អតីតប្រធានាធិបតីហ្វីលីពីន ទៅជួបមន្ត្រីចិននៅហុងកុង ដើម្បីរកច្រកចេញដោះស្រាយជម្លោះ
លោក ហ្វីឌែល រ៉ាម៉ូស អតីតប្រធានាធិបតីហ្វីលីពីនចន្លោះពី ឆ្នាំ១៩៩២ ដល់ ១៩៩៨ បានអញ្ជើញទៅក្រុងហុងកុង នៅថ្ងៃសៅរ៍ ទី ១៣សីហា ដើម្បីព្យាយាមជួបជាមួយមន្ត្រីចិនមួយចំនួន។ ការជួបប្រជុំដែលមានលក្ខណៈមិនផ្លូវការនេះ ត្រូវបានគេឲ្យដឹងថា គឺធ្វើឡើងបន្ទាប់ពីមានការសំណូមពរពីលោកប្រធានាធិបតីហ្វីលីពីន រ៉ូឌ្រេហ្គោ ឌុយទែតឺ ដើម្បីព្យាយាមរកផ្លូវចរចាជាមួយចិន និងស្តារទំនាក់ទំនងពាណិជ្ជកម្ម រវាងចិន និងហ្វីលីពីន ឲ្យបានល្អប្រសើរឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
រដ្ឋាភិបាលហ្វីលីពីន ហាក់កំពុងបញ្ចេញពីឆន្ទៈជានាគ្នា ជាមួយចិនឡើងវិញ កាន់តែច្បាស់ នាពេលនេះ។ ជម្លោះក្នុងដែនសមុទ្រចិនខាងត្បូង រវាងហ្វីលីពីន និងចិន ហើយដែលបានឈានទៅដល់ការសម្រេចសេចក្តីដោយតុលាការអាជ្ញាកណ្តាលអន្តរជាតិនោះ បានបំពុលទំនាក់ទំនងរវាងប្រទេសទាំងពីរ ជាច្រើនឆ្នាំមកហើយ។ ជម្លោះការទូត តែវាបានជះឥទ្ធិពលពេញទំហឹង ទៅលើវិស័យសេដ្ឋកិច្ច ការដោះដូរពាណិជកម្ម និងការដាក់ទុនវិនិយោគ រវាងហ្វីលីពីន និងចិន។ ចិន ដែលជាមហាយក្សសេដ្ឋកិច្ច ខាតមិនច្រើនដូចហ្វីលីពីន ទេ ដែលគ្រាន់តែជាកូនក្រកមួយតូច នៅក្នុងតំបន់អាស៊ីអាគ្នេយ៍តែប៉ុណ្ណោះ។
លោក រ៉ូឌ្រេហ្គោ ឌុយទែតឺ បានបញ្ជាក់ម្តងហើយម្តងទៀត អំពីឆន្ទៈដោះស្រាយជម្លោះ ដោយការចរចាជាមួយចិន។ លោកថែមទាំងធ្លាប់បានប្រកាសថា ហ្វីលីពីន សុខចិត្តបែងចែកភោគផល ក្នុងសមុទ្រនៅតំបន់មានជម្លោះ ជាមួយនឹងចិនទៀតផង។ គោលជំហរនេះ អាចត្រូវបានអ្នកខ្លះចាត់ទុកថាជាការចុះញ៉ម ចាញ់ប្រៀបចិន តែយ៉ាងណា កាលៈទេសៈជាក់ស្តែង យើងសួរថាតើហ្វីលីពីន ដែលជាពងមាន់ អាចហ៊ានទៅជល់នឹងផ្ទាំងថ្មនៃមហាកំផែង របស់ចិនដែររឺទេ?
ជាជំហានដំបូង លោកប្រធានាធិបតីហ្វីលីពីន បានទៅរកជំនួយពីលោក ហ្វីឌែល រ៉ាម៉ូស Fedel Ramos អតីតប្រធានាធិបតីហ្វីលីពីន។ ក្នុងអាណត្តិរបស់លោក រ៉ាម៉ូស ពីឆ្នាំ១៩៩២ ដល់ឆ្នាំ១៩៩៨ ហ្វីលីពីន បានចងសម្ព័ន្ធមេត្រីជាមួយចិន យ៉ាងស្អិតរមួត។ នៅទីក្រុងហុងកុង កាលពីល្ងាចថ្ងៃសៅរ៍ទី ១៣ សីហា លោកហ្វីឌែល រ៉ាម៉ូស ដែលមានវ័យ៨៨ឆ្នាំទៅហើយ បានប្រកាសប្រាប់អ្នកកាសែតថា លោកមកនេះ គឺដើម្បីជួមបមន្ត្រីចិន ដែលជាមិត្ត ធ្លាប់ធ្វើការជាមួយគ្នា ដើម្បីបើកផ្លូវស្តារទំនាក់ទំនងរវាងចិន និងហ្វីលីពីនឡើងវិញ។ មិត្តភ័ក្តទាំងនោះ អាចនឹងនាំសារនេះ ទៅកាន់មន្ត្រីធំៗផ្សេងទៀត នៅប៉េកាំង។ តែយ៉ាងណាក៏ដោយ លោករ៉ាម៉ូស មិនបានបញ្ជាក់លម្អិតថា គេបានប្រជុំជាមួយអ្នកណាខ្លះ និងនិយាយពីអ្វីខ្លះទេ។ ហើយលោកក៏មិនបានបញ្ជាក់ថា លោកនឹងធ្វើដំណើរទៅចិនដីគោកដែរ។
យ៉ាងណាមិញ លោក Rafael Aluna អតីតរដ្ឋមន្ត្រីក្រសួងមហាផ្ទៃហ្វីលីពីន ដែលមានវត្តមាននៅទីនោះដែរ បានបញ្ជាក់ប្រាប់អ្នកយកព័ត៌មានថា ជំនួបមិនផ្លូវការជាមួយមន្ត្រីចិន គឺបានទទួលលទ្ធផលល្អ ហើយវានឹងបើកផ្លូវឲ្យមានការចរចា ផ្លូវការទៅលើវិស័យផ្សេងទៀត ដោយមិនឲ្យជម្លោះក្នុងដែនសមុទ្រ មករារាំងទំនាក់ទំនងពាណិជ្ជកម្មរវាងប្រទេសទាំងពីរទេ។ ដូចគ្នាដែរ លោក Ernie Abella អ្នកនាំពាក្យរដ្ឋាភិបាលហ្វីលីពីន បានសម្តែងសុទិដ្ឋិនិយម ដែលថាជំនួបមិនផ្លូវការនេះ នឹងនាំទៅដល់ការចរចាការទូតរវាងប្រទេសទាំងពីរ ជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ