អង្គការICG៖ ការរឹតបន្តឹងជ្រុលផ្នែកសន្តិសុខនៅថៃនឹងធ្វើឲ្យមានអំពើហិង្សាជាថ្មី
អង្គការអន្តរជាតិដើម្បីបង្ការជម្លោះដែលមានឈ្មោះថា International Crisis Groupបានចេញរបាយការណ៍ នៅថ្ងៃចន្ទនេះ អំពាវនាវដល់រដ្ឋាភិបាលថៃឲ្យដកកាប្រកាសភាពអាសន្ន ជាបន្ទាន់ពីក្នុងខេត្ត និងក្រុងបាងកក។ អង្គការអន្តរជាតិមួយនេះដែលមានមូលដ្ឋាន នៅទីក្រុងBruxelles ក្នុងប្រទេសប៊ែលហ្សិក បានក្រើនរំលឹកថា ការដាក់សម្ពាធកាន់តែខ្លាំងទៅលើក្រុមអាវក្រហមនឹងធ្វើឲ្យកើតមាន ចលនាលួចលាក់ និងសកម្មភាពប្រឆាំងក្រៅច្បាប់កាន់តែច្រើនក្នុងស្រទាប់ប្រជាជនថៃ។
ចុះផ្សាយនៅថ្ងៃ៖ កែប្រែថ្ងៃទី៖
សេក្តីរាយការណ៍របស់ឈាង បុប្ផា
អង្គការអន្តរជាតិដើម្បីបង្ការជម្លោះហៅកាត់ថា ICG មើលឃើញថា វិធានការពង្រឹងសន្តិសុខដែលប្រកាសដោយរដ្ឋាភិបាលថៃ កំពុងដាក់គំនាបយ៉ាងធ្ងន់ធ្ងរទៅលើក្រុមអាវក្រហម។ ក្រុមអាវក្រហមដែលប្រឆាំងនឹងរដ្ឋាភិបាលរបស់លោកអាភីស៊ីត បច្ចុប្បន្ននេះ មិនមានឱកាស និងមានសិទ្ធិសេរីភាពក្នុងការបញ្ចេញមតិដូចមុន។ យោងតាមអង្គការបង្ការជម្លោះ ICG ច្បាប់ដ៏តឹងរ៉ឹងនេះកំពុងធ្វើឲ្យក្រុមអាវក្រហមកើតក្តីទោមនស្ស និងជម្រុញឲ្យពួកគេធ្វើសកម្មភាព លួចលាក់ប្រឆាំងនឹងអាជ្ញាធរថៃ។
របាយការណ៍របស់ ICGរំលឹកផងដែរដល់រដ្ឋាភិបាលរបស់លោកអាភីស៊ីត ឲ្យធ្វើការកាត់បន្ថយវិធានការទាំងឡាយណាដែលជម្រុញមានការបែកបាក់កាន់តែខ្លាំងក្នុងសង្គមថៃ។ អង្គការ ICG បានបង្ហាញនូវសេណារេយ៉ូ ដែលថា រដ្ឋាភិបាលថៃគួរដកការប្រកាសភាពអាសន្ន ពីខេត្តក្រុង ឬសុខចិត្តបន្តបំផ្លាញលក្ខណៈប្រជាធិបតេយ្យក្នុងប្រទេស។ អង្គការ ICG បញ្ជាក់ថា ការខឹងគុំគួនទាំងឡាយរបស់ប្រជាជននឹងបណ្តាលឲ្យមានអំពើហិង្សា ថ្មី នៅពេលអនាគតខាងមុខ។
រដ្ឋាភិបាលទីក្រុងបាងកក ត្រូវសម្រេចចិត្តនៅថ្ងៃពុធខាងមុខនេះអំពីជំហររបស់ខ្លួនក្នុងរឿងដាក់ខេត្តក្រុងក្នុងភាពអាសន្ន។ លោកអាភីស៊ីតធ្លាប់ប្រកាសថា គេនឹងអាចដកការប្រកាសភាពអាសន្នពីខេត្តទាំងឡាយដើម្បីត្រៀមការបោះឆ្នោតតំបន់ដែលនឹងធ្វើឡើងនៅថ្ងៃទី ២៥កក្កដាខាងមុខ។ អាជ្ញាធរជាតិបញ្ជាក់ថា ទោះយ៉ាងណា ក្រុងបាងកកនៅតែត្រូវស្ថិតនៅក្នុងកម្រិតភាពអាសន្នដដែល។
ជាមួយ គ្នានេះ ដើម្បីជៀសវាងវិបត្តិនយោបាយជាថ្មី អង្គការបង្ការជម្លោះស្នើសុំផងដែរដល់រដ្ឋាភិបាលថៃឲ្យរៀបចំការបោះឆ្នោតឲ្យបានឆាប់បំផុត។ នោះគឺព្រោះថា មានតែរដ្ឋាភិបាលថ្មីដែលចេញពីការបោះឆ្នោតដោយសកលទេដែលអាចធ្វើប្រទេសថៃដកខ្លួនរួចពីវិបត្តិបច្ចុប្បន្ន។
គួរំលឹកថា ប្រជាជនក្រុមអាវក្រហមដែលគាំទ្រលោកថាក់ស៊ីន នៅតែចោទរដ្ឋាភិបាលរបស់អាភីស៊ីតថា ជារដ្ឋាភិបាលដែលមិនបានចេញមកពីការបោះឆ្នោតគាំទ្រដោយប្រជាជន។ បាតុកម្មដ៏ហិង្សា កាលពីខែមេសា និងឧសភាមុននេះដែលបណ្តាលឲ្យមានមនុស្សស្លាប់ជិតមួយរយនាក់ ធ្វើឡើង ក៏ដើម្បីទាមទារលោកអាភីស៊ីតចុះចេញពីតំណែង និងរៀបចំបោះឆ្នោតជាថ្មីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ