ចិនយល់ព្រមពិចារណារឿងដាក់ទណ្ឌកម្មលើអៀរ៉ង់
ក្រោយពីបានជំទាស់អស់រយៈពេលរាប់ខែមក ទីបំផុត ចិនបានយល់ព្រមយករឿងទណ្ឌកម្មលើអៀរ៉ង់មកពិចារណា។ នេះបើយោងតាមការប្រកាសរបស់លោកស្រីហ៊ីឡារី គ្លីនតុន (Hillary Clinton) រដ្ឋមន្រ្តីការបរទេសអាមេរិក កាលពីល្ងាចថ្ងៃពុធ ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
អាមេរិកទទួលបានចម្លើយវិជ្ជមានពីចិន ក្រោយពីការសន្ទនាតាមទូរស័ព្ទ កាលពីល្ងាចថ្ងៃពុធ ម្សិលមិញ រវាងឯកអគ្គរដ្ឋទូតប្រទេសទាំង ៦ ប្រចាំនៅអ.ស.ប. គឺអាមេរិក អង់គ្លេស បារាំង ចិន រុស្ស៊ី និងអាឡឺម៉ង់។
ចិនបានព្រមព្រៀងជជែកជាមួយបណ្តាប្រទេសមហាអំណាចដទៃទៀត អំពីការដាក់ទណ្ឌកម្មលើអៀរ៉ង់ ក៏ប៉ុន្តែ មិនមានន័យថា ចិនព្រមទទួលយកគម្រោងទណ្ឌកម្ម ដែលស្នើឡើងដោយអាមេរិកនោះទេ។
គួររំឭកថា អាមេរិក ដោយមានការឯកភាពពីសម្ព័ន្ធមិត្តទាំង៣ នៅអឺរ៉ុប គឺអង់គ្លេស បារាំង និងអាឡឺម៉ង់ បានរៀបចំគម្រោងទណ្ឌកម្មមួយ ដើម្បីដាក់ជូនឲ្យក្រុមប្រឹក្សាសន្តិសុខអនុម័ត។ ទណ្ឌកម្មនេះ ផ្តោតជាសំខាន់ ទៅលើការហាមឃាត់ការនាំផលិតផលប្រេងចម្រាញ់រួច ចូលទៅក្នុងប្រទេសអៀរ៉ង់។
សេចក្តីព្រាងនេះ ត្រូវបានសហរដ្ឋអាមេរិកផ្ញើទៅរុស្ស៊ី និងចិន តាំងពី១ខែមុនម៉្លេះ។ គឺសេចក្តីព្រាងនេះហើយ ដែលនឹងត្រូវយកមកធ្វើជាមូលដ្ឋាននៃការចរចា ដែលចិនទើបតែប្រកាសចូលរួមនេះ។
យោងតាមអ្នកការទូតលោកខាងលិច ការណ៍ដែលចិនផ្លាស់ប្តូរជំហរ សុខចិត្តទទួលយកគម្រោងទណ្ឌកម្មលើអៀរ៉ង់មកពិចារណានេះ គឺទំនងមកពីចិនអាក់អន់ចិត្តនឹងអៀរ៉ង់ ដែលមិនបានផ្តល់ចម្លើយច្បាស់លាស់ ទៅនឹងការទាមទាររបស់ចិន។ ចិន រួមជាមួយនឹងរុស្ស៊ី បាននាំគ្នាជជែកដោយស្ងាត់ៗជាមួយអៀរ៉ង់ ដើម្បីបញ្ចុះបញ្ចូលអៀរ៉ង់ឲ្យទទួលយកសំណើកិច្ចព្រមព្រៀង ដែលស្នើឡើងដោយប្រទេសលោកខាងលិច តាមរយៈទីភ្នាក់ងារ AIEA នាពេលកន្លងមក ដើម្បីជៀសពីទណ្ឌកម្ម។ ក៏ប៉ុន្តែ ចិន និងរុស្ស៊ី មិនបានទទួលចម្លើយវិជ្ជមានពីអៀរ៉ង់នោះទេ។
នៅថ្ងៃព្រហស្បតិ៍នេះ ១ថ្ងៃ ក្រោយពីចិនសុខចិត្តទទួលយកគម្រោងទណ្ឌកម្មមកពិចារណា ស្រាប់តែអៀរ៉ង់បានបញ្ជូនតំណាងជាន់ខ្ពស់១រូប ដែលជាអ្នកទទួលបន្ទុកសំណុំរឿងនុយក្លេអ៊ែរ ឲ្យទៅទីក្រុងប៉េកាំង ដើម្បីជួបពិភាក្សាជាមួយមន្រ្តីចិន។ យោងតាមមន្រ្តីអ្នកនាំពាក្យស្ថានទូតអៀរ៉ង់ ប្រចាំក្រុងប៉េកាំង មន្រ្តីទទួលបន្ទុកកិច្ចការនុយក្លេអ៊ែរអៀរ៉ង់នេះនឹងជជែកជាមួយមន្រ្តីចិន ស្តីពីទំនាក់ទំនងទ្វេភាគីអៀរ៉ង់-ចិន និងអំពីសំណុំរឿងនុយក្លេអ៊ែរផងដែរ។
ប្រតិកម្មពីខាងអ៊ីស្រាអែលវិញ ថ្វីដ្បិតតែបានទទួលស្វាគមន៍ការផ្លាស់ប្តូរជំហររបស់ចិន ប៉ុន្តែ អ៊ីស្រាអែលបានបង្ហាញនូវទុទ្ទិដ្ឋិនិយមថា បើមើលទៅលើជំហររបស់ចិន ដែលមិនសូវគាំទ្រទណ្ឌកម្មលើអៀរ៉ង់ ការចរចានៅក្រុមប្រឹក្សាសន្តិសុខ បើទោះជាទទួលជោគជ័យ ឈានទៅអនុម័តទណ្ឌកម្មលើអៀរ៉ង់ក៏ដោយ ក៏ទណ្ឌកម្មនេះប្រហែលជានឹងត្រូវបន្ធូរបន្ថយច្រើនដែរ ដែលអាចនឹងធ្វើឲ្យទណ្ឌកម្មនេះគ្មានប្រសិទ្ធិភាព ដូចដែលគេធ្លាប់ឃើញ កាលពីទណ្ឌកម្ម៣លើកមុនៗស្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ