អ្នកបើកឡាននិងជាមនុស្សជំនិតរបស់លោកស្រីអ៊ុងសាន ស៊ូជី ឈរឈ្មោះជាប្រធាធិបតី
អស់រយៈពេល៤ខែ ដែលគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីអ៊ុងសាន ស៊ូជី បានទទួលជោគជ័យក្នុងការបោះឆ្នោតសភាភូមា នៅថ្ងៃនេះ លោកស្រីអ៊ុងសាន ស៊ូជីក៏ដូចជាគណបក្សលោកស្រី បានប្រកាសឈ្មោះបេក្ខភាព ដែលនឹងឈរឈ្មោះជា ប្រធានាធិបតី។ បេក្ខជននោះគឺលោក ទីន ឆវ មនុស្សដ៏ស្និតស្នាល និងជាអ្នកបើកឡានរបស់លោកស្រីអ៊ុងសាន ស៊ូជីផ្ទាល់តែម្តង។ សូមជំរាបថា លោកស្រីអ៊ុងសាន ស៊ូជី មិនអាចក្លាយជាប្រធានាធិបតីបានទេ ដោយសារតែរដ្ឋធម្មនុញ្ញបានហាមឃាត់មិនឲ្យអ្នកដែលមានកូនដែលមានសញ្ជាតិបរទេស អាចកាន់មុខតំណែងនេះបាន។ យ៉ាងណាក៏ដោយ លោកស្រីអ៊ុងសាន ស៊ូជី បានសន្យាថាលោកស្រី នឹងនៅពីក្រោយខ្នងប្រធានាធិបតីថ្មីដើម្បីដឹកនាំភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៥
ទីបំផុតទៅនៅថ្ងៃ ទី១០ មីនា លោកស្រីអ៊ុងសាន ស៊ូជី បានសម្រេចស្នើលោក ទីន ឆវ ឲ្យឈរឈ្មោះជាប្រធានាធិបតី។ ក្នុងអំឡុងពេល៤ខែមកនេះ ខ្លួនលោកស្រីផ្ទាល់ ក៏ដូចជាសមាជិកធំៗនៅក្នុងគណបក្សសម្ព័ន្ធជាតិដើម្បីប្រជាធិបតេយ្យភូមា បានខិតខំព្យាយាមចរចា ជាមួយក្រុមយោធាដែរ ដើម្បីធ្វើយ៉ាងណាកែប្រែរដ្ឋធម្មនុញ្ញ ហើយអនុញ្ញាតឲ្យលោកស្រីអ៊ុងសាន ស៊ូជី អាចកាន់តំណែងនេះបាន។ ក៏ប៉ុន្តែតាមការស្មានក្រុមយោធាបានរឹងទទឹង មិនព្រមទេ បើទោះបីជាមានការធ្វើញត្តិទាមទាររហូតដល់ទៅ៥លាននាក់ក៏ដោយ។
នៅថ្ងៃនេះ នៅចំពោះមុខសភាជាន់ទាបភូមា លោកស្រី ឃិន សានលាំង សមាជិកសភាមកពីគណបក្សលោកស្រីអ៊ុងសាន ស៊ូជី បានប្រកាសថា គណបក្សសម្ព័ន្ធជាតិដើម្បីប្រជាធិបតេយ្យ សូមស្នើឈ្នោះលោក ទីន ឆវ ឲ្យឈរឈ្មោះជាប្រធានាធិបតី។
តើលោក ទីន ឆវ(HTIN KYAW) ជាអ្នកណា? តាមពិត គាត់មិនមែនមានមុខនាទីជាអ្នកបើកឡានឲ្យលោកស្រីអ៊ុងសាន ស៊ូជី នោះទេ គឺគ្រាន់តែគាត់ជាមនុស្សស្និតស្នាលខ្លាំង ជាមួយលោកស្រីអ៊ុងសាន ស៊ូជី ហើយលោកតែងតែទៅណាមកជាមួយលោកស្រី ដោយលោកជាអ្នកបើកឡានជូនគាត់។ អញ្ចឹងហើយ បានជាគ្រប់គ្នាថាគាត់ជាអ្នកបើកឡានឲ្យលោកស្រីអ៊ុងសាន ស៊ូជី។ តាមពិត លោកទីន ឆវ គឺជាមិត្តភ័ក្តតាំងពីកុមាររបស់លោកស្រីអ៊ុងសាន ស៊ូជី។
លោក ទីន ឆវ ឆ្នាំនេះគាត់មានអាយុ៦៩ឆ្នាំ គាត់មានឪពុកជាអតីតអ្នកកវីនិពន្ធភូមាដ៏ល្បីម្នាក់។ គាត់មានសញ្ញាបត្រផ្នែកសេដ្ឋកិច្ចមកពីសកលវិទ្យាល័យ Oxford ហើយលោកធ្លាប់ធ្វើជាសាស្ត្រាចារ្យនៅសកលវិទ្យាល័យ ព្រមទាំងធ្លាប់ធ្វើការក្នុងក្រសួងការបរទេសភូមា កាលពីជំនាន់ឆ្នាំ១៩៧០។ ថ្វីបើស្និតស្នាល នៅអែបជាប់នឹងលោកស្រីអ៊ុងសាន ស៊ូជីមករហូត ក្នុងអំឡុងពេលដែលលោកស្រីជាប់ឃុំ ក៏ប៉ុន្តែលោកទីន ឆវ មិនដែលបានជាប់ឆ្នោតក្នុងការបោះឆ្នោតណាមួយទេ។ តែភរិយាគាត់ ជាតំណាងរាស្ត្រម្នាក់ជាប់ឆ្នោតក្នុងឆ្នាំ២០១២។
មុននឹងមានការសម្រេចស្នើឈ្មោះគាត់នេះ មានពាក្យចចាមអារ៉ាមច្រើនណាស់ ដែលគេនាំគ្នាចោទសួរថា លោកស្រីអ៊ុងសាន ស៊ូជី នឹងបញ្ជូនអ្នកណាឲ្យទៅធ្វើប្រធានាធិបតីជំនួសគាត់។ មានអ្នកខ្លះថា អាចជាគ្រូពេទ្យផ្ទាល់របស់លោកស្រី មានអ្នកខ្លះថាអាចជាជំនួយការផ្ទាល់របស់លោកស្រី។ តែទីបំផុតទៅគឺលោក ទីន ឆ រដែលកន្លងមកមិនសូវជាចេញមុខច្រើនទេ។ គេគ្រាន់តែឃើញគាត់នៅក្បែរលោកស្រីអ៊ុងសាន ស៊ូជីជានិច្ច។
សភាភូមាទាំងពីរនឹងបោះឆ្នោតសម្រេចនៅសប្តាហ៍ក្រោយ៖
តាមច្បាប់កំណត់ គណបក្សដែលមានសម្លេងភាគច្រើន ត្រូវស្នើសុំបេក្ខភាពប្រធានាធិបតីមួយរូប ឯចំណែកក្រុមយោធានិងត្រូវស្នើបេក្ខភាពពីររូបផ្សេងទៀត។ បន្ទាប់មក សមាជិកសភាជាន់ទាប និងសមាជិកសភាជាន់ខ្ពស់ រឺយើងហៅថាព្រឹទ្ធសភា នឹងត្រូវជួបប្រជុំគ្នាទាំងអស់ដើម្បីសម្រេចបោះឆ្នោតជ្រើសរើសបេក្ខជនម្នាក់ ឲ្យក្លាយជាប្រធានាធិបតី ហើយពីរនាក់ទៀត នឹងក្លាយជាអនុប្រធានធិបតី ដោយស្វ័យប្រវត្តិ។
បើយើងសម្លឹងទៅមើលចំនួនកៅអីរបស់គណបក្សលោកស្រីអ៊ុងសាន ស៊ូជី ទាំងក្នុងសភាជាន់ទាបនិងសភាជាន់ខ្ពស់ គឺគេសង្ឃឹមសឹងតែ១០០%ទៅហើយ ថាលោក ទីន ឆ រ នឹងជាប់ជាប្រធានាធិបតីភូមា។ គណបក្សសម្ព័ន្ធជាតិដើម្បីប្រជាធិបតេយ្យ មានសមាជិកទាំងអស់ជិត៨០% នៅក្នុងសភាទាំងពីរ ដូច្នេះសម្លេងឆ្នោតគាំទ្រលោក ទីន ឆ រគឺមិនពិបាករកទេ លើកលែងតែសមាជិកសភាមកពីគណបក្សលោកស្រីអ៊ុងសាន ស៊ូជី គេមិនពេញចិត្តរូបលោក ទីន ឆ រ ហើយនាំគ្នាទៅបោះឲ្យក្រុមយោធាវិញ នោះទើបជារឿងចម្លែក។
បើតាមការគ្រោងទុក សភាទាំងពីរនឹងប្រជុំគ្នាបោះឆ្នោត នៅដើមសប្តាហ៍ក្រោយនេះហើយ ហើយបន្ទាប់ពីនេះទៅ រដ្ឋាភិបាលថ្មីរបស់ភូមា នឹងចូលកាន់មុខតំណែងការងារ នៅដើមខែមេសានេះហើយ។ ព្រឹត្តិការណ៍នេះ នឹងជាព្រឹត្តិការណ៍ប្រវត្តិសាស្រ្តសម្រាប់ភូមា ព្រោះជិត៥០ឆ្នាំហើយ ដែលភូមាស្ថិតក្នុងក្រញ៉ាំផ្តាច់ការរបស់ពួកយោធា។
ការលំបាករបស់រដ្ឋាភិបាលភូមាថ្មី៖
ជាការពិត ក្រុមយោធានៅមិនទាន់អស់ឥទ្ធិពលទាំងស្រុងទេ ហើយពួកនេះបានរៀបជើងព្រួលជាស្រេច ដើម្បី អាចបកមកយកអំណាចវិញបានគ្រាប់ពេល។ តែយ៉ាងណាក៏ដោយ ជោគជ័យរបស់គណបក្សលោកស្រីអ៊ុងសាន ស៊ូជីនាពេលនេះ គឺជានិម្មិតរូបនៃកម្លាំងប្រជាធិបតេយ្យ កម្លាំងសាមគ្គីរបស់ប្រជាជនភូមា ដែលក្លាហាន ហ៊ានបោះឆ្នោតដើម្បីការផ្លាស់ប្តូរនយោបាយ។
សម្រាប់រដ្ឋាភិបាលថ្មីភូមានេះ ក្រុមយោធាមានអំណាចតែងតាំងរដ្ឋមន្ត្រីបីរូប គឺរដ្ឋមន្ត្រីក្រសួងការពារជាតិ ក្រសួងមហាផ្ទៃ និងក្រសួងគ្រប់គ្រងកិច្ចការព្រំដែន។ ក្រសួងទាំងបីនេះសំខាន់ណាស់ ហើយការដែលក្រុមយោធាកាន់កាប់ក្រសួងទាំងនេះ វានឹងបង្ករការលំបាកដល់រដ្ឋាភិបាលថ្មី របស់គណបក្សលោកស្រីអ៊ុងសាន ស៊ូជី ជាពិសេសក្នុងការងារដោះស្រាយវិបត្តិជម្លោះជាមួយជនជាតិភាគតិចតំបន់ភ្នំ។
សន្តិភាពទូទាំងប្រទេស គឺជាអាទិភាពដើម្បីកសាងនិងអភិវឌ្ឍន៍ភូមា។ នេះគឺជាការសន្យារបស់លោកស្រីអ៊ុងសាន ស៊ូជី។ លោកស្រីបានសន្យាទៀតថា រដ្ឋាភិបាលថ្មីរបស់ភូមា នឹងជារដ្ឋាភិបាលដែលផ្តល់អាទិភាពខ្ពស់ លើវិស័យអប់រំ និងវិស័យសុខាភិបាល សម្រាប់ប្រជាជនភូមាទាំង៥១លាននាក់។ ប៉ុន្តែយើងសួរថា តើរដ្ឋាភិបាលថ្មីនឹងធ្វើបានសម្រេចកម្រិតណា ត្រង់នេះហើយដែលចោទជាបញ្ហា។ ក្នុងអាណត្តិ៥ឆ្នាំទៅមុខនេះ គេយល់ថា គណបក្សលោកស្រីអ៊ុងសាន ស៊ូជី នឹងត្រូវប្រឈមមុខនឹងការលំបាកខ្លាំងណាស់ សម្រាប់ការងារស្តារភូមាឡើងវិញផង និងធ្វើយ៉ាងណាកុំឲ្យក្រុមយោធាក្តៅក្រហាយផង។
លោកស្រីអ៊ុងសាន ស៊ូជី នឹងកាន់តំណែងជានាយករដ្ឋមន្ត្រី រឺរដ្ឋមន្ត្រីការបរទេស រឺគ្មានតំណែងសោះ?៖
យើងងៀកទៅសួរថា លោកស្រីអ៊ុងសាន ស៊ូជី នឹងដឹកនាំភូមាដោយរបៀបណា បើគាត់គ្មានតំណែងជាប្រធានធិបតីផងនោះ? លោកស្រីបានសន្យាថា ថ្វីបើខ្លួនលោកស្រីមិនមែនជាប្រធានាធិបតី តែលោកស្រីនឹងនៅពីក្រោយប្រធានាធិបតីថ្មីដើម្បីដឹកនាំភូមា។ អញ្ចឹងហើយបានពេលនេះ លោកស្រីអ៊ុងសាន ស៊ូជី បានជ្រើសរើសលោក ទីន ឆ រព្រោះគាត់ជាមនុស្សស្និតស្នាលបំផុត និងជាអ្នកដែលលោកស្រីទុកចិត្ត អាចនិយាយជាមួយបាន។
មានអ្នកវិភាគនយោបាយភូមាមួយចំនួន កំពុងតែសង្ស័យថា លោកស្រីអាចនឹងមានចិត្តច្រណែន នៅពេលឃើញអ្នកផ្សេងអង្គុយកៅអីប្រធានាធិបតី។ ខ្លួនលោកស្រីខំតស៊ូរាប់សិបឆ្នាំ ត្រូវគេចាប់ដាក់ឃុំទៀត តែទីបំផុតបានតែនៅពីក្រោយវាំងននទៅវិញ។
ការវិភាគទាំងអស់នេះ វាអាចត្រូវ តែយើងកុំភ្លេចថាលោកស្រីខ្លួនគាត់ ជាអ្នកស្នើឈ្មោះលោក ទីន ឆរ ព្រោះលោកស្រីទុកចិត្តគាត់។ ហើយមួយវិញទៀត ការតស៊ូរបស់លោកស្រីរាប់សិបឆ្នាំមកនេះ មិនមែនដើម្បីបានតំណែងប្រធានាធិបតីទេ តែដើម្បីនំាលទ្ធិប្រធាធិបតេយ្យជូនប្រជាជនភូមា។ ដូច្នេះទោះលោកស្រីនៅខាងមុខ រឺនៅក្រោយវាំងនន វាមិនសំខាន់ទេ។ យ៉ាងណាមិញ បើតាមការសង្ស័យទៀត លោកស្រីអាចនឹងធ្វើជានាយករដ្ឋមន្ត្រី រឺជារដ្ឋមន្ត្រីក្រសួងការបរទេសភូមា តែអ្នកខ្លះសង្ស័យថា គាត់ប្រហែលជាមិនកាន់តំណែងអ្វីទាំងអស់ គឺគាត់រងចាំតែនៅពីក្រោយ ប្រធានាធិបតីថ្មី ដូចលោកស្រីសូនីញ៉ា ហ្គាន់ធី នៅឥណ្ឌាអញ្ចឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ