អាមេរិក-បារាំង

ប៉ូលិសអាមេរិកចាប់ឃុំខ្លួនអគ្គនាយក FMI ពីបទប៉ុនប៉ងរំលោភសេពសន្ថវៈ

លោកដូមីនិក ស្រ្តូសកាន់ (Dominique Strauss-Kahn) អគ្គនាយកមូលនិធិរូបិយវត្ថុអន្តរជាតិ (ហៅកាត់តាមភាសាបារាំង FMI) ត្រូវបានប៉ូលិសក្រុងញូវយ៉កចាប់ឃុំខ្លួន កាលពីល្ងាចថ្ងៃសៅរ៍ ក្នុងបទសង្ស័យថាបានប៉ុនប៉ងរំលោភស្រ្តីបម្រើសណ្ឋាគារម្នាក់ នៅញូវយ៉ក។ នៅព្រឹកថ្ងៃអាទិត្យនេះ រដ្ឋអាជ្ញាក្រុងញូវយ៉កបានធ្វើការចោទប្រកាន់លោកស្ត្រូសកាន់ជាផ្លូវការ ហើយបញ្ជូនសំណុំរឿងទៅឲ្យតុលាការ ដើម្បីជំនុំជម្រះ។

ចុះផ្សាយនៅថ្ងៃ៖ 15/05/2011 - 14:40កែប្រែថ្ងៃទី៖ 15/05/2011 - 15:11

ដោយ៖ សេង ឌីណា

ផ្សាយពាណិជ្ជកម្ម

យោងតាមមន្រ្តីប៉ូលិសក្រុងញូវយ៉ក នៅល្ងាចថ្ងៃសៅរ៍ (ម៉ោងនៅញូវយ៉ក) លោកដូមីនិក ស្រ្តូសកាន់ (ជនជាតិបារាំងជាទូទៅ ច្រើនតែហៅកាត់ដោយខ្លីថា DSK) ត្រូវបានប៉ូលិសចាប់ខ្លួនពីលើយន្តហោះរបស់ក្រុមហ៊ុន Air France ជើងហោះហើរញូវយ៉ក-ប៉ារីស ។ លោកអគ្គនាយក FMI ត្រូវបានប៉ូលិសសួរចម្លើយ និងឃុំខ្លួន នៅក្នុងទីស្នាក់ការប៉ូលិសជំនាញខាងបទល្មើសផ្លូវភេទ។

ការចាប់ខ្លួនលោក DSK ដែលមានអាយុ ៦២ឆ្នាំ ត្រូវបានធ្វើឡើងទៅតាមពាក្យបណ្តឹងរបស់ស្រ្តីបម្រើម្នាក់ នៃសណ្ឋាគារ Sofitel New York ដែលលោក DSK បានស្នាក់នៅតាំងពីថ្ងៃសុក្រ។ ស្រ្តីបម្រើរូបនេះបានប្រាប់ប៉ូលិសញូវយ៉កថា នៅម៉ោងប្រមាណ ១រសៀល គាត់បានចូលទៅក្នុងបន្ទប់របស់លោក DSK ។ លោក DSK បានចេញពីបន្ទប់ទឹកទាំងស្រាតននល ហើយក៏បានស្ទុះមកចាប់ស្រ្តីបម្រើ ដែលមានអាយុ ៣២ឆ្នាំ ឡើងលើគ្រែ បម្រុងនឹងរំលោភ ក៏ប៉ុន្តែ ស្រ្តីរូបនេះបានរើខ្លួនរួច ហើយរត់ទៅប្រាប់បុគ្គលិកសណ្ឋាគារផ្សេងទៀតឲ្យប្តឹងប៉ូលិស។

នៅពេលទៅដល់បន្ទប់សណ្ឋាគារ ប៉ូលិសមិនបានឃើញលោក DSK នោះទេ គឺឃើញតែទូរស័ព្ទដៃ និងរបស់របរប្រើប្រាស់មួយចំនួនរបស់គាត់។ បន្ទាប់មកប៉ូលិសក៏បានដឹងថា លោក DSK កំពុងតែស្ថិតនៅលើយន្តហោះ ឆ្ពោះទៅកាន់ទីក្រុងប៉ារីស។ ប៉ូលិសប្រចាំព្រលានយន្តហោះ JFK ក្រុងញូវយ៉ក ក៏បានឃាត់យន្តហោះមិនឲ្យចេញដំណើរ ហើយឡើងទៅចាប់ខ្លួនលោក DSK ចេញពីលើយន្តហោះ។

មន្រ្តីប៉ូលិសញូវយ៉កបានសន្និដ្ឋានថា លោក DSK ទំនងជាចង់រត់គេចខ្លួនពីសហរដ្ឋអាមេរិក។ ក៏ប៉ុន្តែ យោងតាមកម្មវិធីរបស់ FMI លោក DSK មានគម្រោងត្រូវជួបជាមួយលោកស្រីប្រមុខរដ្ឋាភិបាលអាល្លឺម៉ង់ នៅរសៀលថ្ងៃអាទិត្យនេះ នៅទីក្រុងប៊ែរឡាំង។ ដូច្នេះ ការប៉ុនប៉ងធ្វើដំណើរតាមយន្តហោះ ចាកចេញពីអាមេរិក អាចជារឿងធម្មតា មិនមែនជាការរត់គេចខ្លួននោះទេ។ ទោះជាយ៉ាងណាក៏ដោយ ការណ៍ដែលប៉ូលិសបានរកឃើញទូរស័ព្ទដៃរបស់លោក DSK នៅក្នុងបន្ទប់សណ្ឋាគារ អាចឲ្យគេសន្និដ្ឋានថា លោកអគ្គនាយក FMI ទំនងជាបានចាកចេញពីសណ្ឋាគារដោយប្រញាប់ប្រញាល់បំផុត រហូតដល់ភ្លេចទូរស័ព្ទដៃ។

នៅព្រឹកថ្ងៃអាទិត្យនេះ រដ្ឋអាជ្ញាក្រុងញូវយ៉កបានធ្វើការចោទប្រកាន់រូបលោក DSK ក្នុងបទល្មើសចំនួនបី៖ ការបំពារបំពានផ្លូវភេទ ការប៉ុនប៉ងរំលោភសេពសន្ថវៈ និងការឃុំខ្លួនមនុស្សដោយខុសច្បាប់។

នៅថ្ងៃអាទិត្យនេះ ដំណឹងស្តីពីការចាប់ខ្លួនលោក DSK បានធ្វើឲ្យកក្រើកឆាកនយោបាយបារាំង។ លោក DSK គឺជាអ្នកនយោបាយក្នុងគណបក្សសង្គមនិយម ដែលជាគណបក្សប្រឆាំង។ នៅក្នុងរាល់ការស្ទាបស្ទង់មតិកន្លងមក លោក DSK គឺជាអ្នកនយោបាយ ដែលមានប្រជាប្រិយភាពខ្ពស់ជាងគេបំផុត ដែលអាចប្រជែងយកតំណែងប្រធានាធិបតីបារាំង ក្នុងការបោះឆ្នោត នៅឆ្នាំ២០១២ខាងមុខ។ នៅពេលនេះ លទ្ធភាពដែលលោក DSK ឈរឈ្មោះជាបេក្ខជនប្រធានាធិបតីបារាំង ទំនងជាធ្លាក់ដល់កម្រិតសូន្យហើយ។

ការចាប់ខ្លួនអគ្គនាយក FMI នៅពេលនេះ ក៏ទំនងជានឹងធ្វើឲ្យប៉ះពាល់ដល់ការដោះស្រាយវិបត្តិហិរញ្ញវត្ថុនៅក្នុងតំបន់អឺរ៉ូដែរ។ នៅពេលនេះ FMI កំពុងតែពិចារណាអំពីផែនការផ្តល់ជំនួយបន្ថែមដល់ប្រទេសក្រិក ដើម្បីស្រោចស្រង់រដ្ឋាភិបាលឲ្យចេញពីវិបត្តិ។ ប្រទេសព័រទុយហ្កាល់ក៏កំពុងតែជំពាក់បំណុលគេវ័ណ្ឌ ក ហើយអាចនឹងត្រូវការជំនួយពី FMI ដែរ។ គេអាចនឹងចាប់ផ្តើមមើលឃើញថា តើការចាប់ខ្លួនលោក DSK មានផលប៉ះពាល់ប៉ុណ្ណា ក្នុងវិស័យហិរញ្ញវត្ថុ នៅពេលដែលទីផ្សារមូលបត្រចាប់ផ្តើមបើកទ្វារលក់ដូរឡើងវិញ នៅថ្ងៃចន្ទស្អែក៕