មហាបាតុកម្មទាមទារឲ្យប្តូររបបគ្រប់គ្រងនៅប្រទេសយេមែន
បាតុករយេមែនរាប់ម៉ឺននាក់ដែលជាអ្នកគាំទ្របក្សប្រឆាំងបាននាំគ្នាចុះថ្នល់នៅថ្ងៃព្រហស្បតិ៍ទី៣កុម្ភៈឆ្នាំ២០១១នៅទីក្រុងSanaa ដើម្បីសម្តែងការប្រឆាំងទាមទារឲ្យប្តូររបបគ្រប់គ្រងនៅប្រទេសយេមែន ទោះបីជាប្រធានាធិបតីយេមែនAli Abdallah Saleh ដែលបានកាន់កាប់អំណាចអស់រយៈពេល៣២ឆ្នាំហើយដែលជាសម្ព័ន្ធមិត្តដ៏ សំខាន់របស់ទីក្រុងវ៉ាស៊ីនតោនក្នុងការប្រយុទ្ធប្រឆាំងនឹងពួក អាល់កៃដាបានប្រកាសទទួលយល់ព្រមធ្វើសម្បទានក្រោមសម្ពាធរបស់បាតុកររួចហើយក្តី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
លោកប្រធានាធិបតីអាមេរិកបារ៉ាក់អូបាម៉ាបានគាំទ្រកំណែទម្រង់ដែលបានធ្វើនៅប្រទេសយេមែន។ ក៏ប៉ុន្តែអ្នកដឹកនាំអាមេរិកក៏បានផងដែរអំពាវនាវកុំឲ្យអាជ្ញាធរយេមែនប្រើអំពើហិង្សាទៅលើក្រុមបាតុករដែលទាមទារឲ្យប្តូររបបគ្រប់គ្រងដោយសន្តិវិធី។
ចំណែកឯវាគ្មិននៃសម្ព័ន្ធរួបរួមបក្សប្រឆាំងយេមែនបានប្រកាសក្តែងៗនៅចំពោះមុខបាតុករប្រមាណ១០០ ០០០នាក់ថា “ ពួកយើងនឹងបន្តធ្វើការប្រយុទ្ធតស៊ូដោយសន្តិវិធីលុះត្រាតែរបបគ្រប់គ្រងដ៏ពុករលួយនេះធ្លាក់ដួលរលំ” ។
គួរកត់សម្គាល់ថា នេះជាលើកទីមួយហើយដែលរបបគ្រប់គ្រងរបស់ប្រធានាធិបតីយេមែនAli Abdallah Saleh ដែលបានកាន់កាប់អំណាចអស់រយៈពេល៣២ឆ្នាំបានពើបជួបនឹងមហាបាតុកម្មដ៏សែនធំធេងបែបនេះ។
រីឯគណបក្សកាន់អំណាចយេមែនបច្ចុប្បន្នពោលគឺបក្សសមាជប្រជាជនទូទៅ(Congrès populaire général)ក៏បានរៀបចំធ្វើបាតុកម្មគាំទ្រប្រធានាធិបតី Ali Abdallah Saleh ក្រោយពីAli Abdallah Salehបានប្រកាសសម្រេចចិត្តនៅថ្ងៃពុធទី២កុម្ភៈថា នឹងពុំបន្តអាណត្តិប្រធានាធិបតីថ្មីទៀតឡើយ អាណត្តិប្រធានាធិបតីបច្ចុប្បន្នរបស់ Ali Abdallah Salehដែលនឹងត្រូវបញ្ចប់នៅឆ្នាំ២០១៣។ ហើយបន្ថែមពីលើនេះ Ali Abdallah Salehក៏បានថ្លែងបញ្ជាក់ផងដែរថា ខ្លួនពុំសាងផ្ទេរអំណាចឲ្យកូនប្រុសឈ្មោះAhmed ឡើយ។
ប្រធានាធិបតី Ali Abdallah Salehបានអំពាវនាវឲ្យបក្សប្រឆាំងយេមែនឈប់ធ្វើបាតុកម្មហើយងាកមករកតុចរចាវិញ។ ក៏ប៉ុន្តែបក្សប្រឆាំងយេមែនដែលបានឃើញចលនាតស៊ូប្រយុទ្ធដោយសន្តិវិធីរបស់ប្រជាជនទុយនីស៊ីនិងអេហ្ស៊ីព្ទទទួលបានជោគជ័យ ពូកគេបានសម្រេចបន្តសកម្មភាពប្រយុទ្ធប្រឆាំងដោយសន្តិវិធីលុះត្រាតែរបបគ្រប់គ្រងរបស់ប្រធានាធិបតីយេមែន Ali Abdallah Saleh ដួលរលំ។
សូមរំលឹកថា ចលនាបះបោរប្រយុទ្ធតស៊ូទាមទាររកយុត្តិធម៌បានចាប់ផ្តើមកើតមាននៅប្រទេសទុយនីស៊ី បន្តកើតមានបច្ចុប្បន្ននេះនៅប្រទេសអេហ្ស៊ីព្ទ បានរាលដាលដល់ប្រទេសយេមែន ហើយនឹងអាចឆ្លងរីករាលដាលដល់ប្រទេសហ្សកដានី ប្រទេសស៊ីរី ប្រទេសស៊ូដង់ ប្រទេសអាល់ហ្សេរី ឬរីករាលដាលដល់ប្រទេសនៃពិភពអារ៉ាប់ទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ