ទីក្រុងសេអ៊ូលនឹងចរចាដាច់ឡែកជាមួយអាមេរិកនិងជាមួយអៀរ៉ង់
ប្រទេសកូរ៉េខាងត្បូងនឹងមានកិច្ចចរចាដាច់ឡែកជាមួយសហរដ្ឋ អាមេរិកហើយនិងជាមួយប្រទេសអៀរ៉ង់។ ទីក្រុងសេអ៊ូលខិតខំធ្វើការសម្របសម្រួលជាមួយប្រទេសទាំងពីរ ក្នុងខណៈដែលសហរដ្ឋអាមេរិកនិងសហគមន៍អន្តរជាតិកំពុងរិះរកដាក់ ទណ្ឌកម្មទៅលើប្រទេសអៀរ៉ង់ដោយហេតុតែបញ្ហានុយក្លេអ៊ែររបស់ទីក្រុង តេហេរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ទីក្រុងវ៉ាស៊ីនតោនដែលជាសម្ពន្ធមិត្តដ៏សំខាន់របស់កូរ៉េខាងត្បូងសង្ឃឹមថា ទីក្រុងសេអ៊ូលនឹងជួយពង្រឹងដាក់ទណ្ឌកម្មសេដ្ឋកិច្ចទៅលើប្រទេសអៀរ៉ង់។ ចំណែកឯប្រទេសអៀរ៉ង់វិញ បានព្រមានទីក្រុងសេអ៊ូលថា បើកូរ៉េខាងត្បូងធ្វើតាមសំណើរបស់អាមេរិក នោះទីក្រុងតេហេរ៉ង់ច្បាស់ជាឈប់លក់ប្រេងកាតឲ្យប្រទេសកូរ៉េខាងត្បូង។
ពាក់ព័ន្ធនឹងបញ្ហាដាក់ទណ្ឌកម្មទៅលើប្រទេសអៀរ៉ង់នេះ អ្នកទទួលខុសត្រូវជាន់ខ្ពស់កូរ៉េខាងត្បូងម្នាក់បានថ្លែងឲ្យដឹងថា ទីក្រុងសេអ៊ូលនឹងធ្វើការចរចាដាច់ដោយឡែកពីគ្នាជាមួយសហរដ្ឋអាមេរិកហើយនិងជាមួយទីក្រុងតេហេរ៉ង់។
ជាមួយសហរដ្ឋអាមេរិក ទីក្រុងសេអ៊ូលនឹងលើកយកការលំបាកដែលសហគ្រាសកូរ៉េខាងត្បូងនឹងត្រូវពើបជួប បើប្រសិនជាទីក្រុងសេអ៊ូលធ្វើតាមសំណើរបស់ទីក្រុងវ៉ាស៊ីនតោនក្នុងការដាក់ទណ្ឌកម្មទៅលើទីក្រុងតេហេរ៉ង់។
ជាមួយប្រទេសអៀរ៉ង់ដែលជាអ្នកផ្តល់លក់ប្រេងកាតឲ្យកូរ៉េខាងត្បូងចាប់ចំណាត់ថ្នាក់ទី៤វិញ ទីក្រុងសេអ៊ូលត្រូវតែធ្វើការសម្របសម្រួលជាមួយទីក្រុងតេហេរ៉ង់ ដោយហេតុថាសហគ្រាសកូរ៉េខាងត្បូងបានចុះហត្ថលេខាទៅលើកិច្ចព្រមព្រៀងពាណិជ្ជកម្មជាមួយប្រទេសអៀរ៉ង់ មានទឹកប្រាក់ដល់ទៅជាច្រើនពាន់លានដុល្លារនៅក្នុងវិស័យសាងសង់និងសាធារណការ ហើយនិងវិស័យសាងសង់នាវា។ ហើយម្យ៉ាងទៀត ទីផ្សារអៀរ៉ង់ជាទីផ្សារមួយដ៏សំខាន់សម្រាប់សេដ្ឋកិច្ចកូរ៉េខាងត្បូង។
មូលហេតុនេះហើយដែលបាននាំឲ្យឯកអគ្គរដ្ឋទូតអៀរ៉ង់ប្រចាំទីក្រុងសេអ៊ូលថ្លែងប្រកាសថា បើទីក្រុងសេអ៊ូលធ្វើតាមសំណើរបស់អាមេរិក នោះសេដ្ឋកិច្ចនៃប្រទេសកូរ៉េខាងត្បូងនឹងស្គាល់ការខាតបង់ផលប្រយោជន៍យ៉ាងច្រើនក្នុងការដោះដូរពាណិជ្ជកម្មជាមួយប្រទេសអៀរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ