លោកនាយករដ្ឋមន្ត្រីជប៉ុន ណាអូតូ កាន បានប្រកាសលាឈប់ពីមុខតំណែង
លោកនាយករដ្ឋមន្ត្រីជប៉ុន ណាអូតូ កាន បានប្រកាសលាឈប់ពីមុខតំណែងជាប្រធាននៃបក្សប្រជាធិបតេយ្យជប៉ុន PDJ នៅថ្ងៃសុក្រទី២៦សីហាឆ្នាំ២០១១នេះ ហើយលោកនឹងចាកចេញពីរដ្ឋាភិបាលជប៉ុននៅសប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
នៅមុខសមាជិកសភានៃបក្សប្រជាធិបតេយ្យជប៉ុន PDJ នៅថ្ងៃសុក្រទី២៦សីហាឆ្នាំ២០១១នេះ លោកនាយករដ្ឋមន្ត្រីជប៉ុន ណាអូតូ កាន បានប្រកាសថា “ថ្ងៃនេះខ្ញុំលាឈប់ពីមុខតំណែងជាប្រធានបក្សប្រជាធិបតេយ្យជប៉ុន ហើយក្រោយពីប្រធានបក្សបានត្រូវគេបោះឆ្នោតជ្រើសតាំងរួចមក ខ្ញុំនឹងលាចាកចេញពីមុខតំណែងជានាយករដ្ឋមន្ត្រី។ សមាជិករដ្ឋាភិបាលទាំងអស់ក៏នឹងលាឈប់ទាំងអស់គ្នាតែម្តង។”
ចំណែកឯលោក Katsuya Okada អគ្គលេខាធិការនៃបក្សប្រជាធិបតេយ្យជប៉ុនក៏បានថ្លែងប្រាប់ថា អ្នកដែលត្រូវឡើងមកទទួលតំណែងជាប្រធានបក្សប្រជាធិបតេយ្យជប៉ុនជំនួសលោក ណាអូតូ កាន នឹងត្រូវគេបោះឆ្នោតជ្រើសតាំងនៅព្រឹកថ្ងៃចន្ទខាងមុខនេះ។ ហើយបន្ទាប់មកប្រធានបក្សដែលមានសមាជិកសភាច្រើនជាងគេនឹងត្រូវគេតែងតាំងជានាយករដ្ឋមន្ត្រីជប៉ុន។
គួរបញ្ជាក់ថា លោក ណាអូតូ កាន មានអាយុ៦៤ឆ្នាំ ជានាយករដ្ឋមន្ត្រីជប៉ុនទីប្រាំក្នុងរយៈកាល៥ឆ្នាំចុងក្រោយនេះ។ លោកបានត្រូវគេតែងតាំងជានាយករដ្ឋមន្ត្រីនៅខែមិថុនាឆ្នាំ២០១០កន្លងទៅ។ ក៏ប៉ុន្តែ នៅទីបំផុត លោក ណាអូតូ កានត្រូវលាឈប់ពីមុខតំណែង ដោយហេតុតែមានការវាយប្រហារយ៉ាងខ្លាំងក្លាពីសំណាក់បក្សអភិរក្សនិយមដែលជាបក្សប្រឆាំង ហើយនិងពីសំណាក់បក្សប្រជាធិបតេយ្យជប៉ុនខ្លួនឯងផងទៀត ពីព្រោះគេយល់ថា លោក ណាអូតូ កាន គ្មានអភិបាលកិច្ចគ្រប់គ្រាន់និងពុំបានរិះរកដំណោះស្រាយឲ្យបានល្អត្រឹមត្រូវក្នុងវិបត្តិគ្រោះមហន្តរាយស៊ូណាមីនិងរញ្ជួយដីហើយនិងគ្រោះថ្នាក់នុយក្លេអ៊ែរនៅហ្វូគូស្ហ៊ីម៉ាកាលពីខែមីនាកន្លងទៅ។
ក្នុងចំណោមបេក្ខជនដែលអាចមានភ័ព្វវាសនានឹងឡើងមកតស្នងតំណែងពីលោក ណាអូតូ កាន គេកត់សម្គាល់ឃើញមានលោកអតីតរដ្ឋមន្ត្រីក្រសួងការបរទេស Seiji Maehara អាយុ៤៩ឆ្នាំដែលមានប្រជាប្រិយភាពជាងគេ។ នេះបើយោងតាមការស្ទាបស្ទង់មតិនៅពេលថ្មីៗនេះ។ បន្ទាប់មកគឺលោក Yoshihiko Noda បច្ចុប្បន្នរដ្ឋមន្ត្រីក្រសួងហិរញ្ញវត្ថុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ