ចិន និងរុស្ស៊ី ប្រកាសធ្វើសមយុទ្ធយោធារួមគ្នា ក្នុងសមុទ្រចិនខាងត្បូង
២សប្តាហ៍បន្ទាប់ពីតុលាការអាជ្ញាកណ្តាលអន្តរជាតិ សម្រេចសេចក្តីថាចិន គ្មានសិទ្ធិណាមួយមកត្រួតត្រាផ្ទៃសមុទ្រចិនខាងត្បូងសឹងតែទាំងអស់នោះ កាលពីថ្ងៃព្រហស្បតិ៍ទី២៨ កក្កដា ម្សិលមិញ ក្រសួងការពារជាតិចិន បានប្រកាសថា ចិននិងរុស្ស៊ី បានព្រមព្រាងគ្នា ដើម្បីធ្វើសមយុទ្ធយោធាមួយដ៏ធំ នៅក្នុងសមុទ្រចិនខាងត្បូង នៅខែកញ្ញាខាងមុខនេះ។ មានការព្រួយបារម្ភថា សមយុទ្ធយោធាដែលគេមានគម្រោងធ្វើនេះ នឹងពិតជាធ្វើឲ្យស្ថានភាពកាន់តែវិកវរ ដោយសារក្នុងតំបន់សមុទ្រចិនខាងត្បូងនេះ មាននាវាចម្បាំងរបស់អាមេរិកយាមការពារជាច្រើនគ្រឿង។
ចុះផ្សាយនៅថ្ងៃ៖
ស្តាប់ - ០២:២៣
លោក យ៉ាង យូជុន អ្នកនាំពាក្យក្រសួងការពារជាតិចិន បានប្រកាសនៅក្នុងសន្និសីទកាសែតប្រចាំខែរបស់ខ្លួនថា នៅខែកញ្ញាខាងមុខនេះ កងទ័ពចិន និងរុស្ស៊ី នឹងរួមគ្នាធ្វើសមយុទ្ធយោធាដ៏ធំមួយ នៅក្នុងផ្ទៃសមុទ្រចិនខាងត្បូង ទាំងក្នុងទឹក ទាំងពីលើអាកាស។ លោកបន្ថែមថា នេះគឺជាសមយុទ្ធយោធា បែបសាមញ្ញ ដើម្បីជាការហ្វឹកហាត់ ដោយពុំមានសំដៅ ទៅគម្រាមកំហែងអ្នកណាទេ។
ទោះបីជាយ៉ាងណា ការប្រកាសធ្វើសមយុទ្ធយោធារបស់ចិន និងរុស្ស៊ី នៅពេលនេះ គឺមិនអាច មិនធ្វើឲ្យគេនឹងគិតទៅដល់បញ្ហាជម្លោះដែនទឹក ក្នុងសមុទ្រចិនខាងត្បូងបានទេ។ កាលពីថ្ងៃទី១២ កក្កដា ប្រមាណជាង២សប្តាហ៍មុននេះ តុលាការអាជ្ញាកណ្តាលអន្តរជាតិក្រុងឡាអេ បានសម្រេចសេចក្តី ទៅតាមការស្នើសុំរបស់ហ្វីលីពីន ដោយបានអះអាងថា ចិនពុំមានអំណះអំណាងផ្លូវច្បាប់ណា មកវាទទីគ្រប់គ្រងដែនសមុទ្រចិនខាងត្បូងតែម្នាក់ឯងនោះទេ។ សូមបញ្ជាក់ថា ក្នុងចំណោមផ្ទៃក្រឡា ទាំង៣លានគីឡូមែត្រក្រឡា របស់សមុទ្រចិនខាងត្បូង ត្រូវបានចិនចាត់ទុកថាជារបស់ខ្លួនអស់២លាន៦សែន គីឡូមែត្រក្រឡាទៅហើយ។
ជាងនេះទៅទៀត បច្ចុប្បន្ននេះ មាននាវាចម្បាំងអាមេរិក ជាច្រើនគ្រឿងដែលកំពុងបំពេញបេសកកម្មការពារនៅតំបន់សមុទ្រចិនខាងត្បូង។ ហេតុផលនៃវត្តមានរបស់នាវាចម្បាំងអាមេរិក គឺតែមួយគត់ គឺការពារស្ថិរភាព និងសន្តិសុខចរាចរណ៍នាវាពាណិជ្ជកម្មនានា នៅក្នុងតំបន់ ដោយយោងទៅតាមគោលការគ្រិះ នៃសេរីភាព ក្នុងការធ្វើចរាចរណ៍ តាមដែនសមុទ្រអន្តរជាតិ។
ការព្រួយបារម្ភ ក្រោយការប្រកាសធ្វើសមយុទ្ធយោធានេះ គឺមានន័យថា នៅខែកញ្ញាខាងមុខនេះ ក្នុងសមុទ្រចិនខាងត្បូង នឹងមានវត្តមានកងទ័ពចិនផង រុស្ស៊ីផង និងអាមេរិកផង ពោលគឺសុទ្ធសឹងតែជាមហាយក្សសព្វាវុធ និងយោធា ដ៏ធំទាំងបីរបស់ពិភពលោក។ ការប៉ះទង្គិចណាមួយ ប្រាកដជាអាចបង្កជាជម្លោះការទូត។
គួរកត់សម្គាល់ផងដែរថា មួយរយៈពេលចុងក្រោយនេះ ចិន នឹងរុស្ស៊ី បានខិតទៅជិតគ្នាកាន់តែខ្លាំង ដោយហាក់ដូចជាបានចាប់ដៃគ្នា ដើម្បីមានបំណងផ្តួលសហរដ្ឋអាមេរិក នៅលើសៃវៀនអន្តរជាតិ។ លោក ពូទីន និងលោកស៊ី ជីនពីង តែងតែជួបគ្នាជារឿយៗ ហើយក្នុងនាមប្រទេសសមាជិកនៃក្រុមប្រឹក្សាអចន្ត្រៃយ៍ ដូចគ្នា មេដឹកនាំប្រទេសទាំងពីរនេះ មានទំនោរស្របគ្នាទាំងស្រុង ក្នុងការដោះស្រាយបញ្ហានានានៅក្នុងពិភពលោក ជាក់ស្តែងដូចជាជម្លោះនៅស៊ីរីជាដើម។ មួយវិញទៀត វាមិនមែនជាលើកទីមួយទេ ដែលរុស្ស៊ី និងចិនធ្វើសមយុទ្ធយោធារួមគ្នា។ កាលពីខែសីហា ឆ្នាំ២០១៥ កងទ័ពមហាយក្សទាំងពីរ រួមមាននាវាចម្បាំង២២គ្រឿង និងយន្តហោះចម្បាំង២០គ្រឿង បានធ្វើសមយុទ្ធសម្ញែងសាច់ដុំនៅតំបន់សមុទ្រប៉ាស៊ីហ្វិក ក្បែរក្រុង Vladivostok ភាគខាងកើតបង្អស់របស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ