ខួប១ឆ្នាំនៃអំពើហិង្សានៅស៊ីងជាំងក្រោមការទាមទារធ្វើអង្កេតឯករាជ្យ និងតម្លាភាពសិទ្ធិមនុស្ស
មួយឆ្នាំក្រោយអំពើហិង្សាបង្ហូរឈាមរវាងជាតិសាសន៍ហាន និងអ៊ុយហ្គួរ (Ouïghours)នៅប្រទេសចិនមក នៅថ្ងៃម្សិលមិញ សហរដ្ឋអាមេរិក បានអំពាវនាវឲ្យអាជ្ញាធរចិន បង្ហាញពីតម្លាភាព និងការគោរពសិទ្ធិមនុស្ស។ ឯចំណែកអង្គការការពារសិទ្ធិមនុស្សអន្តរជាតិបានស្នើសុំឲ្យមានការ អង្កេតឯករាជ្យមួយ ពីព្រោះរបាយការណ៍របស់រដ្ឋាភិបាលចិនស្តីពីអំពើហិង្សាពូជសាសន៍ ថ្ងៃទី ៥ កក្កដា ២០០៩ មានសល់ចន្លោះចំណុចមិនច្បាស់លាស់ច្រើនពេក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
តាមរយៈរបាយការណ៍ផ្លូវការរបស់អាជ្ញាធរចិន គេនៅតែពុំអាចដឹងបានថាតើមានមនុស្សប៉ុន្មាននាក់ដែលបានស្លាប់ឲ្យពិតប្រាកដ ក្នុងពេលបះបោរ? អ្នកណាសម្លាប់អ្នកណា និងហេតុដូចម្តេចបានជាមានផ្ទុះអំពើហិង្សាពូជសាសន៍ នៅថ្ងៃទី ៥កក្កដា ២០០៩នោះ? ហេតុដូច្នេះ ចិនត្រូវតែបើកធ្វើអង្កេតឯករាជ្យមួយ ដើម្បីវែករកមុខអ្នកដែលបានប្រព្រឹត្តការរំលោភសិទ្ធិមនុស្សទាំងឡាយ និងដើម្បីធានាបានតម្លាភាពក្នុងការរកយុត្តិធម៌ជូនបណ្តាជនទូទៅ នៅក្រុង Urumqi ។ នេះជាការកត់សម្គាល់របស់អង្គការការពារសិទ្ធិមនុស្សអន្តរជាតិ Amnesty International។
ទោះបីជា នារយៈពេលចុងក្រោយនេះ ប៉េកាំងបានយល់ព្រមបង្កើតឲ្យមានគម្រោងអភិវឌ្ឍន៍ ដើម្បីស្ថិរភាពនៅស៊ីងជាំងក៏ដោយ ក៏សហរដ្ឋអាមេរិក នៅតែទទូចទាមទារឲ្យចិនធានា និងបង្ហាញពីតម្លាភាពក្នុងការគោរពសិទ្ធិប្រជាជនដែលរស់នៅក្នុងខេត្តស៊ីងជាំង ឲ្យស្របតាមច្បាប់អន្តរជាតិ។ ព្រោះជនជាតិភាគតិចចិនOuïghours ដែលកាន់សាសនាអ៊ីស្លាម តែងទទួលរងនូវការរើសអើង ទាំងផ្នែកវប្បធម៌ សាសនា ពីសំណាក់ប្រជាជនចិនភាគច្រើន ដែលមានដើមកំណើតហាន និងមិនបានទទួលភាគផលសេដ្ឋកិច្ច ដូចបណ្តាជនចិនទូទៅទេ។
សូមរំលឹកថា អំពើហិង្សា នៅ Urumqi ទីរួមខេត្ត ស៊ីងជាំង រវាងបណ្តាជនចិន ដើមកំណើតOuïghours កាន់សាសនាអ៊ីស្លាម និងជនជាតិចិន ហាន នៅថ្ងៃទី ៥ កក្កដា ឆ្នាំ២០០៩ បានសម្លាប់ជីវិតមនុស្សជាផ្លូវការជិត ២០០នាក់ និងរបួស ជាង១៦០០នាក់។ ប៉ុន្តែបើយោងតាមក្រុមOuïghoursប្រឆាំងនឹងរដ្ឋាភិបាលនៅកំពុងនិរទេសខ្លួននៅបរទេស តុល្យការនៃមនុស្សស្លាប់និងរបួសមានលក្ខណៈធ្ងន់ធ្ងរជាងការប្រកាសផ្លូវការឆ្ងាយណាស់។
ក្នុងពេលដែលខួបមួយឆ្នាំនៃអំពើហិង្សាកាន់តែខិតជិតចូលមកដល់ អាជ្ញាធរចិន បានចាត់វិធានការការពារយ៉ាងតឹងតែងបំផុត។ គេសង្កេតឃើញមានការដាក់ម៉ាស៊ីនវីដេអូ ថត ស្ទើរគ្រប់ទីកន្លែងទាំងអស់ (ក្នុងរថយន្តក្រុង រទេះភ្លើង សាលារៀន មជ្ឈមណ្ឌលពាណិជ្ជកម្ម ផ្សារ) ប្រមាណជាង ៤ម៉ឺនកន្លែង នៅក្នុងUrumqi ដើម្បីបញ្ចៀសរាល់អំពើហិង្សាជាយថាហេតុណាមួយដូចឆ្នាំកន្លងទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ