ការបញ្ចុះថ្លៃប្រាក់ដុងវៀតណាមជាលើកទី៤ក្នុងរយៈពេល១៥ខែ
ធនាគារកណ្តាលវៀតណាមបានធ្វើការបញ្ចុះថ្លៃប្រាក់ដុងជាង៩%នៅថ្ងៃសុក្រទី១១កុម្ភៈឆ្នាំ២០១១នេះ។ ការបញ្ចុះថ្លៃប្រាក់ដុងវៀតណាមនេះជាការបញ្ចុះថ្លៃលើកទី៤ហើយក្នុងរយៈពេលតែ១៥ខែប៉ុណ្ណោះ នៅក្នុងប្រទេសមួយដែលមានរូបិយវត្ថុឋិតនៅក្រោមសម្ពាធអតិផរណានិងក្រោមសម្ពាធឧនភាពពាណិជ្ជកម្ម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
អត្រាអន្តរធនាគាររវាងប្រាក់ដុងវៀតណាមនិងប្រាក់ដុល្លារអាមេរិកបានត្រូវកែប្រែឲ្យចុះថ្លៃអស់៩,៣%នៅថ្ងៃសុក្រទី១១កុម្ភ៖នេះ ពោលគឺក្នុង១ដុល្លារអាមេរិកអាចដូរបាន២០ ៦៩៣ដុងទល់នឹង១៨ ៩៣២ដុងនៅពេលមុន។
ក្នុងខណៈដែលរូបិយវត្ថុនៃប្រទេសជាច្រើនក្នុងតំបន់បានស្គាល់ការឡើងថ្លៃនៅចំពោះមុខប្រាក់ដុល្លារអាមេរិកនៅឆ្នាំ២០១០ ដោយហេតុតែមានការហូរចូលយ៉ាងច្រើនមហិមានៃប្រាក់មូលធនបរទេស។ ប្រាក់ដុងវៀតណាមឯណេះវិញ បែរជាស្គាល់ការធ្លាក់ស្រុតចុះថ្លៃពុំឈប់ឈរ។ មុនថ្ងៃសុក្រទី១១កុម្ភៈនេះ ធនាគារកណ្តាលវៀតណាមធ្លាប់បានបញ្ចុះថ្លៃប្រាក់ដុង៣លើករួចទៅហើយ៖
-លើកទី១នៅខែវិច្ឆិកាឆ្នាំ២០០៩។
-លើកទី២នៅខែកុម្ភៈឆ្នាំ២០១០។
-និងលើកទី៣នៅខែសីហាឆ្នាំ២០១០។
គោលបំណងនៃការបញ្ចុះថ្លៃប្រាក់ដុងដោយធនាគារកណ្តាលវៀតណាមនេះគឺធ្វើឡើងដើម្បីជួយកាត់បន្ថយឧនភាពជញ្ជីងពាណិជ្ជកម្ម ហើយនិងដើម្បីគាំទ្រនយោបាយរូបិយវត្ថុវៀតណាមឲ្យមានភាពសកម្មនិងមានភាពទន់ភ្លន់ជាងមុន។ នេះបើយោងតាមសេចក្តីប្រកាសរបស់ធនាគារកណ្តាលវៀតណាម។
គួរកត់សម្គាល់ថា អត្រាអតិផរណានៃប្រទេសវៀតណាមនៅខែមករាកន្លងទៅនេះកើនឡើង១២,៧%ក្នុង១ឆ្នាំ។ ចំណែកឯឧនភាពនៃជញ្ជីងពាណិជ្ជកម្មវិញមានដល់ទៅមួយពាន់លានដុល្លារអាមេរិកសម្រាប់ខែមករាឆ្នាំ២០១១។
ទោះបីជាសេដ្ឋកិច្ចវៀតណាមមានកំណើនខ្លាំងក្លាជាច្រើនឆ្នាំហើយក៏ដោយ ហើយនៅឆ្នាំ២០១០កន្លងទៅប្រទេសវៀតណាមមានកំណើនសេដ្ឋកិច្ច៦,៨% ក៏ប៉ុន្តែអ្នកជំនាញការអន្តរជាតិបានព្រមានថា កំណើនសេដ្ឋកិច្ចវៀតណាមអាចជួបនឹងឧបសគ្គបើប្រសិនជាអ្នកដឹកនាំវៀតណាមពុំធ្វើការប្រយុទ្ធប្រឆាំងនឹងបញ្ហាទំនិញឡើងថ្លៃហើយនិងបញ្ហាភាពទន់ខ្សោយនៃរូបិយវត្ថុរបស់ខ្លួនឲ្យមានប្រសិទ្ធភាពទេនោះ។
សូមបញ្ជាក់ថា ទីភ្នាក់ងារវិភាគសេដ្ឋកិច្ចនិងហិរញ្ញវត្ថុអន្តរជាតិឈ្មោះMoody’s និងStandard&Poor’sបាននាំគ្នាធ្វើការបញ្ចុះកំណត់ពិន្ទុទៅលើប្រទេសវៀតណាមកាលពីចុងឆ្នាំកន្លងទៅ។ ពួកអ្នកវិភាគខ្លាចក្រែងមានការដួលរលំនៃប្រព័ន្ធធនាគារវៀតណាមហើយនិងបារម្ភពីផលវិបាកដ៏ធ្ងន់ធ្ងរដែលកើតមានពីការក្ស័យធននៃក្រុមហ៊ុនរដ្ឋស្ថាបនានាវាVinashin ដែលបានខាងបង់អស់ប្រាក់៤ ៤០០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ