អាមេរិកយល់ថាលោក Strauss-Kahnឋិតនៅក្នុងស្ថានភាពពុំអាចដឹកនាំFMIឡើយ
រដ្ឋមន្ត្រីក្រសួងហិរញ្ញវត្ថុអាមេរិកលោកTimothy Geithner បានថ្លែងឲ្យដឹងនៅថ្ងៃអង្គារម្សិលមិញនៅទីក្រុងញូវយ៉កថា លោកDominique Strauss-Kahnឋិតនៅក្នុងស្ថានភាពពុំអាចដឹកនាំមូលនិធិរូបិយវត្ថុ អន្តរជាតិFMIបានឡើយ។ សហរដ្ឋអាមេរិកគឺជាប្រទេសដែលបានផ្តល់មូលនិធិឲ្យFMIច្រើនជាងគេ។ FMIដែលបច្ចុប្បន្ននេះឋិតនៅក្រោមការដឹកនាំរបស់លោកJohn Lipsky ជនជាតិអាមេរិកាំងនិងជាភូឈួយទីមួយរបស់លោកDominique Strauss-Kahn។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
លោកTimothy Geithner រដ្ឋមន្ត្រីក្រសួងហិរញ្ញវត្ថុអាមេរិក បានថ្លែងឲ្យដឹងនៅថ្ងៃអង្គារម្សិលមិញនៅទីក្រុងញូវយ៉កថា លោកDominique Strauss-Kahnអគ្គនាយកនៃមូលនិធិរូបិយវត្ថុអន្តរជាតិFMIឋិតនៅក្នុងស្ថានភាពមួយដែលធ្វើឲ្យលោកពុំអាចដឹកនាំ FMI បានឡើយ។ លោកDominique Strauss-Kahnដែលកំពុងជាប់ឃុំក្នុងពន្ធនាគារនៅទីក្រុងញូវយ៉កបន្ទាប់ពីជាប់ចោទពីបទបានធ្វើការរំលោភសេពសន្ថវៈ។
មូលនិធិរូបិយវត្ថុអន្តរជាតិFMIឋិតនៅក្នុងសភាពការណ៍មួយដែលខ្លួនពុំដែលបានជួបប្រទះ។ ជាពិសេស នៅខណៈពេលដែលអគ្គនាយករបស់ខ្លួនពោលគឺ លោកDominique Strauss-Kahnដែលកំពុងជាប់ឃុំក្នុងពន្ធនាគារនៅទីក្រុងញូវយ៉ក ពុំបានសម្ដែងឲ្យដឹងថា តើលោកនឹងសុំលាចាកចេញពីមុខតំណែងអគ្គនាយកឬយ៉ាងណាឡើយ?
បច្ចុប្បន្ននេះ មូលនិធិរូបិយវត្ថុអន្តរជាតិFMIអាចមានដំណើរការទោះបីជាគ្មានវត្តមានរបស់លោកDominique Strauss-Kahnក៏ដោយ។ ស្ថាប័នហិរញ្ញវត្ថុFMI ដ៏ល្បីឈ្មោះនៅទីក្រុងវ៉ាស៊ីនតោនមួយនេះកំពុងឋិតនៅក្រោមការដឹកនាំរបស់លោកJohn Lipskyដែលជាភូឈួយទីមួយរបស់លោកDominique Strauss-Kahn។
ប្រទេសជប៉ុនឯណោះវិញ តាមរយៈអ្នកនាំពាក្យរបស់រដ្ឋាភិបាលលោកYukio Edano បានថ្លែងឲ្យដឹងថា “ពេលវេលាសម្រាប់ពិភាក្សាអំពីការស្វែងរកអ្នកឡើងមកជំនួសលោកDominique Strauss-Kahnពុំទាន់ឈានមកដល់ទេ”។ សូមបញ្ជាក់ថា ប្រទេសជប៉ុនគឺជាប្រទេសសំខាន់ទីពីរបន្ទាប់ពីសហរដ្ឋអាមេរិកក្នុងការផ្តល់មូលនិធិឲ្យFMI៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ