បញ្ហានុយក្លេអ៊ែរ៖អៀរ៉ង់បដិសេធទណ្ឌកម្មតែទាមទារការចរចា
ទីក្រុងតេហេរ៉ង់បានបដិសេធទាត់ចោល ទណ្ឌកម្មថ្មីរបស់សហភាពអឺរ៉ុបដែលបានប្រកាសដាក់ទៅលើប្រទេសអៀរ៉ង់ ដោយបានថ្លែងឲ្យដឹងថាទណ្ឌកម្មថ្មីទាំងនេះនឹងធ្វើឲ្យការរិះរក ដំណោះស្រាយឲ្យបញ្ហានុយក្លេអ៊ែររឹងរិតតែស្មុគស្មាញបន្ថែមទៀត។ ហើយលោកប្រធានាធិបតីអៀរ៉ង់Mahmoud Ahmadinejad បានអះអាងថានឹងចាប់មានកិច្ចចរចាឡើងវិញនៅខែកញ្ញាខាងមុខនេះ។
ចុះផ្សាយនៅថ្ងៃ៖
បទវិភាគរបស់ សៀក សារិន
នៅក្នុងបទសម្ភាសន៍កាលពីថ្ងៃអង្គារម្សិលមិញតាមរយៈទូរទស្សន៍អៀរ៉ង់ជាភាសាអង់គ្លេសឈ្មោះPress-TV លោកប្រធានាធិបតីអៀរ៉ង់Mahmoud Ahmadinejad បានថ្លែងឲ្យដឹងថា “ប្រទេសអៀរ៉ង់នឹងមានកិច្ចចរចាឡើងវិញជាមួយប្រទេសលោកខាងលិចនៅខែកញ្ញាខាងមុខនេះ។ ក៏ប៉ុន្តែជាកិច្ចចរចាដោយមានលក្ខខណ្ឌ ពោលគឺរក្សាទុកនៅដដែលលក្ខខណ្ឌដែលទីក្រុងតេហេរ៉ង់ធ្លាប់បានដាក់កាលពីខែមិថុនាកន្លងទៅ បានសេចក្តីថាប្រទេសអៀរ៉ង់ចង់ឲ្យប្រទេសលោកខាងលិចឆ្លើយបំភ្លឺពីជំហររបស់ខ្លួនពាក់ព័ន្ធនឹងគ្រាប់បែកនុយក្លេអ៊ែររបស់ប្រទេសអ៊ីស្រាអែល។ ប្រទេសមហាអំណាចលោកខាងលិចត្រូវតែបញ្ជាក់ប្រាប់ឲ្យបានច្បាស់ៗថា តើខ្លួនទទួលយល់ព្រមឲ្យប្រទេសអ៊ីស្រាអែលមានគ្រាប់បែកនុយក្លេអ៊ែរដែរឬទេ?
ទាំងនេះបានន័យថា បើប្រទេសមហាអំណាចលោកខាងលិចទទួលស្គាល់យល់ព្រមឲ្យប្រទេសអ៊ីស្រាអែលមានគ្រាប់បែកនុយក្លេអ៊ែរមែន នោះប្រទេសអៀរ៉ង់ក៏មានសិទ្ធិដូចប្រទេសអ៊ីស្រាអែលអ៊ីចឹងដែរក្នុងការផលិតគ្រាប់បែកនុយក្លេអ៊ែរ។
បន្ថែមពីលើនេះ លោកប្រធានាធិបតីអៀរ៉ង់Mahmoud Ahmadinejad បានទាមទារឲ្យមានវត្តមានរបស់ប្រទេសទួរគីនិងប្រទេសប្រេស៊ីលនៅក្នុងកិច្ចចរចា។ ដោយហេតុថាប្រទេសទាំងពីរខាងលើនេះមានគោលជំហរប្រហាក់ប្រហែលគ្នានឹងប្រទេសអៀរ៉ង់ពាក់ព័ន្ធនឹងបញ្ហានុយក្លេអ៊ែរ។
គួរកត់សម្គាល់ថា ប្រទេសអ៊ីស្រាអែលដែលគេចាត់ទុកថាជាមហាអំណាចនុយក្លេអ៊ែរមួយនៅតំបន់ដើមបូព៌ា បានធ្វើការចោទប្រកាន់ទៅលើប្រទេសអៀរ៉ង់ដូចប្រទេសលោកខាងលិចឯទៀតៗថា ទីក្រុងតេហេរ៉ង់កំពុងស្វះស្វែងរិះរកផលិតអាវុធនុយក្លេអ៊ែរ។ ហើយអ៊ីស្រាអែលពុំរួញរាឡើយនឹងធ្វើការវាយប្រហារតាមផ្លូវយោធាទៅលើទីតាំងនុយក្លេអ៊ែររបស់ប្រទេសអៀរ៉ង់។
សហភាពអឺរ៉ុបបានសម្រេចដាក់ទណ្ឌកម្មយ៉ាងធ្ងន់ធ្ងរទៅលើប្រទេសអៀរ៉ង់ ជាពិសេសនៅលើវិស័យថាមពលកាលពីថ្ងៃចន្ទកន្លងទៅ ដើម្បីជំរុញឲ្យទីក្រុងតេហេរ៉ង់ងាកមករកតុចរចាឡើងវិញពាក់ព័ន្ធនឹងកម្មវិធីនុយក្លេអ៊ែររបស់ខ្លួន។
សាធារណរដ្ឋអ៊ីស្លាមអៀរ៉ង់បានប្រកាសឲ្យដឹងថា គេសោកស្តាយចំពោះការដាក់ទណ្ឌកម្មថ្មីរបស់សហភាពអឺរ៉ុប។ ក៏ប៉ុន្តែទាំងនេះពុំបានធ្វើឲ្យប៉ះពាល់ដល់ការប្តេជ្ញាចិត្តរបស់ទីក្រុងតេហេរ៉ង់ឡើយក្នុងកិច្ចការពារសិទ្ធិសេរីភាពរបស់ខ្លួនក្នុងការបន្តកម្មវិធីនុយក្លេអ៊ែរស្របតាមច្បាប់។
ទណ្ឌកម្មថ្មីនៃសហភាពអឺរ៉ុបដែលដាក់ទៅលើអៀរ៉ង់មានសុពលភាពចាប់តាំងពីថ្ងៃអង្គារម្សិលមិញទៅ ដែលក្នុងនោះមាន៖
-ការហាមឃាត់ពុំឲ្យមានការបោះទុនធ្វើវិនិយោគថ្មីនៅប្រទេសអៀរ៉ង់។
-ការហាមឃាត់ពុំឲ្យមានជំនួយបច្ចេកទេសឬការសាងផ្ទេរបច្ចេកវិទ្យាទៅប្រទេសអៀរ៉ង់ ជាពិសេសក្នុងវិស័យចម្រាញ់ប្រេងកាតនិងការផលិតឧស្ម័ន។
-ពង្រឹងការត្រួតពិនិត្យទៅលើការដឹកជញ្ជូនតាមផ្លូវសមុទ្ររបស់អៀរ៉ង់នៅតាមកំពង់ផែទាំងឡាយរបស់ប្រទេសអឺរ៉ុប។
សូមបញ្ជាក់ថា ទន្ទឹមគ្នានឹងការដាក់ទណ្ឌកម្មថ្មីរបស់ប្រទេសអឺរ៉ុប ប្រទេសកាណាដាក៏បានប្រកាសឲ្យដឹងពីវិធានការដាក់ទណ្ឌកម្មទៅលើប្រទេសអៀរ៉ង់ដែលមានលក្ខណៈប្រហាក់ប្រហែលនឹងទណ្ឌកម្មរបស់សហភាពអឺរ៉ុប។ ចំណែកឯសហរដ្ឋអាមេរិកនិងប្រទេសអូស្ត្រាលីវិញ ពួកគេបានចាត់វិធានការទាំងនេះមុនទីក្រុងBruxelles និងទីក្រុងOttawaរួចទៅហើយ។
ប្រទេសរុស្ស៊ីឯណោះយល់ថា ទណ្ឌកម្មថ្មីដែលសហភាពអឺរ៉ុបបានសម្រេចដាក់ទៅលើទីក្រុងតេហេរ៉ង់នេះនឹងធ្វើឲ្យរិតតែមានការស្មុគស្មាញនៅក្នុងការរិះរកដំណោះស្រាយឲ្យបញ្ហានុយក្លេអ៊ែរអៀរ៉ង់។ ហើយទីក្រុងម៉ូស្គូនៅរក្សាក្តីសង្ឃឹមថាប្រទេសរុស្ស៊ីនិងប្រទេសមហាអំណាចលោកខាងលិចនៅអាចធ្វើសហការនឹងគ្នាដើម្បីរិះរកដំណោះស្រាយឲ្យបញ្ហានុយក្លេអ៊ែរអៀរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ