ក្រុមតាលីបង់រំលឹករដ្ឋាភិបាលមិនឲ្យទទួលជំនួយអន្តរជាតិ
ក្រុមតាលីបង់ក្នុងប្រទេសប៉ាគីស្តង់ខំប្រឹងនិយាយបញ្ចុះបញ្ចូលរដ្ឋាភិបាលដើម្បីកុំឲ្យទទួលយកជំនួយពីក្រុមបស្ចិមប្រទេស ដែលសំដៅជួយដល់ជនរងគ្រោះដោយទឹកជំនន់បច្ចុប្បន្ននេះ។ ក្រុមតាលីបង់ចោទថា ដោយសារអំពើពុករលួយរបស់មន្រ្តីថ្នាក់មូលដ្ឋាន ជំនួយនឹងមិនអាចបានទៅដល់ដៃរបស់ប្រជាជនប៉ាគីស្តង់ជាង១៣លាននាក់ដែលកំពុងរងគ្រោះដោយទឹកជំនន់បច្ចុប្បន្ននេះ។ ការវាយប្រហាររបស់ក្រុមតាលីបង់ទៅលើអង្គកាមនុស្សធម៌ក៏ចោទជាឧបសគ្គមួយរារាំងសកម្មភាពផ្តល់ជំនួយដល់ជនរងគ្រោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
នៅប៉ុន្មានថ្ងៃចុងក្រោយនេះក្រុមតាលីបង់បានវាយប្រហារទៅលើក្រុមអង្គការមនុស្សធម៌បរទេសដែលកំពុងចុះជួយដល់ប្រជាជនរងគ្រោះដោយទឹកជំនន់ និងបានបញ្ជាឲ្យពួកគេចាកចេញពីប៉ាគីស្តង់ជាបន្ទាន់។ ពួកតាលីបង់ចោទថា អង្គការទាំងនោះកំពុងព្យាយាមផ្សព្វផ្សាយឥទ្ធិពលរបស់លោកខាងលិច នៅប៉ាគីស្តង់។
ក្រុមតាលីបង់ដដែលនេះបានខំប្រឹងនិយាយបញ្ចុះបញ្ចូល កាលពីម្សិលមិញថា រដ្ឋាភិបាលត្រូវបែរខ្នង មិនទទួលជំនួយដើម្បីហេតុផលអធិបតេយ្យ និងឯករាជ្យរបស់ប្រទេស។ ក្រុមតាលីបង់ទាមទារយ៉ាងដូច្នេះ បន្ទាប់ពីរដ្ឋាភិបាលប៉ាគីស្តង់បានបន្តស្រែកអំពាវនាវស្វែងរកជំនួយសម្រាប់ជនរងគ្រោះដោយទឹកជំនន់។
ចាប់តាំងពីទឹកភ្លៀងមូសុងដែលបង្កជាទឹកជំនន់មក ស្ថានភាពអាក្រក់ខាងផ្នែកសុខភាព គ្រោះទុរភិក្សមានសភាពធ្ងន់ធ្ងរហួសពីសមត្ថភាពរបស់រដ្ឋាភិបាល។ ក្នុងជំនួយសម្រាប់ប្រជាជនប៉ាគីស្តង់ អង់គ្លេសបានប្រកាសផ្តល់ជំនួយ ១២លានផោន ចំណែកអាមេរិកសម្រេចផ្តល់២០លានដុល្លារ។
រហូតមកដល់ថ្ងៃនេះ គេមិនទាន់ឃើញមានប្រតិកម្មរបស់រដ្ឋាភិបាលប៉ាគីស្តង់ទៅនឹងការអំពាវនាវរបស់ក្រុមតាលីបង់នៅឡើយទេ។ ប្រធានាធិបតីប៉ាគីស្តង់ខ្លួនឯងកំពុងរងការរិះគន់ខ្លាំង ដោយសារតែឲ្យតម្លៃខ្លាំងទៅលើទស្សនកិច្ចក្រៅប្រទេស ជាជាងស្ថិតនៅក្នុងប្រទេស និងជួយប្រជាជនដែលកំពុងរងគ្រោះដោយទឹកជំនន់ដ៏អាក្រក់មិនធា្លប់មានក្នុងរយៈពេល៨០ឆ្នាំចុងក្រោយនេះ។
ជាមួយនឹងការលើកទឹកចិត្តរដ្ឋាភិបាលមិនឲ្យទទួលជំនួយបរទេស សកម្មជនរបស់ក្រុមអ៊ីស្លាមនិយមជ្រុលដែលមានជាប់ទាក់ទងនឹងចលនារបស់តាលីបង់ និងអាល់កៃដា កំពុងមានសកម្មភាពយ៉ាងផុសផុល នៅតាមខេត្តដែលរងគ្រោះខ្លាំងដោយទឹកជំនន់។ សកម្មជនរបស់អង្គការទាំងនេះត្រូវពង្រាយនៅស្ទើរគ្រប់ខេត្ត ជាពិសេសខេត្តដែលនៅជាប់ព្រំប្រទល់ជាមួយអាហ្វហ្កានិស្តង់។
អង្គការអ៊ីស្លាមធំៗបី កំពុងស្វែងរកប្រជាប្រិយភាពរបស់ខ្លួនដោយផ្តល់ជំនួយជាអាហារ ទឹក ការសាងសង់ស្ពានដើម្បីសង្រ្គោះប្រជាជន។ អង្គការស្តាំនិយមទាំងនោះ គឺ Jamaat-e-Islami Jamaat-ud-Dawa Sipah-e-Sahaba ជាអង្គការដែលប្រឆាំងនឹងរដ្ឋាភិបាលបច្ចុប្បន្ន និង គាំទ្រចង់ឲ្យមានការផ្សះផ្សាជាមួយក្រុមតាលីបង់។
ក្រុមអ្នកវិភាគមើលឃើញថា រាល់ពេលដែលប្រទេសកំពុងជួបគ្រោះទុរភិក្ស និងពេលដែលដ្ឋាភិបាលខ្ជីខ្ជាមិនផ្តល់ជំនួយដល់ប្រជាជនរងគ្រោះ ក្រុមអ៊ីស្លាមនិយមតែងតែឆ្លៀតកេងចំណេញពេលអត្តខាត់នេះដើម្បីអូសទាញទឹកចិត្តប្រជាជន តាមរយៈការផ្តល់ជំនួយចាំបាច់របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ