជាពលរដ្ឋ តាមរយៈការបោះឆ្នោតប្រជាមតិ។
មតិសាធារណៈជប៉ុន បែកជាពីរ
តើការធ្វើវិសោធនកម្មនេះ ត្រូវបានប្រជាជនជប៉ុនពេញចិត្តកំរិតណា? ការប៉ះពាល់រដ្ឋធម្មនុញ្ញសន្តិភាពនិយម ដែលមានវ័យ៧០ឆ្នាំ ហើយដែលអនុញ្ញាតិឲ្យជប៉ុន ក្លាយជាប្រទេសគំរូ ដែលស្រលាញ់សន្តិភាព ដែលមិនទៅធ្វើសង្រ្គាមកាប់សម្លាប់អ្នកណានោះ តើប្រជាជនជប៉ុនអាចនឹងទទួលបានដែរឬទេ? គំរោងវិសោធនកម្មនេះ កំពុងបែងចែកមតិសាធរណៈជប៉ុនជាពីរ ម្ខាងគឺមតិជាតិនិយម ម្ខាងមតិសន្តិភាពនិយម។
យោងតាមការស្ទៀបស្ទង់មតិ ធ្វើឡើងដោយ ទីភ្នាក់ងារ Nikkei/TV Tokyo ដែលចេញផ្សាយកាលពីថ្ងៃពុធ ទី៣ឧសភា បានបង្ហាញថា ប្រជាជនជប៉ុនប្រមាណ៤៥% មានយោបល់មិនជំទាល់ ទៅនឹងការធ្វើកំណែទំរង់រដ្ឋធម្មនុញ្ញទេ។ បើប្រៀបធៀបទៅនឹងតួលេខកាលពីឆ្នាំទៅ គឺចំនួននេះ បានថយចុះ៥ពិន្ទុ។ ដោយឡែក តួលេខចុងក្រោយបង្ហាញថា ប្រជាជនជប៉ុន៤៦% មិនចង់ឲ្យគេប៉ះពាល់ រឺកែប្រែរដ្ឋធម្មនុញ្ញទេ ដែលចំនួននេះបានថយចុះចំនួន៤ពិទ្ទុ។
ដូច្នេះយើងឃើញថា មតិសាធារណៈជប៉ុន នៅប្រទាញប្រទង់គ្នា មិនមានខាងណា លើសខាងណាច្រើនទេ។ តែភាពស្ទើស្ទាក់ ប្រហាក់ប្រហែលគ្នានេះ អាចនឹងហុចកំលាំងទៅខាងសម្លេងដែលគាំទ្រ បើក្នុងករណី ជប៉ុនក្លាយជាជនរងគ្រោះ ដោយសារគ្រាប់មីស៊ីលកូរ៉េខាងជើង។ មតិសារធារៈជប៉ុនបច្ចុប្បន្ននេះ មានការព្រួយបារម្ភខ្លាំងបំផុត ទៅនឹងមីស៊ីលបាលីស្ទីក ដែលកូរ៉េខាងជើង បានគំរាមបាញ់មកលើជប៉ុន។ បើក្នុងករណី មីស៊ីលកូរ៉េខាងជើង ធ្លាក់មកលើជប៉ុនមែននោះ នោះប្រហែលជាប្រជាជនជប៉ុន មួយភាគធំ លែងស្ទាក់ស្ទើរ ទៀតហើយ ហើយនឹងចេញមកគាំទ្រឲ្យប្រទេសខ្លួន មានកងទ័ពជាតិ ទុកការពារខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ