នាយករដ្ឋមន្ត្រីថ្មីនៃរដ្ឋាភិបាលនិរទេសទីបេជាអ្នកច្បាប់
លោក Lobsang Sangay អាយុ៤៣ឆ្នាំសាស្ត្រាចារ្យខាងច្បាប់នៃមហាវិទ្យាល័យអាមេរិក Harvard ទើបត្រូវបានគេបោះឆ្នោតជ្រើសរើសជានាយករដ្ឋមន្ត្រីនៃរដ្ឋាភិបាលនិរទេសទីបេ។ នាយករដ្ឋមន្ត្រីនឹងមានភារកិច្ចដ៏សែនពិបាកក្នុងការធានានូវ តួនាទីនយោបាយមួយដែលតំណាងដោយសម្តេចសង្ឃដាឡៃឡាម៉ាក្នុងអំឡុងពេល ជាច្រើនទសវត្សរ៍មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ប្រជាជនទីបេនិរទេស ក្នុងពិភពលោកចំនួនប្រមាណ៤ ម៉ឺន៩ពាន់នាក់ក្នុងចំណោមជនទីបេ៨ម៉ឹន៣៤០០នាក់ដែលមានសិទ្ធិបោះឆ្នោត បានជ្រើសរើសនៅថ្ងៃពុធ២៧មេសានេះលោក Lobsang Sangay បណ្ឌិតខាងច្បាប់អន្តរជាតិ និងឯកទេសខាងទីបេជានាយករដ្ឋមន្រ្តីថ្មីនៃរដ្ឋាភិបាលនិរទេសទីបេ ប្រមូលសំឡេងឆ្នោតគាំទ្រចំនួន ៥៥% ។
ការបោះឆ្នោតនេះ ត្រូវធ្វើឡើង ក្រោយពីសេចក្តីសំរេចចិត្តរបស់សម្តេចសង្ឃដាឡៃឡាម៉ាដែលមានព្រះជន្ម៧៥វស្សា ប្រកាសបោះបង់ចោលតួនាទីរបស់ព្រះអង្គជាមេដឹកនាំនយោបាយជាផ្លូវការ កាលពីថ្ងៃទី១០ មីនាកន្លងទៅនេះ។
លោក Tenzing Tethong ដែលជាអតីតអ្នកតំណាងរបស់ប្រមុខដឹកនាំពុទ្ធសាសនាទីបេ ដាឡៃឡាម៉ា នៅទីក្រុង New york និង Washingtonវិញ បានសំឡេងឆ្នោតគាំទ្រចំនួនតែ ៣៧,៤% ។ រីឯ បេក្ខជន ទី៣ គឺលោក Tashi Wangdi ដែលកាន់កាប់ តំណែងជាច្រើន នៅក្នុងរដ្ឋាភិបាលនិរទេសទីបេជាច្រើនឆ្នាំកន្លងមកនោះ បានសំឡេងឆ្នោតគាំទ្រ ចំនួន តែ ៦,៤% ។
កើតនៅ តំបន់ផលិត តែ នៅប៉ែកឦសានប្រទេសឥណ្ឌា លោក Sangay ពុំធ្លាប់រស់នៅតំបន់ទីបេនិងក៏ពុំធ្លាប់អញ្ជើញ ទៅកាន់តំបន់ទីបេ ដូច អ្នកដឹកនាំសាសនាទីបេជំនាន់មុនដែលក្តាប់បានជីវភាពនយោបាយតស៊ូរបស់ទីបេទេ។
ប៉ុន្តែ គេសង្ឃឹមថា ក្នុងអន្តរកាលនយោបាយ លោក នាយករដ្ឋមន្ត្រីជាប់ឆ្នោតថ្មីនឹងប្រមូលបានកិត្យានុភាពច្រើនជាងអ្នកដឹកនាំមុនៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ